3
Aj Tbꞌantik Jun Xjal Kox Tuq
1 Ntons jun qꞌij te Xhpeꞌy tukyꞌi Waꞌnch exwaꞌq tuj te Nin Jay Nabꞌil Qtata Dios tuj toxiꞌ or te qaleꞌ, aj orji a tuq te or tzan kxnaqꞌtzan tukyꞌi Qtata Dios. 2 Ntons, stziꞌ te Nin Jay Nabꞌil Qtata Dios atqet tuq jun chꞌi kox tetxkkix tuq. Bꞌajqꞌij tuq nxik in tzi, nqet tuq siꞌ stziꞌ te lamel aj nꞌok kyqꞌumaꞌ “Tbꞌanil Lamel” tzan tuq txik tqaniꞌ chꞌin tlimosn kyukyꞌi kye aj nkyeꞌox tuq tzi. 3 Yatzun te yabꞌ, ya ma kyexik teꞌeꞌ te Xhpeꞌy bꞌix te Waꞌnch ikjaꞌn tuq kyox tuj te Nin Jay, tetz oxik tqaniꞌ jun chꞌi tlimosn kyetz.
4 Yaji kyetz ekaj kaꞌyin tiꞌj bꞌix te Xhpeꞌy oxik tqꞌumaꞌ ikxjani: “Qotzaj awena.” 5 Yaji te xjal okaj kaꞌyin kyiꞌj, tetz tuj tnabꞌl qa maꞌ tuq xik siꞌ jun chꞌi tlimosn. 6 Per yatzun te Xhpeꞌy oxik tqꞌumaꞌ ikxjani: “Wetz kꞌontiꞌl [tmin] plata ni oro, per te aj at te wetz oxeꞌl nsiꞌ yatz: Tukyꞌi tbꞌi Jesukrist aj Nasaret oxeꞌl nqꞌumaꞌ yatz, [pajaw waꞌlet bꞌix] pabꞌet.”
7 Ya ma xik tqꞌumaꞌ te Xhpeꞌy ikxji, ojaw stzyuꞌ tbꞌanqꞌabꞌ te yabꞌ bꞌix ojaw twabꞌaꞌ, bꞌix te yabꞌ, aj tjaw waꞌlet, kye toq ebꞌantik bꞌix kye tmapil toq ekawxik. 8 Yaji te xjal njaw naj xlinkꞌan tzan tjaw waꞌlet, bꞌix owaqꞌik tzan tbꞌet; yaji owox kyukyꞌiꞌl tuj te Nin Jay bꞌix bꞌan nxlinkꞌan [bꞌan nchalaj] tuq, nxik tqꞌumaꞌ tuq tidiꞌchq bꞌan galan tiꞌj te Qtata Dios.
9 Kyaqil kye xjal eꞌok eꞌen tetz nbꞌet tuq bꞌix nxik tuq tqꞌumaꞌ tidiꞌchq bꞌan galan tiꞌj Qtata Dios. 10 Bꞌix komo kyebꞌenky tuq ajixkix tuq te kox aj nqeten tuq stziꞌ tlamelul te Nin Jay aj nꞌok tuq kyqꞌumaꞌ “Tbꞌanil Lamel,” nqeten tuq qanil chꞌi tlimosn, kyetz oje kyebꞌajlabꞌan bꞌix bꞌeyx etzajbꞌaj tzan tpaj aj ojetq tuq kyꞌik tiꞌj.
11 Te kox aj ojetq tuq bꞌantik kꞌontiꞌl tuq nꞌel tpawaꞌ tibꞌ tiꞌj te Xhpeꞌy bꞌix te Waꞌnch. Kyaqil kye xjal bꞌan nkyelabꞌan tuq bꞌix ebꞌajpon kare aj jaꞌ tuq akyeqet twitzjay aj nꞌok kyqꞌumaꞌ tuq “Aj Salomon.”
12 Ya ma tzꞌok ten te Xhpeꞌy nkyelabꞌan tuq kye xjal, tetz oxik tqꞌumaꞌ ikxjani: “Etetz aj tijajil Israel, ¿tistil bꞌan nkxlabꞌan? ¿Tistil nqotzaj eteꞌeꞌna naqe cha aꞌoꞌna ma qoqet qꞌanan ja xjalni, naqe cha qetza bꞌaꞌn qitzaꞌ tzan tbꞌantik tbꞌet qitzaꞌna, naqe cha tzan tpaj bꞌan galan aꞌoꞌna tuj twitz te Qtata Dios? 13 Te Qtata Dios aj ntzaj tuq kynaꞌoꞌ kye aꞌeꞌ [qijajil] Abran bꞌix Isak bꞌix Jacob, tetz aj ntzaj naꞌoꞌ tzan kye qijajil oqtxiꞌ, tetz oje tkꞌuluj tzan tqet witꞌlet tuj twitꞌlel tuj kaꞌj te Jesus aj aqꞌunon te tetz. Etetz oxik eqꞌapoꞌ tuj kyqꞌabꞌ kye kꞌulul mandad bꞌix owel etikꞌoꞌ twitz te Pilat, anke te Pilat ojetq qet tbꞌisuꞌ tzan txik stzoqpiꞌ.* 14 Etetz oxik eqꞌumaꞌ tzan txik tzoqpiꞌ jun kansal xjal, per yatzun tiꞌj te Jesus aj pawaꞌ aꞌox te Qtata Dios bꞌix bꞌan kꞌontiꞌl tuq xhchoj, etetz cha owel etikꞌoꞌ tzan kꞌon tkaj tzoqpiꞌ.* 15 Ikxji etetz oqet ekansaꞌ te Qajawil aj ntzaj tsiꞌ qanqꞌin, per te Qtata Dios otkꞌuluj tzan tjaw anqꞌin junkyꞌel bꞌix qetza owok qeꞌeꞌna aj ojetq tuq tjaw anqꞌin.
16 Ja xjal aj etetz etotzqiꞌ bꞌix atqet ewitz, tetz ma bꞌantik tzan tpaj toklen witꞌlet jkꞌuꞌja tiꞌj tajwalil Jesus. Tzan tpaj toklen witꞌlet jkꞌuꞌja tiꞌj Jesus, tetz maꞌtx bꞌantik iktzaꞌx nꞌok eten ajnaꞌl.
17 Wetz webꞌen waq erman, etetz bꞌix kye aj nim kyajwalil exol, etetz aj tqet ekansaꞌ te Jesus, kꞌontiꞌl nꞌel enikyꞌ tidiꞌ tuq nꞌekꞌuluꞌ. 18 Ikxji oponkix tyol te Qtata Dios aj ojetq tuq xik tyoliꞌ kyukyꞌi kyaqil kye aj yolil tyol oqtxiꞌ, qa te Krist aj [Koloyon Aj Qꞌumankaj Oqtxiꞌ,] maꞌkix tuq tzꞌok ten twitz xhchoꞌnal. 19 Astilji ajnaꞌl etetz intjaw ekyꞌixpuꞌ enabꞌlin bꞌix peꞌetokslan tiꞌj tetz tzan tqet tnajsaꞌ te echoj. Ikxji te Qtata Dios otzajel tsiꞌ jun chewsbꞌil tuj etanim, 20 bꞌix bꞌaꞌn tzan stzaj tlajoꞌ tetz te Jesukrist, aj Koloyon Aj Qꞌumankaj Oqtxiꞌ. 21 Aj Jesusji a tgan tzan sten tuj kaꞌj max oj tpon kyaqil iktzaꞌx okaj qꞌumaꞌ oqtxiꞌ kyukyꞌi kye aj yolil tyol Dios aj pawameꞌ aꞌox te tetz. 22 Te Moisés oxik tqꞌumaꞌ kye qijajil oqtxiꞌ ikxjani: “Te Qtata Dios, aj Qajawil, otkꞌuluꞌtz tzan tetz exol etetz jun aj yolil tyol iktzaꞌ aꞌin. Intqet etokslaꞌ kyaqil aj otzajel tqꞌumaꞌ etetz.* 23 Abꞌl te aj nlay qet tokslaꞌ te ja yolil tyol Dios ntzani, owelax in kxol kye xjal tzan tponaj.”*
24 Bꞌix kyaqil kye aj yolil tyol Dios aj eꞌaqꞌik atx aj tul te Samuel, oxik kypakbꞌaꞌ tiꞌj kyaqil aj nkyꞌik ajnaꞌl. 25 Qetz aꞌoꞌ kyijajil kye aj yolil tyol Qtata Dios oqtxiꞌ bꞌix ax at qoklen tiꞌj te aj oxik tsiꞌ tyol te Qtata Dios tiꞌj kyukyꞌi kye qijajil oqtxiꞌ. Komo te Qtata Dios oxik tqꞌumaꞌ te qijajil Abran ikxjani: “Kyaqil kye xjal twitz txꞌoꞌtxꞌ okyeqtel kyꞌiwlaꞌ tzan tpaj jun awijajil.”* 26 Ya ma tkꞌuluj te Qtata Dios tzan tjaw anqꞌin te [Jesus] aj aqꞌunon te tetz, yaji otzaj tlajoꞌ tbꞌayaꞌ qxol qetz tzan jqet tkyꞌiwlaꞌ tzan tjaw qkyꞌixpuꞌ qnabꞌlin tiꞌj te qchoj.”