Te Stzꞌibꞌen Paꞌk Kye Qerman Aj Amaqꞌ Rom
1
Jun Limbꞌil
1 Wetz aꞌin Paꞌk, bꞌix a te Kristo Jesus wajawil aj nqet wokslaꞌ; bꞌix joyomin titzaꞌ tzan wok tkyꞌixel, bꞌix pawamin [tzan txik npakbꞌaꞌ] te tpakbꞌalil galan aj Qtata Dios swal tetz, 2 te tpakbꞌalil aj okaj tqꞌumaꞌ oqtxiꞌ kyukyꞌi kye aj yolil tyol aj oqet ktzꞌibꞌaꞌ tuj Tuꞌjal aj bꞌan tumeꞌl. 3 Aj ja tpakbꞌalilni nyolin tiꞌj te Tkꞌwaꞌal; tetz tzan kypaj stat, tetz jun tijajil Dawid [aj twitzaleꞌ kꞌulul mandad oqtxiꞌ], 4 per ax tetz bꞌanꞌax Tkꞌwaꞌal Dios, komo owel nikyꞌj tiꞌj tjawlen anqꞌin kxol kye kamnaq tzan te tajwalil te Txewx Qtata Dios; ntons a tetz te Jesukrist aj Qajawil. 5 A tetz otzaj sin wetza jun nim bꞌan galan aj kꞌontiꞌl nwajoꞌ bꞌix otzaj tsiꞌ wajwalil tzan wok jun tkyꞌixel, tzan txik npakbꞌaꞌ kxol kyaqil kye aj nyaꞌtx tijajil Israel tzan tqet kyokslaꞌ te tpakbꞌalil tiꞌj Jesukrist tzan tqet kyjiqꞌbꞌaꞌ, 6 bꞌix kxol kye aj xjalni, ax atikxqet etetz, joyomix tzan eten te tetz.
7 [Wetz nqet ntzꞌibꞌaꞌ te ja uꞌjni] te etetz ekyaqil qerman aj amaqꞌ Rom, etetz aj ganimix tzan Qtata Dios bꞌix joyomix tzan eten pawaꞌ aꞌox te tetz. Qtata Diosxwit bꞌix te Qajaw Jesukrist tzaj ksiꞌxwit jun nim bꞌan galan etajsik ekyaqil etetz bꞌix qet kchewsaꞌxwit ekꞌuꞌj.
Te Paꞌk Nxik Tsiꞌ Pixon Te Dios Kyiꞌj Kye Qerman Aj Rom
8 Ntons, tbꞌay nxik nsiꞌ pixon te Qtata Dios etiꞌj etetz ekyaqil tukyꞌi tbꞌi te Qajaw Jesukrist tzan tpaj jaꞌchq nꞌok chaꞌlet titzaꞌ etetz witꞌlik ekꞌuꞌj tiꞌj. 9 Te Qtata Dios aj wetz nqet wokslaꞌ tukyꞌi jun tkꞌuꞌjlal tzan txik nqꞌumaꞌ te tpakbꞌalil tiꞌj te Tkꞌwaꞌal, tetz tebꞌen, wetz kꞌontiꞌl nkxꞌajnaj tiꞌj wanim tzan etzaj nnaꞌoꞌ kyaqil-el oj nxnaqꞌtzan tukyꞌiꞌl. 10 Wetz nqet nwitz twitz tzan stzaj tsiꞌ jun tumeꞌl tzan nxik qꞌolbꞌel etetz, qa tetz tgan ikxji. 11 Wetz ngan tzan nxik qꞌolbꞌel etetz tzan wonen etukyꞌiꞌl tzan eten jwert tukyꞌi Qtata Dios; 12 ikxji ojawel qnimsaꞌ jkꞌuꞌj qibꞌqibꞌx iktzaꞌx qetz qkyaqil witꞌlikok jkꞌuꞌj tiꞌj Qtata Dios.
13 Wetz ajnaꞌl waq erman, ngan tzan tok echaꞌoꞌ, wetz kyꞌilaꞌj-el oje qet nbꞌisuꞌ tzan nxik qꞌolbꞌel etetz per tiꞌchq nꞌok nojan, kꞌontiꞌl nbꞌantik tzan nxik.* Komo ngan tzan tok wen jun galan exol [exiklen nxnaqꞌtzaꞌ], iktzaꞌx nꞌok wen tuj txqꞌanky amaqꞌ.b 14 Wetz nnaꞌoꞌ iktzaꞌ kꞌasbꞌenaꞌ witzaꞌ tzan txik npakbꞌaꞌ kye aj nyaꞌtx tijajil Israel qa tlimaqal-eꞌ qatzun nyaꞌtxji, bꞌix kyukyꞌi kye aj at jun kynabꞌl tumeꞌl bꞌix kyukyꞌi kye aj kꞌontiꞌl. 15 Astilji wetz ngan tzan txik npakbꞌaꞌ te tpakbꞌalil galan tiꞌj Jesukrist exol etetz tzi tuj Rom.
Tzan Tpaj Te Tpakbꞌalil Tiꞌj Jesukrist, Bꞌaꞌn Tzan Qel Galan Tuj Twitz Qtata Dios
16 Wetz kꞌontiꞌl nkyinqet kyꞌixwik kywitz xjal tiꞌj te tpakbꞌalil tiꞌj Jesukrist, komo tiꞌj te ntzani te Qtata Dios bꞌaꞌn tzan tkolon kyiꞌj kyaqil kye aj nkyeꞌokslan tiꞌj, tbꞌay [oxik pakbꞌlet] kxol kye aj qijajil Israel bꞌix yaji kxol kye aj nyaꞌtx tijajil Israel. 17 Komo te tpakbꞌalil nyolin titzaꞌ te Qtata Dios nkꞌulun tzan jkaj saq tuj twitz, bꞌix nꞌel qnikyꞌ te nini oj tok qwitꞌbꞌaꞌ jkꞌuꞌj tiꞌj tetz bꞌix tzan tkaj witꞌlet jkꞌuꞌj tiꞌj, ikx tzꞌibꞌankaj tuj Tuꞌjal Qtata Dios ikxjani: “Te aj oje tzꞌel in xhchoj owanqꞌiyon tzan tpaj witꞌlik tkꞌuꞌj [tiꞌj Qtata Dios].”*
Kye Xjal Kꞌon Kygan Okslan Anke Nꞌok Kyen Kyaqil Aj Nqet Tkꞌuluꞌ Te Qtata Dios
18 Qetz nꞌok qen, te Qtata Dios aj atjax tuj kaꞌj ntzaj tqꞌoj kyiꞌj kyaqil kye xjal aj kꞌontiꞌl nkyexjanin te tetz bꞌix tidiꞌchq nyaꞌtx galan nkykꞌuluꞌ tzan kꞌon tok eꞌeꞌ te bꞌanꞌax. 19 Komo te aj bꞌaꞌn tzan tel qnikyꞌ tiꞌj te Qtata Dios oje tzꞌok kyen kxol, komo axk te Qtata Dios oje tzaj tyekꞌuꞌ kyetz. 20 Komo atx tkajlen kꞌuluꞌ te twitz txꞌoꞌtxꞌ, te aj kꞌontiꞌl nxik qen titzaꞌ te Qtata Dios, bꞌaꞌn tzan tel qnikyꞌ tiꞌj tzan tpaj kyaqil te tkꞌulbꞌen aj bꞌaꞌn tzan txik qen. Kyaqil tkꞌulbꞌen telponx te tajwalil nlay mankun bꞌix aꞌox tetz Dios; astilji nlay bꞌantik tzan txik kyqꞌumaꞌ chꞌinwt tzan kykolon kyibꞌ.
21 Komo kye xjal kyebꞌenky tuq ikxji tiꞌj te Qtata Dios, per kꞌontiꞌl oqet kyjiqꞌbꞌaꞌ iktzaꞌ Qtata Dios, bꞌix kꞌontiꞌl oxik ksiꞌ pixon tetz. Bꞌix tzan tpaj nini te kywiꞌ kꞌontiꞌl nꞌoken tzan kybꞌisun galan, bꞌix tuj kyanim kꞌontiꞌl owel kynikyꞌ chꞌinwt, bꞌix qlolj tuj kywitz. 22 Nkyqꞌumaꞌ tuq bꞌan list-eꞌ per oje tzꞌok te kywiꞌ bꞌan tont. 23 Bꞌix okaj ksiꞌ tzan kynaꞌon te Qtata Dios aj mas bꞌan tbꞌanil twitz kyaqil bꞌix itzꞌoj te jun-eleꞌx, bꞌix ojaw kkyꞌixpuꞌ tzan kynaꞌon titzbꞌalil xjal aj nkyeponaj, bꞌix titzbꞌalil pichꞌ bꞌix tidiꞌchq txkup kaj kyoq bꞌix txkup aj cha nkyexik jilin twitz txꞌoꞌtxꞌ. 24 Ntons astilji te Qtata Dios ekaj tkolaꞌ tzan kykꞌulun tiꞌchq nyaꞌtx galan aj nꞌel tganiꞌ te kyanim, tzan tel kyin kkyꞌexawx, tiꞌchq nyaꞌtx galan nkykꞌuluꞌ kyibꞌkyibꞌx tukyꞌi kchiꞌjel. 25 Ojaw kkyꞌixpuꞌ te bꞌanꞌax tiꞌj te Qtata Dios tukyꞌi te aj nyaꞌtx bꞌanꞌax, bꞌix oqet kynaꞌoꞌ, oqet kyokslaꞌ te aj cha kꞌulumeꞌ; kꞌontiꞌl oqet kyokslaꞌ te Tzꞌaqol, per a te Tzꞌaqol te aj jiqꞌbꞌaꞌ te jun-eleꞌx. ¡Ikxjikixiꞌ!
26 Ntons tzan tpaj kyaqil ntzani, te Qtata Dios ekaj tkolaꞌ tzan kxik tuj kyaqil aj eqꞌbꞌil kkyꞌexaw. Kye xuj kꞌontiꞌl nqet kyen kyibꞌ tukyꞌi jun ichan sinoke xuj tukyꞌi xuj. 27 Ax kye ichan ojaw kkyꞌixpuꞌ titzaꞌ tuq kykajlen siꞌ tzan tqet kyen kyibꞌ tukyꞌi jun xuj, ojakul kygan tzan kykꞌulun tiꞌchq eqꞌbꞌil kyꞌexawil, oqet kyen kyibꞌ ichan tukyꞌi ichan bꞌix ikxji owok kyen xhchoꞌnal tzan tpaj kykꞌulbꞌen nyaꞌtx galan. 28 Komo kꞌontiꞌl oqet tuj kywitz tzan tqet kyjiqꞌbꞌaꞌ Qtata Dios, yaji tetz ekaj tsiꞌ tzan kybꞌisun jun kynabꞌl bꞌan kꞌontiꞌl token tzan kykꞌulun tidiꞌchq nyaꞌtx galan. 29 Kyetz maꞌtx kykꞌuluj tidiꞌchq nyaꞌtx galan kxol: pur kꞌajajbꞌilj tuj kyanim, ax nꞌel kyqꞌajabꞌ tiꞌj te aj at te junky, nkyetzeqtik tzan kykꞌulun nyaꞌtx galan, cha kyqꞌojinqet tzan tpaj aj at te junky, nkyekansan txqꞌanky, cha kywululunqet, nqet kyeqꞌiꞌ junky, list-eꞌ tzan kykꞌulun nyaꞌtx galan, chimol yoleꞌ, 30 nkyeyolin nyaꞌtx galan tiꞌj junky, nꞌok kyqꞌojiꞌ Qtata Dios, nꞌok kywulkꞌaꞌ junky, nqet kchalaniꞌ kyibꞌ, nqet kyjiqꞌbꞌaꞌ kyibꞌ, cha kxkonolinqet titzaꞌ tzan kykꞌulun nyaꞌtx galan, kꞌontiꞌl nkyeꞌokslan kytat, 31 kuch-eꞌ, kꞌontiꞌl nkyekꞌulun iktzaꞌ aj ojetq kyyolij, kꞌontiꞌl nqet kyganiꞌ abꞌlkyetz, kꞌontiꞌl nloꞌet kykꞌuꞌj tiꞌj junky. 32 Kyetz kyebꞌen te Qtata Dios okaj tqꞌumaꞌ tzan kynaj kye aj nkyekꞌulun te ja ntzani, per kyetz nkykꞌuluꞌ kyaqil ja ntzani bꞌix nkyechalaj oj kykꞌulun kye txqꞌanky iktzaꞌ kyetz nkykꞌuluꞌ.