9
Kye Aj Nkyepakbꞌan Tyol Dios Presis Tzan Txik Siꞌlet Aj Owokeyon Tzan Kyanqꞌin
1 ¿Nyaꞌtx petzun kolpimin wetz aꞌin? ¿Nyaꞌtx petzun wetz aꞌin tkyꞌixel te Qajaw Jesus? ¿Kꞌontiꞌl petzun wetz owok wen te Jesus aj Qajawil qetz?* ¿Nyaꞌtx petzun etiꞌj etetz nꞌok wen te waqꞌumbꞌen exol, te waqꞌumbꞌen aj te Qajawil? 2 Qa tuj kynabꞌl kye txqꞌanky nyaꞌtx aꞌin tkyꞌixel Qajawil, per etetz etebꞌen, wetz aꞌin tkyꞌixel tzan tpaj etiꞌj etetz telponx aꞌin wetz tkyꞌixel. 3 Aj ntzani wetz te nyol tzan nkolon wibꞌx kywitz kye aj nkyinxik kypoqoꞌ: 4 ¿Kꞌontiꞌl petzun qetza qoklena tzan qwaꞌan bꞌix tzan qukꞌan? 5 ¿Kꞌontiꞌl petzun qetza qoklena tzan qok junan tukyꞌi jun qerman xuj, iktzaꞌ kye txqꞌanky tkyꞌixel Qajawil bꞌix iktzaꞌ kye titzꞌin te Qajawil bꞌix iktzaꞌ te Xhpeꞌy?a 6 ¿Qatzun aꞌox peꞌ te Bꞌeꞌch bꞌix wetz aꞌin aj presis tzan qaqꞌunan [tzan qanqꞌinxnajji]? 7 ¿Abꞌl jun soldad aj ajixk tetz nchojonx kyaqil aj presis te tetz? ¿Bꞌix abꞌl jun aj nꞌawan tawal qa nyaꞌtx aji oxeꞌl nikyꞌbꞌen te twitz? ¿Bꞌix abꞌl jun aj nkꞌulun kwent kye taloꞌ qa nlay tzꞌukꞌan taꞌl kyim? 8 ¿Cha tuj nwiꞌx petzun wetz nꞌetz win aj nxik nqꞌumaꞌni? ¿Kꞌontiꞌl petzun tzꞌibꞌankaj ikxji tuj te Kawbꞌil? 9 Komo tuj te [Kawbꞌil aj stzꞌibꞌen] Moisés nyolin ikxjani: “Jun bweys aj nꞌaqꞌunan kꞌon tzꞌok ekꞌaloꞌ stziꞌ.”b ¿Nbꞌisun petzun te Qtata Dios [cha aꞌox] kyiꞌj kye bweys [aj txik tqꞌumaꞌ te ntzani]? 10 ¿Qatzun nyolin qiꞌj qetzji? Okaj tzꞌibꞌaꞌ tzan qpaj qetz, [komo iktzaꞌx nyolin] te aj nqꞌuꞌun, a tgan tzan tok loꞌet tkꞌuꞌj tistil nqꞌuꞌun, bꞌix te aj nbꞌujun twitz tawal, a tgan tzan tok loꞌet tkꞌuꞌj tiꞌj te aj ntaqꞌunaꞌ. 11 Qa qetza aꞌoꞌna oxik pakbꞌan exol etetz te tpakbꞌalil tzan etokslan tiꞌj Qtata Dios, ntons ¿tiꞌtzun, nim petzun qa qetza jkꞌamoꞌtza chꞌin tiꞌj etaqꞌumbꞌen etetz [tzan qanqꞌin]?* 12 Qa txqꞌanky xjal at kyoklen tzan kykꞌamon tiꞌj te etaqꞌumbꞌen etetz, ntons qetza at mas qoklena. Anke qetza at qoklena, kꞌontiꞌl owok qsiꞌ jkꞌuꞌj tzan jkꞌamon jun tidiꞌ tiꞌj te nini, sinoke qetza maꞌtx qipajna kyaqil tzan tpakbꞌlet mas te tpakbꞌalil galan tiꞌj Krist. 13 ¿Tiꞌtzun, kꞌontiꞌl petzun etebꞌen etetz, kye aj nkyeꞌaqꞌunan tuj te Nin Jay Nabꞌil Qtata Dios nkyewaꞌan tiꞌj te oyej aj npon in txini? ¿Kꞌontiꞌl petzun etebꞌen kye [pal] aj nkyeꞌaqꞌunan tiꞌj te tzꞌeꞌsbꞌil nkyewaꞌan tiꞌj te aj nxik qꞌapoꞌ twiꞌ te tzꞌeꞌsbꞌil?* 14 Ax ikxji okaj tqꞌumaꞌ te Qajawil kyiꞌj kye aj nkyeꞌaqꞌunan tzan kypakbꞌan te tpakbꞌalil galan, ax ikxji a tgan tzan kywaꞌan tiꞌj te tpakbꞌalil galan.*
Te Aj Presis Tzan Tkꞌulun Jun Aj Npakbꞌan Te Tyol Qtata Dios
15 Per wetz kꞌontiꞌl [maꞌtx tzꞌok loꞌet nkꞌuꞌj] tzan nkꞌamon jun tidiꞌ tiꞌj waqꞌumbꞌen [te Qtat]. Bꞌix ax kꞌontiꞌl nqet ntzꞌibꞌaꞌ ja ntzani tzan stzaj esiꞌ tidiꞌ wetz. Wetz mejor-tal inkamik, bꞌix nyaꞌtx tzan tponaj te chalajbꞌil aj nnaꞌoꞌ tuj wanim [tiꞌj waqꞌun te Qtat aj kꞌontiꞌl nkyinpeyun tiꞌj]. 16 Qa wetz nkyinpakbꞌan te tpakbꞌalil galan, nlay bꞌantik tzan tqet njiqꞌbꞌaꞌ wibꞌ tzan tpaj nini, komo at woklen tzan txik npakbꞌaꞌ bꞌix nlay bꞌantik tzan tkaj nkolaꞌ. Last wetz aꞌin qa nlay xik npakbꞌaꞌ te tpakbꞌalil galan.* 17 Qa oqtel nkꞌuluꞌ aꞌox tzan tpaj wetz ngan kꞌulun ntzani, ntons onkambꞌaꞌtz jun galan te wetz; per qa oqtel nkꞌuluꞌ tzan tpaj lajomin, ikxji cha nkyinkꞌulun aj okaj tqꞌumaꞌ te Qajawil. 18 Wetz te aj nkambꞌaꞌ [jun chalajbꞌil tuj wanim] tzan tpaj txiklen npakbꞌaꞌ te tpakbꞌalil galan tiꞌj Jesukrist bꞌix kꞌontiꞌl nꞌel npeyuꞌ chꞌinwt; bꞌix ikxji kꞌontiꞌl nkyinjoyon jun galan te wetz tzan tpaj at woklen tiꞌj waqꞌun iktzaꞌ jun pakbꞌon.
19 Ntons anke kolpimin bꞌix kꞌontiꞌl akyinqet tuj tqꞌabꞌ junky, wetz oje nkꞌuluj tzan waqꞌunan te jun galan kye kyaqil tzan kyokslan kyꞌilaꞌj xjal. 20 Qa atinqet kxol kye aj tijajil Israel, nkyinbꞌet iktzaꞌ jun aj tijajil Israel tzan kyokslan; komo kyukyꞌi kye aj presis tzan tqet kyokslaꞌ te Kawbꞌil, ax wetz aꞌin iktzaꞌ jun aj presis tzan tqet wokslaꞌ te Kawbꞌil, anke wetz nyaꞌtx presis tzan nkꞌulun nini, per nkꞌuluꞌ ikxji tzan kyokslan. 21 Kyukyꞌi kye aj kꞌontiꞌl toklen te Kawbꞌil kyiꞌj, wetz aꞌin iktzaꞌx kyetz tzan kyokslan, (anke a te Qtata Dios aj nkꞌulun mandad wiꞌj, bꞌix a te tumeꞌl tiꞌj te Krist at toklen wiꞌj). 22 Bꞌix ax qa akyinqet kxol kye aj nyaꞌtx jwert ateꞌ tukyꞌi Qtata Dios, wetz nkyinbꞌet kxol tuj jun tumeꞌl galan tzan kꞌon kyjoyon choj tzan npaj wetz.c Nkyinꞌok iktzaꞌx kyaqil xjal, ikxji tzan kykolet junjun te kyetz. 23 Wetz nqet nkꞌuluꞌ kyaqil nini tzan tpaj te tpakbꞌalil galan aj nxik npakbꞌaꞌ, bꞌix loꞌik nkꞌuꞌj tzan nkꞌamon te galan aj ntqꞌumaꞌ te tpakbꞌalil.
24 Etetz etebꞌen titzaꞌ nkyeꞌoqelan kye xjal tuj jun estadio anke kyetz kyebꞌen cha jun te aj nkambꞌan te kykanabꞌ. Ax ikxji etiꞌj etetz, kꞌon kaj esiꞌ tzan ebꞌet tuj tumeꞌl tzan ekꞌamon te ekanabꞌ tukyꞌi Qtata Dios. 25 Kye aj nkyekꞌulun kyibꞌ tzan kyoqelan kyukyꞌi txqꞌanky, nkykꞌuluꞌ mandad kyibꞌx tzan tkaj ksiꞌ kyaqil aj nꞌok jun nyaꞌtx galan te kyetz, per kyetz nkyekꞌulun nini tzan kykambꞌan jun tidiꞌd aj nmankun, per qetz tzan jkꞌamon jun [qanqꞌin] aj nlay nmankun. 26 Ax ikxji wetz nkyinbꞌet tuj tumeꞌl bꞌix nkyinkꞌulun te aj presis, bꞌix nkyinꞌaqꞌunan bꞌan jwert nyaꞌtx iktzaꞌ kꞌontiꞌl-wit webꞌen tidiꞌ nkyinkꞌulun, 27 sinoke tzan nqet tokslaꞌ te nchiꞌjel tzan kꞌon tponaj kyaqil waqꞌumbꞌen, pyorx-alo tzan tpaj oje kyexik nxnaqꞌtzaꞌ txqꞌanky.