4
1 Ax oxeꞌl nqꞌumaꞌ [jun yekꞌbꞌil] ikxjani: Qa at jun kꞌwaꞌalbꞌaj tuj jun jay aj owokel tajaw kyaqil, per qa man kꞌwaꞌl, tetz parej tukyꞌi tmos stat anke owokel tajaw te jay. 2 Per parej tukyꞌi jun aqꞌunon tzan tpaj te kꞌwaꞌl tzunx atqet tuj kyqꞌabꞌ kye kꞌulul kwent tetz bꞌix tuj kyqꞌabꞌ kye aj eꞌel aqꞌunj tuj tjay max oj tpon te qꞌij aj qꞌumankaj tzan stat. 3 Ax ikxji qiꞌj qetz, aj minaꞌ tuq jkolet,a qetz tzyumoꞌ tuq tzan tidiꞌchq aj nyaꞌtx galan aj te twitz txꞌoꞌtxꞌ.b 4 Per ya ma pon te tyemp aj qꞌumankaj tuq tzan te Qtata Dios, tetz otzaj tlajoꞌ te Tkꞌwaꞌal bꞌix owitzꞌjik tiꞌj jun xuj, bꞌix okꞌulun kyaqil aj ntqꞌumaꞌ te Kawbꞌil, 5 tzan tel xhchojoꞌ tuq te aj presis [tzan tkolpin] qetz aj tzyumoꞌ tuq tzan te Kawbꞌil bꞌix ikxji tzan qok qetz tkꞌwaꞌal Qtata Dios. 6 Bꞌix komo ax etetz aꞌix Tkꞌwaꞌal Dios iktzaꞌx qetza, astilji te Qtata Dios otzaj tlajoꞌ tuj qanim te Txew Tkꞌwaꞌal aj nyolin ikxjani: “Tat,* tat.” 7 Ikxji etetz ajnaꞌl ya nyaꞌtx aꞌix iktzaꞌ jun mosjc sinoke aꞌix tkꞌwaꞌal Qtata Dios, bꞌix komo tkꞌwaꞌal aꞌix, ax okxꞌetzayon te aj otzajel tsiꞌ.*
Te Paꞌk Bꞌan Nbꞌisun Tuq Kyiꞌj Kye Aj Galasy
8 Tbꞌay aj minaꞌ tuq tok etotzqilaꞌ te Qtata Dios, etetz tzyumix tuq tzan kye aj nyaꞌtx dios-eꞌ, [cha kyitzbꞌalil tidiꞌchq qa malspiritji]. 9 Per ajnaꞌl etetz etotzqiꞌ te Qtata Dios, o mejor oxeꞌl nqꞌumaꞌ, te Qtata Dios oje kxꞌok totzqilaꞌ. Bꞌix ¿tistil etetz nkxmeltzꞌjik tzan ekaj junkyꞌel tuj kyqꞌabꞌ kye malspirit aj kꞌontiꞌl kyajwalil bꞌix kꞌontiꞌl chꞌinwt tzan txik ksiꞌ etetz, bꞌix etetz egan tzan ekaj ktzyuꞌ junkyꞌel? 10 Komo etetz tzunx nkyeqet exjaniꞌ junjun qꞌij, bꞌix junjun qyaꞌ bꞌix kye tyemp bꞌix kye aqꞌbꞌi. 11 Wetz nkyinbꞌisun etiꞌj qa te waqꞌun aj oqet nkꞌuluꞌ exol qanq chagan.
12 Werman, wetz nqet nwitz ewitz tzan tel etin iktzaꞌ aꞌin iktzaꞌx wetz oje kyinꞌok iktzaꞌ aꞌix.d Etetz kꞌontiꞌl maꞌtx ekꞌuluj jun nyaꞌtx galan wiꞌj. 13 Komo etetz etebꞌenky tzan tpaj jun nyabꞌil oxik npakbꞌaꞌ te tpakbꞌalil galan etukyꞌiꞌl tbꞌay. 14 Bꞌix te nyabꞌil owok jun preb te etetz, per kꞌontiꞌl inꞌel etikꞌoꞌ sinoke inꞌekꞌamoj iktzaꞌ jun ángel tuq aꞌin qatzun etetz tuj enabꞌl tuq iktzaꞌ Kristo Jesus aꞌin. 15 ¿Tistil kꞌontiꞌl nkxchalaj ajnaꞌl iktzaꞌ tuq jun-el? Wetz webꞌen, aj akyinqet tuq exol, cha bꞌantik-wit tuq tzan tjatz etin te tbꞌaqꞌ ewitz otzaj-tal esiꞌ te nwitz. 16 Bꞌix ajnaꞌl ¿aꞌin petzun wetz jun etajqꞌoj tzan tpaj maꞌtx xik nqꞌumaꞌ te bꞌanꞌax etetz?
17 Kye aj xjal [aj nkyeqet eqꞌin etetzni] bꞌan nkxik kynaꞌoꞌ galan, per cha nkyekꞌulun jun nyaꞌtx galan etiꞌj; cha kygan tzan etel kypawaꞌ qiꞌja bꞌix tzan etok lapet kyiꞌj. 18 Galankixiꞌ tzan kxik qnaꞌoꞌ galan txqꞌanky xjal; [iktzaꞌ nkxik qnaꞌoꞌna] bꞌix nyaꞌtx cha aꞌox aj atinqet exol. 19 Nkꞌwaꞌal, wetz nkyinbꞌisun etiꞌj iktzaꞌ jun xuj nꞌok ten twitz xhchoꞌnal oj titzꞌjik jun tal; bꞌix wetz, max oj eten bꞌan jwert tukyꞌi Krist, maxji owelal te nbꞌis etiꞌj. 20 Titzaꞌxwit kyinpon exol etetz ajnaꞌl tzan nyolin etukyꞌiꞌl tukyꞌi junky nwiꞌ, per laqꞌchik atin kꞌontiꞌl nꞌel nnikyꞌ tiꞌj kyaqil aj nkxkꞌulunni.
Qetz Ya Kꞌontiꞌl Atoqet Tuj Tqꞌabꞌ Te Kawbꞌil
21 Instzaj eqꞌumaꞌ etetz aj egan tzan tqet etokslaꞌ te Kawbꞌil: ¿Etebꞌen peꞌ tidiꞌ nyolin te Kawbꞌil? 22 Komo tzꞌibꞌankaj tuj Tuꞌjal Dios, te Abran etzaj kabꞌeꞌ tkꞌwaꞌal, jun aj otzaj tiꞌj te tmos, [aj Agar], bꞌix te junky aj otzaj tiꞌj te txuꞌjel, [aj Sar].* 23 Te aj otzaj tiꞌj te tmos, owitzꞌjik tuj jun tumeꞌl iktzaꞌxkix jkajlen swaꞌ titzaꞌ nꞌitzꞌjik jun jkꞌwaꞌal, per yatzun te junky aj owitzꞌjik tiꞌj Sar, owitzꞌjik tzan tpaj te Qtata Dios oxik tsiꞌ tyol tiꞌj. 24 Kye ja kabꞌeꞌ alonni telponx iktzaꞌ kabꞌeꞌ tumelil: Te tbꞌay telponx tiꞌj [te Kawbꞌil aj oxik tsiꞌ Qtata Dios te Moisés twiꞌ] te witz Sinayi; ikxnini telponx tiꞌj te Agar aj owitzꞌjik tal tzan tqetkix mosiꞌ. 25 Te Agar [telponx tiꞌj te Kawbꞌil aj otzaj tsiꞌ Qtata Dios twiꞌ] te witz Sinayi tuj tkwentil Araby, bꞌix ajnaꞌl telponx tiꞌj te amaqꞌ Jerusalen tzan tpaj kye aj nkyenajan tzi tzyumeꞌ [tzan te Kawbꞌil]. 26 Per kye aj te Jerusalen aj tuj kaꞌj nyaꞌtx tzyumeꞌ tzan jun tidiꞌ, bꞌix qetz aꞌoꞌ kꞌwaꞌalbꞌaj te aj amaqꞌ [tuj kaꞌjni]. 27 Komo te Tuꞌjal Dios nyolin, “Pachalaj yatz aj machor aꞌich aj kꞌontiꞌl awal, palabꞌan bꞌix intxik apakbꞌaꞌ yatz aj minaꞌ tok awotzqilaꞌ twitz alaꞌmj; komo [yatz] aj kꞌontiꞌl achꞌinal, yatz kyetzajel mas awal twitz junky aj at tichmil.”
28 Erman, etetz aꞌix tkꞌwaꞌal Qtata Dios tzan tpaj te tyol aj otzaj tsiꞌ, iktzaꞌx te Isak [aj tkꞌajol Abran] owitzꞌjik tzan tpaj te tyol aj otzaj tsiꞌ tiꞌj. 29 Per te junky aj owitzꞌjik tzan tpaj kykawlbꞌen kye stat, tetz nꞌok tuq tqꞌojiꞌ te junky aj owitzꞌjik tzan tpaj te Txew Dios,* bꞌix kyetz kyijajil tzunx nkyeqꞌojin ajnaꞌl. 30 Per ¿titzaꞌ nyolin tuj te Tuꞌjal Dios? Nyolin ikxjani: “Intex alajoꞌ te aj mosjni tukyꞌix tal tzan tpaj te tal te jun mosj nlay bꞌantik tzan tetzan junchꞌin tukyꞌi tal te txuꞌjel te ajawilon.”* 31 Astilji waq erman, qetz nyaꞌtx aꞌoꞌ iktzaꞌ tijajil te aj mosiꞌ sinoke qetz aꞌoꞌ iktzaꞌ tijajil te aj nyaꞌtx mosiꞌ.