Te Stzꞌibꞌen Paꞌk Kye Qerman Aj Amaqꞌ Galasy
1
Jun Limbꞌil
1 Wetz aꞌin Paꞌk tkyꞌixel Jesukrist; wetz nyaꞌtx xjal lajol wetz sinoke lajomin tzan Jesukrist bꞌix Qtata Dios aj ojaw anqꞌinsan tetz. 2 Wetz bꞌix kye kyaqil qerman aj akyeqet wukyꞌiꞌl tzani nxik qsamaꞌna ja uꞌjni te etetz ekyaqil aj bꞌuchꞌuj qerman jaꞌchq tuj tkwentil Galasy. 3 Qtata Diosxwit bꞌix te Qajaw Jesukrist tzaj sinxwit jun nim bꞌan galan etajsik etetz, bꞌix qet kchewsaꞌxwit ekꞌuꞌj. 4 Te Jesukrist oxik tqꞌapoꞌ tibꞌ tzan tkamik tzan tpaj te qchoj bꞌix ikxji tzan tkolpin qetz tiꞌj te nyaꞌtx galan kxol kye xjal aj twitz ja txꞌoꞌtxꞌni; oqet tkꞌuluꞌ ikxji iktzaꞌx tgan tuq te Qtata Dios aj ntzaj qnaꞌoꞌ, 5 aj jiqꞌbꞌaꞌ te jun-eleꞌx. Intkyꞌikxwit ikxji.
Te Paꞌk Nbꞌisun Tuq Tzan Tpaj Kye Xjal Nkaj Tuq Kykolaꞌ Te Tpakbꞌalil Tiꞌj Jesukrist
6 Wetz bꞌan nkyinlabꞌan tzan tpaj ikjaꞌn naj tkaj ekolaꞌ te Qtata Dios, te Qtat aj okxtzaj tukꞌleꞌ tzan tpaj te aj nim bꞌan galan aj ntzaj tsiꞌ tzan tpaj te Krist anke kꞌontiꞌl nqajoꞌ, bꞌix ajnaꞌl ikjaꞌn txik etokslaꞌ junky tpakbꞌalil [aj nyaꞌtx bꞌanꞌax], 7 nyaꞌtx tzan tpaj at-wit junky tpakbꞌalil galan sinoke cha ateꞌ xjal aj kygan tzan tnaꞌnon etanim bꞌix tzan tjaw kkyꞌixpuꞌ te tpakbꞌalil tiꞌj Krist. 8 Qa jun-wit te qetza qatzun jun ángelji aj tuj kaꞌj oxeꞌl tpakbꞌaꞌ junky tpakbꞌalil aj nyaꞌtx iktzaꞌ aj oje xik qpakbꞌaꞌna etetz, intpon najsaꞌ tzan te Qtata Dios. 9 Iktzaꞌx oxik jqꞌumaꞌna etetz tbꞌay bꞌix ajnaꞌl oxeꞌl jqꞌumaꞌna junkyꞌel, qa at-wit junky oxeꞌl pakbꞌan junky tpakbꞌalil nyaꞌtx iktzaꞌ te aj oje tzꞌok echaꞌoꞌ, intpon najsaꞌx tzan te Qtat. 10 Wetz kꞌontiꞌl nkyinjoyon tzan wel galan tuj kywitz xjal sinoke tzan wel galan tuj twitz Qtata Dios. Cha nkyinjoyon-wit tzan wel galan tuj kywitz xjal, nyaꞌtx-tal aꞌin qꞌapoꞌ wibꞌ nkyinꞌaqꞌunan te Krist.
Te Tpakbꞌalil Aj Ntpakbꞌaꞌ Tuq Te Paꞌk Nyaꞌtx Jun Tidiꞌ Aj Xkonoliꞌx-wit Titzaꞌ
11 Ntons waq erman, wetz ngan tzan txik nqꞌumaꞌ etetz, te tpakbꞌalil aj oxik npakbꞌaꞌ etukyꞌiꞌl nyaꞌtx jun tidiꞌ aj cha tuj twiꞌ jun xjal. 12 Bꞌix ax nyaꞌtx jun xjal otzaj qꞌuman te wetz ja tpakbꞌalilni bꞌix nyaꞌtx jun xjal otzaj xnaqꞌtzan te wetz, sinoke axk te Jesukrist otzaj tyekꞌuꞌ wetz. 13 Etetz oje tzꞌok echaꞌoꞌ titzaꞌ tuq kyinnabꞌlin wetz oqtxiꞌ aj tzunx tuq eqꞌiꞌ witzaꞌ aj eqꞌiꞌ kyitzaꞌ kye nxjalil aj tijajil Israel. Komo wetz ejaw nlajoꞌ tukyꞌi nqꞌoj kye aj nkyeꞌokslan tuq tiꞌj Jesukrist bꞌix tidiꞌchq tuq nkꞌuluꞌ tzan kyponaj.* 14 Bꞌix wetz mas tuq nꞌok nsiꞌ nkꞌuꞌj kywitz kye txqꞌanky wamoj aj tijajil Israel; wetz nꞌok tuq nsiꞌ nkꞌuꞌj tzan txik kyin kye qxjalil cha aꞌox iktzaꞌx oqtxiꞌ.* 15 Per aj wel tjoyoꞌ te Qtata Dios atx aj man tuq atin tuj nbꞌoꞌtil, tetz inxik tukꞌleꞌ nyaꞌtx tzan tpaj-wit jun nkꞌulbꞌen galan sinoke tzan tpaj tganx tuq tetz ikxji. 16 Bꞌix tzan tpaj owel galan tuj twitz, otzaj tyekꞌuꞌ te Tkꞌwaꞌal [tzan tok wotzqilaꞌ] tzan txik npakbꞌaꞌ tiꞌj Tkꞌwaꞌal kxol kye aj nyaꞌtx tijajil Israel.* Wetz kꞌontiꞌl inxwaꞌq chaꞌol jun konsej tukyꞌi nijunwt 17 bꞌix ax kꞌontiꞌl inxwaꞌqa Jerusalen qꞌolbꞌel kye aj tkyꞌixel Jesukrist tbꞌay nwitz wetz, sinoke inxik tkwentil Araby bꞌix yaji inmeltzꞌjikky tuj Damask. 18 Ya ma kyꞌik oxe aqꞌbꞌi, inxwaꞌq Jerusalen* qꞌolbꞌel Xhpeꞌy bꞌix inkajten jwebꞌlajuj qꞌij tukyꞌiꞌl 19 per kꞌontiꞌl eꞌok wen kye txqꞌanky tkyꞌixel Jesukrist, sinoke aꞌox te Chaw aj titzꞌin Qajawil. 20 Tiꞌj kyaqil aj nqet ntzꞌibꞌaꞌ etetzni, Qtata Dios nkaꞌyin wiꞌj, wetz kꞌontiꞌl nkyinnikꞌon. 21 Yaji inxik tuj tkwentil te Siry bꞌix Silisy, 22 bꞌix nyaꞌtx tuq otzqimin tuj tkwentil Judey tzan kye bꞌuchꞌuj qerman tzi aj mojbꞌaꞌ kyibꞌ tukyꞌi Krist, 23 aꞌox ojetq tuq tzꞌok kchaꞌoꞌ wiꞌj ikxjani: “Te aj nqojaw tuq tlajoꞌ tbꞌay, ajnaꞌl nxik tpakbꞌaꞌ te tpakbꞌalil aj tbꞌayaꞌ tgan tuq tzan tpon tnajsaꞌ.” 24 Ntons bꞌan nqet tuq kyjiqꞌbꞌaꞌ Qtata Dios tzan npaj wetz.