14
Te Tumeꞌl Tiꞌj Jun Yol Aj Tzajnaq Tuj Kaꞌj Aj Kꞌontiꞌl Nꞌel Qnikyꞌ Tiꞌj
1 Intok esiꞌ enabꞌl tzan kyqet eganiꞌ txqꞌanky, bꞌix tzan stzaj tsiꞌ Qtata Dios jun etajbꞌen kxol kye qerman,* bꞌix mejor tzan eyolin tyol.a 2 Komo te aj nxnaqꞌtzan tukyꞌi Qtata Dios tuj jun yol aj tzajnaq tuj kaꞌj aj kꞌontiꞌl nꞌel qnikyꞌ tiꞌj, tetz kꞌontiꞌl nyolin kye xjal sinoke nyolin tukyꞌi Qtata Dios, komo nijunwt nꞌel tnikyꞌ tiꞌj te aj nxik tqꞌumaꞌ sinoke tuj tanim nyolin tidiꞌchq aj kꞌontiꞌl nꞌel qnikyꞌ tiꞌj. 3 Per yatzun te jun aj yolil tyol, tetz nyolin kye xjal tzan kyten jwert tukyꞌi Qtata Dios bꞌix tzan txik tnimsaꞌ kykꞌuꞌj, bꞌix tzan txik xhchewsaꞌ kyanim. 4 Jun aj nxnaqꞌtzan tukyꞌi Qtata Dios tuj jun yol aj tzajnaq tuj kaꞌj, cha aꞌox te tetz jun galan; yatzun te aj yolil tyol Dios, tetz tyol nꞌok te jun galan kye kyaqil qerman. 5 Wetz ngan-tal tzan exnaqꞌtzan ekyaqil etetz tuj jun yol aj tzajnaq tuj kaꞌj, per mas ngan tzan eyolin tyol Dios tuj jun yol aj nꞌel qnikyꞌ tiꞌj twitz te oj exnaqꞌtzan tuj yol aj tzajnaq tuj kaꞌj, nini bꞌaꞌn aꞌox qa oxeꞌl qꞌumlet tidiꞌ telponx tzan tok te jun galan kye kyaqil qerman.
6 Erman waq, qa wetz okyinpoyon exol bꞌix okyinyoliyon tuj jun yol aj tzajnaq tuj kaꞌj, ¿titzaꞌ owokel te jun galan te etetz? Owokel te jun galan aꞌox qa oxeꞌl nqꞌumaꞌ te aj otzajel tyekꞌuꞌ te Txew Dios [tidiꞌ telponx], qatzun okyinyoliyon tukyꞌi jun nnabꞌl bꞌan tumeꞌl tiꞌj, qatzun jun tpakbꞌalil aj Txew Dios swal tetz, qatzun tzan txik nxnaqꞌtzaꞌ etetz tiꞌj [tidiꞌ telponx]. 7 Qa jun chinabꞌ iktzaꞌ te ajlaj qatzun te arp aj kꞌontiꞌl tnabꞌl, qa kꞌontiꞌl-wit jun tumeꞌl te twiꞌ junjunchaq te kyetz, ntons nlay tzꞌel qnikyꞌ tiꞌj te bꞌitz aj njatz eqꞌiꞌ tukyꞌi te chinabꞌ qa ajlaj qatzun arpji. 8 Bꞌix qa te twiꞌ te trompet nlay xik chaꞌoꞌ nꞌoqꞌ tukyꞌi tumeꞌl, ntons kye soldad nlay qet kykꞌuluꞌ kyibꞌ tzan kyqꞌojin kyiꞌj kye kyajqꞌoj.b 9 Ntons ax ikxji etiꞌj etetz, qa kꞌontiꞌl nxik eqꞌumaꞌ jun yol aj nꞌel qnikyꞌ tiꞌj, ntons ¿titzaꞌ owelal qnikyꞌ tiꞌj te aj nxik eqꞌumaꞌ? Ikxji chagan nkxyolin.c 10 Bꞌanꞌax ateꞌ kyꞌilaꞌj yol twitz txꞌoꞌtxꞌ, per kyaqil at tidiꞌ telponx. 11 Qa wetz kꞌontiꞌl nꞌel nnikyꞌ tiꞌj kyyol txqꞌanky, wetz aꞌin iktzaꞌ jun laqꞌchik xjal te kyetz bꞌix ax kyetz iktzaꞌ jun laqꞌchik xjal te wetz. 12 Ntons ax ikxji etiꞌj etetz, komo bꞌan mer egan tzan tok eten nim etajbꞌen tukyꞌi te Txew Dios, ntons intok esiꞌ ekꞌuꞌj tzan ekꞌulun nini tzan kyok jwert kye qerman tukyꞌi Qtata Dios.
13 Ntons astilji jun aj nyolin tuj jun yol aj tzajnaq tuj kaꞌj, intxik tqaniꞌ tukyꞌi Qtat tzan stzaj siꞌ tnabꞌl tzan tbꞌantik txik tqꞌumaꞌ kyukyꞌi kye txqꞌanky tidiꞌ telponx. 14 Komo qa wetz nkyinxnaqꞌtzan tukyꞌi Qtata Dios tukyꞌi jun yol aj tzajnaq tuj kaꞌj, wetz wanim nxnaqꞌtzan per te nnabꞌl kꞌontiꞌl nqet tbꞌisuꞌ. 15 Ntons ¿tidiꞌ nkꞌuluꞌtz? Ntons wetz okyinxnaqꞌtzayon tukyꞌi wanim, per ax okyinxnaqꞌtzayon tukyꞌi nnabꞌl; ax okyinbꞌitzayon tukyꞌi wanim per ax okyinbꞌitzayon tukyꞌi nnabꞌl. 16 Qa yatz aꞌox tuj awanim nchyolin yol galan te Qtata Dios, bꞌix qa jun xjal aj nchaꞌon awiꞌj kꞌontiꞌl nꞌel tnikyꞌ tiꞌj ayol, tetz nlay bꞌantik tzan txik tqꞌumaꞌ qa dyakwerdd at tukyꞌi te aj nxik asiꞌ pixon te Dios, tzan tpaj kꞌontiꞌl nꞌox tuj twiꞌ te aj nxik aqꞌumaꞌ. 17 Yatz bꞌanꞌax nxik asiꞌ pixon te Qtata Dios, per yatzun tiꞌj te junky, kꞌontiꞌl nꞌok jun galan te tetz.
18 Wetz nxik nsiꞌ pixon te Qtata Dios tzan tpaj bꞌaꞌn kyinxnaqꞌtzan tuj jun yol aj tzajnaq tuj kaꞌj mas ewitz etetz ekyaqil. 19 Per chaꞌoj tok nchimoꞌ wibꞌ kyukyꞌi qerman, mejor tzan txik nqꞌumaꞌ cha kabꞌe nyol aj nꞌel kynikyꞌ kye qerman tiꞌj, bꞌix nyaꞌtx tzan nyolin bꞌan kyꞌilaꞌj yol aj kꞌontiꞌl nꞌel kynikyꞌ. 20 Etetz waq erman, kꞌon kxꞌok ixneꞌ waq titzaꞌ nkxbꞌisun. Peꞌetok ixneꞌ tiꞌj te nyaꞌtx galan, yatzun titzaꞌ nkxbꞌisun, peꞌetok iktzaꞌ tijxjal. 21 Tuj te Tuꞌjal Dios tzꞌibꞌankaj ikxjani: “‘Wetz okyinyoliyon kyukyꞌi ja xjalni tuj ktziꞌ aj laqꞌchik xjal, bꞌix ax okyinyoliyon kyukyꞌiꞌl tuj junky yol aj minaꞌ tok kchaꞌoꞌ, per ni ikxji, nlay kyinxik kyokslaꞌ,’ kyi te Qajawil.”*
22 Ntons, oj qyolin tuj jun yol aj tzajnaq tuj kaꞌj, nini nꞌoken te jun seny kye aj kꞌontiꞌl nkyeꞌokslan bꞌix nyaꞌtx kye aj nkyeꞌokslan; per oj txik qpakbꞌaꞌ jun tpakbꞌalil aj Txew Dios swal tetz, te nini nꞌoken kye aj nkyeꞌokslan bꞌix nyaꞌtx kye aj kꞌontiꞌl nkyeꞌokslan. 23 Ntons, qa kyaqil kye qerman owokel kchimoꞌ kyibꞌ bꞌix kkyaqil okyeyoliyon tuj jun yol aj tzajnaq tuj kaꞌj aj kꞌontiꞌl nꞌel qnikyꞌ tiꞌj, bꞌix qa ma kyeꞌox xjal aj kꞌontiꞌl nꞌel kynikyꞌ tiꞌj kyaqil ntzani qatzun xjal aj kꞌontiꞌl nkyeꞌokslan, ¿nlay petzun kyeyolin qa etetz cha lok aꞌix? 24 Per yatzun qa kyaqil qerman nkyeyolin tyol Dios [tuj jun yol aj nꞌel qnikyꞌ], bꞌix owokex jun aj kꞌontiꞌl nꞌokslan qatzun jun aj kꞌontiꞌl nꞌel tnikyꞌ tiꞌj kyaqil ntzani, tetz owelal tnikyꞌ tiꞌj te xhchoj bꞌix oqtel tbꞌisuꞌ titzaꞌ at tzan tpaj te aj nkyyoliꞌ. 25 Ntons kyaqil aj ewaꞌ tuq tuj tanim, owelal tnikyꞌ [nyaꞌtx galan te nini], bꞌix oqtel mejlet owokelten naꞌol Qtata Dios, bꞌix ikxji otqꞌumaꞌtz bꞌanꞌax te Qtata Dios atqet exol.
Oj Tok Qchimoꞌ Qibꞌ Naꞌol Qtata Dios A Tgan Tzan Jkꞌulun Kyaqil Tuj Tumeꞌl
26 Ntons erman, ¿titzaꞌ qoteyon tiꞌj te ntzani? Etetz oj tok echimoꞌ etibꞌ, junjunchaq bꞌaꞌn tzan txik ebꞌitzaꞌ jun ebꞌitz, qatzun tzan txik exnaqꞌtzaꞌ txqꞌanky, qatzun tzan txik eqꞌumaꞌ tidiꞌ aj ojetq tqꞌumaj te Qtata Dios tuj etanim, qatzun tzan eyolin tuj jun yol aj tzajnaq tuj kaꞌj, qatzun tzan epakbꞌan tidiꞌ telponx te yol aj tuj kaꞌj. Per kyaqil intbꞌantik tzan kyten jwert kye qerman. 27 Bꞌix oj eyolin tuj jun yol aj tzajnaq tuj kaꞌj, cha inkyyolin aꞌox kabꞌeꞌ qa ox qermanji, jun tbꞌay, yaji junky, a tgan tzan kyiyon kytyemp te junjunchaq, bꞌix a tgan tzan txik qꞌumlet tidiꞌ telponx aj yolji. 28 Bꞌix qa kꞌontiꞌl abꞌl bꞌaꞌn tzan txik tqꞌumaꞌ tidiꞌ telponx te aj nkyyoliꞌ, mejor tzan kꞌon txik kyyoliꞌ chꞌinwt tuj junky yol oj tok echimoꞌ etibꞌ exolx, bꞌix mejor tzan txik kyyoliꞌ tuj aj yol aꞌox tuj kyanim bꞌix tukyꞌi Qtata Dios. 29 Bꞌix ax ikxji kyiꞌj kye aj yolil tyol Dios, inkyyolin cha kabꞌeꞌ qa oxji, bꞌix kye txqꞌanky intxik kyqꞌumaꞌ qa tumeꞌl qa nyaꞌtxji. 30 Per qa te Txew Dios otzajel tswaꞌ jun tpakbꞌalil tuj tanim te junky aj witꞌlik, ntons tbꞌay a tgan tzan tlumet te aj nyolin tzan tyolin te junky. 31 Junjunchaq etetz aj nyolin tyol Dios, a tgan tzan etiyon tzan tlumet te aj nyolin bꞌix yaji tzan tyolin junky, ikxji kyaqil qerman bꞌaꞌn tzan tel kynikyꞌ, bꞌix bꞌaꞌn tzan tnimsan kykꞌuꞌj. 32 Komo jun aj yolil tyol Dios bꞌaꞌn tzan tiyon oj tmankun tyolin te junky bꞌix yaji tzan tyolin tetz. 33 Komo te Qtata Dios nyaꞌtx jun Qtata Dios aj tgan kꞌulun jun tidiꞌ aj kꞌontiꞌl tumelil, sinoke nkꞌulun kyaqil tuj tumeꞌl.
34 Ntons ax iktzaꞌx kxol kyaqil kye bꞌuchꞌuj qerman aj pawameꞌ te Qtata Dios, ntons oj tok echimoꞌ etibꞌ exolx, ax a tgan tzan kylumet kye xuj, kꞌontiꞌl tzan kyyolin sinoke tzan kyokslan iktzaꞌx ntyoliꞌ te Kawbꞌil.* 35 Qa kye xuj kygan tzan tok kchaꞌoꞌ tiꞌj jun tidiꞌ ntons a tgan tzan txik kchaꞌoꞌ te kyichmil tuj kyjay, tzan tpaj nyaꞌtx tumeꞌl qa jun xuj oyoliyon kxol jun bꞌuchꞌuj qerman oj tok kchimoꞌ kyibꞌ. 36 ¿Etukyꞌiꞌl petzun etetz otzaj te tyol Qtata Dios? ¿Bꞌix aꞌox petzun etetz oje kxꞌok chaꞌon tetz? 37 Qa at jun exol etetz aj tetz tuj tnabꞌl tetz jun aj yolil tyol Dios, qatzun tetz tuj tnabꞌl nkꞌulun kyaqil bꞌan tumeꞌl iktzaꞌ te Qtata Dios tgan, ntons owelal tnikyꞌ te aj nxik nqꞌumaꞌni a te Qtata Dios otzaj qꞌuman tetz. 38 Per qa tetz kꞌontiꞌl nꞌokslan tiꞌj, ntons ax tetz kꞌon xik etokslaꞌ. 39 Ntons waq erman, intel eganiꞌ tzan eyolin tyol Dios, ax kꞌon tzꞌel etin gan qa junky oyoliyon tuj junky yol aj kꞌontiꞌl nꞌel qnikyꞌ tiꞌj. 40 Per intqet ekꞌuluꞌ waq kyaqil tukyꞌi tumeꞌl galan bꞌix xtxolil.