3
Kꞌontiꞌl Tzan Tkaj Qsiꞌ Tzan Qbꞌet Iktzaꞌx Oje Xik Qeqꞌiꞌ
1 ¡Erman aj Galasy, etetz bꞌan tꞌaꞌq aꞌix! ¿Abꞌl oje qet eqꞌin etetz? Oje xik jqꞌumaꞌna tuj ewitz titzaꞌ te Jesukrist okamik twitz krus. 2 Wetz aꞌox ngan tzan tok nchaꞌoꞌ etukyꞌiꞌl ntzani: ¿Ekꞌamoj peꞌ etetz te Txew Dios tzan tpaj tqetlen etokslaꞌ te Kawbꞌil qatzun tzan tpaj toklen witꞌlet ekꞌuꞌj tiꞌj te tpakbꞌalil galan aj owok echaꞌoꞌji? 3 ¡Etetz bꞌan tꞌaꞌq aꞌix! Tbꞌay nkxbꞌet tuq tukyꞌi te Txew Dios. ¿Tistil ajnaꞌl egan tzan tkaj ekolaꞌ tzan tok ewitꞌbꞌaꞌ ekꞌuꞌj tiꞌj te ekꞌulbꞌen? 4 ¿Tiꞌtzun, chagan-alo kyaqil te xhchoꞌnal aj oje tzꞌok eten? ¿Chagan petzun te nini? 5 Te Qtata Dios oxik tsiꞌ Txew etetz bꞌix nkꞌulun tidiꞌchq yekꞌbꞌil exol etetz tukyꞌi nim tajwalil. ¿Nkꞌulun peꞌ nini tzan tpaj nqet ekꞌuluꞌ aj nyolin tuj te Kawbꞌil, qatzun tzan tpaj toklen witꞌlet ekꞌuꞌj tiꞌj te tpakbꞌalil aj owok echaꞌoꞌji?
Te Tyol Aj Oxik Tsiꞌ Te Qtata Dios Tukyꞌi Abran Nꞌoken Kyiꞌj Kyaqil Xjal
6 Komo ax ikxji te Abran oxik tokslaꞌ [tyol] Qtata Dios, bꞌix tzan tpaj tokslbꞌen owel tuj twitz [te Qtat] ya kꞌontiꞌl xhchoj.* 7 Astilji a tgan tzan tel enikyꞌ kye aj bꞌaꞌn bꞌanꞌax tijajil Abran aꞌeꞌ kye aj witꞌlik kykꞌuꞌj tiꞌj te Qtata Dios [tzan tel in kypaj tuj twitz], aꞌeꞌ kyetz kye bꞌan bꞌanꞌax tijajil Abran.* 8 Bꞌix komo te Qtata Dios tgan tuq tzan tel tin kchoj kye aj nyaꞌtx tijajil Israel aj witꞌlik kykꞌuꞌj tiꞌj, astilji oqet tzꞌibꞌaꞌ tuj Tuꞌjal atx aj bꞌan oqtxiꞌ aj txik tqꞌumaꞌ tukyꞌi Abran ikxjani: “Kyaqil xjal twitz txꞌoꞌtxꞌ okyeqtel kyꞌiwlaꞌ tzan tpaj awijajil yatz.”* 9 Ikxji kye aj witꞌlik kykꞌuꞌj tiꞌj te Qtata Dios nkyeqet kyꞌiwlaꞌ iktzaꞌx te Abran oqet kyꞌiwlaꞌ tzan tpaj witꞌlik tuq tkꞌuꞌj tiꞌj te Qtat. 10 Abꞌl kye aj nꞌok kywitꞌbꞌaꞌ kykꞌuꞌj tiꞌj kykꞌulbꞌen tqetlen kyokslaꞌ aj nyolin te Kawbꞌil, kyetz ya qanbꞌenbꞌaj kyajsik tzan tpaj te Tuꞌjal nyolin ikxjani: “Abꞌl aj kꞌontiꞌl nqet tkꞌuluꞌ bꞌan kyaqil iktzaꞌx aj tzꞌibꞌankaj tuj ja Kawbꞌilni qanbꞌenbꞌaj tajsik.”* 11 Ikxji nꞌel qnikyꞌ nijunwt abꞌl nꞌel in xhchoj tzan tpaj nkꞌulun iktzaꞌx te Kawbꞌil nyolin, komo nyolin ikxjani: “Te aj oje tzꞌel in xhchoj owanqꞌiyon tzan tpaj witꞌlik tkꞌuꞌj tiꞌj Qtata Dios.”* 12 Yatzun te Kawbꞌil kꞌontiꞌl nyolin tzan tok witꞌlet jkꞌuꞌj tiꞌjx sinoke nyolin ikxjani: “Abꞌl te aj nkꞌulun iktzaꞌ nyolin ja Kawbꞌilni owanqꞌiyon.”* 13 Te Krist otkolpij aꞌoꞌ tiꞌj te aj qanbꞌenbꞌaj qajsik tzan te Kawbꞌil, komo tzan qpaj qetz otzaj qanbꞌeꞌ tajsik tetz, iktzaꞌx nyolin te Tuꞌjal Dios ikxjani: “Qanbꞌenbꞌaj tajsik te xjal aj yobꞌaꞌ twitz jun tzeꞌ.”* 14 Ikxji, tzan tpaj Jesukrist kye aj nyaꞌtx tijajil Israel bꞌaꞌn tzan kykꞌamon te aj oxik tsiꞌ Dios tyol tiꞌj tukyꞌi Abran. Bꞌix ikxji, ax qetz ajnaꞌl tzan tpaj toklen witꞌlet jkꞌuꞌj tiꞌj, bꞌaꞌn tzan jkꞌamon te Txew Dios aj oxik tsiꞌ te Jesukrist tyol tiꞌj.
15 Erman, wetz oxeꞌl nqꞌumaꞌ etetz tiꞌj ntzani iktzaꞌx qetz nqoyolin: Jun xjal oj tbꞌantik jun strat, oj tqet stzꞌibꞌaꞌ tbꞌi tiꞌj te tuꞌjal, nijunwt abꞌl bꞌaꞌn tzan tjaw kyꞌixpun tetz. 16 [Ax ikxji tiꞌj] te Qtata Dios oxik tsiꞌ tyol tukyꞌi Abran bꞌix tukyꞌi tijajil. Kꞌontiꞌl nyolin kye kyꞌilaꞌj tijajil sinoke tiꞌj cha jun tijajil nyolin ikxjani: “Tukyꞌi awijajil.”* Bꞌix te nini telponx tiꞌj te Krist. 17 Te aj ngan tzan txik nqꞌumaꞌ etetz aj ntzani: Tbꞌay oxik tsiꞌ Qtata Dios tyol tukyꞌi Abran, bꞌix tkyꞌiklen kaj oqal tukyꞌi lajuj tuj kawnaq (430) aqꞌbꞌi,* yaji okaj tqꞌumaꞌ Qtata Dios te Tkawbꞌil tukyꞌi Moisés, per te Kawbꞌil kꞌontiꞌl opon tnajsaꞌ te tyol aj oxik tsiꞌ tukyꞌi Abran tbꞌay. 18 Qa te aj njkꞌamoꞌ tukyꞌi Qtata Dios cha tzan tpaj-wit tqetlen qokslaꞌ te Kawbꞌil, ntons kꞌontiꞌl-tal njkꞌamoꞌ cha aꞌox tzan tpaj te tyol aj oxik tsiꞌ [tukyꞌi Abran]; per te Qtata Dios oxik tsiꞌ te Abran cha aꞌox tzan tpaj ojetq tuq xik tsiꞌ tyol tetz.*
Te Kawbꞌil Okaj Siꞌ Tzan Tel Qnikyꞌ Alkyetz Te Galan Bꞌix Alkyetz Te Nyaꞌtx Galan
19 Ntons ¿tidiꞌ token te Kawbꞌil? Te Kawbꞌil okaj siꞌ tzan tpaj kyaqil aj nyaꞌtx galan tuq nkyekꞌulun kye xjal,a bꞌix tzan token tuq maxkix oj tul te tijajil Abran aj oxik tsiꞌ te Qtata Dios tyol tiꞌj. Te Kawbꞌil oxik qꞌumaꞌ tzan kye ángel* tukyꞌi jun yoliyon.b 20 Per komo te jun yoliyon kꞌontiꞌl nyolin cha te jun xjal [sinoke kye kykabꞌil], per te Qtata Dios cha jun [ntons axk tetz okaj sin tyol kyukyꞌi kye xjal].c
21 Ntons ¿tzan tpaj petzun nini te Kawbꞌil, npon tnajsaꞌ te tyol aj oxik tsiꞌ te Qtata Dios [tukyꞌi Abran]? Kꞌontiꞌl. Qa jun Kawbꞌil nbꞌantik-wit qanqꞌin titzaꞌ, ntons te aj nꞌel in te qchoj akix-tal te Kawbꞌil. 22 Per te Kawbꞌil nyolin kyaqil xjal tzyumeꞌ tzan te choj; bꞌix [nyolin ikxji] tzan tponkix kyukyꞌi kye aj nkyeꞌokslan te aj oxik tsiꞌ Qtata Dios tyol tiꞌj, aj njkꞌamoꞌ toklen witꞌlet jkꞌuꞌj tiꞌj Jesukrist. 23 Aj minaꞌ tuq tul te tumelil tzan tok witꞌlet jkꞌuꞌj tiꞌj Jesukrist, qetz a tgan tuq tzan tqet qokslaꞌ te Kawbꞌil bꞌix tzan qiyon tuq tzan stzaj siꞌ te tumelil akꞌaꞌj. 24 Ntons ikxji te Kawbꞌil nꞌoken tuq tzan qtzaj txnaqꞌtzaꞌ maxkix tuq oj tul te Krist, bꞌix ikxji tzan tel in te qchoj tzan tpaj toklen witꞌlet jkꞌuꞌj [tiꞌj te Krist]. 25 Per ya ma tzul te tumeꞌl tzan tok witꞌlet jkꞌuꞌj, ajnaꞌl ya kꞌontiꞌl tzan qtzaj txnaqꞌtzaꞌ te Kawbꞌil. 26 Astilji ajnaꞌl etetz aꞌix tkꞌwaꞌal Qtata Dios ekyaqil etetz tzan tpaj toklen witꞌlet ekꞌuꞌj tiꞌj Kristo Jesus. 27 Astilji ekyaqil etetz ojaw siꞌ aꞌ ewiꞌ tukyꞌi tbꞌi Jesukrist, etetz oje kxkyꞌixpjik tzan etok iktzaꞌ Krist. 28 Ajnaꞌl kꞌontiꞌl pawaꞌ kyibꞌ kye xjal aj tijajil Israel bꞌix kye xjal aj nyaꞌtx tijajil Israel, ax kꞌontiꞌl pawaꞌ kyibꞌ kye aj mosimeꞌ bꞌix kye aj nyaꞌtx mosimeꞌ, ax kꞌontiꞌl pawaꞌ kyibꞌ kye ichan bꞌix kye xuj; ajnaꞌl ekyaqil etetz mojlikix tukyꞌi Kristo Jesus. 29 Komo etetz aꞌix aj te Krist, astilji ax aꞌix tijajil Abran bꞌix etetzaꞌtz te aj oxik tsiꞌ te Qtata Dios tyol tiꞌj [tukyꞌi Abran].*