6
Kꞌontiꞌl Tzan Qxik Qaniyon Tiꞌj Jun Qermanx Sinoke Tzan Tbꞌantik Sten Kyaqil Qxolx Qetz
1 Ntons, qa at jun exol etetz aj oxeꞌl qaniyon tiꞌj junky, ¿tistil nxik qaniyon tiꞌj, kywitz kye aj kꞌontiꞌl nkyeꞌokslan Qtata Dios? ¿Tistil nyaꞌtx kywitz kye qerman aj pawameꞌ te Qtata Dios? 2 ¿Tiꞌtzun, kꞌontiꞌl etebꞌen etetz, qetz aj pawamoꞌ te Qtata Dios oxeꞌl jqꞌumaꞌ kyil kye aj kꞌontiꞌl nkyeꞌokslan Qtata Dios [chaꞌoj tul te Qajaw]?* Qa qetz aj nqoꞌokslan Qtata Dios oxeꞌl jqꞌumaꞌ kyil kye aj kꞌontiꞌl nkyeꞌokslan, ¿tiꞌtzun etetz nlay bꞌantik etitzaꞌ tzan txik eqꞌumaꞌ tidiꞌ presis tzan tbꞌantik tukyꞌi jun tidiꞌ nekit aj exolx etetz? 3 ¿Tiꞌtzun, kꞌontiꞌl etebꞌen, qetz aj nqoꞌokslan Qtata Dios oxeꞌl jqꞌumaꞌ kyiꞌj kye ángel? Qa ikxji, ntons ¿token nlay bꞌantik tzan txik epoqoꞌ jun tidiꞌ aj tzani twitz txꞌoꞌtxꞌ? 4 Qa etetz at jun qꞌoj exol, ¿tistil nkxik kyukyꞌi kye pujul il aj kꞌontiꞌl kyoklen qxol qetz aj nqoꞌokslan Qtata Dios? 5 Wetz nxik nqꞌumaꞌ etetz ntzani tzan ekyꞌixwik chꞌin. ¿Tiꞌtzun, kꞌontiꞌl nijunwt exol etetz aj bꞌaꞌn tzan txik tqꞌumaꞌ alkyetz te tumeꞌl kyiꞌj kabꞌeꞌ qerman aj nkyeqꞌojin? 6 [Per kꞌontiꞌl] sinoke cha nkxqanin tiꞌj junky etermanx exolx bꞌix nkxik qaniyon kywitz xjal aj kꞌontiꞌl nkyeꞌokslan. 7 Tzan tpaj cha nkxqanin etiꞌjx exolx, nini telponx etetz kꞌontiꞌl nkxbꞌet tuj tumeꞌl. ¿Tistil nyaꞌtx mejor cha tzan etipan kyaqil te aj nyaꞌtx galan aj nꞌok kꞌuluꞌ etiꞌj? ¿Tistil mejor nyaꞌtx tzan etzoqpin qa ma kxqet elqꞌaꞌ? 8 Per etetz cha mas nkxkꞌulun tiꞌchq nyaꞌtx galan bꞌix nkyeqet etelqꞌaꞌ txqꞌanky, bꞌix kyaqil ntzani kyiꞌj etermanx. 9 ¿Tiꞌtzun, kꞌontiꞌl etebꞌen etetz kyaqil kye aj nkyekꞌulun nyaꞌtx galan nlay bꞌantik tzan kykꞌamon jun kyanqꞌin te jun-eleꞌx tukyꞌi Qtata Dios? Kꞌon qet emoyiꞌ etibꞌ; kye aj nkyekꞌajajin bꞌix kye aj nkyenaꞌon twitz titzbꞌalil jun tidiꞌ bꞌix kye aj xhqꞌe-eꞌ, 10 bꞌix kye aj eleqꞌ bꞌix kye aj nkyetzeqtik tiꞌj tidiꞌchq, bꞌix ax kye aj pur xhbꞌaꞌj kyaqꞌun bꞌix kye aj yasol txqꞌanky, bꞌix kye aj nqet kyelqꞌaꞌ junky, nijunwt kyetz nlay bꞌantik tzan kykꞌamon jun kyanqꞌin te jun-eleꞌx tukyꞌi Qtata Dios. 11 Oqtxiꞌ junjun exol etetz aꞌix tuq iktzaꞌ kye ja xjalni, per ya etetz ajnaꞌl oje kaj saq etanim, oje kxꞌel pawaꞌ aꞌox te Qtata Dios, bꞌix oje tzꞌel in echoj tzan tpaj tajwalil Qajaw Jesukrist bꞌix tzan tpaj te Txew Dios.
Te Qchiꞌjel Nyaꞌtx Te Qetzx Sinoke Te Qtata Dios
12 Wetz libr atin tzan tqet nkꞌuluꞌ kyaqil aj ngan, per nyaꞌtx kyaqil owokel te jun galan te wetz. Libr atin tzan tqet nkꞌuluꞌ kyaqil, per wetz nlay ntzoqpij tzan nqet kykꞌuluꞌ mandad kyaqil nini.* 13 [Iktzaꞌx kye xjal nkyeyolin] “te qweꞌ nꞌoken te jkꞌuꞌj, bꞌix te jkꞌuꞌj te qweꞌ.” Per jun qꞌij te Qtata Dios opoyon tnajsaꞌxkix kykabꞌil nini. Bꞌix te qchiꞌjel nyaꞌtx tzan token te kꞌajajbꞌilj, sinoke te qchiꞌjel te Qajaw, bꞌix te Qajaw te qchiꞌjel.a 14 Bꞌix te Qtata Dios aj otkꞌuluj tzan tjaw anqꞌin te Qajawil, ax otkꞌuluꞌtz tzan qjaw anqꞌin qetz tzan tajwalil. 15 ¿Tiꞌtzun, kꞌontiꞌl etebꞌen etetz, te echiꞌjel [nyaꞌtx te etetzx sinoke] te Krist [tzan tpaj te Txew atqex tuj etanim tuj echiꞌjel]? ¿Nkꞌuluꞌtz petzun wetz tzan tok njunbꞌeꞌ te xhchiꞌjel Jesukrist tiꞌj xhchiꞌjel jun xuj aj nkꞌayin tibꞌ? ¡Nlay! 16 ¿Kꞌontiꞌl petzun etetz etebꞌen qa jun xjal ma tzꞌok tjunbꞌeꞌ tibꞌ tukyꞌi jun xuj aj nkꞌayin tibꞌ, nkyeꞌok cha jun xjal-oq kykabꞌil? Komo te Qtata Dios nyolin ikxjani [tuj Tuꞌjal]: “Te kchiꞌjel kyetz owokel iktzaꞌ cha jun xjal tzan kykabꞌil.”* 17 Per te aj nꞌok tjunbꞌeꞌ tibꞌ tukyꞌi Qajawil, tetz nꞌok cha jun-oq tuj tanim tukyꞌiꞌl. 18 Intkaj ekolaꞌ waq te kꞌajajbꞌilj. Kye txqꞌanky txakl choj aj ntkꞌuluꞌ jun xjal kꞌontiꞌl tidiꞌ nkyꞌik tiꞌj te xhchiꞌjel tetz, per te xjal aj nkꞌajajin, te nini njoyon choj tiꞌjx te xhchiꞌjel tetz. 19 ¿Kꞌontiꞌl petzun etebꞌen etetz, te echiꞌjel iktzaꞌ tjay te Txew Dios aj atqex tuj etanim bꞌix otzaj siꞌ tzan te Qtata Dios, bꞌix [astilji] etetz nyaꞌtx aꞌix etajawilx etiꞌj?* 20 Te Qtata Dios oje tzꞌel xhchojoꞌ te echoj tzan tkolon etetz, astilji etetz presis tzan tqet ejiqꞌbꞌaꞌ te Qtata Dios tukyꞌi echiꞌjel.