6
A Tgan Tzan Qonen Kyiꞌj Kye Qerman Aj Nkyeqet Tzꞌaqik
1 Erman qa etetz owokel echaꞌoꞌ tiꞌj jun qerman aj ojetq qet tzꞌaqik, etetz aj atix jwert tukyꞌi Krist a tgan tzan etonen tukyꞌiꞌl tzan tjaw eteqꞌiꞌ tkꞌuꞌj [tzan tok lapet junkyꞌel tiꞌj Qajawil]. Per oqtel ekꞌuluꞌ tukyꞌi jun tumeꞌl kyebꞌaꞌ, intok esiꞌ enabꞌl tzan kꞌon eqet tzꞌaqik etetzky. 2 Peꞌetonen waq etibꞌx exolx oj tok eten twitz jun xhchoꞌnal bꞌix ikxji oqtel ekꞌuluꞌ aj tgan te Krist.a 3 Per qa [nlay qoꞌonen kyukyꞌi kye txqꞌanky tzan tpaj] qetz tuj qnabꞌl qa tlimaqal xjal aꞌoꞌ, bꞌix nyaꞌtx bꞌanꞌax, ikxji cha nqet qeqꞌiꞌ qibꞌx. 4 Intqet qbꞌisuꞌ byenech tiꞌj te aj njkꞌuluꞌ qetz tzan tok qen qa bꞌaꞌn tzan qchalaj tiꞌj, bꞌix nyaꞌtx tzan tqet qbꞌisuꞌ qa qetz mas galan aꞌoꞌ kywitz txqꞌanky. 5 Komo junjunchaq a tgan tzan tok tsiꞌ tnabꞌl tidiꞌ ntkꞌuluꞌ.
6 Ntons qkyaqil qetz aj nqotzaj xnaqꞌtzaꞌ tiꞌj te Tuꞌjal Dios, presis tzan qonen tukyꞌi tidiꞌchq aj at qetz kyukyꞌi kye aj nkyexnaqꞌtzan te qetz.
7 Kꞌon qet eteqꞌiꞌ etibꞌx; te Qtata Dios nlay bꞌantik tzan tqet qeqꞌiꞌ. Komo iktzaꞌx nqokꞌulun ax ikxji ojkꞌamoꞌtz.b 8 Abꞌl te aj nkꞌulun iktzaꞌx tgan te xhchiꞌjel, opoyon najsaꞌ tzan te xhchiꞌjelx; per te aj nkꞌulun iktzaꞌ tgan te Txew Dios, tzan te Txew Dios otzajel siꞌ jun tanqꞌin te jun-eleꞌx. 9 Kꞌon qobꞌajsiktik tzan jkꞌulun te galan* tzan tpaj jun qꞌij jun tyemp ojkambꞌaꞌtz jun tbꞌanil, qa nlay kaj qsiꞌ tzan jkꞌulun galan. 10 Astilji ajnaꞌl tzunx at tyemp tzan jkꞌulun te galan, a tgan tzan qonen najji kyukyꞌi abꞌlchaq xjal, bꞌix pyor kyukyꞌi qerman aj witꞌlik kykꞌuꞌj tiꞌj Krist.
Jun Kawbꞌil
11 Intok esiꞌ enabꞌl tiꞌj te ntzꞌibꞌen tukyꞌi nletr bꞌan limaq, aꞌinx wetz nqet ntzꞌibꞌaꞌ te etetz. 12 Kye aj kygan tzan tok siꞌlet etechalul, kyetz cha kygan tzan kykaj galan kyukyꞌi kye xjal bꞌix kꞌon kygan tzan tok kyen twitz xhchoꞌnal tzan tpaj tkamlen te Krist twitz krus. 13 Komo kyetz [eqꞌiꞌ kyitzaꞌ te kostumbr] nꞌok ksiꞌ kyechalul [iktzaꞌ nyolin te Kawbꞌil], per ni kyetz kꞌontiꞌl eqꞌiꞌ kyitzaꞌ kyaqil aj nyolin te Kawbꞌil, per kygan tzan tok siꞌlet etechalul tzan kyyolin ax etetz nkxꞌok lapet kyiꞌj. 14 Per wetz nlay ntzoqpij tzan tqet njiqꞌbꞌaꞌ wibꞌx, sinoke aꞌox tiꞌj tkamlen te Qajawil Jesukrist twitz krus. Komo tzan tpaj tkamlen twitz krus, te aj nyaꞌtx galan aj nꞌel tganiꞌ tuq te nchiꞌjel maꞌtx ponaj, ya kꞌontiꞌl toklen wiꞌj bꞌix wetz ya kꞌontiꞌl woklen tiꞌj.c 15 Qa atok qechalul qa kꞌontiꞌlji, te nini kꞌontiꞌl toklen, sinoke ajnaꞌl aꞌoꞌ jun xjal akꞌaꞌj.*
16 Tzꞌok siꞌxwit jun chewsbꞌil tuj kyanim kkyaqil kye aj nkyeꞌokslan te nini, bꞌix tzꞌokxwit loꞌet tkꞌuꞌj te Qtata Dios kyiꞌj tzan tpaj aꞌeꞌ te tijajil Israel bꞌan bꞌanꞌax aj te Qtat. 17 Ajnaꞌl kꞌonkyxwit tzꞌok junky bꞌis wiꞌj tzan nijunwt; wetz oje tzꞌok wen nim okꞌol tiꞌj nchiꞌjel tzan tpaj te xhchoꞌnal aj oje tzꞌok wen tzan tpaj [wokslbꞌen] tiꞌj Jesus. 18 Erman waq, tzaj siꞌxwit tuj etanim jun nim bꞌan galan tzan tpaj te Qajawil Jesukrist. Intkyꞌikxwit ikxji.