5
Aj Okyꞌik Tiꞌj Te Ananiys Bꞌix Te Sapir
1 At tuq jun ichan tbꞌi Ananiys, bꞌix te txuꞌjel Sapir tuq tbꞌi, kyetz oqet kykawlaꞌ tzan txik kykꞌayiꞌ jun ktxꞌoꞌotxꞌ. 2 Te ja ichanni oqet tkawlaꞌ tukyꞌi txuꞌjel, okaj tewaꞌ chꞌin tiꞌj twibꞌen te txꞌoꞌtxꞌ bꞌix te txqꞌanky oxik kyqꞌapoꞌ kyukyꞌi kye tkyꞌixel Jesus.
3 Yaji te Xhpeꞌy oxik tqꞌumaꞌ tetz ikxjani: “Ananiys, ¿tistil ma atzoqpij tzan tyolin te Satanas tuj awanim? ¿Tistil yatz tuj anabꞌl bꞌaꞌn tzan tqet aweqꞌiꞌ te Txew Dios, ma kaj awewaꞌ chꞌin te tmin aj ma chojlik tiꞌj te atxꞌoꞌotxꞌ? 4 ¿Tiꞌtzun, nyaꞌtx petzun yatz tuq te txꞌoꞌtxꞌ? Bꞌix txiklen akꞌayiꞌ, ¿nyaꞌtx petzun tuj aqꞌabꞌ tuq atkaj kyaqil? ¿Tistil ma qet abꞌisuꞌ tuj awanim tzan akꞌulun ikxji? Yatz nyaꞌtx kyukyꞌi xjal maꞌtx chnikꞌon sinoke maꞌtx chnikꞌon tukyꞌi Qtata Dios.”
5 Ntons, ya ma tzꞌok xhchaꞌoꞌ te Ananiys ikxji, oqet tilan bꞌix bꞌeyx okamik. Kye aj akyeqet tuq tzi, otzaj jun nim xobꞌalj kyiꞌj. 6 Ebꞌajtzaj kye txqꞌan kuꞌxon, oqet ksiꞌ tmortaj, owex kyin tzi bꞌix oxwaꞌq kymuquꞌtz.
7 Ntons yaji, qanq ojetq tuq kyꞌik oxe or, tpon te txuꞌjel. Tetz kꞌontiꞌl tuq tebꞌen te aj ojetq kyꞌik. 8 Yaji te Xhpeꞌy oxik xhchaꞌoꞌ tetz ikxjani: “Instzaj aqꞌumaꞌ qa te txꞌoꞌtxꞌ aj oxik ekꞌayiꞌ, ochojlik ikxjani tiꞌj tzan kyaqil.” Yaji tetz owaj stzaqꞌbꞌeꞌ ikxjani: “Yeꞌ, ikxji.”
9 Yaji te Xhpeꞌy oxik tqꞌumaꞌ tetz ikxjani: “¿Tistil oqet ekawlaꞌ ekabꞌil tzan tqet eteqꞌiꞌ te Txew Dios? Intxik awen; kyeꞌul kye aj ma kyexwaꞌtz muqul te awichmil, bꞌix ajnaꞌl ax yatz otxeꞌl kyin junkyꞌel.”
10 Bꞌeyxnajji oqet tilan ax twitz te Xhpeꞌy bꞌix okamik. Ya ma kyeꞌokon kye kuꞌxon, otzaj kykambꞌaꞌ ojetq tuq kamik, yaji owex kyin bꞌix oxwaꞌq kymuquꞌtz tiꞌjx te tichmil. 11 Bꞌix kyaqil kye qerman txini, bꞌix ax kyaqil kye txqꞌanky xjal aj owok kchaꞌoꞌ tiꞌj te ntzani, kkyaqil kyetz ebꞌajxobꞌ nim.
Aj Kykꞌulun Kye Tkyꞌixel Jesus Tidiꞌchq Yekꞌbꞌil
12 Kye tkyꞌixel Jesus nqet tuq kykꞌuluꞌ tidiꞌchq yekꞌbꞌil tukyꞌi nim tajwalil Dios bꞌix tidiꞌchq aj nkyelabꞌan tuq kye xjal tiꞌj. Kkyaqil [kye aj nkyeꞌokslan tuq tiꞌj Jesus] nꞌok tuq kchimoꞌ kyibꞌ tuj te Nin Jay Nabꞌil Qtata Dios tuj te twitzjay aj nꞌok kyqꞌumaꞌ tuq “Aj Salomon” bꞌix bꞌan dyakwerd tuq ateꞌ. 13 Bꞌan nkyeqet tuq jiqꞌbꞌaꞌ tzan kyaqil kye xjal, per kye txqꞌanky xjal [aj kꞌon tuq kygan tzan kyokslan], nijunwt kxol kyetz ntnimsaꞌ tuq kykꞌuꞌj tzan tox ksamoꞌ kyibꞌ kxol. 14 Per mas tuq kyꞌilaꞌj kye xjal nkyeꞌokslan tiꞌj te Qajawil, ichan bꞌix xuj nkyeꞌokslan tuq tiꞌj. 15 Bꞌix kye yabꞌ nkyeꞌetz tuq kyin tuj kyjay twitz kywatubꞌ tzan kyqet tuq ksiꞌ tuj bꞌey aj jaꞌ nkyꞌik tuq te Xhpeꞌy tzan tkyꞌik tuq nkesey aꞌox chꞌi txmojomal kyajsik. 16 Kye xjal tuj amaqꞌ qaynin tzi, ax nkyepon tuq Jerusalen, npon kyin tuq kye yabꞌ bꞌix kye aj nꞌok kyen twitz xhchoꞌnal tzan tpaj malspirit tuj kyanim, bꞌix kyaqil nkyebꞌantik tuq.
Aj Kyjaw Lajoꞌ Kye Aꞌeꞌ Tkyꞌixel Jesus Tzan Kye Aj Nim Kyajwalil
17 Ntons tzaj te twitzaleꞌ pal bꞌix kye tukyꞌiꞌl aj bꞌuchꞌuj Sadusey, kyetz otzaj nim kyqꞌoj 18 bꞌix ejaw ktzyuꞌ kye tkyꞌixel Jesus bꞌix eqex ksiꞌ tuj pres. 19 Per qonikꞌan jun ángel tlajen Qajawil owel tjaqoꞌ te tlamelul te pres, ebꞌajjatz teqꞌiꞌ, bꞌix oxik tqꞌumaꞌ kyetz ikxjani: 20 “Pex waq tuj te Nin Jay Nabꞌil Qtata Dios, intxik epakbꞌaꞌ kye xjal kyaqil tumeꞌl tiꞌj titzaꞌ tzan kyanqꞌin [tukyꞌi Jesus].” 21 Ntons, iktzaꞌx ojetq tuq tzaj qꞌumaꞌ kyetz, tuj junky iwitq bꞌan qꞌeqoꞌ ebꞌajxik tuj te Nin Jay Nabꞌil Qtata Dios bꞌix eꞌaqꞌik tzan txik kxnaqꞌtzaꞌ. Yatzun te twitzaleꞌ pal kyukyꞌi kye tukyꞌiꞌl, kyetz etzaj kyukꞌleꞌ kyaqil kye txqꞌanky aj te bꞌuchꞌuj mas nim kyajwalil kxol kye aj tijajil Israel tzan tok kchimoꞌ kyibꞌ, bꞌix yaji oxik kykꞌuluꞌ mandad tzan ktzaj in kye tukyꞌiꞌl Jesus aj akyeqex tuq tuj pres. 22 Ya ma kyepon kye mulon tuj te pres, kꞌontiꞌl tuq akyeqex tuj te pres. Emeltzꞌjik bꞌix oxik kyqꞌumaꞌ tpakbꞌalil ikxjani: 23 “Ma tzaj jkambꞌaꞌna te pres bꞌan lamoꞌ tuq bꞌix kye soldad nkyexbꞌuqin tuq stziꞌ te lamel per aj stzꞌox qjaqoꞌna kꞌontiꞌl tuq akyeqex kye xjal tuj te pres.”
24 Ya ma tzꞌok kchan ikxji, te kꞌulul mandad kye aj xbꞌuqil te Nin Jay Nabꞌil Qtata Dios bꞌix kye pal aj nim kyajwalil bꞌan nkyelabꞌan tuq, nkyebꞌisun tuq tidiꞌ okyꞌel tzan tpaj nini. 25 Per yaji opon jun swal tpakbꞌalil kyukyꞌiꞌl ikxjani: “Kye xjal aj eqex esiꞌ etetz tuj pres, kyetz akyeꞌox tuj te Nin Jay Nabꞌil Qtata Dios bꞌix nxik kxnaqꞌtzaꞌ kye xjal.”
26 Yaji kyetzaj kye xbꞌuqil jay bꞌix te kꞌulul mandad kxol kyetz, exwaꞌq eꞌel kyetz, bꞌix etzaj kyin kyebꞌaꞌ, kꞌontiꞌl owok kykꞌuluꞌ chꞌinwt kyiꞌj tzan tpaj nkyexobꞌ tuq kyiꞌj kye xjal, kebal tuq tzan kyok xoꞌoꞌ tukyꞌi abꞌj. 27 Ya ma kyepon eqꞌiꞌ, eqet siꞌ kywitz kkyaqil kye aj nim kyajwalil kxol kye aj tijajil Israel, bꞌix tzaj te twitzaleꞌ pal, oxik tqꞌumaꞌ kyetz ikxjani: 28 “¿Tiꞌtzun, kꞌontiꞌl oxik jqꞌumaꞌna etetz tzan kꞌon exnaqꞌtzan tiꞌj aj xjalni?* Bꞌix ajnaꞌl oje kyexik exnaqꞌtzaꞌ kyaqil xjal tuj Jerusalen. Bꞌix egan tzan tok esiꞌ qpajna qa tzan qpaj qetza okamik te aj ichan aj nꞌeqꞌumaꞌ etetzni.”*
29 Yaji te Xhpeꞌy kyukyꞌi kye txqꞌanky tkyꞌixel Jesus owaj ktzaqꞌbꞌeꞌ ikxjani: “Qetza presis tzan tqet qokslaꞌna te Qtata Dios bꞌix nyaꞌtx cha aꞌox kyyol xjal. 30 Te Qtata Dios aj ntzaj kynaꞌoꞌ tuq kye qijajil oqtxiꞌ, otkꞌuluj tzan tjaw anqꞌin te Jesus, axkix aj oqet ekansaꞌ etetz aj tjaw eyobꞌaꞌ twitz krus. 31 Ajnaꞌl oje jaw anqꞌin tzan te Qtata Dios, bꞌix ajnaꞌl witꞌlik tuj tbꞌanqꞌabꞌ bꞌix oje tkꞌuluj tzan tok te Twitzaleꞌ Kꞌulul Mandad bꞌix Koloyon kyiꞌj qxjalil aj tijajil Israel. Tzan tpaj tetz kye qxjalil bꞌaꞌn tzan tjaw kkyꞌixpuꞌ kynabꞌlin tzan tqet najsaꞌ te kchoj. 32 Qetza oje tzꞌok qena te ntzani. Bꞌix ax te Txew Dios tebꞌen bꞌix nyolin bꞌanꞌax tiꞌj ntzani, bꞌix tetz oje tzaj siꞌ tzan Qtata Dios kye aꞌeꞌ aj nkyeqet okslan tetz.”
33 Ya ma tzꞌok kchaꞌoꞌ kyetz ikxjani, kye kꞌulul mandad ebꞌajjaw qꞌojlik kyiꞌj tkyꞌixel Jesus bꞌix kygan tuq tzan kyqet kykansaꞌ. 34 Ntons jun xjal aj bꞌuchꞌuj Parisey, Gamaliel tbꞌi, ojaw waꞌlet kxol. Tetz jun xnaqꞌtzal Kawbꞌil tiꞌj kyrelijyon tuq bꞌix jiqꞌbꞌaꞌ tuq tzan kye xjal. Yaji tetz oxik tkꞌuluꞌ mandad tzan kyex in tuq kye tkyꞌixel Jesus jun rat jwer. 35 Yaji tetz oxik tqꞌumaꞌ kyetz ikxjani: “Etetz aj tijajil Israel, intok esiꞌ enabꞌl tiꞌj aj oqtel ekꞌuluꞌ kyukyꞌi kye ja xjalni. 36 Instzaj enaꞌoꞌ, jun-el jun xjal Teúdas tbꞌi, nxik tuq tpakbꞌaꞌ at tuq nim tajwalil. Tuj aj tyempji kyꞌilaꞌj xjal eꞌok lapet tiꞌj, qanq kaj oqal (400) xjal tuq. Yaji txqꞌan xjal oqet kansan tetz; yatzun kye aj lapikeꞌ tuq tiꞌj, oxik kslabꞌuꞌ kyibꞌ bꞌix ikxji te aj nkyekꞌulun oponaj. 37 Yaji, mas yaj otzaj junky, te Juds aj Galiley, mer tuj te tyemp aj njaw tuq kyajlal kye xjal, bꞌix ax kyꞌilaꞌj xjal ebꞌajꞌok lapet tiꞌj. Yaji ax tetz oqet kansaꞌ bꞌix kye aj ajuneꞌ tuq tukyꞌiꞌl oxik kslabꞌuꞌ kyibꞌ bꞌix te aj nkyekꞌulun tuq oponaj. 38 Ntons kyiꞌj ja xjalni, oxeꞌl nqꞌumaꞌ etetz tzan tel epawaꞌ etibꞌ kyiꞌj, inkxik etzoqpiꞌ. Qa te aj nxik kxnaqꞌtzaꞌ cha tuj kywiꞌx kyetz, ntons opoyonaj. 39 Per qa te aj nxik kxnaqꞌtzaꞌ bꞌanꞌax tzajnaq tukyꞌi Qtata Dios, etetz nlay bꞌantik tzan tpon enajsaꞌ. ¡Oj stzaj enabꞌeꞌ etibꞌ, qanq kebal nkxqꞌojin tukyꞌi Qtata Dios!” Ntons kye txqꞌanky aj nkyechaꞌon tuq tiꞌj oxik kyokslaꞌ tyol.
40 Yaji etzaj kyukꞌleꞌ kye tkyꞌixel Jesus bꞌix eqetbꞌaj kyjubꞌchaꞌ. Yaji eꞌok kyiliꞌ tzan kꞌon tuq kxnaqꞌtzan junkyꞌel tukyꞌi tbꞌi te Jesus bꞌix yaji exik ktzoqpiꞌ. 41 Kye tkyꞌixel Jesus ebꞌajchalaj aj kyex kxol, tzan tpaj te Qtata Dios owel galan tuj twitz tzan [kypakbꞌan, anke] nꞌok kyen tuq twitz xhchoꞌnal tzan tpaj te Jesukrist. 42 Bꞌajqꞌij kyetz kꞌontiꞌl tuq nkaj ksiꞌ tzan kxik tuj te Nin Jay Nabꞌil Qtata Dios bꞌix jaꞌchq tuj kyjay kye xjal, tzan txik kxnaqꞌtzaꞌ bꞌix tzan txik kypakbꞌaꞌ a te Jesus te Koloyon aj Qꞌumankaj.