5
Titzaꞌ Tzan Jkaj Tiꞌj Jun Qerman Aj Tidiꞌchq Nkꞌulun
1 Ntons wetz owok nchaꞌoꞌ exol etetz at jun kꞌajajbꞌilj aj ni kxol kye aj nyaꞌtx aj tijajil Israel aj kꞌontiꞌl nkyeꞌokslan te Qtata Dios nkyekꞌulun ikxji. Oje tzꞌok nchaꞌoꞌ jun te etetz xujelaꞌ tnanbꞌilx titzaꞌ. Te nini bꞌan nyaꞌtx galan.* 2 ¡Bꞌix etetz tuj enabꞌl bꞌan galan atix! ¿Nyaꞌtx petzun cha-tal bꞌan kxbꞌisun chꞌin tiꞌj nini? ¿Tistil minaꞌx tetz etin exol te aj nkꞌulun ikxnini? 3 Wetz, anke kꞌontiꞌl akyinqet nwitzaleꞌ exol, wetz nkyinbꞌisun nim tuj wanim etiꞌj, bꞌix oje qet nbꞌisuꞌ, te aj ntkꞌuluꞌ te aj xjalni jun bꞌan nyaꞌtx galan. 4 Nxik nqꞌumaꞌ etetz, chaꞌoj tok echimoꞌ etibꞌ tzan enaꞌon te Qajaw Jesukrist bꞌix oj tqet ebꞌisuꞌ tiꞌj te nyol aj maꞌtx xik nqꞌumaꞌ, ntons tukyꞌi tajwalil te Qajaw Jesukrist aj oje xik tsiꞌ etetz, 5 intetz etin exol te aj xjalni tzan tkaj tuj tqꞌabꞌ te Satanas tzan tponaj te xhchiꞌjel bꞌix tzan tkolet te tanim oj tul te Qajaw junkyꞌel.
6 Etetz nyaꞌtx galan nkxkꞌulun bꞌix nqet ejiqꞌbꞌaꞌ etibꞌ. ¿Tiꞌtzun, kꞌontiꞌl etebꞌen [aj ntkꞌuluꞌ jun xjal ikxnini owokel jun nyaꞌtx galan kxol kye txqꞌanky iktzaꞌ] te malsbꞌil aj nxik tsipaꞌ tibꞌ tuj kyaqil te qꞌotj?* 7 [Astilji] intex etin [te aj xjal exolni] tzan ekaj saq exol etetz iktzaꞌ te qjay nkaj saq chaꞌoj tex qin te malsbꞌil wabꞌj qꞌanq tuj qjay tuj te qꞌij Paskw. Ikxji tzan etok exol etetz iktzaꞌ jun akꞌaꞌj qꞌotj kꞌontiꞌl jun malsbꞌil tuj. Komo te Krist oje qet klabiꞌ twitz krus te chojbꞌil qchoj iktzaꞌ te tal moch* aj nqet kansaꞌ tuj te qꞌij Paskw. 8 Ntons intqet jqꞌijlaꞌ te qꞌij, per nyaꞌtx tukyꞌi jun [nyaꞌtx galan qxol iktzaꞌ] jun malsbꞌil qꞌanq tuj te wabꞌj, iktzaꞌ te [aj bꞌan nyaꞌtx galan tuj qanim tuq oqtxiꞌ], sinoke intqet jqꞌijlaꞌ tukyꞌi jun tkꞌuꞌjlal bꞌix tuj tumeꞌl bꞌanꞌax iktzaꞌ nqet jqꞌijlaꞌ te qꞌij tukyꞌi jun wabꞌj aj kꞌontiꞌl malsbꞌil tuj.*
9 Wetz oje qet ntzꞌibꞌaꞌ te etetz tzan kꞌon tzꞌox esamoꞌ etibꞌ kyukyꞌi kye aj nkyekꞌajajin. 10 Per wetz kꞌontiꞌl nkyinyolin kyiꞌj kye aj nyaꞌtx aꞌeꞌ aj qxol, iktzaꞌ aꞌeꞌ aj kꞌajajiyon bꞌix nkyetzeqtik tiꞌj tmin bꞌix eleqꞌ bꞌix kye aj nkyenaꞌon titzbꞌalil jun tidiꞌ; qa nkyinyolin-wit kyiꞌj kyetz, ntons presis-tal tzan tkaj ekolaꞌ te ja twitz txꞌoꞌtxꞌni. 11 Nqet ntzꞌibꞌaꞌ te etetz tzan kꞌon tox esamoꞌ etibꞌ kyukyꞌi kye aj nkyyoliꞌ qerman-eꞌ bꞌix nkyekꞌajajin, nkyetzeqtik tiꞌj tmin, nkyenaꞌon twitz titzbꞌalil jun tidiꞌ, ntzaj kyqanbꞌeꞌ tiꞌj junky, nkyexhbꞌaꞌjin, nkyeꞌelqꞌan. Kyukyꞌi kyaqil aj xjalji ni kꞌon kxwaꞌan junx kyukyꞌiꞌl. 12 Komo ¿tidiꞌ wetz woklen tzan kxik npoqoꞌ kye aj kꞌontiꞌl nkyeꞌokslan? ¿Nyaꞌtx petzun aꞌix etetz aj at etoklen tzan kxik epoqoꞌ kye aj exol etetz? 13 Kye aj kꞌontiꞌl nkyeꞌokslan, a te Qtata Dios oxeꞌl poqon kyetz. Per yatzun exol etetz, inkyetz etin kye aj nkyejoyon choj.