28
Aj Tpon Te Paꞌk Tuj Malt
1 Ntons aj ojetq tuq qolibrina, owok qchaꞌoꞌna te txꞌoꞌtxꞌ Malt tbꞌi, jun txꞌoꞌtxꞌ nim aꞌ kyaqil palaj. 2 Kye aj nkyenajan tuq txini, kyetz bꞌan galan enabꞌlin qukyꞌila. Komo ajun jabꞌ tuq bꞌix ajun xhchewal, ntons kyetz oqet kybꞌichkꞌaꞌ jun qꞌaqꞌ bꞌan nim te jqꞌex, oꞌok kyukꞌleꞌna qꞌexnon.
3 Te Paꞌk ojetq tuq tzaj xhchimoꞌ txqꞌan kyꞌixhlabꞌ, ikjaꞌn tuq tox tsiꞌ tuj qꞌaqꞌ, tuj te kyꞌixhlabꞌ owetz oqik jun kan tzan te kyaq bꞌix owok tunlet tiꞌj tqꞌabꞌ te Paꞌk. 4 Ya kye aj nkyenajan tuq tzi oxik kyen te kan atok tuq tiꞌj tqꞌabꞌ te Paꞌk, nkyeyolin tuq kyibꞌkyibꞌx ikxjani: “Bꞌanꞌax te ja xjalni tetz jun kansal xjal-alo. Anke ma librin tuj te nim aꞌ per tetxk tzan tnaj, kꞌontiꞌl ntzoqpjik tzan tanqꞌin.” 5 Per te Paꞌk owel tkyitoꞌ te kan tiꞌj tqꞌabꞌ tuj te qꞌaqꞌ bꞌix kꞌontiꞌl tidiꞌ okyꞌik tiꞌj. 6 Kyetz cha nkyeꞌiyon tuq janikꞌor oxeꞌl mal xhchiꞌjel qatzun oqtel tuq tilan derepentji bꞌix okamel. Per ya ma kyꞌik nim tuj bꞌix kꞌontiꞌl tuq tidiꞌ nkyꞌik tiꞌj, yaji kye xjal tzi, ojaw kkyꞌixpuꞌ titzaꞌ tuq nkyebꞌisun tiꞌj bꞌix nkyqꞌumaꞌ tuq qa tetz jun dios.
7 Ntons tuj aj luwarji at tuq jun xjal tbꞌi Públio, a tetz te twitzaleꞌ tuj aj luwarji, bꞌix at tuq nim xtxꞌoꞌotxꞌ tzi. Tetz oqet tkꞌamoꞌna tuj tjay bꞌix otzaj tzi qposadna bꞌix oqet tkꞌuluꞌ kwentna galan oxe qꞌij. 8 Yaji te stat te Públio atqet tuq tjaqꞌ xnoqꞌl tzan tpaj yabꞌ tuq tukyꞌi kyaq bꞌix kyikꞌoj. Ntons te Paꞌk owox aj jaꞌ tuq tetz atqet, bꞌix ya ma mankun txnaqꞌtzan, oqet tsiꞌ tqꞌabꞌ tajsik bꞌix te tij obꞌantik. 9 Ya ma kyꞌik kyaqil ntzani, kyaqil kye yabꞌ tuj aj luwar nkyepon tuq tukyꞌi Paꞌk bꞌix nkyeqet tuq qꞌanaꞌ. 10 Kyetz oqet kyena bꞌan galan bꞌix ya ma qoꞌexna tzi, otzaj ksiꞌ kyaqil aj presis tuq tuj qbꞌeya.
Aj Tpon Te Paꞌk Tuj Amaqꞌ Rom
11 Ya ma kyꞌik oxe qyaꞌ txini, oxikna tuj jun bark aj tzajnaq tuq Alejandriy aj ojetq tuq kaj txini te jabꞌalil. Atok tuq tiꞌj te bark jun titzbꞌalil kyiꞌj kye dios aj yuxheꞌ Cástor bꞌix Póluks. 12 Bꞌix ya ma qopona Sirakus, jun amaqꞌ stziꞌ te nim aꞌ, tzi oqetena oxe qꞌij. 13 Yaji kyebꞌayleꞌ oxikna xtxaꞌm-eleꞌ te aꞌ, opona tuj amaqꞌ Rejy. Ya ma kyꞌik jun qꞌij qbꞌetbꞌena, ojaw jun kyaqꞌiqꞌ galan tuj qbꞌeya, jun kyaqꞌiqꞌ iktzaꞌ kyaqꞌiqꞌ tuj kwares,a bꞌix tuj tkabꞌiꞌ qꞌij opona Puteóli. 14 Tuj aj luwarji ateꞌ tuq junjun qerman txini bꞌix okaj kyukꞌleꞌna tzan jkajtena tuq kyukyꞌiꞌl bꞌix okajtena wuq qꞌij. Bꞌix ikxji kyebꞌayleꞌ opona max Rom. 15 Kye qerman aj Rom, ya ma tzꞌok kchaꞌoꞌ qiꞌja, kyetz ebꞌajꞌul kanol qetza max tuj te luwar aj tbꞌi Ox Posad bꞌix aj nꞌok qꞌumaꞌ Apio aj jaꞌ nꞌok kchimoꞌ kyibꞌ kye xjal. Te Paꞌk ya ma kyexik teꞌeꞌ, ochalaj bꞌix oxik tsiꞌ pixon te Qtata Dios.
Aj Tpakbꞌan Te Paꞌk Tuj Amaqꞌ Rom
16 Aj qpona Rom, te kapitanb kyiꞌj kye soldad ostzoqpij tzan tnajan te Paꞌk xhchukel tuj jun jay, per tzan sten jun soldad xbꞌuqil tetz. 17 Ya ma kyꞌik oxe qꞌij, te Paꞌk eꞌok xhchimoꞌ kye aj tijajil Israel aj at tuq nim kyajwalil, bꞌix oxik tqꞌumaꞌ kyetz ikxjani: “Waq erman, wetz kꞌontiꞌl oqet nkꞌuluꞌ jun nyaꞌtx galan kyiꞌj kye qxjalil ni tiꞌj te aj eqꞌiꞌ qitzaꞌ iktzaꞌx kye qijajil oqtxiꞌ. Wetz kꞌontiꞌl wil bꞌix maꞌtx kyinxik qꞌapoꞌ pres max Jerusalen tuj kyqꞌabꞌ kye aꞌeꞌ aj Rom. 18 Ya ma tzꞌokbꞌaj kchaꞌoꞌ kyaqil wiꞌj, kygan tuq tzan nxik ktzoqpiꞌ tzan tpaj kꞌontiꞌl owoknoj jun wil kyitzaꞌ aj presis-wit tzan nkamik. 19 Per kye qxjalil aj tijajil Israel ebꞌajjaw labꞌun wiꞌj. Astilji wetz nqanij tzan nkolon wibꞌ twitz te César [aj twitzaleꞌ kyiꞌj kye kꞌulul mandad, tzan tyolin tetz qa at wil qa kꞌontiꞌlji],* nyaꞌtx tzan tpaj at-wit tidiꞌ oxeꞌl nqꞌumaꞌ aj nyaꞌtx galan kyiꞌj kye qxjalil. 20 Astilji wetz ma kxtzaj wukꞌleꞌ tzan etok wen bꞌix tzan nyolin etukyꞌiꞌl, tzan tpaj wetz loꞌik nkꞌuꞌj [tiꞌj te Koloyon aj Qꞌumankaj Oqtxiꞌ] parej iktzaꞌx kye aj qijajil Israel oqtxiꞌ, bꞌix astilji wetz kꞌalomin tukyꞌi kaden.” 21 Ntons kyetz oxik kyqꞌumaꞌ ikxjani: “Qetza kꞌontiꞌl ojkꞌamojna jun uꞌj aj tzajnaq-wit Judey aj nyolin-wit awiꞌj, bꞌix nijunwt kye qerman aj oje kyeꞌul txini oje tzaj kyqꞌumaꞌ-wit jun tidiꞌ aj nyaꞌtx galan awiꞌj. 22 Qetza tuj qnabꞌl bꞌaꞌn tzan awok qchaꞌoꞌna aj nꞌabꞌisuꞌ yatz tiꞌj aj relijyon man akꞌaꞌj, komo jaꞌchq kye xjal nkyeyolin nyaꞌtx galan tiꞌj.”
23 Ikxji okaj ksiꞌ jun qꞌij, bꞌix eꞌul kyꞌilaꞌj xjal aj jaꞌ tuq tetz nnajan. Te Paꞌk nxik tuq tpakbꞌaꞌ tiꞌj te tumeꞌl titzaꞌ tzan kykaj tuj tqꞌabꞌ Qtata Dios, owaqꞌik qꞌeqoꞌ bꞌix max qonikꞌan nꞌok il tuq nxik tqꞌumaꞌ xtxolil tiꞌj Jesus tukyꞌi te Kawbꞌil [aj oqet stzꞌibꞌaꞌ] Moisés bꞌix tukyꞌi te aj oqet ktzꞌibꞌaꞌ kye aj yolil tyol Dios oqtxiꞌ. 24 Junjun nxik tuq kyokslaꞌ te aj ntyoliꞌ, per kye txqꞌanky kꞌontiꞌl tuq nxik kyokslaꞌ. 25 Kye xjal nyaꞌtx tuq dyakwerd ateꞌ kxolx, bꞌix kyebꞌayleꞌ owaqꞌik tzan kyaj junjun. Yaji te Paꞌk oxik tqꞌumaꞌ [kye aj kꞌontiꞌl tuq nkyeꞌokslan] ikxjani: “Bꞌanꞌax te aj otyolij te Txew Dios tukyꞌi te Chay aj yolil tyol Dios. Tetz oxik tyoliꞌ tukyꞌiꞌl kyiꞌj kye aꞌeꞌ etijajil oqtxiꞌ ikxjani: 26 “Pax kxol ja xjalni bꞌix intxik aqꞌumaꞌ: ‘Owokel echaꞌoꞌ [npakbꞌalil], per nlay tzꞌox tuj ewiꞌ; bꞌix owokel eteꞌeꞌ [nkꞌulbꞌen], per nlay tzꞌel enikyꞌ tiꞌj. 27 Komo kyetz kyanim nyaꞌtx dispwest tzan nqet kyokslaꞌ, te kxkyin bꞌan lamoꞌ, bꞌix kywitz bꞌan txayiꞌ. Ikxji kꞌontiꞌl nkyekaꞌyin tukyꞌi kywitz, kꞌontiꞌl nkyechaꞌon tukyꞌi kxkyin, kꞌontiꞌl nꞌox tuj kywiꞌ tukyꞌi jun tkꞌuꞌjlal. Ikxji nlay kyeꞌokslan wiꞌj, bꞌix nlay kyeqet nqꞌanaꞌ.’ ”* 28 Instzaj echaꞌoꞌ ntzani: Te tumeꞌl titzaꞌ te Qtata Dios nqoqet tkoloꞌ nxik qꞌumlet kye xjal aj nyaꞌtx tijajil Israel [bꞌix kyetz nkyeꞌokslan].” 29 [Ya ma xik tqꞌumaꞌ tetz ikxji, kye aj tijajil Israel kyebꞌayleꞌ ebꞌajꞌaj bꞌix bꞌan nkyewululun tuq kxol.]c
30 Ntons, te Paꞌk okajten kabꞌeꞌ aqꞌbꞌi kabal tuj te jay aj jaꞌ tuq nnajan per nchojon tuq, bꞌix tzi nkyetkꞌamoꞌ tuq kyaqil kye aj nkyepon tuq qꞌolbꞌel tetz. 31 Tukyꞌi jun tkꞌuꞌjlal tetz nxik tuq tpakbꞌaꞌ te tpakbꞌalil tiꞌj te tumeꞌl titzaꞌ tzan kykaj tuj tqꞌabꞌ Qtata Dios, bꞌix nxik tuq txnaqꞌtzaꞌ tiꞌj te Qajaw Jesukrist, bꞌix nijunwt tuq abꞌl nꞌel in gan tetz.