Te Kyaqꞌumbꞌen Kye Tkyꞌixel Jesus
1
Aj Okaj Tqꞌumaꞌ Jesus Kyukyꞌi Kye Txnaqꞌatz Aj Chꞌinky Tuq Txik Tuj Kaꞌj
1 Wetz tuj te tbꞌay uꞌj aj oqet ntzꞌibꞌaꞌ te yatz, tat Teófilo,* oqet ntzꞌibꞌaꞌ tiꞌj te Jesus, tiꞌj kyaqil aj nqet tuq tkꞌuluꞌ qxol, bꞌix kyaqil aj nxik tuq txnaqꞌtzaꞌ, 2 max aj txik in junkyꞌel tuj kaꞌj. Aj minaꞌ tuq txik in tuj kaꞌj, tetz oxik tyoliꞌ kye tkyꞌixel aj ojetq tuq kyeꞌel tjoyoꞌ; oxik tkꞌuluꞌ mandad kyetz tzan kykꞌulun te aj nyolin tuq te Txew Dios. 3 Bꞌix kywitz kyetz opon tyekꞌuꞌtz tibꞌ bꞌix tidiꞌchq oqet tkꞌuluꞌ kxol tzan tel kynikyꞌ bꞌanꞌax ojetq tuq jaw anqꞌin, bꞌix oqeten kawnaq (40) qꞌij kxol bꞌix exik txnaqꞌtzaꞌ titzaꞌ tzan qbꞌet oj jkaj tuj tqꞌabꞌ Qtata Dios.
4 Aj man tuq atqet kxol, oxik tqꞌumaꞌ kyetz tzan kꞌon tuq kyex tzi Jerusalen, exik tkawiꞌ ikxjani: “Peꞌetiyon waq max oj tponkix te aj oxik tsiꞌ te Ntat tyol tiꞌj, axkix aj oje tzꞌok echaꞌoꞌ wukyꞌiꞌl.* 5 Te Waꞌnch njaw tuq tsiꞌ aꞌ ewiꞌ cha aꞌox tukyꞌi aꞌ, per ajnaꞌl cha kabꞌe qꞌijky tzan stzaj te Txew Dios etajsik.”*
Aj Txik Te Jesus Tuj Kaꞌj
6 Ntons kye aj akyeqet tuq tukyꞌi Jesus oxik kchaꞌoꞌ tetz ikxjani: “Tat, ¿akꞌuluꞌtz ajnaꞌl tzan kykꞌulun mandad kye qxjalil tuj qamaqꞌx Israel?”
7 Yaji te Jesus owaj stzaqꞌbꞌeꞌ kyetz ikxjani: “Etetz kꞌontiꞌl etoklen tzan tok echaꞌoꞌ janikꞌbꞌaꞌn kyꞌik nini; aꞌox te Qtat [tebꞌen tzan tpaj] a tetz oje qet tbꞌisuꞌ tukyꞌi tajwalil tujbꞌaꞌn kyꞌik. 8 Per oj tul te Txew Dios etajsik, etetz ekꞌamoꞌtz jun etajwalil bꞌix okxpakbꞌayon wiꞌj, tbꞌay tuj Jerusalen, yaji tuj tkwentil Judey bꞌix Samary, bꞌix yaji tuj kyaqil twitz txꞌoꞌtxꞌ bꞌan laqꞌchik.”*
9 Ya ma xik tqꞌumaꞌ tiꞌj kyaqil ntzani bꞌix atxik tuq kywitz tiꞌj, tetz ojax in tuj kaꞌj bꞌix jun muj owok tiꞌj, ya kꞌontiꞌl oxik kyeꞌeꞌ.* 10 Aj man tuq nxik kyen titzaꞌ tuq ikjaꞌn tjax in tuj kaꞌj, ejaw kanet kabꞌeꞌ xjal kykꞌatzaj, atok jun kyqꞌanaq saq. 11 Bꞌix kye xjal oxik kyqꞌumaꞌ kyetz ikxjani: “Etetz aj Galiley aꞌix, ¿tistil nkxkaj kꞌabꞌlet twitz kaꞌj? Te ja Jesus aj maꞌtx jaw eqꞌiꞌ exol, tetz owulel junkyꞌel, bꞌix tzul iktzaꞌxkix maꞌtx xik eten xtxik tuj kaꞌj, ax ikxji tzul junkyꞌel.”
12 Ntons yaji ebꞌajꞌajtz txini twiꞌ te witz Olib, bꞌix ebꞌajpon Jerusalen. Komo te witz Olib nyaꞌtx tuq laqꞌchik nkaj tiꞌj Jerusalen; te tbꞌeyil cha aꞌox aj bꞌaꞌnkix tzan txik kybꞌeteꞌ tuj jun qꞌij ojlaꞌmj [iktzaꞌx nyolin tuj te Kawbꞌil tiꞌj kyrelijyon]. 13 Ya ma kyepon tuj te jay aj jaꞌ tuq atok kyposad tuj te amaqꞌ, ebꞌajjax tuj tmankbꞌil txol te jay, aꞌeꞌ tuq te Xhpeꞌy bꞌix Waꞌnch, Chaw, Lexh, Lip, Maxh, Xhtoꞌl, Matey, Jacoboa aj tkꞌajol Alfey, bꞌix Simon “Selot”b bꞌix Juds aj tkꞌajolc Jacobo.d 14 Kkyaqil kyetz kꞌontiꞌl tuq nkaj ksiꞌ tzan tok kchimoꞌ kyibꞌ tzan kxnaqꞌtzan junx, bꞌix nꞌok tuq kchimoꞌ kyibꞌ kyukyꞌiꞌl txqꞌan xuj bꞌix te Liy aj tnan Jesus bꞌix kye aꞌeꞌ titzꞌin Jesus.
Aj Tel Joyoꞌ Junky Xjal Tzan Tkaj Tkyꞌixel Juds Kxol Kye Tkyꞌixel Jesus
15 Tuj aj tyempji te Xhpeꞌy ojaw waꞌlet kxol kye erman aj nꞌok tuq kchimoꞌ kyibꞌ, kyetz tzan kkyaqil jun oqal tukyꞌi winqiꞌ (120) xjal tuq kybꞌet, bꞌix oxik tqꞌumaꞌ ikxjani: 16 “Erman, presiskix tuq tzan tpon iktzaꞌx tzꞌibꞌankaj tuj Tuꞌjal Dios. Komo te Txew Dios otqꞌumaj tukyꞌi Dawid tiꞌj te Juds aj oxik eqꞌin kye aj ejaw tzyun te Jesus. 17 Te Juds jun qukyꞌiꞌl tuq, bꞌix nꞌaqꞌunan tuq iktzaꞌx qetza nqokꞌulun.”
18 (Yaji oqet tloqꞌoꞌ jun txꞌoꞌtxꞌ tukyꞌi te tmin aj otzaj siꞌ twiꞌ tkꞌuꞌj txiklen tqꞌapoꞌ te Qajaw, per yaji, tzi otzaj tzꞌaqik qetl twiꞌ bꞌix owetz kyaqil tuj tkꞌuꞌj. 19 Kyaqil xjal tuj Jerusalen owok kchaꞌoꞌ nini; astilji owok ksiꞌ tbꞌi te luwar Acéldama, aj telponx tuj kyyol kyetz “Te Txꞌoꞌtxꞌ Aj Jaꞌ Owel Kyikꞌ.”* 20 Komo tuj te uꞌj Kye Salmo nyolin ikxjani: “Te tjay intok bꞌan takun bꞌix nijunwt intnajan tzi.”* Bꞌix ax nyolin ikxjani: “Intkaj junky tkyꞌixel tuj taqꞌun.”)*
21 “Astilji a tgan [tzan tqet qjoyoꞌ] junky qerman [te tkyꞌixel], jun aj ajun tuq qukyꞌila kyaqil tyemp aj oqeten te Qajaw Jesukrist qxol, 22 atx aj tjaw siꞌ aꞌ twiꞌ tzan Waꞌnch* max aj txik in tuj kaꞌj.* Jun te kyetz bꞌaꞌn tzan tok te jun qukyꞌila tzan txik tpakbꞌaꞌ junx qukyꞌiꞌl, te Jesus ojaw anqꞌin.”
23 Ntons oqet kybꞌisuꞌ tzan kykaj ksiꞌ kabꞌeꞌ aber abꞌl tuq jun te kyetz okajel, te Matiys qatzun Chepji, aj Chep aj nꞌok qꞌumaꞌ tuq Barsabas bꞌix ax tuq nꞌok qꞌumaꞌ tbꞌi Justo. 24 Yaji exnaqꞌtzan kyiꞌj ikxjani: “Tat, yatz nꞌel anikyꞌ kyiꞌj kyanim kyaqil xjal. Instzaj ayekꞌuꞌ chꞌin qetza abꞌl jun te kykabꞌilni oje tzꞌel ajoyoꞌ yatz 25 tzan tkꞌamon tajwalil tzan taqꞌunan junx qukyꞌila tuj awaqꞌun tzan tok jun akyꞌixel tzan tpaj te Juds okaj tkolaꞌ te ntzani tzan txik tuj te luwar aj tetxkkix tuq iktzaꞌx tkajlen siꞌ.”
26 Ntons yaji oqet kykꞌuluꞌ loteriy aber abꞌl tuq jun te kyetz okambꞌayon. Dech okambꞌan te Matiys; yaji tetz okꞌamet kxol kye kyjunlajujil iktzaꞌxkix jun tkyꞌixel Jesus.