4
Aꞌox Te Qtata Dios At Tajwalil Tzan Txik Tyoliꞌ Titzaꞌ Taqꞌun Jun Tkyꞌixel
1 Ntons, kyaqil xjal injqet kyena chꞌin iktzaꞌ qꞌapoꞌ qibꞌa nqoꞌaqꞌunana te Krist, bꞌix oje tzaj siꞌ qajwalilna tzan txik qpakbꞌaꞌ te aj kꞌontiꞌl owel nikyꞌj tiꞌj te Qtata Dios tbꞌayaꞌ. 2 Kye aj oje tzaj siꞌ kyajwalil presis tzan kꞌon tkaj ksiꞌ tzan kyaqꞌunan tukyꞌi tumeꞌl. 3 Wetz kꞌontiꞌl nkyinbꞌisun titzaꞌ nkyinꞌel tuj ewitz, qatzun tuj kywitz kye aj nkyepoqon txqꞌanky, komo ni wetz kꞌontiꞌl tidiꞌ bꞌaꞌn tzan txik nqꞌumaꞌ wiꞌjx. 4 Wetz nnaꞌoꞌ tuj wanim nkyinꞌaqꞌunan tumeꞌl, per nyaꞌtx tzan tpajji wetz galan atin tuj twitz Qtata Dios, aꞌox te Qtat eꞌel tetz.* 5 Ntons kꞌon xik eqꞌumaꞌ til te junky qa minaꞌ tpon or, sinoke [peꞌetiyon waq] max oj tul te Qajawil; a tetz otzajel tqꞌumaꞌ xtxolil kyaqil tidiꞌchq aj nkyekꞌulun ewj tuj qlolj bꞌix a tetz otzajel tyekꞌuꞌ kyaqil aj nꞌel tganiꞌ te qanim. Ntons junjunchaq okyeqtel jiqꞌbꞌaꞌ tzan te Qtata Dios tzan tpaj aj owokel en kyiꞌj.
6 Ntons wetz erman, nxik nqꞌumaꞌ etetz ntzani te jun galan te etetzx bꞌix nqet nyekꞌuꞌ jun ejempl te etetz tiꞌj te Pol bꞌix wiꞌjx wetz, tzan tox tuj ewiꞌ te aj tzꞌibꞌankaj [tuj Tuꞌjal Dios] tzan kꞌon enaꞌon etetz mas tbꞌanil aꞌix kywitz txqꞌanky. 7 Komo ¿abꞌl jun mas tbꞌanil kywitz kye txqꞌanky? Bꞌix ¿tidiꞌ at te etetz aj nyaꞌtx a te Qtata Dios oje tzaj sin tetz? Per qa te Qtat oje tzaj sin tetz, ntons ¿tistil etetz nqet ejiqꞌbꞌaꞌ etibꞌ? 8 Qa tuj enabꞌl kꞌontiꞌl tidiꞌ npaltin te etetz bꞌix qꞌinon aꞌix bꞌix witꞌlikix tuj ewitꞌlel iktzaꞌ jun kꞌulul mandad, galan-talo qa bꞌanꞌaxwit aꞌix iktzaꞌ jun kꞌulul mandad, ikxji qetza bꞌaꞌn-tal tzan jkꞌuluna mandad chꞌin etukyꞌiꞌl. 9 Per ajnaꞌl qetza aj tkyꞌixel Jesus aꞌoꞌni, qanq te Qtata Dios oje qokaj tkolaꞌ bꞌix okaj siꞌna tzan jkamik, bꞌix cha aꞌoꞌna te kykaꞌybꞌil kyaqil xjal bꞌix kykaꞌybꞌil kye ángel. 10 Qetza tzan tpaj nqet qganiꞌna te Krist, nꞌel tuj ewitz iktzaꞌ bꞌan tꞌaꞌq aꞌoꞌna, per etetz tuj enabꞌl bꞌan list aꞌix tzan tpaj te Krist; bꞌix etetz tuj enabꞌl qetza kꞌontiꞌl bꞌaꞌn qitzaꞌna per etetz bꞌaꞌn etitzaꞌ. Etetz bꞌan jiqꞌbꞌamix per qetza nyaꞌtx jiqꞌbꞌamoꞌna. 11 Qetza nꞌok qen twitz waꞌij bꞌix at tzakjel qiꞌja bꞌix pur chꞌi xhbꞌuꞌq jqꞌanaq, bꞌix nqoqetbꞌaj bꞌujuꞌna bꞌix kꞌontiꞌl jun qjaya aj qetzax, 12 bꞌix njkansaꞌ qibꞌ tzan tpaj nim nqoꞌaqꞌunana. Kye xjal nqoꞌok kyyasoꞌna, per qetza nkyeqet qkyꞌiwlaꞌna; kyetz nqoꞌex kylajoꞌna, per nkyꞌix qitzaꞌna; 13 njaw kynikꞌoꞌ yol qiꞌj, per qetza tukyꞌi yol tumeꞌl nꞌaj qtzaqꞌbꞌeꞌna; qetza nqoqet ena tzan kye xjal iktzaꞌ kyꞌis bꞌix iktzaꞌ kꞌontiꞌl qokena.
14 Wetz nqet ntzꞌibꞌaꞌ ntzani nyaꞌtx tzan tel win ekyꞌexaw sinoke tzan txik nsiꞌ jun konsej etetz iktzaꞌ nkꞌwaꞌal aꞌix aj ganimix witzaꞌ. 15 Anke ateꞌ bꞌan kyꞌilaꞌja xnaqꞌtzon te xnaqꞌtzal etetz tiꞌj te Krist, per nijunwt te kyetz iktzaꞌ jun etat. Tzan tpaj te Kristo Jesus wetz aꞌin etat toklen echaꞌoꞌ te tpakbꞌalil galan aj oxik npakbꞌaꞌ te etetz. 16 Astilji wetz nxik nqꞌumaꞌ etetz, intel etin iktzaꞌ wetz aꞌin.* 17 Astilji wetz oxik nlajoꞌ te Timotey etukyꞌiꞌl tzi. Tetz iktzaꞌ jun nkꞌwaꞌal aj ganiꞌ nim witzaꞌ, bꞌix kꞌontiꞌl nkaj tsiꞌ tzan tqet tokslaꞌ te Qajawil. Tetz oxeꞌl tqꞌumaꞌ etukyꞌiꞌl tzan stzaj enaꞌoꞌ titzaꞌ wetz nkyinbꞌet tuj tumeꞌl iktzaꞌx nkyinꞌokslan tiꞌj Krist, iktzaꞌx nxik nxnaqꞌtzaꞌ jaꞌchq kxol kyaqil bꞌuchꞌuj qerman.
18 Ntons, ateꞌ junjun exol etetz, bꞌan nqet kyjiqꞌbꞌaꞌ kyibꞌ iktzaꞌ tlimaqal xjal-eꞌ, kyetz tuj kynabꞌl qa nlay kyinpon exol. 19 Wetz okyinpoyon naj etukyꞌiꞌl, qa ikxji tgan te Qajawil, bꞌix ikxji owokel nchaꞌoꞌ kyaqil aj nkyyoliꞌ kye ja cha kyjiqꞌbꞌanqet kyibꞌni bꞌix owokel wen tidiꞌ bꞌaꞌn tzan kykꞌulun. 20 Komo tzan jkaj tuj tqꞌabꞌ Qtata Dios, nyaꞌtx cha tzan tpaj aj nim nqoyolin sinoke tzan tpaj nqoꞌanqꞌin tukyꞌi jun tumeꞌl aj ntzaj tsiꞌ te Qtata Dios qetz tukyꞌi nim tajwalil. 21 ¿Titzaꞌ egan etetz oj npon exol? ¿Egan peꞌ tzan wilin etiꞌj, qatzun tzan nyolin tukyꞌi jun tumeꞌl bꞌan galanji iktzaꞌ nkxqet nganiꞌ bꞌix tzan tok loꞌet nkꞌuꞌj etiꞌj?