Te Tbꞌay Uꞌj Stzꞌibꞌen Paꞌk Kye Qerman Aj Amaqꞌ Korint
1
Jun Limbꞌil Kye Aj Korint
1 Wetz aꞌin Paꞌk aj inxik ukꞌleꞌ tzan wok tkyꞌixel te Kristo Jesus tzan tpaj ikxji tgan tuq te Qtata Dios, ntons wetz junx tukyꞌi te qerman Sóstenes 2 nqet ntzꞌibꞌaꞌ ja uꞌj ntzani te etetz waq ermana aj amaqꞌ Korint,* etetz aj oje kxkaj saq tuj twitz Qtata Dios tzan tpaj te Qajaw Jesukrist, etetz aj ukꞌlemix tzan ekaj pawaꞌ aꞌox te Qtat junx kyukyꞌi kyaqil kye qerman jaꞌchq aj nkyexnaqꞌtzan te Qajaw Jesukrist, te Jesukrist aj Etajawil etetz bꞌix ax Qajawil qetza. 3 Tzaj siꞌxwit jun nim bꞌan galan etajsik ekyaqil etetz bꞌix qet chewsaꞌxwit ekꞌuꞌj tzan te Qtata Dios bꞌix te Qajaw Jesukrist.
Tidiꞌchq Bꞌan Galan Oje Tzaj Siꞌ Qetz Tzan Tpaj Te Jesukrist
4 Wetz bꞌajqꞌij nxik nsiꞌ pixon te Qtata Dios etiꞌj etetz tzan tpaj te nim bꞌan galan aj oje tzaj tsiꞌ etetz tzan tpaj mojbꞌaꞌ etibꞌ tukyꞌi Kristo Jesus. 5 Komo junx atix tukyꞌiꞌl, tetz oje tzaj tsiꞌ tidiꞌchq bꞌan galan tuj etanim, komo bꞌaꞌn tzan eyolin tbꞌanil bꞌix oje tzꞌel enikyꞌ tiꞌj tidiꞌchq. 6 Ikxji te tpakbꞌalil aj owok echaꞌoꞌ tiꞌj te Krist oje tzꞌok en bꞌan bꞌanꞌax exol. 7 Ikxji kꞌontiꞌl npaltin te etetz chꞌinwt tiꞌj etajbꞌen tzan kyok jwert kye qerman tukyꞌi Qtata Dios, man nkxꞌiyon tukyꞌi jun tkꞌuꞌjlal tzan tulky te Qajaw Jesukrist. 8 Tetz otkꞌuluꞌtz tzan eten bꞌan jwert max oj tul te jwisy, tzan kꞌon exik poqoꞌ oj tul tetz. 9 Te Qtata Dios jun yolin bꞌix okxtzaj tukꞌleꞌ tzan eten junx tukyꞌi te Tkꞌwaꞌal, aj Jesukrist aj Qajawil.
Kꞌontiꞌl Tzan Tqet Qpawaꞌ Qibꞌ Kyukyꞌi Txqꞌanky Qerman
10 Erman waq, tukyꞌi tbꞌi te Qajaw Jesukrist wetz oxeꞌl nqꞌumaꞌ jun tumeꞌl etetz tzan eten dyakwerd exolx bꞌix kꞌon qet epawaꞌ etibꞌ exolx. Peꞌetanqꞌin waq galan exolx tukyꞌi jun enabꞌl parej ekyaqil bꞌix peꞌeten dyakwerd tiꞌj te aj nꞌebꞌisuꞌ. 11 Komo wetz oje tzꞌok nchaꞌoꞌ etiꞌj etetz waq erman, otzaj kyqꞌumaꞌ kye aj tuj tjay te Kloey, at qꞌoj exol etetz bꞌix nqet epawaꞌ etibꞌ exolx. 12 Wetz nꞌok nchaꞌoꞌ ateꞌ junjun exol etetz nkyqꞌumaꞌ ikxjani: “Wetz aꞌin te Paꞌk.” Bꞌix junjunky nkyqꞌumaꞌ: “Wetz aꞌin te Pol.”b Junjunky nkyqꞌumaꞌ: “Wetz aꞌin te Xhpeꞌy.”* Bꞌix junjunky nkyqꞌumaꞌ: “Wetz aꞌin te Jesukrist.” 13 ¿Tiꞌtzun? ¿Pawaꞌ petzun tibꞌ te Krist? ¿A petzun te Paꞌk te aj owok klabiꞌ twitz krus tzan epaj? ¿Ojaw siꞌ aꞌ petzun ewiꞌ tukyꞌi tbꞌi te Paꞌk? 14 Wetz nxik nsiꞌ pixon te Dios tzan tpaj kꞌontiꞌl ojaw nsiꞌ aꞌ kywiꞌ nijunwt exol etetz, sinoke aꞌox te Krisp* bꞌix te Gay.* 15 Ikxji nijunwt exol etetz bꞌaꞌn tzan tyolin qa aꞌin injaw sin aꞌ twiꞌ tukyꞌi nbꞌi. 16 Ah nyeꞌ, ajnaꞌl ntzaj nnaꞌoꞌ, ojaw nsiꞌ aꞌ kywiꞌ kye aj tuj tjay te Estéfan,* per kꞌontiꞌl ntzaj nnaꞌoꞌ qa ojaw nsiꞌ aꞌ twiꞌ junky xjal exol tzi. 17 Wetz kꞌontiꞌl intzaj tlajoꞌ Krist swal aꞌ kywiꞌ xjal sinoke pakbꞌal te tpakbꞌalil galan, bꞌix nyaꞌtx cha tukyꞌi junjun yol aj bꞌan tbꞌanil tok chaꞌon; ikxji tzan kꞌon tok chagan te tkamlen te Qajaw Krist twitz krus.
Tiꞌj Jesukrist Nꞌok Qeꞌeꞌ Tajwalil Te Qtata Dios
18 Tuj kywitz kye aj nkyexiknaj, te tpakbꞌalil tiꞌj te tkamlen [Jesus] twitz krus naqe cha kꞌontiꞌl tidiꞌ token; per yatzun qetz aj kolomoꞌ aꞌoꞌni, [nꞌel qnikyꞌ te nini jun] tajwalil te Qtata Dios. 19 Iktzaꞌx tzꞌibꞌankaj [tuj Tuꞌjal Dios oqtxiꞌ] ikxjani: “Wetz owelal win kynabꞌl kye aj at nim kynabꞌl, bꞌix kye aj bꞌan list-eꞌ owelal win kyaqil titzaꞌ nkyebꞌisun.”* 20 Ntons ¿jaꞌ ateꞌ kye aj bꞌan list-eꞌ? Bꞌix ¿jaꞌ ateꞌ kye aj xnaqꞌtzal Kawbꞌil? Bꞌix ¿jaꞌ ateꞌ kye aj nkyewululun cha aꞌox tiꞌj tidiꞌchq tzani twitz txꞌoꞌtxꞌ? ¿Tiꞌtzun, nyaꞌtx bꞌanꞌax te Qtata Dios oje qet tyekꞌuꞌ te kynabꞌl kyetz kꞌontiꞌl token?* 21 Te Qtata Dios oqet tbꞌisuꞌ bꞌan tumeꞌl tzan kꞌon tok kyotzqilaꞌ kye xjal te tetz tukyꞌi kynabꞌlx kyetz, sinoke oqet tbꞌisuꞌ tzan tkolon kyiꞌj kye aj nkyeꞌokslan tiꞌj iktzaꞌ nyolin te tpakbꞌalil galan aj nxik pakbꞌlet, anke te tpakbꞌalilni nꞌel tuj kywitz junjun iktzaꞌ cha jun tidiꞌ aj kꞌontiꞌl token. 22 Kye xjal aj tijajil Israel kygan tzan tok kyen jun labꞌal tukyꞌi nim tajwalil Qtata Dios tzan tok kyen qa bꞌanꞌax, bꞌix yatzun kye aj nyaꞌtx tijajil Israel, kyetz nkyejoyon jun tumeꞌl cha tzan stzꞌaqet mas kynabꞌl. 23 Per yatzun qetz, nqopakbꞌan te tpakbꞌalil tiꞌj te Krist aj owok klabiꞌ twitz krus. Te ntzani nꞌok kye aj tijajil Israel iktzaꞌ jun abꞌj aj nkyejaw xpetkꞌan tiꞌj,* bꞌix kye aj nyaꞌtx aj tijajil Israel, kyetz tuj kynabꞌl te ja ntzaꞌn cha jun tontwil. 24 Per kye aj ukꞌlemeꞌ tzan te Qtata Dios kxol kye aj tijajil Israel bꞌix kxol kye aj nyaꞌtx aj tijajil Israel, kxol kykabꞌil tijajil xjal, nꞌok qen tiꞌj te Krist tajwalil te Qtata Dios, bꞌix ax tiꞌj tetz nꞌok qen te tumeꞌl titzaꞌ te Qtata Dios nqet tbꞌisuꞌ tukyꞌi jun tnabꞌl bꞌan tumeꞌl. 25 Komo te aj nkybꞌisuꞌ kye xjal tiꞌj te tkꞌulbꞌen te Qtata Dios qa kꞌontiꞌl token, per kebaser te tkꞌulbꞌenni a te aj mas bꞌan galan twitz kyaqil aj nkybꞌisuꞌ kye xjal. Bꞌix te aj nkybꞌisuꞌ tiꞌj tajwalil Qtata Dios qa nyaꞌtx nim, a te aj mas bꞌan nim twitz kyaqil kyajwalil kyetz.
Te Qtata Dios Oꞌel Tjoyoꞌ Anke Kꞌontiꞌl Tidiꞌ Bꞌaꞌn Qitzaꞌ
26 Instzaj enaꞌoꞌ waq erman titzaꞌ tuq atix aj etzaj ukꞌleꞌ etetz tzan te Qtata Dios. Nyaꞌtx tuq kyꞌilaꞌj etetz bꞌan list aꞌix tuj kywitz kye xjal, bꞌix nyaꞌtx tuq kyꞌilaꞌj etetz aj at nim etajwalil, bꞌix nyaꞌtx tuq tlimaqal xjal aꞌix. 27 Per te Qtata Dios eꞌel tjoyoꞌ kye aj tuj kywitz kye xjal cha tont-eꞌ, tzan tel tin kkyꞌexaw kye aj tuj kynabꞌlx kyetz bꞌan list-eꞌ. Bꞌix eꞌel tjoyoꞌ kye aj tuj kywitz kye xjal kꞌontiꞌl kyajwalil, tzan tel tin kkyꞌexaw kye aj at nim kyajwalil tzani twitz txꞌoꞌtxꞌ,* 28 bꞌix eꞌel tjoyoꞌ kye aj nkyeꞌel ikꞌoꞌ bꞌix kye aj kꞌontiꞌl nkyeqet en galan tzan kye xjal, bꞌix owel tjoyoꞌ te aj kꞌontiꞌl at* tzan tpon najsaꞌ kyaqil aj nim token tuj kywitz kye xjal. 29 Ikxji oqet tkꞌuluꞌ te Qtata Dios tzan kꞌon tqet tjiqꞌbꞌaꞌ tibꞌ nijunwt xjal tuj twitz. 30 Tzan tpaj te aj oqet tkꞌuluꞌ Qtata Dios, etetz mojbꞌaꞌ etibꞌ tukyꞌi Kristo Jesus; komo te Krist [oje tzul kolol te qetz] tzan tpaj ikxji oqet tbꞌisuꞌ te Qtata Dios tukyꞌi jun tumeꞌl bꞌan galan, bꞌix a tetz te aj nkꞌulun tzan tel in qchoj, bꞌix tzan jkaj pawaꞌ aꞌox te Qtat, bꞌix a tetz te aj nkolon te qetz. 31 Komo iktzaꞌx tzꞌibꞌankaj [tuj Tuꞌjal Dios oqtxiꞌ] ikxjani: “Abꞌl te aj tgan tzan tqet tjiqꞌbꞌaꞌ tibꞌ tiꞌj jun tidiꞌ, mejor intqet tjiqꞌbꞌaꞌ tibꞌ tiꞌj Qajawil.”*