12
Te Qtata Dios Ntzaj Tsiꞌ Qajbꞌen Tzan Qonen Qibꞌx Qxol Tzan Qten Jwert Tukyꞌiꞌl
1 Ntons waq erman, wetz ax ngan tzan tok echaꞌoꞌ chꞌin tiꞌj te qajbꞌen aj ntzaj tsiꞌ te Txew Dios. 2 Etetz etebꞌen, aj minaꞌ tuq etokslan tiꞌj Qtata Dios, etetz jaꞌchq tuq nkxik eqꞌiꞌ tzan etokslan kye kyitzbꞌalil tidiꞌchq aj kꞌontiꞌl nꞌel ktziꞌ. 3 Astilji, wetz ajnaꞌl oxeꞌl nqꞌumaꞌ etetz, nijunwt xjal aj atqex Txew Dios tuj tanim bꞌaꞌn tzan txik tqꞌumaꞌ, “Tiꞌ-wit jun syent tkotz te Jesus.” Bꞌix qa tetz kꞌontiꞌl nyolin tukyꞌi Txew Dios, nlay bꞌantik tzan tyolin, “Te Jesus aji te Qajawil.”
4 Ntons, tidiꞌchq qajbꞌen ntzaj siꞌ, per cha junkix te Txew Dios aj ntzaj sin tetz.* 5 Bꞌix tidiꞌchq tumeꞌl tzan qonen kyukyꞌi kye qerman, per te Qajawil axkix cha jun. 6 Bꞌix ax at kyꞌilaꞌj tumeꞌl titzaꞌ nbꞌantik tidiꞌchq qxol, per cha junkix te Qtata Dios aj nbꞌantik kyaqil nini titzaꞌ. 7 Te junjunchaq te qetz ntzaj siꞌ jun qajbꞌen tzan te Txew Dios tzan qonen kyukyꞌi txqꞌanky qerman tzan tok te jun galan te qkyaqil. 8 Komo jun qerman bꞌaꞌn tzan tyolin tuj tumeꞌl tukyꞌi jun tnabꞌl aj ntzaj tsiꞌ te Txew Dios, bꞌix axkix te Txew Dios ntzaj tsiꞌ te junky qerman tzan tyolin yol tukyꞌi nim aj totzqiꞌ, 9 bꞌix tzan tpaj axkix te Txew Dios junky qerman bꞌaꞌn tzan tok twitꞌbꞌaꞌ tkꞌuꞌj tiꞌj te Qtat tzan tbꞌantik tidiꞌchq titzaꞌ, bꞌix [tzan tpaj axkix te Txew Dios] junky qerman bꞌaꞌn tzan tqꞌanan yabꞌ tukyꞌi tajwalil Qtata Dios, 10 bꞌix junky qerman ntkꞌamoꞌ tajwalil tzan tkꞌulun tukyꞌi tajwalil Qtata Dios jun tidiꞌ aj minaꞌ tok qen, bꞌix junky bꞌaꞌn tzan txik tpakbꞌaꞌ jun tpakbꞌalil aj Txew Dios swal tetz, bꞌix junky qerman ntzaj siꞌ jun tnabꞌl tzan tel tnikyꞌ alkyetz kye malspirit, bꞌix ax [tzan tpaj te Txew Dios] junky qerman bꞌaꞌn tzan tyolin tuj junky yol aj tzajnaq tuj kaꞌj aj kꞌontiꞌl nꞌel qnikyꞌ tiꞌj, bꞌix [tzan tpaj axkix te Txew Dios] junky qerman bꞌaꞌn tzan txik tqꞌumaꞌ tidiꞌ telponx te aj yol. 11 Per kyaqil te ntzani, cha jun te aj ntzaj swan tetz, aꞌox te Txew Dios. A tetz ntzaj sin te junjunchaq iktzaꞌ tetz tgan.
Qkyaqil Qetz Cha Jun-oq Aꞌoꞌ Aj Nqoꞌokslan Tiꞌj Jesukrist
12 Ntons, komo iktzaꞌx te qchiꞌjel cha jun-oq tzan kyaqil bꞌix at kyꞌilaꞌjchaq part tetz, anke kyꞌilaꞌj part tetz, cha jun-oq; bꞌix ax ikxji [qiꞌj qkyaqil qetz aj nqoꞌokslan tiꞌj] te Qajaw Jesukrist.* 13 Komo qetz otzaj siꞌ te Txew Dios tuj qanim tzan qok qkyaqil qetz cha jun-oq, qa qetz tijajil Israel aꞌoꞌ qatzun nyaꞌtxji, qa mosiꞌ aꞌoꞌ tzan junky qatzun nyaꞌtxji, qetz parej qkyaqil oje tzꞌok qen axkix te Txew Dios. 14 Te qchiꞌjel nyaꞌtx cha jun-oq part sinoke kyꞌilaꞌj part. 15 Qa jun qoq oxeꞌl tqꞌumaꞌ-wit, “Wetz nyaꞌtx aꞌin aqꞌabꞌ, astilji nyaꞌtx aꞌin part tiꞌj achiꞌjel,” per nyaꞌtx tzan tpaj aj yolni telponx nyaꞌtx aji part te qchiꞌjel. 16 Bꞌix qa jun qxkyin oxeꞌl tqꞌumaꞌ-wit, “Wetz nyaꞌtx aꞌin awitz, astilji nyaꞌtx aꞌin part tiꞌj achiꞌjel,” per nyaꞌtx tzan tpaj aj yolni telponx nyaꞌtx aji part te qchiꞌjel. 17 Qa kyaqil-wit te qchiꞌjel pur-wit qwitz, ntons ¿titzaꞌ-tal obꞌantel tzan qchaꞌon? Bꞌix qa kyaqil-wit te qchiꞌjel pur-wit qxkyin, ntons ¿titzaꞌ-tal obꞌantel tzan qsiqon? 18 Per te Qtata Dios okaj tsiꞌ junjunchaq part te qchiꞌjel aj jaꞌ tuq nꞌel tetz tuj twitz galan. 19 Qa kyaqil part te qchiꞌjel cha jun-wit, ntons ¿titzaꞌ-tal te qchiꞌjel ikxji? 20 Per nyaꞌtx ikxji tukyꞌi qchiꞌjel sinoke te qchiꞌjel ateꞌ kyꞌilaꞌj part, per tzan kyaqil te qchiꞌjel cha jun-oq. 21 Te qwitz nlay bꞌantik tzan txik tqꞌumaꞌ te jqꞌabꞌ, “Yatz aꞌich nyaꞌtx presis te wetz.” Bꞌix te qwiꞌ nlay bꞌantik tzan txik tqꞌumaꞌ te qoq, “Etetz aꞌix nyaꞌtx presis te wetz.” 22 Nyaꞌtx ikxji sinoke kye aꞌeꞌ aj part te qchiꞌjel aj naqe cha kꞌontiꞌl nim kybalor, kye nini at nim kyoken. 23 Bꞌix kye part te qchiꞌjel aj kꞌon qgan tzan qyolin kyiꞌj, kyetzji nkyeqet qen galan; bꞌix kye part te qchiꞌjel aj nyaꞌtx ebꞌl, nqokꞌulun kwent tukyꞌi jun tumeꞌl galan. 24 Nyaꞌtx presis tzan jkꞌulun ikxji kyukyꞌi kye part te qchiꞌjel aj bꞌaꞌn tzan kykaj ebꞌl. Per te Qtata Dios okaj tsiꞌ te qchiꞌjel tzan tqet jkꞌuluꞌ tuj jun tumeꞌl galan kye aj part aj nyaꞌtx ebꞌl. 25 Ikxji tzan kꞌon kykaj pawaꞌ kyibꞌ jun part tiꞌj junky part sinoke tzan kyten-oq tzan kyaqꞌunan junchꞌin. 26 Qa tuj jun part te qchiꞌjel, nqnaꞌoꞌ jun xhchoꞌnal, ax tuj kyaqil qchiꞌjel nqnaꞌoꞌ xhchoꞌnal; bꞌix qa nqokꞌulun kwent te jun part te qchiꞌjel, ax nqnaꞌoꞌ galan kyaqil part te qchiꞌjel.
27 [Ntons ax ikxji etiꞌj etetz tukyꞌi Krist.] Etetz aꞌix iktzaꞌ xhchiꞌjel Krist, bꞌix junjunchaq te etetz aꞌix iktzaꞌ part te xhchiꞌjel. 28 Bꞌix ax ikxji okaj tsiꞌ te Qtata Dios kye junjunchaq kye qerman. Tbꞌay ekaj tsiꞌ kye tkyꞌixel, tkabꞌiꞌ kye aj yolil tyol, toxiꞌ kye xnaqꞌtzon, bꞌix yaji kye aj nqet kykꞌuluꞌ tukyꞌi tajwalil Qtata Dios tidiꞌchq milagr, [yaji] kye aj bꞌaꞌn kyeqꞌanan, bꞌix kye aj bꞌaꞌn kyeꞌonen kye txqꞌanky, bꞌix kye aj bꞌaꞌn kyeꞌeꞌen tumeꞌl kxol kye bꞌuchꞌuj qerman titzaꞌ tzan tbꞌantik kyaqil tuj tumeꞌl, bꞌix kye aj bꞌaꞌn kyeyolin tuj junky yol aj tzajnaq tuj kaꞌj aj kꞌontiꞌl nꞌel qnikyꞌ tiꞌj.* 29 ¿Qkyaqil petzun aꞌoꞌ tkyꞌixel? ¿Qkyaqil petzun aꞌoꞌ yolil tyol? ¿Qkyaqil petzun aꞌoꞌ xnaqꞌtzon? ¿Qkyaqil petzun bꞌaꞌn tzan jkꞌulun tukyꞌi tajwalil Dios jun milagr? 30 ¿Ax qkyaqil petzun qetz bꞌaꞌn tzan jqꞌanan? ¿Qkyaqil petzun nqoyolin tuj junky yol aj tzajnaq tuj kaꞌj aj kꞌontiꞌl nꞌel qnikyꞌ tiꞌj? ¿Qkyaqil petzun bꞌaꞌn tzan txik jqꞌumaꞌ tidiꞌ telponx jun yol ikxji? 31 Per etetz intok esiꞌ ekꞌuꞌj tzan txik eqaniꞌ tukyꞌi Qtata Dios kye etajbꞌen aj mas at token. Bꞌix wetz oxeꞌl nqꞌumaꞌ etetz te tumeꞌl aj mas bꞌan tbꞌanil twitz kyaqil.