2
Te Tpakbꞌalil Tkamlen Krist Twitz Krus A Te Aj Mas Presisji
1 Erman, aj npon wetz etukyꞌiꞌl pakbꞌal te tpakbꞌalil Qtata Dios, wetz kꞌontiꞌl inpakbꞌan exol tukyꞌi pur tbꞌanil yol bꞌix nyaꞌtx tukyꞌi jun nnabꞌl aj kwest-wit tzan tel enikyꞌ tiꞌj. 2 Wetz aj akyinqet tuq exol, wetz oqet nbꞌisuꞌ tuj wanim tzan kꞌon tqet nbꞌisuꞌ tiꞌj junky tidiꞌ sinoke aꞌox tiꞌj te Kristo Jesus aj owok klabiꞌ twitz krus. 3 Wetz aj npon exol kꞌontiꞌl tuq nbalor bꞌix nkyinluꞌlun tuq tukyꞌi nxobꞌal. 4 Aj nkyinpakbꞌan tuq te tpakbꞌalil galan, wetz kꞌontiꞌl oxik nqꞌumaꞌ etetz tukyꞌi tbꞌanil yol tzan txik etokslaꞌ iktzaꞌ nkyeyolin kye xjal, sinoke nkyinpakbꞌan tuq tukyꞌi jun nim tajwalil Txew Dios iktzaꞌx aj owok eten etetz. 5 Ikxji tzan kꞌon tok ewitꞌbꞌaꞌ ekꞌuꞌj tiꞌj tyol jun xjal, sinoke tzan tok ewitꞌbꞌaꞌ ekꞌuꞌj tiꞌj tajwalil te Qtata Dios.
Tzan Tel Qnikyꞌ Tiꞌj Te Aj Tgan Te Qtata Dios, A Tgan Te Txew Tuj Qanim
6 Ntons oj qyolin kxol kye aj jwert ateꞌ tukyꞌi Qtata Dios, nqoyolina tukyꞌi jun tumeꞌl bꞌan bꞌisuꞌ byenech, bꞌix nyaꞌtx tukyꞌi jun tumeꞌl aj otzaj xnaqꞌtzaꞌ-wit qetza tzan kye xjal aj twitz ja txꞌoꞌtxꞌni, qatzun tzan kye kꞌulul mandad aj twitz ja txꞌoꞌtxꞌni aj ikjaꞌn kyponaj.* 7 Sinoke nqoyolin a tiꞌj te aj bꞌisuꞌ tuq tzan te Qtata Dios oqtxiꞌ, tiꞌj aj nijunwt abꞌl tuq nꞌel tnikyꞌ tiꞌj, aj ojetq tuq qet tbꞌisuꞌ, atx aj minaꞌ tuq tqet tkꞌuluꞌ te twitz txꞌoꞌtxꞌ, tzan tok te jun nim bꞌan galan te qetz. 8 Te ntzani jun tidiꞌ aj minaꞌ tel kynikyꞌ kye kꞌulul mandad aj twitz ja txꞌoꞌtxꞌni; qa owox-wit tuj kywiꞌ, kꞌontiꞌl-tal oqet kyklabiꞌ twitz krus te Qajawil aj at mas nim xhchqitzꞌunal twitz kyaqil. 9 Iktzaꞌx nyolin [tuj te Oqtxiꞌ Tuꞌjal Dios] ikxjani: “Nijunwt abꞌl oje tzꞌok en tetz, bꞌix nijunwt abꞌl oje tzꞌok chaꞌon tetz, bꞌix nijunwt abꞌl oje qet tbꞌisuꞌ tiꞌj te aj oje qet tkꞌuluꞌ te Qtata Dios [te jun galan] kye aj nkyeqet ganin tetz.”* 10 Komo te Qtata Dios oje tzaj tyekꞌuꞌ kyaqil qetz tzan te Txew tuj qanim. Komo te Txew nqet tbꞌisuꞌ tiꞌj kyaqil bꞌix tebꞌen kyaqil aj nqet tbꞌisuꞌ te Qtata Dios. 11 ¿Abꞌl jun xjal tebꞌen kyaqil tidiꞌchq aj nkyꞌik tuj tanim junky xjal? Nijunwt, sinoke aꞌoxkix tanim te xjal tebꞌen. Ax ikxji nijunwt abꞌl tebꞌen tidiꞌ ntbꞌisuꞌ te Qtata Dios sinoke aꞌox te Txewx tetz. 12 Te Txew Dios aj oje jkꞌamoj, nyaꞌtx iktzaꞌ te aj atqex tuj kyanim kye xjal aj kꞌontiꞌl nkyeꞌokslan, sinoke tetz nꞌonen qukyꞌiꞌl tzan tel qnikyꞌ tiꞌj te aj oje tzaj tsiꞌ te Qtata Dios qetz cha jkotz.
13 Qetza nqoyolina tiꞌj ntzani nyaꞌtx tukyꞌi jun tumeꞌl aj otzaj xnaqꞌtzaꞌ qetza tzan xjal, sinoke tukyꞌi jun tumeꞌl aj otzaj txnaqꞌtzaꞌ te Txew Dios qetza; ikxji nqoyolin te bꞌanꞌax tiꞌj te Qtata Dios tukyꞌi jun tumeꞌl aj ntzaj tsiꞌ te Txew. 14 Jun xjal aj kꞌontiꞌl atqex Txew Dios tuj tanim, tetz kꞌontiꞌl ntkꞌamoꞌ te aj ntqꞌumaꞌ te Txew Dios tzan tpaj tetz tuj tnabꞌl cha jun tontwil, bꞌix kꞌontiꞌl nꞌel tnikyꞌ tiꞌj; komo aꞌox qa atqex te Txew Dios tuj qanim bꞌaꞌn tzan tel qnikyꞌ tiꞌj. 15 Per yatzun te jun xjal aj atqex Txew Dios tuj tanim, tetzji nqetbꞌaj tbꞌisuꞌ kyaqil alkyetz te galan bꞌix alkyetz te nyaꞌtx galan, bꞌix kꞌontiꞌl abꞌl bꞌaꞌn tzan txik qꞌuman tidiꞌ tiꞌj. 16 Komo nyolin [te Tuꞌjal Dios oqtxiꞌ] ikxjani: “¿Abꞌl jun xjal totzqiꞌ kyaqil aj ntbꞌisuꞌ te Qtata Dios? ¿Abꞌl bꞌaꞌn tzan txnaqꞌtzan tetz?”* Per qetz [bꞌaꞌn tzan tel qnikyꞌ tiꞌj te ntzani tzan tpaj] nqobꞌisun tuj tumeꞌl iktzaꞌx te Krist nbꞌisun.