3
Te Paꞌk Te Pakbꞌon Aj Okaj Siꞌ Kxol Kye Aj Nyaꞌtx Tijajil Israel
1 Astilji, wetz akyinqex pres tzan tpaj txiklen npakbꞌaꞌ te tpakbꞌalil tiꞌj Kristo Jesus te jun galan te etetz aj nyaꞌtx aꞌix tijajil Israel. 2 Etetz etebꞌenky te Qtata Dios otzaj tsiꞌ wajwalil tzan nxnaqꞌtzan exol etetz te tpakbꞌalil tiꞌj te nim bꞌan galan aj ntzaj tsiꞌ. 3 Tetz otzaj tyekꞌuꞌ wetz te aj kꞌontiꞌl tuq nꞌel qnikyꞌ tiꞌj tbꞌayaꞌ, iktzaꞌx maꞌtx qet ntzꞌibꞌaꞌ chꞌin tiꞌj. 4 Oj tjaw eteꞌeꞌ te ntzani, bꞌaꞌn tzan tel enikyꞌ wetz webꞌen te aj kꞌontiꞌl tuq nꞌel qnikyꞌ tiꞌj te Krist tbꞌayaꞌ. 5 Te aj nini kꞌontiꞌl oxik yekꞌuꞌ kye nijunwt oqtxiꞌ, sinoke man ajnaꞌl oje tzaj yekꞌuꞌ kye aꞌeꞌ tkyꞌixel bꞌix kye aꞌeꞌ aj yolil tyol aj pawameꞌ aꞌox te tetz, oje tzaj yekꞌuꞌ tzan te Txewx. 6 [Te aj kꞌontiꞌl owel nikyꞌj tiꞌj tbꞌayaꞌ a te ntzani:]* Kye aj nyaꞌtx tijajil Israel, ax kyetz okykꞌamoꞌtz te aj otzajel tsiꞌ Qtata Dios te qetz; ax kyetz qerman qibꞌ kyukyꞌiꞌl bꞌix ax kyetz at kyoklen tiꞌj te aj oxik tsiꞌ te Qtata Dios tyol tiꞌj, aj nponkix tiꞌj te Kristo Jesus aj otzaj tsiꞌ te tpakbꞌalil galan.
7 Te Qtata Dios inkaj tsiꞌ tukyꞌi jun wajbꞌen tzan npakbꞌan aj tpakbꞌalilni, bꞌix inkaj tsiꞌ tuj jun tumeꞌl bꞌan galan anke kꞌontiꞌl nwajoꞌ, bꞌix inkaj tsiꞌ tukyꞌi nim tajwalil tetz. 8 Wetz kywitz kyaqil kye aj pawameꞌ te Qtata Dios, wetz [nnaꞌoꞌ] kꞌontiꞌl nwajoꞌ te ja wajwalilni,* per te Qtata Dios oje tzaj tsiꞌ ja wajwalilni tzan npakbꞌan kxol kye aj nyaꞌtx tijajil Israel, tzan npakbꞌan te tpakbꞌalil tiꞌj te aj bꞌan tbꞌanil aj at tukyꞌi Krist 9 bꞌix tzan txik npakbꞌaꞌ kye kyaqil xjal titzaꞌ tuq atok te tumeꞌl tiꞌj te aj aꞌox tuq Qtata Dios tebꞌen tbꞌay. Komo aji tetz oqet kꞌulun kyaqil 10 tzan tok kchaꞌoꞌ ajnaꞌl kyaqil kye aj at kyajwalil tuj kaꞌj bꞌix kye aj at kybalor tuj kaꞌj, tzan tok kchaꞌoꞌ tiꞌj te aj nim ntbꞌisuꞌ te Qtata Dios bꞌix tzan tok kchaꞌoꞌ nini tzan kye aj nkyeꞌokslan te tetz. 11 Oqet tkꞌuluꞌ ntzani iktzaꞌxkix aj ojetq tuq qet tbꞌisuꞌ te jun-eleꞌx atx aj bꞌan oqtxiꞌ bꞌix tzan tkꞌulun ikxji tzan te Qajaw Kristo Jesus. 12 Komo tzan tpaj te Krist, ajnaꞌl kꞌontiꞌl nqoxobꞌ bꞌix kꞌontiꞌl nqokyꞌixwik tzan qok laqꞌchet tiꞌj Qtata Dios tzan tpaj toklen witꞌlet jkꞌuꞌj tiꞌj Krist. 13 Astilji wetz ngan tzan txik nqꞌumaꞌ etetz tzan kꞌon ebꞌisun tiꞌj te xhchoꞌnal aj nꞌok wen twitz tzan epajni, komo te ntzani owokel te jun nim bꞌan galan te etetz.
Junkyꞌel Te Paꞌk Nxnaqꞌtzan Tukyꞌi Qtata Dios Kyiꞌj Kye Aj Efeso
14 Astilji, wetz nkyinqet mejlet twitz Qtata Dios bꞌix nqet nwitz twitz, 15 komo tzan tpaj tetz ateꞌ kye kyaqil aj akyeqet tuj kaꞌj bꞌix kyaqil kyijajil xjal twitz txꞌoꞌtxꞌ. 16 [Wetz nxik nqaniꞌ tukyꞌiꞌl] tzan txik tsiꞌ te Txew jun nim ebalor tuj etanim bꞌix tzan txik tsiꞌ iktzaꞌx tetz at nim tidiꞌchq bꞌan galan, 17 bꞌix nxik nqaniꞌ tzan sten te Krist tuj etanim tzan tpaj witꞌlik ekꞌuꞌj tiꞌj, bꞌix tzan txik esiꞌ elokꞌil bꞌix tzan eten bꞌan jwert tiꞌj titzaꞌ tetz nqoqet tganiꞌ. 18 Ikxji tzan tel enikyꞌ junx kyukyꞌi kye txqꞌanky aj pawameꞌ te Qtata Dios janikꞌpon bꞌan nim [nqoqet tganiꞌ] 19 bꞌix tzan tok eten titzaꞌ te Krist nkxqet tganiꞌ mas nim twitz te aj bꞌaꞌn tzan tqet qximaꞌ, bꞌix ikxji tzan tok en bꞌan byenech te xhchqitzꞌunal Qtata Dios etiꞌj.
20 Ntons, ajnaꞌl tiꞌj [te Qtata Dios] aj bꞌaꞌn tzan tkꞌulun mas nim twitz te aj nxik jqaniꞌ bꞌix mas nim twitz te aj nqet qximaꞌ, iktzaꞌx te qbalor aj ntzaj tsiꞌ tuj qanim, 21 intqet jiqꞌbꞌaꞌxwit qxol qkyaqil qetz aj nqoꞌokslan te tetz, intqet jiqꞌbꞌaꞌxwit qxol tzan te Kristo Jesus te jun-eleꞌx. Intkyꞌikxwit ikxji.