13
Te Tumeꞌl Titzaꞌ Tzan Kyqet Qganiꞌ Txqꞌanky
1 Qa wetz bꞌaꞌn kyinyolin tuj jun yol aj nyaꞌtx nyol qatzun jun yol aj nkyeyolin kye ángel, per qa kꞌontiꞌl nkyeqet nganiꞌ txqꞌanky, wetz aꞌin iktzaꞌ jun kꞌuxbꞌil aj cha njaw wokꞌin, qatzun iktzaꞌ jun kꞌuxbꞌila aj cha njaw tzlinun. 2 Qa wetz bꞌaꞌn-wit kyinpakbꞌan jun tpakbꞌalil aj Txew Dios swal tetz, bꞌix qa nꞌel nnikyꞌ-wit kyaqil aj bꞌan kwest tzan tel qnikyꞌ tiꞌj bꞌix qa wotzqiꞌ-wit tidiꞌchq, bꞌix qa bꞌaꞌn-wit tzan tok nwitꞌbꞌaꞌ nkꞌuꞌj bꞌan byenech tiꞌj Qtata Dios tzan tkyꞌik nkyꞌixpuꞌ kye witz,* qa bꞌaꞌn-wit tzan tbꞌantik kyaqil nini witzaꞌ per qa kꞌontiꞌl nkyeqet nganiꞌ txqꞌanky, wetz kꞌontiꞌl woken, [chagan kyaqil nini]. 3 Bꞌix qa oxeꞌl nsipaꞌ-wit kyaqil tidiꞌ wetz kye mebꞌaꞌ xjal bꞌix qa dispwest-wit aꞌin tzan tok siꞌ nqꞌaqꞌbꞌel, per qa kꞌontiꞌl nkyeqet nganiꞌ txqꞌanky, kyaqil nini kꞌontiꞌl token te wetz.
4 Te tumeꞌl titzaꞌ nqet qganiꞌ junky ikxjani: a tgan tzan sten nim qpasens, bꞌix tzan qbꞌekꞌan tiꞌj junky, bꞌix kꞌontiꞌl nꞌok jqꞌojiꞌ junky tzan tpaj tidiꞌ tetz, bꞌix kꞌontiꞌl nqet qjiqꞌbꞌaꞌ qibꞌ bꞌix kꞌontiꞌl nqchalaniꞌ qibꞌ. 5 Bꞌix kꞌontiꞌl nqet jkꞌuluꞌ jun tidiꞌ aj eqꞌbꞌajil kyꞌexawil, kꞌontiꞌl nqobꞌisun aꞌox qiꞌjx qetz, kꞌontiꞌl nqojaw qꞌojlik luwew, bꞌix kꞌontiꞌl nqex qsiꞌ jqꞌoj tiꞌj junky. 6 Kꞌontiꞌl nqochalaj tiꞌj te aj nyaꞌtx galan, per bꞌan nqochalaj tiꞌj kyaqil aj tumeꞌl bꞌanꞌax. 7 A tgan tzan tqet qnajsaꞌ kye txqꞌanky, bꞌix kꞌontiꞌl nkaj qsiꞌ tzan qokslan [te galan], kꞌontiꞌl nkaj qsiꞌ tzan tkaj loꞌet jkꞌuꞌj, bꞌix kyaqil nqipaꞌ. 8 Oj kyqet qganiꞌ kye txqꞌanky, ntons kꞌontiꞌl nkaj qsiꞌ tzan kyqet qganiꞌ. Yatzun oj qpakbꞌan jun tpakbꞌalil aj nswan te Txew Dios tuj qanim, te nini omankuyon bꞌix ax oj qyolin tuj junky yol aj tzajnaq tuj kaꞌj aj kꞌontiꞌl nꞌel qnikyꞌ tiꞌj, bꞌix ax oj tel qnikyꞌ tiꞌj tidiꞌchq, kyaqil nini opoyonaj, per oj kyqet qganiꞌ kye txqꞌanky, nlay ponaj. 9 Komo nyaꞌtx kyaqil nꞌel qnikyꞌ tiꞌj, bꞌix nlay bꞌantik tzan txik qyoliꞌ kyaqil tiꞌj, 10 per oj tpon te aj bꞌan nichꞌinwt nyaꞌtx galan tiꞌj, ntons opoyonaj te aj at ajnaꞌl. 11 Wetz aj man tuq tal kꞌwaꞌl aꞌin, nkyinyolin tuq iktzaꞌ jun kꞌwaꞌl, bꞌix nkyinbꞌisun tuq iktzaꞌ jun kꞌwaꞌl, bꞌix nqet nbꞌisuꞌ tuq tiꞌj jun tidiꞌ iktzaꞌ jun kꞌwaꞌl; per ya ma kyinꞌok tijxjal, okaj nsiꞌ kyaqil aj nini. 12 Ajnaꞌl kꞌontiꞌl nꞌel qnikyꞌ bꞌan byenech, iktzaꞌ nxik qen smujin tuj jun despej, per jun qꞌij owokel qen qetz qwitzaleꞌx [te Qajawil] tukyꞌi kykabꞌil qwitz. Ajnaꞌl wetz webꞌen cha chꞌimuꞌs webꞌen tiꞌj, per yaji owokel wen bꞌan byenech iktzaꞌx wetz otzqimin titzaꞌ.*
13 Ntons, ateꞌ ox tidiꞌ aj kꞌontiꞌl nponaj bꞌix aj ntzanijeꞌ: [jun,] te tumeꞌl titzaꞌ nꞌok witꞌlet jkꞌuꞌj tiꞌj Qtata Dios, bꞌix [junky] te tumeꞌl titzaꞌ loꞌik jkꞌuꞌj tiꞌj, bꞌix [junky] te tumeꞌl titzaꞌ nkyeqet qganiꞌ txqꞌanky; aj ntzanijeꞌ kye kyoxil aj kꞌontiꞌl nkyeponaj per te aj mas presis a te tumeꞌl titzaꞌ nkyeqet qganiꞌ txqꞌanky.