4
Junchꞌiꞌ Qibꞌ Qxolx Tzan Te Txew Qtata Dios
1 Ntons astilji wetz aj akyinqex pres tzan tpaj txiklen npakbꞌaꞌ tiꞌj te Qajawil, wetz nqet nwitz ewitz tzan ebꞌet tuj jun tumeꞌl galan tzan tpaj oje kxik ukꞌleꞌ [tzan te Qtata Dios] tzan ebꞌet ikxji. 2 Inkxik enaꞌoꞌ kye txqꞌanky tbꞌay ewitz etetz bꞌix peꞌeyolin waq kyebꞌaꞌ kyukyꞌi txqꞌanky, bꞌix insten epasens exolx tukyꞌi jun tkꞌuꞌjlal bꞌix ganiꞌ etibꞌ exolx,* 3 bꞌix kꞌon kaj esiꞌ tzan eten junchꞌin exolx tukyꞌi te Txew Dios, komo aji tetz nchewsan te ekꞌuꞌj. 4 Aꞌox cha jun xhchiꞌjel [te Krist tzan qkyaqil], bꞌix cha junkix te Txew [Dios te qkyaqil], bꞌix axkix parej ukꞌlemoꞌ qkyaqil tzan tkaj loꞌet jkꞌuꞌj aꞌox tiꞌj tetz. 5 Bꞌix aꞌox cha jun te Qajawil at, bꞌix cha jun tumelil titzaꞌ tzan tok witꞌlet jkꞌuꞌj tiꞌj, bꞌix ax cha jun [tidiꞌ telponx tiꞌj] te tjawlen siꞌ aꞌ qwiꞌ, 6 bꞌix cha jun Dios ntzaj qnaꞌoꞌ, bꞌix aꞌox tetz kꞌwaꞌlon kyiꞌj kyaqil, aꞌox tetz at tajwalil kyiꞌj kyaqil, nꞌaqꞌunan kyukyꞌi kyaqil, atqet kyukyꞌi kyaqil.
7 Per oje tzaj tsiꞌ te junjunchaq te qetz [jun qajbꞌen] tzan jkꞌulun iktzaꞌx janikꞌponkix ntzaj tsiꞌ te Krist mas galan twitz aj nqajoꞌ.* 8 Astilji te Tuꞌjal Qtata Dios nyolin ikxjani: “Tetz ojax [tuj kaꞌj] bꞌix exik tin tukyꞌiꞌl jun jitzij kye aj pres tuq ateꞌ, bꞌix oxik tsiꞌ kyajbꞌen [te junjunchaq].”* 9 ¿Ntons tiꞌ telponx oj txik qꞌumlet “ojax tuj kaꞌj”? Telponx tetz tbꞌay okyaqul tzani twitz txꞌoꞌtxꞌ,a 10 bꞌix te aj okyaqul tzani twitz txꞌoꞌtxꞌ axkix te aj ojax max tuj kaꞌj tajsik kyaqil tzan tkꞌulun mandad tiꞌj kyaqil. 11 Bꞌix ajixk tetz ekaj tsiꞌ junjun te tkyꞌixel, bꞌix junjunky te aj yolil tyol, bꞌix junjunky te pakbꞌal te tpakbꞌalil titzaꞌ nqokolet, bꞌix junjunky kye qerman pastor, bꞌix junjunky te xnaqꞌtzon qxol. 12 Bꞌix kyaqil nini tzan kybꞌantik byenech iktzaꞌ tetz oqet tbꞌisuꞌ kyiꞌj kye aj pawameꞌ titzaꞌ tzan kyonen kyukyꞌi qerman, tzan kyok jwert kkyaqil kye aj qꞌapoꞌ kyibꞌ te Krist.b 13 Bꞌix te nini tzan qok junchꞌin qkyaqil jaꞌ witꞌlik jkꞌuꞌj bꞌix tzan tok qotzqilaꞌ byenech te Tkꞌwaꞌal Qtata Dios tzan qten bꞌan jwert tukyꞌiꞌl max oj qok mer iktzaꞌ te Krist. 14 Ikxji qetz ya nlay qoꞌok iktzaꞌ kꞌwaꞌl aj kobꞌchaq njaw kkyꞌixpuꞌ tzan kybꞌisun bꞌix jaꞌchq nkyexik jukꞌuꞌ tzan jun xnaqꞌtzbꞌilj bꞌix ikxji nkyeqet eqꞌiꞌ tzan kye xjal aj cha nkyejoyon tumeꞌl titzaꞌ tzan kyqet kyeqꞌiꞌ txqꞌanky tzan kxik kyin tuj jun bꞌey aj nyaꞌtx galan. 15 Mejor qobꞌajyolin te bꞌanꞌax tzan tpaj nkyeqet qganiꞌ kye qerman, bꞌix ikxji nqoꞌok mas iktzaꞌ Krist tiꞌj kyaqil, komo aji tetz te twitzaleꞌ kxol kyaqil aj nkyeꞌokslan tiꞌj. 16 Bꞌix komo qetz iktzaꞌ xhchiꞌjel tetz, kabal atoꞌ junchꞌin qkyaqil qa qkyaqil qetz nqokꞌulun te qaqꞌun aj okaj tsiꞌ qetz, bꞌix ikxji nqoꞌok jwert tukyꞌi jun tumeꞌl aj nqet qganiꞌ qibꞌx.*
Te Qanqꞌin Akꞌaꞌj Aj Ntzaj Tsiꞌ Krist
17 Ntons komo wetz aj te Qajawil aꞌin, oxeꞌl nqꞌumaꞌ te etetz ikxjani: Ya kꞌonky kxbꞌet iktzaꞌ nkyebꞌet kye aj nyaꞌtx tijajil Israel [aj kꞌontiꞌl nkyeꞌokslan tiꞌj te Qtata Dios], kyetz nkyeꞌanqꞌin tukyꞌi jun kynabꞌl aj pur nyaꞌtx galan, 18 bꞌan qlolj tuj kywitz tzan tpaj laqꞌchik ateꞌ tiꞌj Qtata Dios, [kꞌontiꞌl jun kyanqꞌin akꞌaꞌj tukyꞌiꞌl] tzan tpaj kꞌontiꞌl nꞌel kynikyꞌ chꞌinwt tiꞌj tetz tzan ktzꞌakal. 19 Ya kꞌontiꞌl nkyebꞌisun qa nyaꞌtx galan te kypakꞌachul bꞌix oje xik kyqꞌapoꞌ kyibꞌ tzan kykꞌulun tidiꞌchq aj ntzꞌilan tuj kyanim bꞌix cha kykꞌulunqet tidiꞌchq tzan tel kyetzaꞌ te aj nꞌel kyqꞌajabꞌ tiꞌj.* 20 Per etetz nyaꞌtx ikxji owok etotzqilaꞌ te Krist tzan etanqꞌin ikxji, 21 qa bꞌanꞌax owok echaꞌoꞌ tiꞌj tetz bꞌix oje kxik xnaqꞌtzaꞌ tiꞌj tetz, iktzaꞌ te tumeꞌl bꞌanꞌax tiꞌj tetz. 22 Intkaj ekolaꞌ te tumeꞌl titzaꞌ nkxkꞌulun tuq tbꞌayaꞌ,* komo cha npon enajsaꞌ etibꞌ tuq tzan tpaj cha nqet tuq eqꞌiꞌ etiꞌj tzan te aj nyaꞌtx galan nꞌel tuq eganiꞌ. 23 Ajnaꞌl a tgan tzan tkyꞌixpjik titzaꞌ nkxbꞌisun tuj etanim tzan tok kyaqil akꞌaꞌj, 24 bꞌix a tgan tzan txik eteqꞌiꞌ te tumeꞌl te etanqꞌin akꞌaꞌj* iktzaꞌx okxkaj tsiꞌ te Qtata Dios tzan etok iktzaꞌ tetz,* tzan ebꞌet tuj jun tumeꞌl bꞌan galan bꞌix tzan eten bꞌan bꞌanꞌax saq etanim tuj twitz.
25 Astilji etetz ya kꞌonky kxnikꞌon, sinoke aꞌox peꞌeyolin te bꞌanꞌax* kyukyꞌi qermanc tzan tpaj qkyaqil qetz junchꞌin aꞌoꞌ.* 26 Qa etetz ma kxjaw qꞌojlik, kꞌon kxjoyon choj, bꞌix oj tex qꞌij ya kꞌonky tzan eqꞌojin mas,* 27 kꞌon xik esiꞌ lad te Tajaw Choj. 28 Te aj nꞌelqꞌan tuq tbꞌayaꞌ, ajnaꞌl intkaj tsiꞌ tzan telqꞌan bꞌix intaqꞌunan tukyꞌi jun tumeꞌl galan tzan tonen kyukyꞌi kye aj presis jun onbꞌil te kyetz. 29 Kꞌon kxyolin jun yol nyaꞌtx galan sinoke tzan eyolin yol galan aj owoneyon kyukyꞌi kye aj nkyechaꞌon tzan tok jun nim bꞌan galan te kyetz. 30 Kꞌon ekꞌuluj tzan tbꞌisun te Txew Dios, komo tzan tpaj tetz atqex tuj etanim te jun etechaꞌl maxkix oj tpon te qꞌij oj ekolet. 31 Intkaj esiꞌ te kyaqil qꞌoj tuj etanim, bꞌix intkaj esiꞌ tzan ejaw qꞌojlik bꞌix kyaqil te etxꞌuꞌjil, bꞌix kꞌon kxꞌok xtxꞌay, bꞌix intkaj esiꞌ te yol nyaꞌtx galan bꞌix kyaqil aj tidiꞌchq aj nyaꞌtx galan. 32 Peꞌetok waq galan kxnabꞌlin kyukyꞌi txqꞌanky, bꞌix intok loꞌet ekꞌuꞌj kyiꞌj, bꞌix inkyqet enajsaꞌ iktzaꞌx te Qtata Dios okxqet tnajsaꞌ tzan tpaj [tkamlen] te Krist.*