3
Qetz Aj Nqoxnaqꞌtzan, Cha Jun Te Qajawil Aj Lapikoꞌ Tiꞌj
1 Wetz erman, [aj atin tuq exol], kꞌontiꞌl obꞌantik tzan nyolin etukyꞌiꞌl iktzaꞌ jwert atix tukyꞌi Qtata Dios, sinoke inyolin etukyꞌiꞌl iktzaꞌ cha nꞌok esiꞌ ekꞌuꞌj tiꞌj tidiꞌchq tzani twitz txꞌoꞌtxꞌ bꞌix iktzaꞌ man txiklen etokslaꞌ tiꞌj Krist. 2 A tgan tuq tzan [exik nxnaqꞌtzaꞌ kyebꞌaꞌ iktzaꞌ] jun tal kꞌwaꞌl aj man nxik siꞌ xtxuꞌ bꞌix nyaꞌtx tweꞌ, komo etetz minaꞌ tuq tbꞌantik tzan ekꞌamon [jun xnaqꞌtzbꞌilj aj mas kwest].* Bꞌix tzunx ajnaꞌl etetz nyaꞌtx list atix tzan ekꞌamon jun tidiꞌ ikxji, 3 tzan tpaj etetz tzunx nꞌok esiꞌ ekꞌuꞌj tiꞌj tidiꞌchq tzani twitz txꞌoꞌtxꞌ, komo etetz tzunx bꞌan enbidyos aꞌix exolx bꞌix nkxqꞌojin exolx. ¿Tiꞌtzun, nyaꞌtx petzun ikxji nkxkꞌulun iktzaꞌ aj cha tgan te echiꞌjel bꞌix cha nkxbꞌet iktzaꞌ kye txqꞌanky xjal? 4 Oj eyolin ikxjani, “wetz aꞌin te Paꞌk,” bꞌix junjunky, “wetz aꞌin te Pol,”* ikxnini cha nkxbꞌisun etetz iktzaꞌ nkyebꞌisun kye xjal aj kꞌontiꞌl nkyexnaqꞌtzan. 5 Komo ¿tidiꞌ [tajwalil] te Pol? Bꞌix ¿tidiꞌ [wajwalil] wetz? Qetza cha aꞌoꞌna aqꞌunon te Qajaw Jesukrist, bꞌix bꞌaꞌn tuq tzan etokslan tzan tpaj te Qajawil otzaj tsiꞌ qajwalilna te junjunchaq qetza tzan txik qpakbꞌaꞌna etukyꞌiꞌl. 6 Tbꞌay aꞌin wetz [inpakbꞌan exol iktzaꞌ jun xjal aj] nqex tawaꞌ jun awalj, bꞌix yaji a te Pol* [oxik xnaqꞌtzan etetz iktzaꞌ jun xjal aj] nqet aꞌlen te awalj, per a te Qtata Dios njaw tkyꞌibꞌsaꞌ te awalj.* 7 Ikxji, te aj nꞌawan bꞌix te aj nꞌaꞌlen kꞌontiꞌl kyajwalil sinoke aꞌox te Qtata Dios aj njaw tkyꞌibꞌsaꞌ kyaqil. 8 Kye aj nkyeꞌawan bꞌix kye aj nkyeꞌaꞌlen, kyetz junx nkyeꞌaqꞌunan tzan tok galan te awalj, bꞌix kykabꞌil okykꞌamoꞌtz twiꞌ kykꞌuꞌj iktzaꞌx kyaqꞌumbꞌen. 9 Komo qetza iktzaꞌ aꞌoꞌna oneyon te Qtata Dios [tuj taqꞌun], bꞌix etetz aꞌix iktzaꞌ te awalj aj nkxkꞌamon jun etanqꞌin tukyꞌiꞌl. Bꞌix ax [bꞌaꞌn tzan qyolin] etetz iktzaꞌ jun jay aj tkꞌulbꞌen Qtata Dios. 10 Komo te Qtata Dios oje tzaj tsiꞌ wetz jun wajwalil, bꞌix tzan tpaj nini wetz aꞌin iktzaꞌ jun aj kꞌulu jay aj totzqiꞌ nim aj witꞌbꞌal txeꞌ jun jay bꞌix txqꞌanky njaw ktzꞌaqoꞌ te loqꞌ. Per junjunchaq te qetz a tgan tzan tok qsiꞌ qnabꞌl titzaꞌ nqoꞌaqꞌunan 11 tzan tpaj nlay bꞌantik tzan txik xnaqꞌtzaꞌ junky tumeꞌl titzaꞌ tzan jkolet sinoke aꞌox te tumeꞌl tiꞌj Jesukrist.
12 Te ntzani iktzaꞌ qa jun xjal ojawel tkꞌuluꞌ jun loqꞌ tajsik te twitꞌlel tukyꞌi xtxꞌotxꞌal oro, xtxꞌotxꞌal plat, qatzun tukyꞌi pur abꞌj aj bꞌan tbꞌanil, qatzun tukyꞌi tzeꞌji qatzun tukyꞌi kyꞌimji qatzun cha toq triwji, 13 per te taqꞌumbꞌen owokel eꞌelet qa bꞌaꞌn oj tok te qꞌaqꞌ tiꞌj oj tul te jwisya bꞌix oqtel kꞌuluꞌ probar kyaqꞌumbꞌenchaq te junjun. 14 Qa taqꞌumbꞌen jun xjal owelal galan oj tul te jwisy ntons otkꞌamoꞌtz te aj tmeres. 15 Per qa te taqꞌumbꞌen opoyonaj, ntons tetz okoletel, per iktzaꞌ jun xjal aj pen okoletel tuj jun qꞌaqꞌ bꞌix opoyonaj kyaqil tidiꞌ tetz.
16 ¿Kꞌontiꞌl petzun etebꞌen qa etetz [echiꞌjel] iktzaꞌ te jay aj nabꞌil Qtata Dios bꞌix te Txew nnajan tuj etanim? 17 Qa at abꞌl opoyon tnajsaꞌ te aj jayji, ntons te Qtata Dios opoyon tnajsaꞌ te tetz tzan tpaj tetz tjay pawaꞌ aꞌox te tetz, bꞌix etetz aꞌix iktzaꞌ aj jayji.
18 Intok esiꞌ enabꞌl tzan kꞌon tqet eteqꞌiꞌ etibꞌx. Qa exol etetz at jun aj tuj tnabꞌl bꞌan tebꞌen nim, ntons mejor intok iktzeꞌxtzun kꞌontiꞌl tebꞌen nichꞌinwt [tuj kywitz kye xjal] tzan tok tetz jun aj bꞌanꞌax totzqiꞌ nim [tiꞌj te tumeꞌl bꞌanꞌax]. 19 Komo te tumeꞌl titzaꞌ nkyebꞌisun kye xjal twitz ja txꞌoꞌtxꞌni, cha jun tidiꞌ aj kꞌontiꞌl token tuj twitz Qtata Dios. Komo iktzaꞌx nyolin [tuj Tuꞌjal] ikxjani: “Te Qtata Dios tukyꞌi kylistulx nkyeqet titzaꞌ kye aj bꞌan kyotzqiꞌ kyaqil.”* 20 Bꞌix ax nyolin ikxjani: “Te Qajawil totzqiꞌ titzaꞌ nqet kybꞌisuꞌ kye [aj twitz ja txꞌoꞌtxꞌni] aj nim kylistul, per kꞌontiꞌl token te aj nkybꞌisuꞌ.”*
21 Astilji nijunwt intqet tjiqꞌbꞌaꞌ tibꞌ tiꞌj junky [aj jaꞌ nꞌok lapet], tzan tpaj kyaqil te jun galan te etetz exolx, 22 qa te Paꞌk, qatzun te Pol, qatzun te Xhpeꞌy, qatzun kyaqil aj at twitz ja txꞌoꞌtxꞌni, qatzun te etanqꞌin, qatzun te ekamiky, qatzun kyaqil aj at ajnaꞌl qatzun kyaqil aj okyꞌel mas yaj, kyaqil nini te etetz 23 bꞌix etetz aꞌix te Krist bꞌix te Krist te Qtata Dios.