7
Jun Konsej Tistil Nqoꞌok Junan
1 Ajnaꞌl tiꞌj te aj oqet etzꞌibꞌaꞌ tuj etuꞌuj aj otzaj esamaꞌ wetz, bꞌaꞌn qa jun ichan nlay tzꞌok tmakoꞌ xuj.a 2 Per tzan tpaj at nim kꞌajajbꞌilj mejor junjunchaq intqet tjoyoꞌ txuꞌjel bꞌix junjunchaq intqet tjoyoꞌ tichmil. 3 Jun ichmilbꞌaj a tgan tzan tkꞌulun tukyꞌi te txuꞌjel kyaqil aj presis iktzaꞌx tkajlen siꞌ, bꞌix ax ikxji te xuj tukyꞌi tichmil. 4 Te xuj kꞌontiꞌl tzan tkꞌulun mandad tibꞌx tiꞌj xhchiꞌjel sinoke a te tichmil, bꞌix ax te ichmilbꞌaj kꞌontiꞌl tzan tkꞌulun mandad tibꞌx tiꞌj xhchiꞌjel sinoke a te txuꞌjel. 5 Kꞌon qet exkꞌayiꞌ waq etibꞌx, aꞌox qa ma kxkaj tiꞌj tzan kꞌon ekꞌulun jun tyemp tzan tok esiꞌ ekꞌuꞌj tzan exnaqꞌtzan, bꞌix yaji a tgan tzan eqet witan junchꞌin junkyꞌel tzan kꞌon eqet tzꞌaqik tzan te Satanas, tzan tpaj cha nqet etipaꞌ aj tgan te echiꞌjel. 6 Kyaqil ntzani nxik nqꞌumaꞌ iktzaꞌ cha jun konsej, nyaꞌtx jun tidiꞌ aj nxik nkꞌuluꞌ mandad-wit tzan ekꞌulun ikxji. 7 Wetz ngan-talo kyaqil kye ichan tzan kykaj [kchukel] iktzaꞌ wetz aꞌin, per te Qtata Dios oje kaj tsiꞌchaq te junjun te aj bꞌan galan te tetz, junjun tzan kyok junan bꞌix junjunky tzan kꞌon kyok junan. 8 Wetz oxeꞌl nqꞌumaꞌ ntzani kye aj kuꞌxon bꞌix kye aj byud-eꞌ, bꞌaꞌn-talo tzan kykaj kchukel iktzaꞌ wetz aꞌin. 9 Per qa kꞌontiꞌl nbꞌantik tzan kyipan aj ntqaniꞌ te kchiꞌjel, ntons mejor inkyok junan; komo mejor tzan kyok junan bꞌix nyaꞌtx tzan kkyaqubꞌan bꞌix nlay qet kykꞌuluꞌ.
10 Per yatzun kye aj oje kyeꞌok junan, oxeꞌl nqꞌumaꞌ kyetz, te ntzani nyaꞌtx nyol wetz sinoke te Qajawil: Te jun xujelbꞌaj kꞌontiꞌl tzan tqet tpawaꞌ tibꞌ tiꞌj te tichmil. 11 Per qa oqtel tpawaꞌ tibꞌ tiꞌj te tichmil, a tgan tzan kꞌon tok junan tukyꞌi junky; bꞌix qa nyaꞌtx ikxji, ntons intjoyon tumeꞌl tzan sten kontent junkyꞌel tukyꞌi tichmil. Bꞌix yatzun te ichmilbꞌaj, kꞌontiꞌl tzan tkaj tkolaꞌ te txuꞌjel.*
12 Yatzun kyiꞌj kye txqꞌanky, wetz oxeꞌl nqꞌumaꞌ kyetz, te ntzani cha nyolx wetz, nyaꞌtx te Qajawil: Qa te txuꞌjel jun qerman kꞌontiꞌl nꞌokslan bꞌix ntnaꞌoꞌ qa bꞌaꞌn tzan tanqꞌin tukyꞌiꞌl, ntons te qerman kꞌontiꞌl tzan taj tlajoꞌ te txuꞌjel. 13 Bꞌix qa te tichmil jun qerman xuj kꞌontiꞌl nꞌokslan bꞌix ntnaꞌoꞌ qa bꞌaꞌn tzan tanqꞌin tukyꞌiꞌl, ntons te qerman xuj kꞌontiꞌl tzan tkaj tkolaꞌ te tichmil. 14 Komo te jun ichmilbꞌaj aj kꞌontiꞌl nꞌokslan nkaj pawaꞌ te Qtata Dios tzan tpaj tokslbꞌen te txuꞌjel; bꞌix ax te jun xujelbꞌaj aj kꞌontiꞌl nꞌokslan nkaj pawaꞌ te Qtata Dios tzan tpaj tokslbꞌen te tichmil; qa nyaꞌtx-wit ikxji ntons kye kykꞌwaꞌal, kyetz nyaꞌtx-tal pawameꞌ te Qtata Dios, per ajnaꞌl kyetz pawameꞌ te tetz. 15 Per qa te ichmilbꞌaj, qatzun te xujelbꞌaj, aj kꞌontiꞌl nꞌokslan te Qtata Dios tgan tzan tqet tpawaꞌ tibꞌ tukyꞌi txuꞌjel qatzun tukyꞌi tichmilji [aj nꞌokslan], ntons intqet tpawaꞌ tibꞌ; ikxji te qerman ichan qatzun te qerman xuj okolpjel tiꞌj te ntzani, tzan tpaj te Qtata Dios oje tzaj tqꞌumaꞌ tzan qanqꞌin tuj jun tumeꞌl kꞌontiꞌl qꞌoj. 16 Komo ¿awebꞌen petzun yatz aj xujelbꞌaj aꞌich, qa obꞌantel tzan tkolet te awichmil awitzaꞌ? Qatzun ¿awebꞌen petzun yatz aj ichmilbꞌaj aꞌich, qa obꞌantel tzan tkolet te axuꞌjel awitzaꞌ? 17 Junjunchaq te etetz peꞌebꞌet iktzaꞌ te tumeꞌl galan aj oje tzaj tsiꞌ te Qajawil etetz iktzaꞌx etzajlen tukꞌleꞌ. Aj ntzani wetz nxik nqꞌumaꞌ kye kyaqil bꞌuchꞌuj qerman jaꞌchq.
18 Qa te Qtata Dios otzaj tukꞌleꞌ jun aj atok techalul, ntons intkaj ikxji bꞌix kꞌon bꞌisun; per qa te Qtata Dios otzaj tukꞌleꞌ jun aj kꞌontiꞌl atok techalul ntons kꞌon tzꞌok tsiꞌ techalul. 19 Komo qa atok qechalul qatzun kꞌontiꞌlji, nyaꞌtx a te presisji; komo te aj presis tzan tqet qokslaꞌ te aj okaj tqꞌumaꞌ Qtata Dios. 20 Junjunchaq inkyten iktzaꞌx tuq akyeqet aj ktzaj ukꞌleꞌ tzan Qtata Dios. 21 ¿Aj awokslan yatz, mosiꞌ petzun tuq aꞌich? Kꞌon chbꞌisun, per qa bꞌaꞌn tzan akaj tzoqpiꞌ, intok asiꞌ akꞌuꞌj tzan akaj tzoqpiꞌ. 22 Te aj mosiꞌ tuq tzan junky bꞌix yaji otzaj ukꞌleꞌ tzan te Qajawil, tetz ajnaꞌl oje tzoqpjik [tuj tqꞌabꞌ te choj] tzan tpaj te Qajawil; bꞌix te aj otzaj ukꞌleꞌ bꞌix nyaꞌtx tuj tqꞌabꞌ junky tuq nꞌaqꞌunan, tetz ajnaꞌl nꞌaqꞌunan te Krist. 23 Te Qtata Dios oje tzꞌel xhchojoꞌ te echoj tzan tkolon etetz, astilji kꞌon etzoqpij tzan ekaj tuj tqꞌabꞌ junky. 24 Astilji waq erman, [tiꞌj te etechalul] peꞌeten tukyꞌi Qtata Dios iktzaꞌx aj atikxqet tuq aj etzaj tukꞌleꞌ tbꞌay-el.
25 Ntons kyiꞌj kye aj minaꞌ tok kyen twitz ichan qatzun twitz xujji,b wetz kꞌontiꞌl jun tidiꞌ tzan txik nqꞌumaꞌ kyetz aj oje kaj tqꞌumaꞌ-wit te Qajawil, per oxeꞌl nqꞌumaꞌ aj wetz nbꞌisuꞌ tuj nnabꞌl iktzaꞌ aꞌin jun aj oje tzꞌok loꞌet tkꞌuꞌj Qtata Dios wiꞌj bꞌix astilji bꞌaꞌn tzan tok ewitꞌbꞌaꞌ ekꞌuꞌj wiꞌj. 26 Wetz tuj nnabꞌl, galan qa jun ichan nkaj iktzaꞌx atqet ajnaꞌl tzan tpaj te ja tyemp ajnaꞌl aj itzꞌojoꞌ qetzni bꞌan kwest tzan qanqꞌin. 27 Qa yatz at axuꞌjel, ntons kꞌontiꞌl tzan tkaj akolaꞌ; qa kꞌontiꞌl axuꞌjel, mejor-tal kꞌontiꞌl tzan tqet abꞌisuꞌ tzan tqet ajoyoꞌ. 28 Qa jun ichan ma tzꞌok junan, kꞌontiꞌl njoyon choj, bꞌix qa jun xuj ma tzꞌok junan, ax kꞌontiꞌl njoyon choj; qa ma kyeꞌok junan, kyetz owokel kyen twitz xhchoꞌnal tzan tpaj te aj presis te kyetz tzan kyanqꞌin, bꞌix wetz kꞌon-tal ngan tzan tkyꞌik etiꞌj ikxji. 29 [Ntons instzaj echaꞌoꞌ te ja ntzani,] wetz nxik nqꞌumaꞌ etetz erman, nyaꞌtx nim tyempky [tzan tul te jwisy]. Astilji kye aj at kxuꞌjel, kꞌontiꞌl tzan tok ksiꞌ kykꞌuꞌj cha aꞌox tiꞌj kxuꞌjel,c 30 bꞌix kye aj nkyeꞌoqꞌ, inkyten iktzeꞌxtzun kꞌontiꞌl nkyeꞌoqꞌ, bꞌix kye aj nkyechalaj, inkyten iktzeꞌxtzun kꞌontiꞌl nkyechalaj, bꞌix kye aj ntzaj kyloqꞌoꞌ jun tidiꞌ, inkyten iktzeꞌxtzun te tidiꞌ nlay bꞌantik tzan tkaj te kyetz bꞌeyx te jun-eleꞌx. 31 Bꞌix kye aj nꞌoken kyitzaꞌ tidiꞌchq aj tzani twitz ja txꞌoꞌtxꞌni, kꞌontiꞌl tzan tok ksiꞌ kykꞌuꞌj aꞌox tiꞌj nini, tzan tpaj kyaqil aj at twitz ja txꞌoꞌtxꞌni opoyonaj.
32 Wetz ngan-tal tzan kꞌon ebꞌisun tiꞌj tidiꞌchq tzani twitz txꞌoꞌtxꞌ. [Komo] te aj minaꞌ toknoj txuꞌjel, tetz nꞌok tsiꞌ tkꞌuꞌj tiꞌj taqꞌun te Qajawil bꞌix titzaꞌ tzan tanqꞌin tuj tumeꞌl tuj twitz tetz. 33 Yatzun te aj oje tzꞌoknoj txuꞌjel, tetz nꞌok tsiꞌ tkꞌuꞌj tiꞌj tidiꞌchq twitz ja txꞌoꞌtxꞌni bꞌix nꞌok tsiꞌ tkꞌuꞌj tzan tkaj galan tuj twitz txuꞌjel 34 bꞌix ikxji pawaꞌ tibꞌ. Yatzun jun xuj aj xhchukel at, qatzun jun xuj aj minaꞌ tok ten twitz ichanji, kyetz witꞌlik kykꞌuꞌj tiꞌj te taqꞌun Qajawil tzan tpaj pawameꞌ te Qtata Dios, nyaꞌtx aꞌox kyanim sinoke ax te kchiꞌjel. Per yatzun jun xuj aj at tichmil, tetz nꞌok tsiꞌ tkꞌuꞌj tiꞌj tidiꞌchq aj at twitz txꞌoꞌtxꞌ tzan tkaj galan tuj twitz te tichmil. 35 Wetz nqet ntzꞌibꞌaꞌ te ntzani te jun galan te etetzx bꞌix nyaꞌtx cha nkꞌuluꞌ tzan tok mas kwest te etetz, sinoke tzan etanqꞌin tuj jun tumeꞌl bꞌan galan, bꞌix tzan eten qꞌapoꞌ etibꞌ te Qajawil tukyꞌi jun tkꞌuꞌjlal.
36 Qa jun ichan nꞌok tqꞌolbꞌeꞌ jun xuj aj minaꞌ tok ten twitz ichan bꞌix ma kyꞌik tedad te xuj, bꞌix te ichan ntbꞌisuꞌ qa a tgan tzan tjunan tukyꞌiꞌl, intok junan tukyꞌiꞌl, nini nyaꞌtx choj. 37 Per te aj ntbꞌisuꞌ tuj tanim tukyꞌi jun tkꞌuꞌjlal [tzan kꞌon tok junan], bꞌix qa kꞌontiꞌl tidiꞌ nlajon tetz tzan tok junan, bꞌix qa bꞌaꞌn tzan tkꞌulun mandad tibꞌx tiꞌjx, bꞌix qa oje qet tbꞌisuꞌ tzan kꞌon tok junan, ntons ax tetz ntkꞌuluꞌ galan. 38 Ntons ikxji, te aj nꞌok junan, ntkꞌuluꞌ galan, bꞌix te aj kꞌontiꞌl nꞌok junan, ntkꞌuluꞌ mas bꞌan galan.
39 Jun xuj aj at tichmil, tetz junbꞌeꞌ tibꞌ tiꞌj te tichmil qa tzunx itzꞌoj te tichmil, per qa ma kamik te tichmil ntons te xuj bꞌaꞌn tzan tok junan tukyꞌi junky aj tetz tgan, per aꞌox tukyꞌi jun aj nꞌokslan te Qajawil. 40 Per wetz tuj nnabꞌl tetz mas ochalajel qa nlay tzꞌok junan junkyꞌel. Te ntzani cha tuj nnabꞌl wetz, per wetz webꞌen atqex te Txew Dios tuj wanim.