5
Kꞌon Kaj Ekolaꞌ Te Tumeꞌl Titzaꞌ Kolpimoꞌ
1 Te Krist okolpin te qetz tzan jkolpjik bꞌeyx te jun-eleꞌx. Astilji kꞌon kaj ekolaꞌ te ja tumeꞌl bꞌix kꞌon xik eqꞌapoꞌ etibꞌ junkyꞌel, tzan kꞌon ekaj tzyuꞌ iktzaꞌ tbꞌay.
2 Intok esiꞌ exkyin tiꞌj ntzani: Wetz aꞌin Paꞌk nxik nqꞌumaꞌ etetz qa etetz owokel siꞌ etechalul [tzan ekolet], ntons te Krist chagan te etetz. 3 Nxik nqꞌumaꞌ etetz junkyꞌel: Abꞌl te aj nꞌok tsiꞌ techalul, a tgan tzan tqet tokslaꞌ kyaqil aj nyolin te Kawbꞌil. 4 Etetz aj egan tzan tel in echoj tqetlen etokslaꞌ te Kawbꞌil, etetz oje tzꞌel epawaꞌ etibꞌ tiꞌj Krist, bꞌix oje kaj ekolaꞌ te aj nim bꞌan galan aj tkꞌulbꞌen Qtata Dios tzan ekolet titzaꞌ. 5 Per qetza,a tzan tpaj te Txew Dios aj atqex tuj qanim, cha nqoꞌiyon witꞌlik jkꞌuꞌj tzan tel in te qchoj tzan te Qtata Dios iktzaꞌx loꞌik jkꞌuꞌj. 6 Komo qetz aj mojlikoꞌ tukyꞌi Kristo Jesus, qa atok qechalul qatzun kꞌontiꞌlji, te nini kꞌontiꞌl tidiꞌ token, per te aj at token aj ntzani: tzan tok qwitꞌbꞌaꞌ jkꞌuꞌj tiꞌj Kristo Jesus bꞌix ikxji nkyeqet qganiꞌ kye txqꞌanky xjal.
7 Etetz nkxbꞌet tuq galan tuj te tumeꞌl bꞌanꞌax, ¿bꞌix abꞌl oqet eqꞌin etetz tzan kꞌonky tqet etokslaꞌ te bꞌanꞌax? 8 Te Qtata Dios aj otzaj ukꞌlen te etetz, tetz kꞌontiꞌl otqꞌumaj tzan ekꞌulun ikxnini. 9 [Iktzaꞌx tiꞌj te malsbꞌil,] tzan chꞌimuꞌs malsbꞌil tuj te qꞌotj ntkꞌuluꞌ tzan tmal kyaqil.* 10 Wetz witꞌlik nkꞌuꞌj tiꞌj Qtata Dios, etetz nlay kaj esiꞌ tzan tok witꞌlet ekꞌuꞌj tiꞌj Qajawil, per te aj nqet eqꞌin etetzni oxeꞌl siꞌ xhchoꞌnal tiꞌj, abꞌlchaq xjal tetz. 11 Ntons erman, wetz, cha tzunxwit nxik nxnaqꞌtzaꞌ tzan tok ksiꞌ kyechalul [tzan kykolet] kye aj nkyeꞌokslan, ntons kꞌontiꞌl-tal nkyinjaw lajoꞌ, ikxji te tpakbꞌalil tiꞌj te tkamlen Jesus twitz krus kꞌontiꞌl-tal nkyejaw qꞌojlik tiꞌj. 12 Per kye aj nkyeqet eqꞌin etetzni, mejor-tal tzan tetz kyin nyaꞌtx cha aꞌox aj chꞌimuꞌsni sinoke kyaqil-tal aj tidiꞌ kyetz.
13 Etetz erman okxtzaj ukꞌleꞌ tzan ekolpjik, per nyaꞌtx tzan tpaj kolpimix ekꞌuluꞌtz tidiꞌchq nyaꞌtx galan aj tgan te echiꞌjel sinoke tzan etonen etibꞌ exolx tzan tpaj nqet eganiꞌ etibꞌ exolx. 14 Komo kyaqil aj ntyoliꞌ te Kawbꞌil telponx ikxjani: “Inkyqet aganiꞌ kye txqꞌanky iktzaꞌx nqet aganiꞌ awibꞌx.”* 15 Qa etetz nqet eloꞌx etibꞌx exolx, ¡intok esiꞌ enabꞌl! Kꞌon kxkꞌulun ikxji tzan tpaj ikxji opoyon enajsaꞌx etibꞌ.
Qobꞌajkꞌulun Waq Aj Tgan Te Txew Dios Bꞌix Nyaꞌtx Aj Tgan Te Qchiꞌjel
16 Wetz oxeꞌl nqꞌumaꞌ etetz, peꞌebꞌet iktzaꞌx ntyoliꞌ te Txew Dios bꞌix ikxji nlay xik esiꞌ lad iktzaꞌ tgan te echiꞌjel. 17 Komo te aj tgan te qchiꞌjel nyaꞌtx iktzaꞌ tgan te Txew Dios, bꞌix te aj tgan te Txew Dios nyaꞌtx iktzaꞌ tgan te qchiꞌjel; ikxji kꞌontiꞌl nxik kyin kyibꞌ bꞌix astilji nlay bꞌantik tzan ekꞌulun iktzaꞌ etetz egan.* 18 Per qa a te Txew Dios eqꞌil etetz, ntons etetz nyaꞌtx tzyumix tzan te Kawbꞌil.
19 Ntons nyaꞌtx kwest tzan tel qnikyꞌ tidiꞌ aj tgan te qchiꞌjel, komo kyaqil nini iktzaꞌ ntzanijeꞌ: Te qchiꞌjel tgan tzan jkꞌajajin bꞌix tidiꞌchq aj nꞌok nyaꞌtx galan te qchiꞌjel bꞌix aj ntzꞌilan tuj qanim, bꞌix ax tgan tzan qpakꞌachin, 20 bꞌix ax tgan tzan tok qsiꞌ jkꞌuꞌj tiꞌj jun tidiꞌ aj ntzaj qnaꞌoꞌ mas twitz te Qtata Dios,* bꞌix ax tzan qchmanin, bꞌix ax tzan tok qajqꞌojaꞌ qibꞌ, bꞌix ax tzan jqꞌojin, bꞌix ax tzan tel jqꞌajabꞌ tiꞌj tidiꞌchq, bꞌix ax tzan qjaw qꞌojlik, bꞌix ax tzan tok qeꞌeꞌ abꞌl te qetz mas galan twitz junky, bꞌix ax tzan tqet qpawaꞌ qibꞌ, bꞌix ax tzan jkꞌulun tzan kyok lapet kye xjal qiꞌj, 21 ax tzan qekꞌawin kyiꞌj txqꞌanky,b bꞌix ax tzan qxhbꞌaꞌjin, bꞌix ax tzan jqꞌijlan tukyꞌi tidiꞌchq nyaꞌtx galan, bꞌix tidiꞌchq iktzaꞌ kyaqil aj nini. Tiꞌj kyaqil aj nini wetz nkxik nkawiꞌ iktzaꞌx oje xik nqꞌumaꞌ etukyꞌiꞌl, kye aj nkyekꞌulun ikxji nlay bꞌantik tzan kykꞌamon jun kyanqꞌin te jun-eleꞌx tukyꞌi Qtata Dios.
22 Per te aj nkꞌulun te Txew Dios tuj qanim aj ntzanijeꞌ: Nkꞌulun tzan kyqet qganiꞌ txqꞌanky, ax tzan qchalaj, ax tzan xhchewsan jkꞌuꞌj, ax tzan sten qpasens, ax tzan qnabꞌlin galan kyukyꞌi xjal, ax tzan jkꞌulun nim galan, ax tzan kꞌon tkaj qsiꞌ tzan tok qwitꞌbꞌaꞌ jkꞌuꞌj tiꞌj te Qtata Dios, 23 ax tzan qyolin tumeꞌl kyebꞌaꞌ kyukyꞌi txqꞌanky, ax tzan jkꞌulun mandad qibꞌx te jun galan. Kyaqil te ja ntzani iktzaꞌx tgan te Kawbꞌil. 24 Per qetz aj te Kristo Jesus aꞌoꞌ oje pon qnajsaꞌ te tidiꞌchq nyaꞌtx galan aj tgan te qchiꞌjel.c 25 Qa bꞌanꞌax qetz nqoꞌanqꞌin tzan te Txew Dios, a tgan tzan qbꞌet iktzaꞌx tgan te Txew Dios. 26 Kꞌon qet qjiqꞌbꞌaꞌ qibꞌ, bꞌix kꞌon tzꞌox qchukuꞌ junky bꞌix kꞌon qoꞌekꞌawin tiꞌj junky.