2
Aj Stzaj Te Txew Dios Kyajsik Kye Qerman
1 Aj tkanon te ninqꞌij aj tbꞌi Pentecostés,* kkyaqil kye erman ojetq tuq tzꞌok kchimoꞌ kyibꞌ tuj jun luwar. 2 Yaji, tanderepent oje trenun ikjaꞌn stzaj tuq twitz kaꞌj naqe jun kyaqꞌiqꞌ bꞌan jwert, oje trenun tuj te jay aj jaꞌ tuq witꞌlikeꞌ kyetz. 3 Bꞌix oxik kyen kyajsikchaq te junjun kyetz jun tidiꞌ naqe jun toq qꞌaqꞌ aj nkaj tuq kyajsik, 4 bꞌix kkyaqil kyetz onoj te Txew Dios tuj kyanim, bꞌix eꞌaqꞌik tzan kyyolin tuj txqꞌanky yol tzan tpaj te Txew Dios nxik tsiꞌ tuq kyyol tzan kyyolin.
5 Ntons, tuj aj qꞌijji ateqet tuq Jerusalen bꞌan kyꞌilaꞌj aj tijajil Israel tzajnaqeꞌ jaꞌchq tuj junjun amaqꞌ, kyetz xjal aj bꞌan xjaniꞌ tuq Qtata Dios kyitzaꞌ. 6 Kyetz owok kchimoꞌ kyibꞌ txiklen kchaꞌoꞌ te aj bꞌan ntrenun tuq bꞌix kꞌontiꞌl owel kynikyꞌ tidiꞌ tuq nkyꞌik. Komo nꞌok kchaꞌoꞌ tuq kye erman nkyeyolin tuq tuj kyyolx kyetz aj jaꞌ tzajnaqeꞌ.
7 Kyetz ojetq tuq kyetzajbꞌaj bꞌix bꞌan nkyelabꞌan tuq, nxik tuq kyqꞌumaꞌ ikxjani: “¿Tiꞌtzun? ¿Nyaꞌtx petzun kkyaqil kyetz aꞌeꞌ aj Galiley kye aj nkyeyolinni? 8 ¿Titzaꞌ kyetz nkyeyolin tuj qyol qetz aj qitzꞌjlenx? 9 Qxol qetz ateꞌ xjal aj Parts bꞌix aj Meds bꞌix aꞌeꞌ aj Elam bꞌix kye aj nkyenajan max Mesopotamy, bꞌix aj Judey bꞌix ax ateꞌ aj Kapadosy bꞌix aj Pont bꞌix max Asy, 10 ax ateꞌ aj tzajnaqeꞌ tuq Prijy bꞌix Panfily bꞌix max Ejipt, bꞌix tkwentil Liby aj mas laqꞌchik twitz te amaqꞌ Siren, bꞌix kye aj tzajnaqeꞌ Rom aj nkyenajan tzani, bꞌix kxol kyetz, ax kye aj tijajil Israel bꞌix txqꞌanky aj nkyeꞌokslan iktzaꞌ kye aj tijajil Israel, 11 bꞌix aj tzajnaqeꞌ tuq Kret bꞌix Araby. Qkyaqil qetz nkyeꞌok qchaꞌoꞌ nkyeyolin tuj qyolx tiꞌj tidiꞌchq tkꞌulbꞌen Qtata Dios tukyꞌi nim tajwalil.” 12 Kyaqil ojetq tuq kyetzajbꞌaj bꞌix kꞌontiꞌl tuq nꞌel kynikyꞌ tiꞌj tidiꞌ nkyꞌik. Nkyechaꞌon tuq kyibꞌkyibꞌx ikxjani: “¿Tidiꞌ telponx kyaqil ntzani?” 13 Per ateꞌ tuq junjun cha tuq nkyexmayin kyiꞌj, nxik tuq kyyoliꞌ ikxjani: “Kye ninijeꞌ cha maꞌtx choꞌon kywiꞌ.”
Aj Tyolin Te Xhpeꞌy Tistil Otzaj Te Txew Dios Kyajsik
14 Ntons te Xhpeꞌy kyukyꞌi kye kyjunlajujilky tkyꞌixel Jesus ebꞌajjaw waꞌlet kxol bꞌix tetz owaqꞌik tzan tyolin ikxjani kongan [tzan kchaꞌon kye xjal]: “Etetz aj tijajil Israel, bꞌix ekyaqil etetz aj nkxnajan tzani Jerusalen, instzaj echaꞌoꞌ ntzani bꞌix intok esiꞌ ewiꞌ tiꞌj aj oxeꞌl nqꞌumaꞌ etetzni. 15 Kye ja xjal ntzanijeꞌ nyaꞌtx bol-eꞌ iktzaꞌ etetz nꞌeqꞌumaꞌni, komo man qꞌeqoꞌ atoꞌ, te toxiꞌ or te qꞌeqoꞌ. 16 Te aj nkyꞌik tzani, cha maꞌtx ponkix tyol te Joel aj yolil tyol Dios oqtxiꞌ, aj txik tqꞌumaꞌ tyol 17 Qtata Dios ikxjani: “Minaꞌ stzaj te jwisy, wetz oxeꞌl nsiꞌ te Nxew kyajsik kye xjal jaꞌchq, bꞌix kye ekꞌwaꞌal ichan bꞌix xuj okyeyoliyon aj oxeꞌl nqꞌumaꞌ kyetz, kye aj man kuꞌxon owokel jotoꞌ tidiꞌchq tuj kywitz, bꞌix kye tij okyewitzkꞌayon [tidiꞌchq aj oxeꞌl nyekꞌuꞌ kyetz] tuj kywitzikꞌ. 18 Kyajsik kye ichan bꞌix kye xuj aj nkyeꞌokslan te wetz, wetz oxeꞌl nsiꞌ Nxew kyajsik bꞌix okyeyoliyon aj oxeꞌl nqꞌumaꞌ kyetz. 19 Bꞌix oqtel nkꞌuluꞌ twitz kaꞌj tidiꞌchq aj bꞌan okyelabꞌayon kyaqil xjal tiꞌj bꞌix tidiꞌchq bꞌan chuktky twitz txꞌoꞌtxꞌ, owokel eꞌelet twitz kyikꞌ, qꞌaqꞌ bꞌix sibꞌ. 20 Aj minaꞌ tuq tkyꞌik te qꞌij aj owokel kyen kyaqil xjal chaꞌoj wul wetz, ntons tbꞌay te qꞌij owokel bꞌan qlolj twitz, bꞌix te qyaꞌ owokel bꞌan kyikꞌ twitz. 21 Bꞌix kyaqil kye xjal aj oqtel kywitz nwitz wetz aj kyajawil aꞌin, kyetz okyekoletel.”*
22 Ntons etetz aj tijajil Israel, instzaj echaꞌoꞌ ja nyolni: Etetz etebꞌen, te Jesus aj Nasaret jun xjal aj nqet tuq tuj twitz Qtata Dios. Komo oje tzꞌok eten tetz bꞌaꞌn tuq tzan tkꞌulun tidiꞌchq tukyꞌi nim tajwalil, tetz oqet tkꞌuluꞌ tidiꞌchq aj nqolabꞌan tiꞌj bꞌix tidiꞌchq yekꞌbꞌil aj telponx aꞌox Dios bꞌaꞌn tzan tkꞌulun tetz. 23 Per aj txik qꞌapoꞌ tuj eqꞌabꞌ etetz iktzaꞌx ojetq tuq qet tbꞌisuꞌ te Qtata Dios, etetz kꞌontiꞌl oxik etzoqpiꞌ. Oxik eqꞌapoꞌ tuj kyqꞌabꞌ xjal aj kꞌontiꞌl Dios tuj kywitz tzan tok kyklabiꞌ twitz krus bꞌix ikxji etetz oqet ekansaꞌ.* 24 Per te Qtata Dios otkꞌuluj tzan tjaw anqꞌin.* Ikxji tetz okolpjik tiꞌj te xhchoꞌnal aj owok ten aj tkamik, komo tzan tpaj nlay tuq bꞌantik tzan tkajkix tuj tqꞌabꞌ te kamikyj bꞌeyx te jun-eleꞌx. 25 Te Dawid nyolin tuq ikxjani tiꞌj te Jesus: “Wetz nxikkix tuq wen te Qajawil nwitz wetz, bꞌix komo tetz atqet wukyꞌiꞌl [kolol te wetz], kꞌontiꞌl nkyinxobꞌ. 26 Astilji wetz wanim bꞌan nchalaj, bꞌix wetz tukyꞌi ntziꞌ nkyinbꞌitzan tukyꞌi jun chalajbꞌil, bꞌix wetz tukyꞌi kyaqil nchiꞌjel okyinꞌojlayon tzan tpaj tukyꞌi jun tkꞌuꞌjlal loꞌik nkꞌuꞌj [tiꞌj Qtata Dios]. 27 Yatz nlay kaj akolaꞌ wanim kxol kye kamnaq, bꞌix nlay atzoqpij tzan tponaj xhchiꞌjel te aj oje tzꞌel apawaꞌ aꞌox te yatz. 28 Otzaj ayekꞌuꞌ wetz tumeꞌl titzaꞌ tzan wanqꞌin, bꞌix tzan tpaj yatz atichqet wukyꞌiꞌl, wetz bꞌan nkyinchalaj.”*
29 Ntons waq erman, oxeꞌl nqꞌumaꞌ etetz tukyꞌi jun tkꞌuꞌjlal, te qijajil Dawid tetz okamik bꞌix oqex muquꞌ, bꞌix qetz qebꞌen jaꞌ oqex muquꞌ. 30 Komo tetz jun aj yolil tyol Dios tuq, tetz tebꞌen tuq te Qtat ojetq tuq xik tsiꞌ tyol maꞌkix tuq kaj tsiꞌ te kꞌulul mandad jun aj tijajil tetz tzan tqet witꞌlet tuj twitꞌlel.* 31 Ikxji te Dawid owel tnikyꞌ tiꞌj te aj okyꞌel tuq mas yaj, tetz otqꞌumaj ojawel anqꞌinkix tuq te Krist, [te Koloyon aj Qꞌumankaj Oqtxiꞌ]. Komo otqꞌumaj nlay tuq kaj kolaꞌ kxol kye kamnaq bꞌix te xhchiꞌjel nlay tuq ponaj.*
32 Ajnaꞌl te Qtata Dios maꞌtxkix jaw anqꞌin te Jesus titzaꞌ, bꞌix qkyaqil qetz owok qen. 33 Te Jesus oxik eqꞌiꞌ tzan txik witꞌletel tuj tbꞌanqꞌabꞌ te Qtata Dios tzan tqet jiqꞌbꞌaꞌ tzi, bꞌix te Qtata Dios, ikxtzaꞌx ojetq tuq xik tsiꞌ tyol tiꞌj, tetz oxik tsiꞌ te Txewx [te Jesus] tzan stzaj tsiꞌ te qetza iktzaꞌx nꞌok eten bꞌix nꞌok echaꞌoꞌni. 34 Komo te Dawid kꞌontiꞌl ojax tuj kaꞌj sinoke axk tetz otqꞌumaj ikxjani: “Te Qajawil oxik tqꞌumaꞌ Wajawil, ‘Paqet witꞌlet tuj nmanqꞌabꞌ 35 man nkyinkꞌulun tzan kyqet kye awajqꞌoj tjaqꞌ awoq.’ ”a 36 Ekyaqil etetz aj tijajil Israel, a tgan tzan tok echaꞌoꞌ te bꞌan bꞌanꞌax, te Jesus aj owok eklabiꞌ twitz krus, te Qtata Dios otkꞌuluj tzan tok tetz Tajawil kyaqil bꞌix tzan tok te Koloyon aj Qꞌumankaj Oqtxiꞌ.”
37 Ntons ya ma tzꞌok kchaꞌoꞌ kye aj akyeqet tuq tzi, kyetz oje kyebꞌisun. Oxik kchaꞌoꞌ tukyꞌi Xhpeꞌy bꞌix kye txqꞌanky tkyꞌixel Jesus ikxjani: “Erman, ¿tidiꞌ presis tzan jkꞌuluna ajnaꞌl?” 38 Yaji te Xhpeꞌy oxik tyoliꞌ kyetz ikxjani: “Intjaw ekyꞌixpuꞌ enabꞌlin bꞌix intjaw siꞌ aꞌ ewiꞌ tukyꞌi tbꞌi Jesukrist tzan tqet tnajsaꞌ tetz echoj; yaji tetz otzajel tsiꞌ te Txew Dios tuj etanim. 39 Tiꞌj te ntzani, te Qtata Dios oje xik tsiꞌ tyol te etetz bꞌix kye ekꞌwaꞌal bꞌix kye kyaqil aj laqꞌchik ateꞌ, kyaqil aꞌeꞌ aj okyetzajel ukꞌleꞌ tzan te Qtata Dios aj Qajawil qetz.”
40 Ntons, te Xhpeꞌy nxik tuq tqꞌumaꞌ tidiꞌchq kyetz tiꞌj te bꞌanꞌax aj tebꞌen tuq tiꞌj Jesukrist, bꞌix nxik tuq tnimsaꞌ kykꞌuꞌj ikxjani: “[Peꞌetokslan waq te ja tpakbꞌalilni] tzan ekolet kxol ja xjal aj nyaꞌtx galan-eꞌni twitz ja txꞌoꞌtxꞌni.”
41 Ntons ikxji kye aj ebꞌajꞌokslan te aj ntqꞌumaꞌ tuq, ojaw siꞌ aꞌ kywiꞌ bꞌix tuj aj qꞌijji eꞌok lapet junky ox mil (3000) xjal kxol [kye aj nkyeꞌokslan tuq tiꞌj Jesukrist]. 42 Kyetz kꞌontiꞌl tuq nkaj kykolaꞌ tzan kchaꞌon te aj nxik kxnaqꞌtzaꞌ kye tkyꞌixel Jesus, bꞌix nꞌok tuq kchimoꞌ kyibꞌ tzan kywaꞌan junchꞌin bꞌix tzan kxnaqꞌtzan tuq junx.
43 Kyaqil kye xjal bꞌan nkyelabꞌan tuq, komo te Qtata Dios nqet tuq tkꞌuluꞌ kyukyꞌi kye tkyꞌixel tidiꞌchq aj nqolabꞌan tiꞌj bꞌix tidiꞌchq yekꞌbꞌil tukyꞌi nim tajwalil. 44 Kyaqil kye aj nkyeꞌokslan, bꞌan eqꞌiꞌ tuq kyibꞌ bꞌix nqet tuq ksipaꞌ tidiꞌ kyetz kxolx tuq kyetz.* 45 Bꞌix te aj tidiꞌ kyetz bꞌix te ktxꞌoꞌotxꞌ, nxik tuq kykꞌayiꞌ bꞌix nqet tuq ksipaꞌ kxol aber janikꞌponkix aj presis tuq te junjun aj at tuq tidiꞌ npaltin te kyetz. 46 Bꞌan dyakwerd tuq ateꞌ kxol bꞌix bꞌajqꞌij tuq nꞌok kchimoꞌ kyibꞌ tuj te Nin Jay Nabꞌil Qtata Dios; bꞌix tjay jun, tjay jun, nkyewaꞌan tuq junchꞌin kkyaqil tukyꞌi jun chalajbꞌil bꞌix tukyꞌi jun tkꞌuꞌjlal tuj tumeꞌl. 47 Nkyeyolin tuq galan tiꞌj Qtata Dios bꞌix nqet tuq tuj kywitz kyaqil xjal tuj te amaqꞌ, bꞌix tzan tpaj Qajawil bꞌajqꞌij nkyeꞌok tuq mas bꞌan kyꞌilaꞌj kye aj nkyeꞌokslan.