11
Titzaꞌ A Tgan Tzan Sten Jun Xuj Oj Tok Qchimoꞌ Qibꞌ Naꞌol Dios
1 Ntons, intel etin iktzaꞌ wetz nkyinkꞌulun, iktzaꞌ wetz nꞌel win iktzaꞌ te Jesukrist.* 2 Wetz nkxqet njiqꞌbꞌaꞌ tzan tpaj etetz kꞌontiꞌl nkyinꞌajnaj tiꞌj etanim, bꞌix etetz nqet etokslaꞌ kyaqil iktzaꞌx aj okaj nqꞌumaꞌ etetz. 3 Per ngan tzan txik nqꞌumaꞌ etetz, te Krist aji tetz te twitzaleꞌ kyiꞌj kye ichmilbꞌaj, iktzaꞌx kye ichmilbꞌaj aꞌeꞌ kyetz twitzaleꞌ kyiꞌj kye kxuꞌjel, iktzaꞌx te Qtata Dios a te twitzaleꞌ tiꞌj te Krist. 4 Qa jun ichan oj txnaqꞌtzan, qatzun oj txik tpakbꞌaꞌ jun tpakbꞌalil aj Txew Dios swal tetz, ntons qa atjax jun tidiꞌ tuj twiꞌ, nꞌel tin tkyꞌexaw te [Krist] aj twitzaleꞌ tiꞌj. 5 Bꞌix jun xuj oj txnaqꞌtzan, qatzun oj txik tpakbꞌaꞌ jun tpakbꞌalil aj Txew Dios swal tetz, ntons qa kꞌontiꞌl atjax jun tidiꞌ txaybꞌil twiꞌ, nꞌel tin tkyꞌexaw te twitzaleꞌ tiꞌj, osey te tichmil, komo ikxji iktzeꞌxtzun maꞌtx qet tmatzoꞌ twiꞌ. 6 Qa jun xuj kꞌontiꞌl njax tsiꞌ txmuj tuj twiꞌ, mejor intqet stzqituꞌ te twiꞌ, bꞌix qa nkyꞌixwik tzan tqet tzqituꞌ twiꞌ, ntons mejor intjax tsiꞌ txmuj. 7 Jun ichan kꞌontiꞌl tzan tjax tsiꞌ jun tidiꞌ tuj twiꞌ, tzan tpaj te Qtata Dios oqet tkꞌuluꞌ te ichan iktzaꞌx tetz bꞌix [ikxji] tiꞌj te ichan nxik eꞌelet tajwalil te Qtata Dios, yatzun tiꞌj te xuj nxik eꞌelet tajwalil te ichan.* 8 Komo te ichan kꞌontiꞌl owel tiꞌj te xuj, sinoke te xuj owel tiꞌj te ichan, 9 bꞌix te ichan kꞌontiꞌl oqet kꞌuluꞌ tzan tpaj te xuj, sinoke te xuj oqet kꞌuluꞌ tzan tpaj te ichan.* 10 Astilji te xuj presis tzan tjax tsiꞌ jun tidiꞌ tuj twiꞌ aj telponx at jun twitzaleꞌ tiꞌj, bꞌix ax tzan tok kyen kye ángel. 11 Tuj twitz te Qajawil te ichan itzꞌoj tzan tpaj te xuj, bꞌix te xuj itzꞌoj tzan tpaj te ichan. 12 Komo te xuj tzajnaq tiꞌj te ichan, bꞌix te ichan tzajnaq tiꞌj te xuj, per kyaqil tzajnaq tukyꞌi Qtata Dios. 13 Aꞌix etetz intqet ebꞌisuꞌ: ¿Galan peꞌ qa jun xuj oxnaqꞌtzayon tiꞌj Qtata Dios qa kꞌontiꞌl atjax txmuj? 14 Iktzaꞌx jkajlen siꞌ, qa jun ichan okajel tkyꞌibꞌsaꞌ twiꞌ [iktzaꞌ twiꞌ xuj], ¿nyaꞌtx petzun kyꞌexawil te tetz? 15 Per yatzun jun xuj qa nim xtxaꞌm twiꞌ, te nini jun tbꞌanil te tetz tzan tpaj te xtxaꞌm twiꞌ iktzaꞌ te txaybꞌil tetz. 16 Qa at abꞌl tgan tzan twululun tiꞌj te ntzani, qetza kꞌontiꞌl eqꞌiꞌ qitzaꞌna junky tumeꞌl twitz te ja ntzani bꞌix ax kye txqꞌanky bꞌuchꞌuj qerman ax ikxji eqꞌiꞌ kyitzaꞌ.
Oj Qwaꞌan Junx Kꞌontiꞌl Tzan Qbꞌisun Tbꞌay Qiꞌjx
17 Ntons, wetz aj oqtel ntzꞌibꞌaꞌni nyaꞌtx tzan eqet njiqꞌbꞌaꞌ, tzan tpaj etetz kꞌontiꞌl nꞌok echimoꞌ etibꞌ tzan tok jun galan exol, sinoke nꞌok echimoꞌ etibꞌ tzan tok jun nyaꞌtx galan. 18 Tbꞌay oxeꞌl nqꞌumaꞌ, wetz nꞌok nchaꞌoꞌ oj tok echimoꞌ etibꞌ exolx erman, cha pur nqet epawaꞌ etibꞌ exolx tzi, bꞌix qanq bꞌanꞌax. 19 ¿Presis petzun tzan tqet epawaꞌ etibꞌ ikxnini tzan tok eꞌelet abꞌleꞌ kye aj nkyeꞌel mas galan tuj twitz Qtata Dios? 20 Oj tok echimoꞌ etibꞌ tzan ewaꞌan junx naꞌol te Qajawil, kꞌontiꞌl nꞌok esiꞌ ekꞌuꞌj tzan enaꞌon te Qajawil. 21 Komo oj etokten waꞌil, junjun tbꞌay nkyexik naj eqꞌil kyetz kyweꞌ te kyetzx, yaji kye txqꞌanky nkyekaj tukyꞌi waꞌij bꞌix junjunky nkyeukꞌan nim. 22 ¿Kꞌontiꞌl petzun ejay aj jaꞌ tzan exik waꞌil bꞌix tzan etukꞌan? ¿Tistil nꞌel etikꞌoꞌ kye qerman aj te Qtata Dios bꞌix nꞌel etin kkyꞌexaw kye aj kꞌontiꞌl chꞌinwt tidiꞌ kyetz? ¿Tidiꞌ oxeꞌl nqꞌumaꞌ etiꞌj? ¿Okxtel njiqꞌbꞌaꞌ? Wetz nlay kxqet njiqꞌbꞌaꞌ tzan tpaj nini.
Te Tumeꞌl Titzaꞌ Tzan Stzaj Qnaꞌoꞌ Te Qajawil Oj Qwaꞌan Junx
23 Ntons te aj oxik nxnaqꞌtzaꞌ etetz, a te Qajawil otzaj sin te wetz bꞌix etetz ekꞌamoj galan ikxjani: Aj aqꞌbꞌil aj txik qꞌapoꞌ te Qajawil, tetz ojaw stzyuꞌ jun wabꞌj, 24 bꞌix ya ma xik tsiꞌ pixon te Qtata Dios tiꞌj, oxik tsipaꞌ bꞌix oxik tqꞌumaꞌ ikxjani: “Te ntzani te nchiꞌjel [aj oxeꞌl qꞌapoꞌ te jun galan] te etetz. Intxik ewaꞌaꞌ tzan ntzaj enaꞌoꞌ.”* 25 Bꞌix ax ikxji otkꞌuluj tukyꞌi te ukꞌbꞌil aj tmankun kywaꞌan, bꞌix oxik tqꞌumaꞌ kyetz, “Te ja qukꞌaꞌ ntzani telponx tiꞌj te tumeꞌl akꞌaꞌj [titzaꞌ nqokolet], tzan tpaj nchikyꞌel [aj owelal oj nkamik]; intqet ekꞌuluꞌ ikxjani kyaqil-el oj etukꞌan tiꞌj, tzan ntzaj enaꞌoꞌ.”* 26 Ntons [ax etetz tzi], kyaqil-el oj ewaꞌan tiꞌj te aj wabꞌjni bꞌix oj etukꞌan tiꞌj te aj ukꞌbꞌilni, ntons ikxji max oj tul tetz nqet eyekꞌuꞌ ntzaj enaꞌoꞌ te tkamlen te Qajawil. 27 Ikxji abꞌlchaq aj oxeꞌl twaꞌaꞌ ja wabꞌjni, qatzun oxeꞌl tukꞌaꞌ ja ukꞌbꞌilni aj te Qajawilni, bꞌix qa nyaꞌtx tuj jun tumeꞌl atqet, ntons njoyon choj tiꞌj xhchiꞌjel te Qajawil bꞌix tiꞌj te xhchikyꞌel. 28 Ntons tzan txik ewaꞌaꞌ te wabꞌj bꞌix tzan etukꞌan tiꞌj te ukꞌbꞌil, presis tzan tqet ebꞌisuꞌ tuj etanim titzaꞌ atix tuj twitz Qtata Dios. 29 Komo jun xjal aj nxik twaꞌaꞌ bꞌix nxik tukꞌaꞌ bꞌix kꞌontiꞌl nqet tbꞌisuꞌ tumeꞌl tiꞌj te xhchiꞌjel te Qajaw Jesukrist, ikxji cha nkꞌulun tzan stzaj siꞌ jun xhchoꞌnal tajsik. 30 Astilji exol etetz ketant kye yabꞌ bꞌix kye aj nyaꞌtx jwert-eꞌ bꞌix junjun oje kyekamik. 31 Qa qetz nqet-wit qbꞌisuꞌ qiꞌj titzaꞌ atoꞌ, ntons te Qajawil kꞌontiꞌl-tal ntzaj tsiꞌ xhchoꞌnal qiꞌj. 32 Qa te Qajaw ntzaj tsiꞌ xhchoꞌnal qiꞌj, te nini [tzan tkaj qmañ] tzan kꞌon qxik siꞌ tuj il iktzaꞌ kye xjal aj kꞌontiꞌl nkyeꞌokslan.* 33 Astilji waq erman, wetz nxik nqꞌumaꞌ etetz oj tok echimoꞌ etibꞌ tzan ewaꞌan, junjunchaq peꞌetiyon waq etiꞌjx. 34 Qa at jun aj at waꞌij tiꞌj, intxik waꞌil tjay; ikxji tzan kꞌon tok echimoꞌ etibꞌ tzan stzaj tsiꞌ te Qtata Dios jun xhchoꞌnal etiꞌj. Bꞌix tiꞌj kye txqꞌanky tidiꞌchq, okyinyoliyon tiꞌj oj npon tzi.