16
Te Paꞌk Ntbꞌisuꞌ Tuq Tbꞌey Max Korint
1 Ntons, tiꞌj te etonbꞌil aj owelal echimoꞌ* kye aj pawameꞌ te Qtata Dios [tuj Jerusalen],* intqet ekꞌuluꞌ iktzaꞌx te tumelil aj oxik nqꞌumaꞌ kye bꞌuchꞌuj qerman aj ateꞌ tuj tkwentil Galasy ikxjani: 2 Te tbꞌay qꞌij tuj te saman, junjunchaq te etetz a tgan tzan tkaj epawaꞌ chꞌin iktzaꞌx janikꞌpon maꞌtx ekꞌuluj ganar bꞌix junjunchaq intqet ekꞌuꞌuꞌ, bꞌix ikxji oj npon wetz eqꞌil tetz, nyaꞌtx maxji ojawel chimlet. 3 Bꞌix oj npon wetz, okyexeꞌl nlajoꞌ tuj Jerusalen tukyꞌi jun uꞌj, kye qerman aj oje kyeꞌel ejoyoꞌ etetz, tzan txik kyin te etonbꞌil. 4 Bꞌix qa wetz presis tzan nxik Jerusalen, okyexeꞌl wukyꞌiꞌl.
5 Wetz okyinpoyon etukyꞌiꞌl per tbꞌay a tgan tzan nkyꞌik tuj tkwentil Masedony, tzan tpaj presis tzan nkyꞌik txini tbꞌay.* 6 Bꞌix qanq okyinkajel etukyꞌiꞌl tzi, qanq okyinkajel kyaqil jabꞌalil, ikxji tzan etonen wukyꞌiꞌl tzan nxik aj jaꞌ presis tzan nxik. 7 Komo kꞌon ngan kyꞌik eꞌel etetz cha jun rat, sinoke ngan tzan nten jun tyemp exol etetz qa ikxji tgan te Qajawil. 8 Per wetz ajnaꞌl okyinkajel tuj Efeso max oj tpon te ninqꞌij Pentecostés 9 tzan tpaj maꞌtx tzꞌoknoj jun tumeꞌl tzan npakbꞌan tzani tzan tok jun bꞌan galan kye kyꞌilaꞌj xjal, anke ateꞌ kyꞌilaꞌj txqꞌanky aj kꞌon kygan.*
10 Bꞌix qa ma pon te Timotey,* intok esiꞌ enabꞌl tzan tnaꞌon galan exol, tzan tpaj tetz ax nꞌaqꞌunan tuj taqꞌun te Qajawil iktzaꞌ wetz. 11 Nijunwt exol etetz owelal ikꞌon tetz, sinoke peꞌetonen tukyꞌiꞌl tzan tul tzani wukyꞌiꞌl tukyꞌi jun chewsbꞌil tuj tanim, komo wetz nkyinꞌiyon tiꞌj junx kyukyꞌi txqꞌanky qerman. 12 Bꞌix tiꞌj te qerman Pol, wetz oqet nwitz twitz tzan txik tuq exol etetz kyukyꞌi kye txqꞌanky qerman; kꞌontiꞌl otbꞌanij tzan txik, per oxeꞌl oj tkanon tiꞌj.
Jun Tkawbꞌil Te Paꞌk Kye Aj Korint
13 Ntons, intok esiꞌ waq enabꞌl, tzan eten jwert, kꞌontiꞌl tzan tkaj esiꞌ tzan tok witꞌlet ekꞌuꞌj tiꞌj te Qtata Dios. Peꞌebꞌet tuj jun tumeꞌl iktzaꞌ ichan aꞌix, bꞌix intetz eten ewitz. 14 Kyaqil aj nqet ekꞌuluꞌ, intqet ekꞌuluꞌ tuj jun tumeꞌl aj nkyeqet eganiꞌ kye qerman bꞌix te Qtata Dios.
15 Erman waq, etetz etebꞌen kye aj tuj tjay te Estéfan, kyetz aꞌeꞌ kye aj bꞌan tbꞌay eꞌokslan tuj tkwentil Akay, bꞌix kyetz ajnaꞌl nkyeꞌaqꞌunan te jun galan te qkyaqil qetz aj pawamoꞌ te Qtata Dios. 16 Wetz ngan tzan txik nqꞌumaꞌ chꞌin etetz tzan kyqet etokslaꞌ kye xjal aj iktzaꞌ kyetz, bꞌix kyaqil kye aj nkyeꞌonen bꞌix nkyeꞌaqꞌunan nim qxol. 17 Wetz nkyinchalaj kyulen te Estéfan* bꞌix te Portunat, bꞌix Akayk, kyetz eꞌul te ekyꞌixel tzan kyonen, 18 ojaw kyin nkꞌuꞌj bꞌix ojaw kyin ekꞌuꞌj etetz; astilji inkyqet eten galan kye xjal aj iktzaꞌ kyetz.
19 Kye bꞌuchꞌuj qerman tuj Asy, kyetz nkyesaman jun limbꞌil te etetz. Te qerman Akiy bꞌix te Xhila bꞌix kye qerman aj nꞌok kchimoꞌ kyibꞌ tuj kyjay, kyetz nkyesaman jun limbꞌil te etetz. 20 Kyaqil kye qerman tzani nxik ksamaꞌ jun limbꞌil te etetz. Peꞌeliman etetz etibꞌx exolx tzi tukyꞌi jun limbꞌil iktzaꞌ bꞌan eterman etibꞌ tzan tpaj te Qtata Dios.b
21 Wetz aꞌin Paꞌk nqet ntzꞌibꞌaꞌ ja limbꞌil te etetz tukyꞌi nqꞌabꞌx. 22 Qa at abꞌl aj kꞌontiꞌl nqet tganiꞌ Qajaw, te tqꞌoj Qtata Dios okajel tajsik.* Te Qajawil chꞌinky tul. 23 Tzaj siꞌxwit etajsik etetz ekyaqil jun nim bꞌan galan tzan te Qajaw Jesus. 24 Wetz nkxqet nganiꞌ nim iktzaꞌ te Kristo Jesus nqoqet tganiꞌ.