15
Tidiꞌ Telponx Tjawlen Anqꞌin Te Krist
1 Erman waq, wetz ngan tzan stzaj nnaꞌoꞌ te etetz te tpakbꞌalil galan aj oxik npakbꞌaꞌ etetz, etetz etokslaj bꞌix ajnaꞌl kꞌontiꞌl nkaj ekolaꞌ. 2 Bꞌix tzan tpaj te aj tpakbꞌalilni etetz kolomix, wen qa bꞌanꞌax okxꞌokslan [tukyꞌi jun tkꞌuꞌjlal]; qa kꞌon, chagan. 3 Wetz oje xik nxnaqꞌtzaꞌ te etetz te aj mas presis aj otzaj xnaqꞌtzaꞌ, bꞌix aj ntzani: Te Krist okamik tzan tpaj te qchoj iktzaꞌx nyolin tuj Tuꞌjal Dios* 4 bꞌix owox muquꞌ bꞌix yaji ojaw anqꞌin tuj toxiꞌn qꞌij iktzaꞌxkix nyolin tuj te Tuꞌjal Dios.* 5 Bꞌix yaji ojaw kanet twitz te Xhpeꞌya bꞌix yaji kywitz kykabꞌlajujil kye tkyꞌixel.b 6 Yaji ojaw kanet bꞌeyx kywitz mas tajsik jwebꞌ oqal (500) qerman, kyꞌilaꞌj kyetz tzunx itzꞌojeꞌ ajnaꞌl bꞌix junjunky oje kyekamik. 7 Yaji ojaw kanet twitz Chaw, yaji kywitz kkyaqil kye tkyꞌixel. 8 Bꞌix yaji mas yaj ojaw kanet nwitz wetz,* wetz aꞌin iktzaꞌ naqe jun kꞌwaꞌl aj inꞌitzꞌjik mas yaj kywitz kye txqꞌanky. 9 Wetz aꞌin kxol kyetz, aꞌin iktzaꞌ aj kꞌontiꞌl nim woken kywitz kye txqꞌanky tkyꞌixel, bꞌix nyaꞌtx nmeres tzan wok qꞌumaꞌ tkyꞌixel Jesus tzan tpaj wetz tbꞌayaꞌ nkyejaw tuq nlajoꞌ kye aj nkyeꞌokslan tuq tiꞌj.* 10 Per tzan tpaj te Qtata Dios bꞌan galan nabꞌlin wukyꞌiꞌl anke kꞌontiꞌl tuq nwajoꞌ, aꞌin iktzaꞌxkix atin ajnaꞌl; bꞌix nyaꞌtx chagan titzaꞌ tetz bꞌan galan nabꞌlin wukyꞌiꞌl tzaj tpaj wetz oje kyinꞌaqꞌunan mas nim kywitz kyaqil kye txqꞌanky, per nyaꞌtx aꞌin wetz sinoke a te Qtata Dios nꞌonen wukyꞌiꞌl. 11 Abꞌl oxik pakbꞌan te etetz nyaꞌtx a te presisji, qa aꞌin qatzun txqꞌankyji, te tpakbꞌalil axkixji aj oxik qpakbꞌaꞌna bꞌix etetz etokslaj.
12 Ntons komo nxik pakbꞌlet te Krist ojaw anqꞌin kxol kye kamnaq, ¿tistil nkyqꞌumaꞌ junjun exol etetz qa kye kamnaq kꞌontiꞌl nkyejaw anqꞌin? 13 Qa kye kamnaq nlay-wit kyejaw anqꞌin [iktzaꞌ nkyqꞌumaꞌ junjun], ntons ax-tal te Krist kꞌontiꞌl ojaw anqꞌin. 14 Bꞌix qa te Krist kꞌontiꞌl-wit ojaw anqꞌin, ntons chagan-tal te aj nxik qpakbꞌaꞌni, bꞌix chagan-tal etetz witꞌlik ekꞌuꞌj tiꞌj. 15 Bꞌix qa ikxji-wit ntons qetza aj nqyoliꞌ nyaꞌtx-tal bꞌanꞌax qitzaꞌna, komo qetza nxik qpakbꞌaꞌna te Qtata Dios ojaw tanqꞌinsaꞌ te Krist. Qa bꞌanꞌaxwit kye kamnaq kꞌontiꞌl nkyejaw anqꞌin, ntons kꞌontiꞌl-tal ojaw anqꞌin te Krist. 16 Komo qa kye kamnaq kꞌontiꞌl-wit nkyejaw anqꞌin, ntons ax-tal te Krist kꞌontiꞌl ojaw anqꞌin. 17 Bꞌix qa te Krist kꞌontiꞌl-wit ojaw anqꞌin, ntons chagan-tal witꞌlikok ekꞌuꞌj tiꞌj bꞌix tzunx-tal at echoj. 18 Bꞌix qa ikxji-wit, ntons kye aj oje kyekamik aj nkyeꞌokslan tuq tiꞌj Krist, kyetz bꞌan perdid-tal ateꞌ. 19 Qa qetz atok jkꞌuꞌj tiꞌj Krist aꞌoxwit te jun qanqꞌin tzani twitz txꞌoꞌtxꞌ, qetz mas bꞌan ekꞌbꞌajil-tal qwitz kywitz kye txqꞌanky.
20 Per yatzun ajnaꞌl te Krist, bꞌan bꞌanꞌax oje jaw anqꞌin kxol kye kamnaq. Ikxji a tetz te tbꞌay aj oje jaw anqꞌin kxol kyaqil kye aj oje kyekamik aj okyejawel anqꞌin bꞌeyx te jun-eleꞌx. 21 Komo iktzaꞌx te kamikyj owul tzani twitz txꞌoꞌtxꞌ tzan tpaj jun xjal,* ax ikxji ajnaꞌl tzan tpaj junky xjal kye kamnaq bꞌaꞌn tzan kyjaw anqꞌin. 22 Komo iktzaꞌx tzan tpaj te Adan qkyaqil nqokamik, bꞌix ax ikxji tzan tpaj te Krist qkyaqil qobꞌajꞌanqꞌiyon. 23 Per kyaqil okyꞌel tuj tumeꞌl, junjunchaq okyejawel anqꞌin; tbꞌay te Krist, yaji qkyaqil qetz aj oje qoꞌokslan tiꞌj te Jesukrist oj tul tetz tkaꞌmjjiꞌn-el. 24 Ntons yaji opoyonaj te twitz txꞌoꞌtxꞌ bꞌix opoyonaj kyaqil kyajwalil xjal bꞌix okyepoyonaj kye aj bꞌaꞌn kyitzaꞌ tuj kyaqꞌiqꞌ, bꞌix yaji tetz okajel tqꞌapoꞌ kyaqil tuj tqꞌabꞌ te Qtata Dios. 25 Komo [te Qajaw Krist] presiskix tzan tkꞌulun mandad max oj kyqet kyaqil kye tajqꞌoj tjaqꞌ toq,* 26 bꞌix te tmankbꞌil aj iktzaꞌ jun tajqꞌoj aj opoyonaj, a te kamikyj. 27 Komo [iktzaꞌ nyolin tuj te Tuꞌjal Dios oqtxiꞌ ikxjani: “Te Qtata Dios], kyaqil oje kaj tsiꞌ tjaqꞌ toq”* [te Qajaw Krist]. Bꞌix oj tqꞌuman qa “kyaqil oje kaj tjaqꞌ toq,” nyaꞌtx telponx ax te Qtata Dios, komo tetz aji te aj okꞌulun tzan tkaj kyaqil tjaqꞌ toq. 28 Bꞌix oj tkaj kyaqil tjaqꞌ toq, yaji ax tetz okajel tqꞌapoꞌ tibꞌ tuj tqꞌabꞌ te Qtata Dios aj otkꞌuluj tzan tkaj kyaqil tjaqꞌ toq, bꞌix ikxji te Qtata Dios okajel tajsik kyaqil. 29 Qa ikxji, kye aj njaw siꞌ aꞌ kywiꞌ kkyꞌixel kye kamnaq, ¿titzaꞌ okyeteyon qa kye kamnaq kꞌontiꞌl nkyejaw anqꞌin? ¿Tistil njaw siꞌ aꞌ kywiꞌ tzan kypaj kyetz? [Komo kye kamnaq okyejawel anqꞌin.] 30 Bꞌix ¿tistil qetz kyaqil qꞌij njkꞌamoꞌ tzan tok qen te nyaꞌtx galan aj nkyꞌik? 31 Erman waq, bꞌajqꞌij wetz chꞌinky tuq nkyinkamik, bꞌix dispwest aꞌin tzan tpaj wetz bꞌan nkyinchalaj etiꞌj etetz tzan tpaj te Qajaw Kristo Jesus. 32 Wetz owipaj tidiꞌchq nyaꞌtx galan tzan kye xjal aj kꞌontiꞌl Dios tuj kywitz tuj Efeso,c per ¿tidiꞌ maꞌtx nkambꞌaj tzan tpaj nini? Qa bꞌanꞌax kye kamnaq kꞌontiꞌl nkyejaw anqꞌin, ntons mejor tzan nkꞌulun iktzaꞌx nkyqꞌumaꞌ junjun ikxjani: “Qobꞌajwaꞌan waq bꞌix qobꞌajꞌukꞌan tzan tpaj nchiꞌj qobꞌajkamel.” 33 Intok esiꞌ waq enabꞌl tzan kꞌon eqet eqꞌiꞌ tukyꞌi kyyol aj nxik kyyoliꞌ. “Qa qetz nqobꞌet kyukyꞌi xjal aj nyaꞌtx galan nkyebꞌet, opoyon qnajsaꞌ te galan aj eqꞌiꞌ qitzaꞌ.” 34 Peꞌemeltzꞌjik junkyꞌel tzan tqet ebꞌisuꞌ tuj tumeꞌl bꞌix kꞌon kxjoyon choj; komo junjun exol etetz kꞌontiꞌl kyotzqiꞌ te Qtata Dios. Wetz nxik nqꞌumaꞌ ntzani tzan ekyꞌixwik chꞌin.
35 Ntons, qanq ateꞌ junjun otzajel kchaꞌoꞌ ikxjani: “¿Titzaꞌ nkyejaw anqꞌin kye kamnaq? ¿Titzaꞌ te kchiꞌjel oj kyjaw anqꞌin?” 36 Aj ntzaj echaꞌoꞌ bꞌan tont. Komo jun tidiꞌ aj oqtex awet, te ijaj tbꞌay opoyonaj tzan tjakul te tal awalj. 37 Te aj nqex awet nyaꞌtx a te toq te awalj bꞌeyx sinoke tbꞌay te chꞌi tal ijaj, triw qatzun tidiꞌ junkyji. 38 Yaji te Qtata Dios kyebꞌaꞌ njaw tkyꞌibꞌsaꞌ iktzaꞌ tetz tgan, bꞌix yaji tiꞌj junjunchaq ijaj nꞌel iktzaꞌx a tgan tzan tel. 39 Nyaꞌtx kyaqil aj at kyanqꞌin twitz txꞌoꞌtxꞌ parej kkyaqil. Chuktky kchiꞌjel kye xjal, bꞌix chuktky kchiꞌjel kye txkup, bꞌix chuktky kchiꞌjel kye pichꞌ bꞌix chuktky kchiꞌjel kye kyiy. 40 Ax chuktky kykajlen kꞌuluꞌ kye tidiꞌchq twitz kaꞌj bꞌix chuktky kykajlen kꞌuluꞌ kye tidiꞌchq twitz txꞌoꞌtxꞌ, bꞌix chuktky te bꞌan tbꞌanil te junjunchaq te kyetz. 41 Chuktky te xhchqitzꞌunal te qꞌij, bꞌix chuktky xhchqitzꞌunal te qyaꞌ, bꞌix chuktky kxhqitzꞌunal kye cheꞌw, bꞌix junjunchaq kye cheꞌw chuktky kywitz kye txqꞌanky cheꞌw.
42 Bꞌix ax ikxji okyꞌel oj kyjaw anqꞌin kye kamnaq. Komo te aj nqex muqet, nponaj; yatzun te aj njaw anqꞌin kꞌontiꞌl nponaj. 43 Te aj nqex muqet kꞌontiꞌl token; yatzun te aj njaw anqꞌin, ojawel anqꞌin tukyꞌi jun xhchqitzꞌunal. Te aj nqex muqet, kꞌontiꞌl tbalor, yatzun te aj ojawel anqꞌin, at nim tbalor. 44 Te aj nqex muqet, at jun xhchiꞌjel aj nꞌoken tzani twitz txꞌoꞌtxꞌ; yatzun te aj ojawel anqꞌin, at jun xhchiꞌjel aj nꞌoken tuj kaꞌj. Komo at jun qchiꞌjel tzani twitz txꞌoꞌtxꞌ, ax owokel junky qchiꞌjel aj tuj kaꞌj. 45 Ikxjani tzꞌibꞌankaj [tuj Tuꞌjal Dios]: “Te tbꞌay Adan, tetz jun xjal aj tzani twitz txꞌoꞌtxꞌ bꞌix oxik siꞌ jun tanqꞌin.”* Yatzun te tkabꞌiꞌ Adan [osey te Krist], tetz at xhchiꞌjel tuj kaꞌj bꞌix ntzaj tsiꞌ qanqꞌin.* 46 Per anke ikxji, te qchiꞌjel aj kꞌontiꞌl nponaj, te nini kꞌontiꞌl otzaj siꞌ tbꞌay, sinoke tbꞌay otzaj siꞌ te qchiꞌjel aj nponaj, bꞌix yaji otzajel siꞌ te aj kꞌontiꞌl nponaj. 47 Te tbꞌay ichan [osey te Adan] oqet kꞌuluꞌ tukyꞌi txꞌoꞌtxꞌ bꞌix tetz te tzani twitz txꞌoꞌtxꞌ kixiꞌ, per te tkabꞌiꞌ ichan [osey te Krist] tetz tzajnaq tuq tuj kaꞌj. 48 Kye [kchiꞌjel kyaqil] aj twitz txꞌoꞌtxꞌ, iktzaꞌxkix kye aj twitz txꞌoꞌtxꞌ. Bꞌix kye aj [nkyexik] tuj kaꞌj, [kyetz kchiꞌjel] iktzaꞌxkix te aj tzajnaq tuj kaꞌj. 49 Komo qchiꞌjel qetz ajnaꞌl parej iktzaꞌx xhchiꞌjel te Adan, ntons ax oj qpon tuj kaꞌj qetz otzajel siꞌ junky qchiꞌjel iktzaꞌx te Krist. 50 Wetz ngan tzan txik nqꞌumaꞌ etetz waq erman, te qchiꞌjeld nlay bꞌantik tox tuj kaꞌj aj jaꞌ atqet te Qtata Dios; bꞌix te qchiꞌjel aj nponaj, nlay bꞌantik tzan tanqꞌin te jun-eleꞌx.
51 Per wetz ngan tzan tok echaꞌoꞌ jun tidiꞌ: Nyaꞌtx qkyaqil qetz qobꞌajkamel per qkyaqil qetz qokyꞌixpjel. 52 Cha tuj jun rat, cha tuj jun mutzꞌ,e oj tjaw oqꞌ te tmankbꞌil trompet, kyaqil kye kamnaq okyejawel anqꞌin tukyꞌi junky kchiꞌjel aj nlay ponaj bꞌix qetz aj itzꞌojoꞌ [aj tyempji] qokyꞌixpjel.* 53 Komo te qchiꞌjel aj nponaj owokel jun aj kꞌontiꞌl nponaj, bꞌix te qchiꞌjel aj nkamik owokel jun aj kꞌontiꞌl nkamik. 54 Bꞌix te ja qchiꞌjelni aj nponaj, chaꞌoj tok junky aj kꞌontiꞌl nponaj, bꞌix te ja qchiꞌjel aj nkamik, chaꞌoj tok junky aj kꞌontiꞌl nkamik, ntons opoyon kixiꞌ te yol aj tzꞌibꞌankaj ikxjani: “Te kamikyj oje ponaj tzan tpaj oje qet [tzan te Qajaw Jesukrist].”* 55 “¿Titzaꞌ obꞌantel tzan jqet tzan te kamikyj? ¿Bꞌix titzaꞌ obꞌantel tzan tkꞌulun jun nyaꞌtx galan qiꞌj?”* 56 Komo tzan tpaj te Kawbꞌil [aj oxik tsiꞌ te Qtata Dios te Moisés] nꞌel qnikyꞌ at te qchoj bꞌix tzan tpaj te qchoj nqokamik. 57 Per a tgan tzan txik qsiꞌ pixon te Qtata Dios, tetz nkꞌulun tzan kꞌon jqet tzan te kamikyj, tzan tpaj te Qajaw Krist. 58 Ntons waq erman aj ganimix witzaꞌ, intok esiꞌ enabꞌl, peꞌeten waq jwert tukyꞌi Qajaw bꞌix kꞌon kaj ekolaꞌ, peꞌetaqꞌunan tukyꞌi jun tkꞌuꞌjlal te Qajaw, tzan tpaj etebꞌenky te qaqꞌun tukyꞌi Qajawil nlay ponaj.