2
Te Aj Nim Bꞌan Galan Aj Oqet Tkꞌuluꞌ Te Qtata Dios Tzan Jqet Tkoloꞌ
1 Tbꞌayaꞌ etetz kamnaq tuq aꞌix tzan tpaj te etil bꞌix te echoj. 2 Nqet tuq ekꞌuluꞌ iktzaꞌx nkyekꞌulun kye xjal aj twitz txꞌoꞌtxꞌ bꞌix iktzaꞌx tgan te twitzaleꞌ kyiꞌj kye malspirit tuj kyaqꞌiqꞌ aj nꞌaqꞌunan tuj kyanim kye aj kꞌontiꞌl nqet kyokslaꞌ te Qtata Dios. 3 Qkyaqil qetz oqtxiꞌ nqobꞌet tuq iktzaꞌx kyetz, nqokꞌulun tuq iktzaꞌx tgan te qchiꞌjel bꞌix iktzaꞌx tuq te aj njaw kanet tuj qwiꞌ. Astilji te aj nqajoꞌ tuq tzan stzaj siꞌ jun xhchoꞌnal qiꞌj tzan tqꞌoj Qtata Dios iktzaꞌx nkyajoꞌ kye txqꞌanky xjal aj twitz txꞌoꞌtxꞌ.
4 Per te Qtata Dios bꞌan nim nloꞌet tkꞌuꞌj qiꞌj, bꞌix tzan tpaj nqoqet tganiꞌ nim, 5 anke kamnaq tuq aꞌoꞌ tzan tpaj te qchoj, tetz otzaj tsiꞌ jun qanqꞌin junx tukyꞌi Krist.* Astilji okxqet tkoloꞌ etetz tzan tpaj tetz bꞌan galan nabꞌlin bꞌix nyaꞌtx tzan tpaj-wit nꞌetajoꞌ. 6 Bꞌix junx tukyꞌi Kristo Jesus te Qtata Dios ojaw tanqꞌinsaꞌ aꞌoꞌ bꞌix oqet twitꞌbꞌaꞌ aꞌoꞌ junx tukyꞌiꞌl tuj kaꞌj. 7 Oqet tkꞌuluꞌ nini tzan tqet tyekꞌuꞌ kywitz kyaqil kye aj kyeꞌul mas yaj, titzaꞌ tetz ntzaj tsiꞌ qajsik jun nim bꞌan galan, iktzaꞌx bꞌan galan nabꞌlin qukyꞌiꞌl tzan te Kristo Jesus [aj otzaj tlajoꞌ kolol qetz]. 8 Tzan tpaj te Qtata Dios bꞌan galan nabꞌlin etukyꞌiꞌl anke kꞌontiꞌl nꞌetajoꞌ, etetz kolomix titzaꞌ toklen witꞌlet ekꞌuꞌj tiꞌj; nyaꞌtx tzan tpaj-wit galan aꞌix, sinoke a te Qtata Dios ntkꞌuluꞌ etukyꞌiꞌl ikxji cha ekotz, 9 bꞌix nyaꞌtx tzan tpaj jun ekꞌulbꞌen galan, ikxji tzan kꞌon tqet tjiqꞌbꞌaꞌ tibꞌ nijunwt. 10 Komo aꞌoꞌ tkꞌulbꞌen tetz, aji tetz oqet kꞌulun te qetz tzan te Kristo Jesus tzan jkꞌulun jun galan aj bꞌisuꞌxkix tuq titzaꞌ tzan tqetkix jkꞌuluꞌ.
11 Instzaj enaꞌoꞌ, tbꞌayaꞌ [kye aj tijajil Israel], kye aj at kyechalul, kyetz nꞌok tuq kyqꞌumaꞌ ikxjani etiꞌj [etetz aj nyaꞌtx kyijajil aꞌix]: “Etetz kꞌontiꞌl etechalul.” Per kyetz kyechalul cha kykꞌulbꞌen xjal. 12 Instzaj enaꞌoꞌ, etetz tbꞌayaꞌ kꞌontiꞌl tuq atqet te Krist etukyꞌiꞌl, bꞌix nyaꞌtx aꞌix tuq aj tijajil Israel, komo kꞌontiꞌl tuq etoklen tiꞌj te aj oxik tsiꞌ te Qtata Dios tyol tiꞌj kyukyꞌiꞌl, bꞌix kꞌontiꞌl jaꞌ tuq loꞌik ekꞌuꞌj [tzan ekolet], kꞌontiꞌl tuq atqet te Qtata Dios etukyꞌiꞌl tzani twitz txꞌoꞌtxꞌ. 13 Per yatzun ajnaꞌl tzan te Kristo Jesus etetz aj laqꞌchik tuq atix [tiꞌj Qtata Dios bꞌix kyiꞌj kye aj etzameꞌ titzaꞌ], ajnaꞌl oje kxꞌok junchꞌina [kyukyꞌiꞌl] tzan tpaj tkamlenb te Krist. 14 Komo aji tetz te aj owul swal jun chewsbꞌil qxol* qetz qkyaqil, bꞌix otkꞌuluj tzan qok cha jun bꞌuchꞌuj qetz aj kabꞌeꞌ bꞌuchꞌuj xjal aꞌoꞌ tuq tbꞌayaꞌ, ikxji owel tin te aj npawan tuq te qetz qxol. 15 Ikxji tzan tpaj tkamlen, owel teqꞌiꞌ te qꞌojc bꞌix te Kawbꞌil aj okaj tqꞌumaꞌ te aj presis tuq tzan tqet qokslaꞌ,* bꞌix yaji tzan kyok tjunchꞌiꞌ kye kykabꞌil bꞌuchꞌuj xjal tzan qok cha jun bꞌuchꞌuj-oq qkyaqil, ikxji ochewsan jkꞌuꞌj qetz qkyaqil. 16 Bꞌix ax tzan tpaj tkamlen te Krist twitz krus, tetz opon tnajsaꞌ te qꞌoj qxol qkyaqil qetz tukyꞌi Qtata Dios,* ikxji otkꞌuluj tzan qten cha jun bꞌuchꞌuj-oq xjal te tetz iktzaꞌ cha jun xhchiꞌjel.
17 Te Krist owul swal jun tpakbꞌalil tzan xhchewsan kykꞌuꞌj kyaqil xjal, nyaꞌtx aꞌox te etetz aj laqꞌchik tuq atix tiꞌj Qtata Dios, sinoke ax kye [aj tijajil Israel] aj qaynin tuq ateꞌ tiꞌj.* 18 Komo tzan tpaj te Krist, kye kykabꞌil bꞌuchꞌuj xjal aj aꞌoꞌ tuq, ajnaꞌl qkyaqil bꞌaꞌn tzan qok laqꞌchet tiꞌj te Qtat tzan tpaj axkix Txewji te qkyaqil. 19 Astilji etetz ajnaꞌl nyaꞌtx aꞌix iktzaꞌ laqꞌchik xjal ni iktzaꞌ xjal cha aj kꞌontiꞌl otzqiꞌmj-eꞌ, sinoke ajnaꞌl etetz at etoklen junchꞌin kyukyꞌi kyaqil kye aj pawameꞌ te Qtata Dios, bꞌix aꞌix aj kxol kye aj tkꞌwaꞌal Qtata Dios. 20 Etetz aꞌix iktzaꞌ jun jay aj witꞌbꞌaꞌ tajsik twitꞌlel; bꞌix te ewitꞌlel etetz aj iktzaꞌ jay aꞌix, axkix [te aj okaj kxnaqꞌtzaꞌ] kye tkyꞌixel Jesus bꞌix kye yolil tyol Dios, bꞌix a te Kristo Jesus iktzaꞌ te tbꞌay abꞌj twitꞌlel te jay,* 21 bꞌix tzan tpaj tetz, qetz qkyaqil junchꞌin atoꞌ, bꞌix kyebꞌayleꞌ nqoꞌok iktzaꞌ jun nim jay cha aꞌox pawaꞌ te Qajawil 22 bꞌix ax etetz nkxꞌok junchꞌin kyukyꞌi kye txqꞌanky tukyꞌi Krist tzan etok iktzaꞌ jun nim jay aj jaꞌ nnajan te Txew Dios.*