Te Stzꞌibꞌen Paꞌk Kye Qerman Aj Amaqꞌ Efeso
1
Jun Limbꞌil
1 Wetz aꞌin Paꞌk tkyꞌixel Kristo Jesus tzan tpaj ikxji tgan tuq te Qtata Dios. Nqet ntzꞌibꞌaꞌ te etetz aj Efeso* aj pawamix te Qtata Dios, etetz aj kꞌontiꞌl nkaj esiꞌ te Kristo Jesus. 2 Te Qtata Dios bꞌix te Qajaw Jesukrist tzaj ksiꞌxwit te etetz jun nim bꞌan galan bꞌix qet kchewsaꞌxwit ekꞌuꞌj.
Nqochalaj Tiꞌj Te Qtata Dios Tzan Tpaj Oꞌel Tjoyoꞌ Tzan Qok Tkꞌwaꞌal
3 Intqet jiqꞌbꞌaꞌxwit te [Qtata Dios] aj ntzaj naꞌoꞌ tzan Tkꞌwaꞌal, aj Qajaw Jesukrist. Tetz maꞌtx tzaj tsiꞌ qetz tidiꞌchq bꞌan galan tuj kaꞌj tzan tpaj te Krist. 4 Komo atx aj minaꞌ tuq tqet tkꞌuluꞌ te twitz txꞌoꞌtxꞌ, oje qoꞌel tjoyoꞌ tzan tpaj te Krist, tzan qten pawamoꞌ aꞌox te tetz bꞌix tzan tok saq qanim tuj twitz. 5 Bꞌix tzan tpaj nqoqet tganiꞌ, bꞌisuꞌxkix tuq tzan qok tkꞌwaꞌal tzan tpaj te Jesukrist iktzaꞌx ojetq qet tbꞌisuꞌ atx bꞌan oqtxiꞌ iktzaꞌxkix tuq tetz tgan. 6 Ikxji tzan qyolin yol bꞌan galan te Qtata Dios tiꞌj te aj nim bꞌan galan aj ntzaj tsiꞌ qajsik qetz aj kꞌontiꞌl tuq nqajoꞌ, bꞌix kꞌontiꞌl nꞌoknoj qyol tzan txik jqꞌumaꞌ tiꞌj kyaqil aj bꞌan galanni aj otzaj tsiꞌ tzan tpaj [te Jesukrist,] te Tkꞌwaꞌal aj ganiꞌ nim titzaꞌ. 7 Te Tkꞌwaꞌal oje tkolpij aꞌoꞌ tzan tpaj telen xhchikyꞌel aj tkamik, oqet tnajsaꞌ qchoj* tzan tpaj tetz nim bꞌan galan nabꞌlin qukyꞌiꞌl anke kꞌontiꞌl nqajoꞌ, 8 ikxji oqet tyekꞌuꞌ te qetz tukyꞌi jun tnabꞌl bꞌan tumeꞌl bꞌix tzan tqet qbꞌisuꞌ byenech tuj tumeꞌl. 9 Ikxji otzaj tyekꞌuꞌ te aj kꞌontiꞌl tuq nꞌel kynikyꞌ kye xjal tiꞌj tbꞌayaꞌ, per otzaj tyekꞌuꞌ iktzaꞌx tuq tetz tgan te jun galan te qetz iktzaꞌx tuq bꞌisuꞌ titzaꞌ atx bꞌan oqtxiꞌ 10 tzan tkyꞌik oj tpon te qꞌij, tzan tok kyaqil tuj tqꞌabꞌ, kyaqil te twitz kaꞌj bꞌix kyaqil te twitz txꞌoꞌtxꞌ. 11 Bꞌix tzan tpaj tetz te Qtat oꞌel tjoyoꞌ iktzaꞌxkix ojetq tuq qet tbꞌisuꞌ, komo tetz nkꞌulun kyaqil iktzaꞌxkix ojetq qet tbꞌisuꞌ. 12 Ikxji tzan qok qetz, aj tbꞌay okaj loꞌet jkꞌuꞌj tiꞌj, tzan qnaꞌon tetz tzan tpaj nim tajwalil. 13 Bꞌix yaji ax etetz aj tok echaꞌoꞌ te tpakbꞌalil galan tiꞌj te bꞌanꞌax aj nkxtkoloꞌ, etetz aj etokslan tiꞌj Krist, okaj te Txew Dios tuj etanim te jun etechaꞌl,* te Txew aj te Qajawil okaj tsiꞌ tyol tiꞌj. 14 Komo te Txew tuj qanim telponx ojkꞌamoꞌtz te aj otzajel tsiꞌ [te Qtata Dios] max oj tkolpin kyaqil kye xjal aj etzameꞌ titzaꞌ tzan qnaꞌon te Qtat tzan tpaj nim tajwalil.
Te Paꞌk Nxnaqꞌtzan Tukyꞌi Qtata Dios Kyiꞌj Kye Aj Efeso
15 Astilji wetz, tzan tpaj nꞌok nchaꞌoꞌ titzaꞌ etetz bꞌan witꞌlik ekꞌuꞌj tiꞌj te Qajaw Jesus bꞌix bꞌan nkyeqet eganiꞌ kye aj pawameꞌ te Qtata Dios, 16 astilji wetz kꞌontiꞌl nkaj nsiꞌ tzan txik nsiꞌ pixon te Qtata Dios etiꞌj etetz oj nxnaqꞌtzan tukyꞌiꞌl. 17 [Nxik nqaniꞌ tukyꞌi] te Qtata Dios aj ntzaj naꞌoꞌ tzan te Qajaw Jesukrist bꞌix aj bꞌan galan nabꞌlin qukyꞌiꞌl, wetz nxik nqaniꞌ tukyꞌiꞌl tzan stzaj tsiꞌ jun enabꞌl bꞌix tzan stzaj tyekꞌuꞌ te aj cha ewj tuq tiꞌj, tzan tok etotzqilaꞌ byenech, 18 bꞌix ikxji tzan tel enikyꞌ tidiꞌ loꞌik jkꞌuꞌj tzan tpaj qxiklen tukꞌleꞌ, osey tzan tel enikyꞌ titzaꞌ bꞌan tbꞌanil kyaqil te aj qetzaꞌtz junchꞌin kyukyꞌi kye txqꞌanky aj pawameꞌ titzaꞌ, 19 bꞌix [tzan tel enikyꞌ] titzaꞌ tetz tukyꞌi tajwalil aj mas bꞌan nim twitz kyaqil, tetz nꞌonen qukyꞌiꞌl qetz aj nqoꞌokslan tiꞌj. 20 [Bꞌix tukyꞌi aj tajwalilni] okꞌulun tzan tjaw tanqꞌinsaꞌ te Krist bꞌix otkꞌuluj tzan tqet witꞌlet tuj tbꞌanqꞌabꞌ tuj kaꞌj,* 21 bꞌix tetz tajwalil mas nim twitz kyaqil kꞌulul mandad bꞌix kyaqil aj at kyajwalil tuj kyaqꞌiqꞌ qa tuj kaꞌjji bꞌix mas nim tajwalil kywitz kyaqil xjal aj bꞌan otzqiꞌmj-eꞌ,a bꞌix kyiꞌj kyaqil ajnaꞌl tzani twitz txꞌoꞌtxꞌ bꞌix tuj junky tyemp mas yaj tuj kaꞌj. 22 Kyaqil okaj tsiꞌ tuj tqꞌabꞌ te Krist bꞌix okaj tsiꞌ tzan tok te twitzaleꞌ tiꞌj kyaqil kxol kye aj nkyeꞌokslan tiꞌj.* 23 Kyetz iktzaꞌ xhchiꞌjel, komo aji tetz atqex tuj kyanim kkyaqil kyetz.b