8
Kꞌontiꞌl Tzan Jkꞌulun Tzan Kyqet Tzꞌaqik Txqꞌanky
1 Ntons kyiꞌj kye present aj qꞌapomeꞌ kye kyitzbꞌalil tidiꞌchq, qetz qkyaqil qebꞌenky tiꞌj nini. Per qa tuj qnabꞌlx qetz qebꞌen nim, cha nqet qjiqꞌbꞌaꞌ qibꞌ tiꞌj te aj kꞌontiꞌl token; yatzun oj tqet qganiꞌ junky xjal, te nini at nim token tzan tpaj nꞌok te jun galan. 2 Per qa tuj qnabꞌlx qetz qotzqiꞌ nim tiꞌj tidiꞌchq, qetz minaꞌ tel qnikyꞌ te aj presis. 3 Per qa at abꞌl nqet tganiꞌ te Qtata Dios, te Qtata Dios nꞌel tnikyꞌ tiꞌj tetz. 4 Ntons tiꞌj te wabꞌj aj oje xik qꞌapoꞌ kye kyitzbꞌalil tidiꞌchq aj nkyetzaj naꞌoꞌ tzan kye xjal, qetz qebꞌen te jun titzbꞌalil kꞌontiꞌl token chꞌinwt, bꞌix qebꞌenky cha aꞌox jun Qtata Dios at. 5 Anke ateꞌ kye aj nkyeꞌok qꞌumaꞌ dios-eꞌ, qa twitz kaꞌj qatzun tzani twitz txꞌoꞌtxꞌ, komo ateꞌ kyꞌilaꞌj aj nkyeꞌok qꞌumaꞌ dios-eꞌ bꞌix kyꞌilaꞌj aj at jun kyajawil; 6 yatzun te qetz, cha jun Qtata Dios at,* bꞌix tukyꞌiꞌl tetz otzaj kyaqil aj nxik qen, bꞌix qetz aꞌoꞌ te tetz; bꞌix cha aꞌox jun Qajawil at, a te Jesukrist,* bꞌix a tetz oqet kꞌulun kyaqil aj at, bꞌix a tetz ntzaj sin qanqꞌin.*
7 Per nyaꞌtx kyaqil kye xjal nꞌel kynikyꞌ tiꞌj ntzani; komo junjun [aj man txiklen kyokslaꞌ Qtata Dios], qa kyetz oje kyenaqꞌet kyiꞌj kye kyitzbꞌalil tidiꞌchq aj ntzaj tuq kynaꞌoꞌ, kyetz tuj kynabꞌl ajnaꞌl, qa ma xik qwaꞌaꞌ jun wabꞌj aj oje xik qꞌapoꞌ kye kyitzbꞌalil, ntons nqojoyon choj, bꞌix nkyebꞌisun ikxji tzan tpaj nnaꞌnon kyanim. 8 Bꞌanꞌax qetz nqoꞌel galan tuj twitz Qtata Dios nyaꞌtx tzan tpaj aj nxik qwaꞌaꞌ, komo qa nlay xik qwaꞌaꞌ kꞌontiꞌl nqoꞌok nyaꞌtx galan, bꞌix qa ma xik qwaꞌaꞌ kꞌontiꞌl nqoꞌok mas tbꞌanil.
9 Per intok esiꞌ waq enabꞌl, qa etetz nꞌenaꞌoꞌ bꞌaꞌn tzan ekꞌulun tidiꞌchq aj egan, kꞌon tzꞌoken te nini tzan tqet tzꞌaqik junky aj nyaꞌtx jwert at tukyꞌi Qtata Dios. 10 Qa yatz awebꞌen kyaqil nini bꞌix nchwaꞌan jun wabꞌj tuj jun jay aj jaꞌ nkyetzaj naꞌoꞌ kye kyitzbꞌalil, bꞌix qa oxhchꞌokel eꞌeꞌ tzan junky aj nyaꞌtx jwert at tukyꞌi Qtata Dios, ¿tiꞌtzun, nlay petzun qet tzꞌaqik tzan tpaj aj nchkꞌulun yatz? 11 Ikxji tzan tpaj te aj nqet abꞌisuꞌ, te qerman aj nyaꞌtx jwert at opoyonaj, bꞌix tiꞌj tetz te Qajaw Jesukrist okamik. 12 Ikxji oj qjoyon choj tiꞌj te qerman bꞌix oj jkꞌulun tzan kꞌon tqet tbꞌisuꞌ te qerman tuj tumeꞌl tzan tpaj nyaꞌtx bꞌan jwert at, ntons ikxji qetz nqojoyon choj tiꞌj Krist. 13 Ikxji qa tzan tpaj te aj nxik nwaꞌaꞌ wetz nqet tzꞌaqik junky qerman, mejor wetz nlay xik nchoꞌ aj chibꞌjni tzan kꞌon nkꞌulun tzan tqet tzꞌaqik te junky qerman.