Te Tkabꞌiꞌ Uꞌj Stzꞌibꞌen Paꞌk Kye Qerman Aj Amaqꞌ Korint
1
Jun Limbꞌil Kye Aj Korint Bꞌix Akay
1 Wetz aꞌin Paꞌk tkyꞌixel Qajaw Jesukrist, tzan tpaj ikxji tgan tuq te Qtata Dios. Wetz tukyꞌi te qerman Timotey, qetza nqet qtzꞌibꞌaꞌna te etetz ermana aj atikxqet Korint, bꞌix kye kyaqil kye txqꞌanky qerman aj pawameꞌ te Qtata Dios aj nkyenajan tuj tkwentil Akay. 2 Qtata Diosxwit bꞌix te Qajaw Jesukrist tzaj ksiꞌxwit jun nim bꞌan galan etajsik ekyaqil etetz bꞌix qet kchewsaꞌxwit ekꞌuꞌj.
Aꞌox Te Qtata Dios Bꞌaꞌn Tzan Tonen Qiꞌj Oj Tok Qen Twitz Xhchoꞌnal
3 Qet jiqꞌbꞌaꞌxwit te Qtata Dios; aji tetz te Stat Qajaw Jesukrist, aji tetz te Qtat aj nꞌok loꞌet tkꞌuꞌj qiꞌj, bꞌix a tetz Dios aj njaw tin jkꞌuꞌj. 4 Tetz njaw tin jkꞌuꞌj tuj kyaqil xhchoꞌnal aj nꞌok qen, bꞌix ikxji tzan tjaw qin kykꞌuꞌj kye txqꞌanky aj nꞌok kyen twitz xhchoꞌnal iktzaꞌx qetz njaw in jkꞌuꞌj tzan te Qtat. 5 Qetz nꞌok qen nim xhchoꞌnal iktzaꞌx okyꞌik tiꞌj te Qajaw Jesukrist, per axkix tetz njaw tin jkꞌuꞌj nim. 6 Qa qetza nꞌok qen twitz xhchoꞌnal, nini tzan tbꞌantik tjaw qina ekꞌuꞌj bꞌix tzan ekolet; bꞌix qa te Qtata Dios njaw tin jkꞌuꞌj, nini ax tzan tbꞌantik tjaw qina ekꞌuꞌj bꞌix tzan etipan tukyꞌi epasens axkix te xhchoꞌnal aj nkyꞌik qiꞌja. 7 Bꞌix qetza loꞌik jkꞌuꞌjna tukyꞌi jun tkꞌuꞌjlal, oj tok eten twitz xhchoꞌnal iktzaꞌx nꞌok qen qetza, ax etetz ojawel in ekꞌuꞌj iktzaꞌx qetza njaw in jkꞌuꞌj tzan te Qtata Dios.
8 Erman waq, qetza qgana tzan tok echaꞌoꞌ kyaqil aj xhchoꞌnal aj okyꞌik qiꞌja tuj tkwentil Asy. Owok qena twitz jun nim xhchoꞌnal aj nlay bꞌantik tuq tzan qipana, qetza tuj qnabꞌla nlay tuq qoꞌanqꞌina. 9 Qetza tuj qanima oqnaꞌoj iktzaꞌ oqokamelna tuq, per te nini owoken tzan kꞌon tuq tok qwitꞌbꞌaꞌ jkꞌuꞌj qiꞌjxa sinoke tiꞌj te Qtata Dios aj nkyejaw tanqꞌinsaꞌ kye kamnaq. 10 Tetz oqet tkoloꞌna tiꞌj ja kamikyjni bꞌix tzunx oqoqtel tkoloꞌ, bꞌix tiꞌj tetz loꞌik jkꞌuꞌjna oqoqtel tkoloꞌky. 11 Tetz oqoqtel tkoloꞌna tzan tpaj etetz nkxꞌonen qukyꞌila tzan tpaj nkxnaqꞌtzan qiꞌja. Bꞌix tzan tpaj nini kyꞌilaꞌj xjal oxeꞌl ksiꞌ pixon te Qtata Dios tzan tpaj tetz oje tzꞌonen qiꞌja tzan tpaj kxnaqꞌtzbꞌen kyꞌilaꞌj xjal tukyꞌiꞌl.
Titzaꞌ Onabꞌlin Te Paꞌk Kyiꞌj Kye Aj Korint
12 Qetza nqnaꞌoꞌna jun chalajbꞌil tuj qanim tzan tpaj te qanim nyolin maꞌtx qobꞌetna tuj jun tumeꞌl galan twitz ja txꞌoꞌtxꞌni bꞌix pyor exol etetz, bꞌix tukyꞌi jun tkꞌuꞌjlal tuj twitz Qtata Dios. Kyaqil ntzani nyaꞌtx tzan tpaj-wit qetza jun qlistulna, sinoke tzan tpaj te Qtata Dios bꞌan galan nabꞌlin qukyꞌila anke kꞌontiꞌl nqajoꞌ. 13 Tuj kyaqil quꞌuja qetza kꞌontiꞌl tidiꞌ maꞌtx qet qewaꞌna ewitz, kyaqil maꞌtx xik jqꞌumaꞌna etetz,b bꞌix wetz loꞌik nkꞌuꞌj, [jun qꞌij jun tyemp] owokex tuj ewiꞌ bꞌan byenech, 14 anke minaꞌ tel enikyꞌ bꞌan byenech. Ikxji, chaꞌoj tmeltzꞌjik te Qajaw Jesus, etetz okxchalajel qiꞌja iktzaꞌx qetza ajnaꞌl nqochalajna etiꞌj.
15 Ntons, komo ojetq tuq qet nbꞌisuꞌ ikxji tbꞌay, wetz oqet nbꞌisuꞌ tzan npon tbꞌay etukyꞌiꞌl qꞌolbꞌel etetz, bꞌix yaji oj npon etukyꞌiꞌl mas yaj owokel te jun nim bꞌan galan te etetz junkyꞌel. 16 Ikxji tzan nkyꞌik tuq exol etetz aj ikjaꞌn nxik tuj nbꞌey Masedony,* yaji okyinmeltzꞌjel tuq junkyꞌel etukyꞌiꞌl, bꞌix yaji tzan etonen tuq wiꞌj tzan nxik Judey. 17 Etetz tuj enabꞌl aj tqet nbꞌisuꞌ ntzani, kxkyin-alo etetz qa kꞌontiꞌl oqet nbꞌisuꞌ bꞌan byenech. ¿Etetz tuj enabꞌl oj tqet nbꞌisuꞌ jun tidiꞌ nnaꞌnon wanim, cha nqet nbꞌisuꞌ tukyꞌi nnabꞌlx wetz bꞌix ikxji tzan txik nqꞌumaꞌ “oꞌ” per yaji “nlay”? 18 Iktzaꞌx te Qtata Dios tetz jun yolin, ax qetza [jun qoyolina] oj txik jqꞌumaꞌ jun tidiꞌ etetz, kꞌontiꞌl nxik qyoliꞌna tbꞌay “oꞌ” bꞌix yaji “nlay.” 19 Komo te Tkꞌwaꞌal Qtata Dios, aj Jesukrist, aj oje xik pakbꞌlet exol qitzaꞌna wetz tukyꞌi te Silbáno bꞌix te Timotey, tetz kꞌontiꞌl nxik tqꞌumaꞌ “oꞌ” bꞌix yaji “nlay,” sinoke tetz bꞌanꞌax nkꞌulun iktzaꞌx ojetq txik tqꞌumaꞌ. 20 Komo tiꞌj te Qajaw Jesukrist nponkix kyaqil aj oje kaj tsiꞌ te Qtata Dios tyol tiꞌj, bꞌix astilji qetza, chaꞌoj tqet qjiqꞌbꞌaꞌ te Qtata Dios tzan tpaj te Krist, nxik jqꞌumaꞌna “intkyꞌikxwit ikxji” [tzan tpaj dyakwerd atoꞌ tukyꞌiꞌl]. 21 A te Qtata Dios ntkꞌuluꞌ qukyꞌiꞌl bꞌix etukyꞌiꞌl tzan qten jwert tukyꞌi Krist, bꞌix a tetz oꞌel tjoyoꞌna. 22 Bꞌix otzaj tsiꞌ jun techaꞌl qiꞌj, otzaj tsiꞌ te Txew tuj qanim te jun techaꞌl aj telponx bꞌanꞌax kyaqil aj oje xik tqꞌumaꞌ. 23 Ajnaꞌl nxik nqaniꞌ te Qtata Dios tzan tkaj testiw wiꞌj, nxik nsiꞌ nyol wiꞌjx wetz, wetz kꞌontiꞌl inxik exol etetz tuj Korint tzan tpaj kꞌon ngan tuq tzan tok jun nyaꞌtx galan exol. 24 Qetza kꞌontiꞌl nkxꞌok qlajoꞌna titzaꞌ tzan tok ewitꞌbꞌaꞌ ekꞌuꞌj, sinoke cha aꞌox nqoꞌonen etukyꞌiꞌl te jun chalajbꞌil te etetz; komo etetz tzan tpaj nꞌok ewitꞌbꞌaꞌ ekꞌuꞌj tiꞌj Qtata Dios astilji jwert atix tukyꞌiꞌl.