10
Tidiꞌ Presis Tzan Tqet Qjiqꞌbꞌaꞌ Te Qtata Dios
1 Waq erman, kꞌon ngan tzan tajnaj tiꞌj etanim, kye qijajil oqtxiꞌ kkyaqil kyetz ebꞌajbꞌet tjaqꞌ te muj [aj nxik yekꞌun tuq kybꞌey] bꞌix kkyaqil kyetz ekyꞌix tuj te nim aꞌ,* 2 bꞌix tzan tpaj kybꞌetbꞌen tjaqꞌ te muj bꞌix tzan tpaj kkyꞌiklen tuj te nim aꞌ, kkyaqil kyetz eꞌok en nkyeꞌok lapet tuq tiꞌj Moisés.a 3 Bꞌix kkyaqil kyetz ebꞌajwaꞌan axkix te kyweꞌ te junjunchaq aj otzaj tsiꞌ te Qtata Dios kyetz.* 4 Bꞌix kkyaqil ebꞌajꞌukꞌan axkix te kyukꞌaꞌ te junjunchaq aj otzaj tsiꞌ te Qtata Dios, komo nkyeꞌukꞌan tuq te aꞌ aj nꞌetz tuq twitz te abꞌj aj nbꞌet tuq kyukyꞌiꞌl, jun abꞌj aj jaꞌ otzaj tsiꞌ te Qtata Dios kyukꞌaꞌ; bꞌix telponx tuq te abꞌj tiꞌj te Krist aj atqet tuq kyukyꞌiꞌl.* 5 Anke [kkyaqil kyetz owok kyen nini] nyaꞌtx kkyaqil ebꞌajꞌel galan tuj twitz te Qtata Dios, kyꞌilaꞌj kyetz ebꞌajkaj jilan tuj te kyꞌixkꞌoj txꞌoꞌtxꞌ.*
6 Ntons, kyaqil nini okyꞌik tzan tok qsiꞌ qnabꞌl tzan kꞌon tel qganiꞌ tidiꞌchq nyaꞌtx galan iktzaꞌ kyetz [oqtxiꞌ] owel kyganiꞌ.* 7 Bꞌix ax ikxji etiꞌj etetz, kꞌontiꞌl tzan stzaj enaꞌoꞌ kye kyitzbꞌalil tidiꞌchq iktzaꞌ okykꞌuluj kyetz oqtxiꞌ; iktzaꞌx tzꞌibꞌankaj [tuj Tuꞌjal Dios] ikxjani: “Kye xjal ebꞌajqet witꞌlet waꞌil bꞌix ukꞌal [xhbꞌaꞌj], bꞌix yaji ebꞌajjaw waꞌlet kꞌulul tidiꞌchq aj cha kyganx tuq kyetz.”* 8 Bꞌix kꞌon kxkꞌajajin iktzaꞌ junjun kyetz ebꞌajkꞌajajin bꞌix tzan tpaj nini cha tuj jun qꞌij bꞌeyx ebꞌajnaj ox tuj kawnaq mil (23,000) xjal.b 9 Bꞌix kꞌon kxjoyon choj tzan ekꞌulun probar te Qajawil, iktzaꞌ kyetz oqet kykꞌuluꞌ probar bꞌix tzan tpaj nini ebꞌajkamik tzan kye kan.* 10 Bꞌix kꞌon qet eyoliꞌ [te Qtata Dios] iktzaꞌ kyetz oqet kyyoliꞌ, komo tzan tpaj nini ebꞌajnaj, ebꞌajqet kansaꞌ tzan te ángel aj kanson.*
11 Kyaqil ntzani okyꞌik kyiꞌj kye qijajil oqtxiꞌ tzan tok qsiꞌ qnabꞌl qetz [tzan kꞌon jkꞌulun ikxji], bꞌix okaj tzꞌibꞌaꞌ tzan tok qsiꞌ qnabꞌl qetz aj itzꞌojoꞌ tuj ja tyemp ajnaꞌl tmankbꞌil twitz ja txꞌoꞌtxꞌni. 12 Ntons tzan tpaj nini, abꞌl aj tuj tnabꞌl tetz jwert at, intok tsiꞌ tnabꞌl tzan kꞌon tqet tzꞌaqik. 13 Etetz kꞌontiꞌl jun preb nꞌok etiꞌj tzan eqet tzꞌaqik titzaꞌ, aj minaꞌ-wit tok qen qetz qkyaqil. Per te Qtata Dios jun yolin,* tetz nlay stzoqpij tzan tok eten twitz jun preb aj nlay-wit bꞌantik tzan etipan tetz, sinoke junx tukyꞌi te preb tetz otzajel tsiꞌ jun tumeꞌl titzaꞌ tzan etipan tetz.
14 Astilji waq erman aj ganimix witzaꞌ, intkaj ekolaꞌ tzan enaꞌon kyitzbꞌalil jun tidiꞌ. 15 Wetz nxik nqꞌumaꞌ etetz iktzaꞌ kyukyꞌi xjal aj nꞌel kynikyꞌ tiꞌj aj nxik nyoliꞌ, etetz bꞌaꞌn tzan tqet ebꞌisuꞌ tiꞌj ja ntzani: 16 Te qukꞌaꞌ aj nqoꞌukꞌan junx [tzan stzaj qnaꞌoꞌ te tkamlen Krist] bꞌix aj nxik qsiꞌ pixon te Dios tiꞌj, ¿te nini nyaꞌtx petzun tzan tpaj mojbꞌaꞌ qibꞌ tukyꞌiꞌl tiꞌj [tkamlen] aj tel xhchikyꞌel? Bꞌix te wabꞌj aj nqowaꞌan junx [tzan stzaj qnaꞌoꞌ te Krist], ¿te nini nyaꞌtx petzun tzan tpaj mojbꞌaꞌ qibꞌ tukyꞌiꞌl tiꞌj xhchiꞌjel?* 17 Ntons te wabꞌj cha jun, bꞌix qetz anke kyꞌilaꞌj qbꞌet, per qetz iktzaꞌ cha jun aꞌoꞌ tzan tpaj qkyaqil nqowaꞌan tiꞌjkix cha jun wabꞌj. 18 Instzaj enaꞌoꞌ kyiꞌj kye aj tijajil Israel: Oj kywaꞌan tiꞌj te kypresent aj nxik kyqꞌapoꞌ te Qtata Dios twiꞌ te tzꞌeꞌsbꞌil [tuj te Nim Jay Te Dios],* ¿tiꞌtzun, nyaꞌtx petzun nxik kysamoꞌ kyibꞌ tiꞌj te aj oje xik kyqꞌapoꞌ twiꞌ te tzꞌeꞌsbꞌil? 19 Ntons, ¿tidiꞌ telponx te ntzani [tiꞌj jun present te jun titzbꞌalil]? ¿Telponx peꞌ qa te present at tajbꞌen, qatzun te titzbꞌalil at nim tajbꞌenji? [¡Kꞌontiꞌl!] 20 Wetz nxik nqꞌumaꞌ kyiꞌj kye aj kꞌontiꞌl nkyeꞌokslan te Qtata Dios, kyetz chaꞌoj txik kyqꞌapoꞌ kypresent twitz titzbꞌalil jun tidiꞌ, kyetz nxik kyqꞌapoꞌ kye malspirit* bꞌix nyaꞌtx te Qtata Dios; bꞌix yatzun etiꞌj etetz, wetz ngan tzan kꞌon tox esamoꞌ etibꞌ kyukyꞌi kye malspirit. 21 Etetz nlay bꞌantik etukꞌan te qukꞌaꞌ tzan qnaꞌon te Qajawil bꞌix qa ax nkxꞌukꞌan te ukꞌbꞌil tzan enaꞌon kye malspirit; nlay bꞌantik tzan ewaꞌan tzan qnaꞌon te Qajawil bꞌix qa ax nkxwaꞌan tzan enaꞌon kye malspirit. 22 ¿Tiꞌtzun, ojkꞌuluꞌtz tzan stzaj qchukuꞌ te Qajawil?* ¿Mas petzun nim qbalor qetz twitz tetz [tzan qipan tetz]?
23 Ntons, [iktzaꞌx etetz nꞌeqꞌumaꞌ] kyaqil bꞌaꞌn tzan tqet nkꞌuluꞌ, per nyaꞌtx kyaqil nꞌok te jun galan. Kyaqil bꞌaꞌn tzan tqet nkꞌuluꞌ, per nyaꞌtx kyaqil nꞌoken tzan qok mas jwert tukyꞌi Qtata Dios.* 24 Kꞌontiꞌl tzan ejoyon jun galan cha aꞌox te etetzx sinoke jun galan kye txqꞌanky. 25 Bꞌaꞌn tzan txik echiꞌ kyaqil txakl chibꞌj aj nkꞌayjik tuj jun kꞌaybꞌil chibꞌj bꞌix nyaꞌtx kabꞌ ekꞌuꞌj oxeꞌl echiꞌ. 26 Komo te twitz txꞌoꞌtxꞌ bꞌix kyaqil aj at twitz, a te Qajawil tajaw.* 27 Qa jun xjal aj kꞌontiꞌl nꞌokslan te Qtata Dios ma xik ukꞌlen te etetz [tzan ewaꞌan tukyꞌiꞌl], bꞌix egan tzan exik, [bꞌaꞌn tzan exik] bꞌix intxik ewaꞌaꞌ kyaqil aj oqtel tsiꞌ, bꞌix kꞌon naꞌnon etanim. 28 Per qa at abꞌl ma tzaj qꞌuman te etetz: “Te ntzani jun wabꞌj aj qꞌapomaj kye kyitzbꞌalil kye dios,” ntons yatzun etetz, kꞌon xik echiꞌ tzan tpaj te aj ma tzaj qꞌuman te etetz bꞌix tzan tpaj te aj ntyoliꞌ tanim.c 29 Wetz nxik nqꞌumaꞌ te ntzani tzan tpaj titzaꞌ nyolin tuj tanim te junky bꞌix nyaꞌtx tiꞌj etanim etetz. [Qatzun at jun etetz ntyoliꞌ], “Wetz libr atin; ¿tistil nlay bꞌantik tzan txik nwaꞌaꞌ cha aꞌox tzan tpaj aj ntnaꞌoꞌ te junky?” 30 Bꞌix wetz, qa nxik nsiꞌ pixon te Qtata Dios tiꞌj te aj nxik nwaꞌaꞌ, ¿ntons tistil wetz nkyinxik poqoꞌ tzan tpaj te aj nxik nwaꞌaꞌ?
31 Ntons, qa etetz okxwaꞌyon, qatzun okxꞌukꞌayon, qatzun okxkꞌuluyon junky tidiꞌ, intqet ekꞌuluꞌ kyaqil tzan tqet ejiqꞌbꞌaꞌ te Qtata Dios. 32 Kꞌon kxkꞌulun tzan kyqet tzꞌaqik kye aj tijajil Israel, qatzun kye aj nyaꞌtx tijajil Israel qatzun kye txqꞌanky qerman aj tkꞌwaꞌal Qtata Dios. 33 Wetz aꞌinxk nkyinꞌok-il tzan nkaj galan tuj kywitz txqꞌanky tukyꞌi kyaqil aj nkꞌuluꞌ, kꞌontiꞌl nkyinjoyon jun galan aj cha aꞌox te wetz sinoke jun galan kye txqꞌanky tzan kykolet.