2
Aj Txik Kyqꞌumaꞌ Kye Tijxjal Galan Tuq Aj Ntpakbꞌaꞌ Te Paꞌk
1 Yaji ya ma kyꞌik kajlajuj aqꞌbꞌi, injakon junkyꞌel Jerusalen junx tukyꞌi Bꞌeꞌch bꞌix ax oxik win Tit wukyꞌiꞌl.* 2 Wetz inxik tzan tpaj te Qtata Dios otzaj tyekꞌuꞌ wetz tzan nxik, bꞌix yaji owok nchimoꞌ wibꞌ nchukel kyukyꞌiꞌ kye qerman aj at kyajwalil txini bꞌix oxik nqꞌumaꞌ xtxolil te tpakbꞌalil galan aj nxik npakbꞌaꞌ kxol kye aj nyaꞌtx tijajil Israel. Wetz nkꞌuluj ikxjani tzan tok nchaꞌoꞌ qa tumeꞌl qa nyaꞌtxji te aj nxik npakbꞌaꞌ. 3 Per te Tit aj ajun tuq wukyꞌiꞌl, komo tetz jun aj nyaꞌtx tijajil Israel, kꞌontiꞌl owok lajoꞌ tzan tok siꞌ techalul, 4 anke epon qxola junjun xjal aj qerman-eꞌ kyi, per nyaꞌtx tuq bꞌanꞌax kyitzaꞌ, kyetz cha tuq nkyechaꞌon qiꞌj titzaꞌ te Kristo Jesus otkolpij aꞌoꞌ [bꞌix qa nyaꞌtx tzan te Kawbꞌil]. 5 Cha kygan tuq tzan qaj kymeltzꞌuꞌ junkyꞌel tzan txik qin junkyꞌel iktzaꞌ oqtxiꞌ, per qetza kꞌontiꞌl oqtzoqpijna tzan tpaj qgana tuq tzan tel enikyꞌ byenech tiꞌj te tumeꞌl bꞌanꞌax tiꞌj te tpakbꞌalil titzaꞌ nqokolet. 6 Per kye aj otzqiꞌmj tukyꞌi nim kyajwalil, (anke wetz kꞌontiꞌl woklen titzaꞌ tuq kyetz kyajwalil, komo tuj twitz te Qtata Dios kꞌontiꞌl jun abꞌl mas tbꞌanil twitz junky),* kyetz kꞌontiꞌl otzaj kyqꞌumaꞌ qa at tidiꞌ npaltin tiꞌj te tpakbꞌalil aj nxik tuq npakbꞌaꞌ 7 sinoke owel kynikyꞌ, wetz bꞌan bꞌanꞌax oje tzaj siꞌ wajwalil [tzan txik npakbꞌaꞌ] te tpakbꞌalil galan kxol kye aj nyaꞌtx tijajil Israel,a bꞌix yatzun te Xhpeꞌy, tetz ojetq tzaj siꞌ tajwalil tzan txik tpakbꞌaꞌ kxol kye qxjalil aj tijajil Israel.b 8 Komo axkix te Qtata Dios aj okaj sin te Xhpeꞌy tzan tok te tkyꞌixel kxol kye aj tijajil Israel,c axkix te Qtatji inkaj tsiꞌ wetz tzan wok te tkyꞌixel kxol kye aj nyaꞌtx tijajil Israel. 9 Bꞌix aj tel kynikyꞌ tiꞌj te wajwalil aj oje tzaj tsiꞌ te Qtata Dios wetz, yaji te Chaw, Xhpeꞌyd bꞌix Waꞌnch, komo aꞌeꞌ kyetz kye aj mas nim kyajwalil, kyetz oqet kykꞌamoꞌna aꞌin bꞌix te Bꞌeꞌch junchꞌin kyukyꞌiꞌl tzan qxikna qetza kxol kye aj nyaꞌtx tijajil Israel bꞌix tzan kxik kyetz kxol kye aj tijajil Israel.e 10 Aꞌox otzaj kyqꞌumaꞌ qetza tzan kxik qnaꞌoꞌna kye mebꞌaꞌ xjal, bꞌix wetz bꞌisuꞌxkix tuq witzaꞌ ikxji.
Kꞌon Qobꞌaj-ok Xmeletzꞌ Tiꞌj Titzaꞌ Nqoꞌokslan
11 Ntons, yaji aj tpon te Xhpeꞌyf tuj Antyokiy, wetz inwaꞌlet twitz bꞌix oxik nkawiꞌ tzan tpaj te aj nyaꞌtx tuq tumeꞌl nkꞌulun. 12 Komo aj minaꞌ tuq kypon junjun aj lajomeꞌ tuq tzan te Chaw, tetz nwaꞌan tuq kyukyꞌi kye aj kꞌontiꞌl atok kyechalul,g per ya ma kyepon kye aj lajomeꞌ tuq tzan te Chaw, tetz owel tpawaꞌ tibꞌ kyiꞌj kye aj kꞌontiꞌl atok kyechalul tzan tpaj nxobꞌ tuq kywitz kye aj tzunx nxik kxnaqꞌtzaꞌ tzan tok kyechalul kye qerman. 13 Ntons ikxji kye txqꞌanky aj tijajil Israel dyakwerd tuq ateꞌ tukyꞌi Xhpeꞌy tiꞌj txmeletzꞌul, bꞌix ax peꞌ te Bꞌeꞌch oxik tsamoꞌ tibꞌ kxol kyetz tiꞌj te kxmeletzꞌulni. 14 Ya ma tzꞌok wen kꞌontiꞌl tuq nkyekꞌulun iktzaꞌ te tumeꞌl iktzaꞌ nyolin te tpakbꞌalil galan [titzaꞌ nqokolet], oxik nqꞌumaꞌ tuj twitz te Xhpeꞌy kywitz kyaqil qerman, “Qa yatz aj aꞌich jun aj tijajil Israel, bꞌix nxhchꞌanqꞌin iktzaꞌ nyaꞌtx aꞌich aj tijajil Israel, ¿tistil nkyeꞌok alajoꞌ kye aj nyaꞌtx tijajil Israel tzan kyok iktzaꞌ tijajil Israel? 15 Qetz aꞌoꞌ tijajil Israel qitzꞌjlenx bꞌix nyaꞌtx aꞌoꞌ chimol choj iktzaꞌ kye aj nyaꞌtx tijajil Israel, 16 per qetz qebꞌenky te qchoj kꞌontiꞌl nꞌel in cha tzan tpaj tqetlen jkꞌuluꞌ aj ntyoliꞌ te Kawbꞌil,* sinoke nꞌel in tzan tpaj toklen witꞌlet jkꞌuꞌj tiꞌj Kristo Jesus.* Astilji ax qetz nqoꞌokslan tiꞌj Kristo Jesus tzan tel in te qchoj tzan tpaj toklen witꞌlet jkꞌuꞌj tiꞌj bꞌix nyaꞌtx tzan tpaj tqetlen jkꞌuluꞌ aj ntyoliꞌ te Kawbꞌil. Komo nijunwt nꞌel in xhchoj tzan tpaj tqetlen tkꞌuluꞌ aj ntyoliꞌ te Kawbꞌil. 17 Qa qetz nqojoyon tzan tel in qchoj tuj twitz Qtata Dios tzan Krist, bꞌix qa ikxji nꞌel qnikyꞌ qetz aꞌoꞌ chimol choj [iktzaꞌ kye aj nyaꞌtx tijajil Israel], ntons ¿telponx peꞌ te nini qa tzan tpaj Krist qetz at qchoj? ¡Nyaꞌtx! 18 Qa qetz pon qnajsaꞌ-wit jun tidiꞌ bꞌix yaji oqtel jkꞌuluꞌ junkyꞌel iktzaꞌ tbꞌay, aꞌoꞌxk qetz nqoqꞌuman nyaꞌtx galan maꞌtx jkꞌuluj.”h
19 Ntons, komo tzan tpaj te Kawbꞌil wetz tuj twitz te Kawbꞌil iktzaꞌ kamnaq aꞌin, per tzan wanqꞌin te Qtata Dios. 20 Junchꞌin tukyꞌi Krist wetz inkamik twitz krus, bꞌix ajnaꞌl wetz kꞌontiꞌl nkyinꞌanqꞌin te wetzx, sinoke nkyinꞌanqꞌin tzan tpaj te Krist atqex tuj wanim; nkyinꞌanqꞌin witꞌlik nkꞌuꞌj tiꞌj te [Krist aj] Tkꞌwaꞌal Dios aj nkyinqet tganiꞌ bꞌix oxik tqꞌapoꞌ tibꞌ tzan tkamik tzan npaj wetz. 21 Wetz kꞌontiꞌl nꞌel wikꞌoꞌ te aj bꞌan galan aj kꞌontiꞌl nqajoꞌ aj ntzaj tsiꞌ te Qtata Dios; cha bꞌaꞌn-wit tzan tel in te qchoj tzan tpaj tqetlen qokslaꞌ te Kawbꞌil, ntons cha-tal gan okamik te Krist.