4
Aj Kyqex Siꞌ Pres Te Xhpeꞌy Bꞌix Te Waꞌnch
1 Aj man tuq nkyeyolin [te Xhpeꞌy bꞌix te Waꞌnch] kyukyꞌi kye xjal, ebꞌajpon kye pal bꞌix te kꞌulul mandad kyiꞌj kye xbꞌuqil te Nin Jay Nabꞌil Qtata Dios bꞌix ax ebꞌajpon kye aj bꞌuchꞌuj Sadusey. 2 Kyetz bꞌan nkyeqꞌojin tuq tzan tpaj te Xhpeꞌy bꞌix te Waꞌnch nxik kxnaqꞌtzaꞌ tuq kye xjal bꞌix nxik tuq kypakbꞌaꞌ tpakbꞌalil tiꞌj te Jesus tjawlen anqꞌin kxol kye kamnaq. 3 Bꞌix ejaw ktzyuꞌ, ebꞌajqex ksiꞌ tuj pres; bꞌix komo qaleꞌky tuq max tuj junky qꞌij ebꞌajjatz kyin. 4 Per kyꞌilaꞌj kxol kye aj nkyechaꞌon tuq te tpakbꞌalil ebꞌajꞌokslan, bꞌix kye aj nkyeꞌokslan tuq tiꞌj Jesus eꞌok mas kyꞌilaꞌj qanq jwebꞌ mil (5000) tuq kybꞌet tzan kkyaqil, nini aꞌox kye ichan.
5 Ntons tuj junky iwitq owok kchimoꞌ kyibꞌ tuj Jerusalen kye aj bꞌuchꞌuj tijxjal aj mas nim kyajwalil kxol tijajil Israel bꞌix kye txqꞌanky tijxjal aj nꞌok tuq kchimoꞌ kyibꞌ kyukyꞌiꞌl bꞌix kye xnaqꞌtzal Kawbꞌil tiꞌj te kyrelijyon. 6 Bꞌix ax atqet tuq kxol kyetz te Anas, te twitzaleꞌ pal, bꞌix te Kaypas bꞌix te Waꞌnch bꞌix te Jant bꞌix kyaqil kye aj tuj tjay te twitzaleꞌ pal. 7 Kyetz oxik kykꞌuluꞌ mandad tzan kyqet wabꞌaꞌ te Xhpeꞌy bꞌix te Waꞌnch kywitz, bꞌix oxik kchaꞌoꞌ ikxjani: “¿Abꞌl oxik sin etetz etajwalil, qatzun abꞌl otzaj lajon te etetz, tzan tqet ekꞌuluꞌ ikxnini?”
8 Ntons te Xhpeꞌy nojnaq tuq tukyꞌi Txew Dios tuj tanim bꞌix oxik tqꞌumaꞌ ikxjani: “Etetz aj at nim etajwalil [qxol qetz aj Israel] bꞌix etetz aj tijxjal qxol, 9 etetz ajnaꞌl nqoqet epichꞌoꞌ tzan tpaj jun galan aj oqet jkꞌuluꞌna tiꞌj jun xjal yabꞌ tuq bꞌix ajnaꞌl oje bꞌantik. 10 Galan tzan tok echaꞌoꞌ ekyaqil etetz, bꞌix tzan tok kchaꞌoꞌ kyaqil xjal aj tijajil Israel, te ja xjal aj atqet tzani ewitz etetzni, tetz obꞌantik tzan tajwalil Jesukrist aj Nasaret, axkix aj owok eklabiꞌ twitz krus bꞌix te Qtata Dios ojaw anqꞌin junkyꞌel titzaꞌ. 11 Te Jesus, a tetz iktzaꞌ jun abꞌj twitꞌlel jay bꞌix etetz iktzaꞌ aꞌix aj kꞌulul jay owel etikꞌoꞌ, per ajnaꞌl tetz oje kaj siꞌ tzan junky iktzaꞌ te abꞌj aj bꞌan presis twitꞌlel jay.* 12 Kꞌontiꞌl junky twitz te Jesus aj bꞌaꞌn tzan tkolon qetz. Kꞌontiꞌl junky tzani twitz txꞌoꞌtxꞌ aj oje kaj siꞌ tzan Qtata Dios tzan tkolon qiꞌj.”
13 Ntons yaji, ya ma tzꞌok kyeꞌeꞌ kye kꞌulul mandad titzaꞌ tuq nkyeyolin te Xhpeꞌy bꞌix te Waꞌnch tukyꞌi jun kyajwalil, bꞌix owel kynikyꞌ kyiꞌj nyaꞌtx tuq xjal aj bꞌan tlimaqal-eꞌwit tiꞌj letr, cha parejeꞌ tuq iktzaꞌ kye txqꞌanky xjal, yaji kyetz oje kyelabꞌan bꞌix owel kynikyꞌ kyiꞌj, kyetz aꞌeꞌ tuq aj lapikeꞌ tiꞌj Jesus. 14 Bꞌix komo te aj ojetq tuq qet qꞌanaꞌ, tetz atqet tuq kywitz, astilji kꞌontiꞌl tidiꞌ bꞌaꞌn tuq tzan txik kyqꞌumaꞌ kyiꞌj. 15 Ntons oxik kykꞌuluꞌ mandad tzan tuq kyex aj jaꞌ tuq chimoꞌ kyibꞌ bꞌix ekaj wululun kxolx.
16 Nkyqꞌumaꞌ tuq ikxjani: “¿Tidiꞌ ojkꞌuluꞌtz kyukyꞌi ja xjalni? Kyaqil xjal tuj ja amaqꞌ Jerusalenni kyebꞌen qa kyetz maꞌtx qet kykꞌuluꞌ ja senyni tukyꞌi nim tajwalil Qtata Dios. Ajnaꞌl nlay bꞌantik tzan txik jqꞌumaꞌ qa nyaꞌtx tumeꞌl. 17 Per ajnaꞌl tzan kꞌon txik kyyoliꞌ kyukyꞌi txqꞌanky, okyeꞌokel qxobꞌsaꞌ tzan tkaj ksiꞌ tzan kyyolin tiꞌj aj Jesusni.” 18 Ntons owox kyukꞌleꞌ junkyꞌel te Xhpeꞌy bꞌix te Waꞌnch, bꞌix eꞌok kyiliꞌ tzan kꞌon txik kyqꞌumaꞌ chꞌinwt tiꞌj Jesus bꞌix tzan kꞌon txik kxnaqꞌtzaꞌ chꞌinwt tiꞌj.
19 Per yaji te Xhpeꞌy bꞌix te Waꞌnch owaj ktzaqꞌbꞌeꞌ kyetz ikxjani: “Intqet ebꞌisuꞌx etetz, ¿galan peꞌ tuj twitz Qtata Dios tzan eqet qokslaꞌna etetz aꞌix qatzun tzan tqet qokslaꞌna te Qtatji? 20 Qetza nlay bꞌantik tzan tkaj qsiꞌna tzan qyolin tiꞌj kyaqil aj oje tzꞌok qena bꞌix tiꞌj kyaqil aj oje tzꞌok qchaꞌoꞌna.”
21 Yaji kye kꞌulul mandad eꞌok kxobꞌsaꞌ, per ekaj ktzoqpiꞌ tzan tpaj kꞌontiꞌl owoknoj jun kyil kyitzaꞌ bꞌix kyaqil tuq kye xjal bꞌan nqet tuq kyjiqꞌbꞌaꞌ Qtata Dios tzan tpaj aj ojetq tuq kyꞌik, 22 komo te xjal aj oqet kyqꞌanaꞌ ojetq tuq jakon mas tajsik kawnaq (40) aqꞌbꞌi tetz.
Aj Kxnaqꞌtzan Kye Qerman Tukyꞌi Qtata Dios Tzan Stzaj Siꞌ Jun Kybalor
23 Ya ma kyexik tzoqpiꞌji, te Xhpeꞌy bꞌix te Waꞌnch ebꞌajꞌex tzi, bꞌix owok kchimoꞌ kyibꞌ kyukyꞌi kye txqꞌanky qerman. Oxik kyqꞌumaꞌ kyetz kyaqil aj ojetq tuq kyyolij kye pal aj nim kyajwalil bꞌix kye aj te bꞌuchꞌuj tijxjal. 24 Ya ma tzꞌok kchaꞌoꞌji, kkyaqil kyetz eꞌok ten xnaqꞌtzon tukyꞌi Qtata Dios, oxik kyqꞌumaꞌ ikxjani: “Tat, yatz aj mas nim awajwalil twitz kyaqil, yatz oqet akꞌuluꞌ te twitz kaꞌj, te twitz txꞌoꞌtxꞌ, kye nim aꞌ, bꞌix kyaqil aj at twitz txꞌoꞌtxꞌ bꞌix twitz kaꞌj bꞌix tuj te nim aꞌ.* 25 Yatz tukyꞌi Axew oxik ayoliꞌ tuj tanim te Dawid aj qijajilna oqtxiꞌ, aj qꞌapoꞌ tibꞌ nꞌaqꞌunan te yatz, oxik ayoliꞌ tuj tanim ikxjani: “¿Tistil nkyejaw labꞌun kye aj kꞌontiꞌl nkyeꞌokslan te Qtata Dios?a ¿Tistil nqet kybꞌisuꞌ jun tidiꞌ aj kꞌontiꞌl tumeꞌl? 26 Kye kꞌulul mandad twitz txꞌoꞌtxꞌ bꞌix txqꞌanky aj nim kyajwalil, owok kchimoꞌ kyibꞌ tzan kyjaw meltzꞌjik tiꞌj te Qtata Dios aj Tajawil Tiꞌj Kyaqil, bꞌix tzan kyqꞌojin tiꞌj te Koloyon aj Qꞌumankaj titzaꞌ.”*
27 Bꞌanꞌax owok kchimoꞌ kyibꞌ tuj ja amaqꞌ ntzani te Eródes* bꞌix te Pónsio Piláto,* bꞌix kye aj nyaꞌtx tijajil Israel bꞌix kye [qxjalil] aj tijajil Israel, kyaqil kyetz owok kchimoꞌ kyibꞌ, ebꞌajjaw meltzꞌjik tiꞌj te Jesus aj joyomaj awitzaꞌ bꞌix pawaꞌ awitzaꞌ bꞌix qꞌapoꞌ tibꞌ nꞌaqꞌunan te yatz. 28 Kyetz oqet kykꞌuluꞌ iktzaꞌx tuq yatzb ojetq qet abꞌisuꞌ tbꞌayaꞌ bꞌix tukyꞌi awajwalil nꞌakꞌuluꞌ tzan tkyꞌik. 29 Ajnaꞌl Tat, intok asiꞌ chꞌin anabꞌl tiꞌj te aj nyaꞌtx galan nkyqꞌumaꞌni, bꞌix instzaj asiꞌ chꞌin mas qbalor qetza aj nchqet qokslaꞌna tzan txik qpakbꞌaꞌna te ayol bꞌix kꞌontiꞌl tzan qxobꞌ. 30 Bꞌix [tukyꞌi awajwalil], intqet asiꞌ chꞌin aqꞌabꞌ kyajsik kye yabꞌ tzan kyqet aqꞌanaꞌ, bꞌix intqet akꞌuluꞌ chꞌin tidiꞌchq yekꞌbꞌil tukyꞌi nim awajwalil bꞌix tidiꞌchq aj okyelabꞌayon kye xjal tiꞌj, intqet akꞌuluꞌ chꞌin kyaqil nini tzan tpaj te Jesus aj pawaꞌ awitzaꞌ bꞌix qꞌapoꞌ tibꞌ nꞌaqꞌunan te yatz.”
31 Ntons, ya ma mankun kxnaqꞌtzan, yaji tuj te luwar aj jaꞌ tuq chimoꞌ kyibꞌ otzaj jun kabꞌjunabꞌ bꞌix te Txew Dios oxik tsiꞌ tuj kyanim kkyaqil kyetz jun nim kyajwalil bꞌix eꞌaqꞌik tzan kypakbꞌan tyol Qtata Dios tukyꞌi jun tkꞌuꞌjlal, kꞌontiꞌl tuq txobꞌlal te kyetz.
Titzaꞌ Tuq Kyemodin Kye Aj Nkyexnaqꞌtzan
32 Kyaqil kye aj nkyeꞌokslan tuq nkynaꞌoꞌ tuq tuj kyanim parej kkyaqil, nijunwt kxol kyetz ntqꞌumaꞌ tuq qa aj tidiꞌ tetz cha aꞌoxwit te tetz, sinoke kyaqil aj tidiꞌ kyetz nꞌoken tuq kye txqꞌanky parej kkyaqil.* 33 Yatzun kye tkyꞌixel Jesus nkyepakbꞌan tuq tiꞌj tjawlen anqꞌin te Qajaw Jesus, per nkyepakbꞌan tuq tukyꞌi jun kyajwalil, bꞌix bꞌan atqet tuq te Qtata Dios kyukyꞌiꞌl tzan tqet tkꞌuluꞌ tidiꞌchq nim bꞌan galan. 34 Kxol kyetz kꞌontiꞌl tuq kye xjal mebꞌaꞌ, tzan tpaj kye aj at tidiꞌchq kyetz qa kyjay qa ktxꞌoꞌotxꞌji, nxik tuq kykꞌayiꞌ bꞌix te twiꞌ ntzaj tuq kyin 35 bꞌix nxik tuq kyqꞌapoꞌ kye aꞌeꞌ tkyꞌixel Jesus tzan tuq tqet ksipaꞌ kxol kye aj presis tuq jun onbꞌil te kyetz.*