5
Te Tumeꞌl Titzaꞌ Tzan Qbꞌet Qetz Aj Tkꞌwaꞌal Qtata Dios Aꞌoꞌ
1 Ntons astilji, intel etin iktzaꞌ te Qtata Dios nabꞌlin, komo etetz aꞌix tkꞌwaꞌal Qtata Dios bꞌix ganimix nim titzaꞌ. 2 Bꞌix intqet eganiꞌ etibꞌx exolx iktzaꞌx te Krist nkxqet tganiꞌ bꞌix oxik tqꞌapoꞌ tibꞌ tzan tok iktzaꞌ jun present tzan qpaj qetz, te jun oyej aj nꞌel bꞌan galan tuj twitz Qtata Dios.*
3 Etetz kꞌon tok te kꞌajajbꞌilj exol, bꞌix te aj tidiꞌchq aj ntzꞌilan tuj etanim, ni tidiꞌchq nyaꞌtx galan aj nꞌel tganiꞌ te echiꞌjel, kꞌon eximan chꞌinwt tiꞌj kyaqil nini tzan tpaj etetz pawamix te Qtata Dios. 4 Kꞌon kxyolin jun yol aj nkyekyꞌixwik xjal tiꞌj, ni jun yol aj kꞌontiꞌl token, pyor jun yol xhchꞌajyol, tzan tpaj kyaqil nini nyaꞌtx galan. Mejor peꞌenaꞌon waq te Qtata Dios tzan txik esiꞌ pixon te tetz. 5 A tgan tzan tel enikyꞌ te ja ntzani: abꞌl aj cha tkꞌajajinqet, qatzun nkꞌulun nyaꞌtx galan tukyꞌi xhchiꞌjel, qatzun tidiꞌchq nkꞌulun tzan tel tetzaꞌ te aj nꞌel tqꞌajabꞌ tiꞌj, komo ikxnini nꞌok tsiꞌ tkꞌuꞌj tiꞌj jun tidiꞌ aj ntzaj tnaꞌoꞌ mas twitz te Qtata Dios,* ntons te aj xjal nini nlay kꞌamon jun tanqꞌin te jun-eleꞌx tukyꞌi Qtata Dios. 6 Intok esiꞌ enabꞌl tzan kꞌon eqet eqꞌiꞌ tukyꞌi yol aj kꞌontiꞌl tidiꞌ token, tzan tpaj kyaqil nini ntzaj tqꞌoj te Qtata Dios, oxeꞌl tsiꞌ xhchoꞌnal kyiꞌj kyaqil aj kꞌontiꞌl nqet kyokslaꞌ. 7 Etetz kꞌon tzꞌox esamoꞌ etibꞌ kxol, 8 komo etetz tbꞌayaꞌ atikxqex tuq tuj qlolj,a per ajnaꞌl atikxqet tuj xhchkꞌatunal te Qajawil. Astilji ajnaꞌl peꞌebꞌet iktzaꞌxkix atikxqet tuj xhchkꞌatunal, 9 komo kyaqil aj nbꞌantik tzan tpaj nqobꞌet tuj te xhkꞌatun kyaqil aj bꞌan galan, kyaqil aj tumeꞌl bꞌix aj bꞌan bꞌanꞌax; 10 ikxji oqtel eyekꞌuꞌ aj nqet tuj twitz Qtata Dios. 11 Bꞌix kꞌon tzꞌox esamoꞌ etibꞌ tuj tidiꞌchq aj nkykꞌuluꞌ kye aj ateqex tuj qlolj, te aj nkykꞌuluꞌ kꞌontiꞌl nꞌel te jun galan, sinoke a tgan tzan txik eyoliꞌ nini nyaꞌtx galan 12 tzan tpaj te aj kykꞌulbꞌen tuj qloljb bꞌan nyaꞌtx galan bꞌix nqokyꞌixwik tzan qyolin tiꞌj. 13 Per oj tel nikyꞌj tzan te chkꞌatunal kyaqil te aj nyaꞌtx galan, kyaqil nkaj bꞌan ebꞌl tzan tpaj te chkꞌatunal nkꞌulun tzan tkaj ebꞌl kyaqil. 14 Iktzaꞌx nyolin ikxjani: “Intel awatl yatz aj nchwitan, intel apawaꞌ awibꞌ kxol kye kamnaq, bꞌix te Krist oxeꞌl tsiꞌ xhchkꞌatunal tuj awanim.”
15 Astilji intok esiꞌ enabꞌl tzan ebꞌet nyaꞌtx iktzaꞌ naqe kꞌombꞌaꞌ kxbꞌisun, sinoke peꞌebꞌet waq tukyꞌi jun enabꞌl bꞌan galan tzan ebꞌisun tuj tumeꞌl, 16 bꞌix tzan tok esiꞌ waq ekꞌuꞌj tzan token galan etitzaꞌ te tyemp* tzan tpaj te ja tyemp ajnaꞌl aj itzꞌojoꞌni pur nyaꞌtx galan nkyꞌik. 17 Astilji kꞌon kxꞌok mokꞌ sinoke intok esiꞌ enabꞌl tidiꞌ tgan te Qajawil. 18 Kꞌon kxbolin tukyꞌi te taꞌal ub txꞌamsaꞌ tzan tpaj okxeꞌl tin tuj jun bꞌey aj okxpoyon tnajsaꞌ; sinoke tzoqpijwaq tzan tkꞌulun mandad te Txew Dios tuj etanim tukyꞌi nim tajwalil. 19 Peꞌeyolin exolx etetz pur tukyꞌi bꞌitz aj Tuꞌjal Dios bꞌix tukyꞌi bꞌitz aj nkxnaꞌon te Qtata Dios bꞌix tukyꞌi tidiꞌchq bꞌitz te tetz, peꞌebꞌitzan bꞌix peꞌenaꞌon tetz tukyꞌi jun tkꞌuꞌjlal tuj etanim. 20 Tuj kyaqil tyemp intxik esiꞌ pixon te Qtata Dios tiꞌj kyaqil tukyꞌi tbꞌi te Qajaw Jesukrist,* 21 bꞌix peꞌetonen etibꞌx exolx tzan tpaj nqet etokslaꞌ te Krist.
Jun Konsej Kye Aj Xujelbꞌaj-eꞌ
22 Ntons astilji etetz aj xujelbꞌaj aꞌix, peꞌetokslan kye etichmil iktzaꞌx nkxꞌokslan te Qajawil* 23 tzan tpaj te ichmilbꞌaj aji te twitzaleꞌ tiꞌj te txuꞌjel iktzaꞌx te Krist aji te twitzaleꞌ kxol kye aj nkyeꞌokslan tiꞌj bꞌix aji te okoloyon kyiꞌj kyetz, komo kyetz aꞌeꞌ te aj xhchiꞌjel. 24 Iktzaꞌx qetz aj nqoꞌokslan tiꞌj Krist nqet qokslaꞌ, ax ikxji kye xujelbꞌaj a tgan tzan kyokslan kye kyichmil tiꞌj kyaqil.
Jun Konsej Kye Aj Ichmilbꞌaj-eꞌ
25 Etetz ichmilbꞌaj, inkyqet eganiꞌ waq kye exuꞌjel iktzaꞌx te Krist nkyeqet tganiꞌ kyaqil kye aj nkyeꞌokslan tiꞌj bꞌix oxik tqꞌapoꞌ tibꞌ tzan tkamik tzan kypaj* 26 tzan kykaj pawameꞌ aꞌox te tetz oj tkaj saq kyanim tzan te Tyol Qtata Dios, 27 bꞌix ikxji tzan tkꞌamon kyetz bꞌan xhqitzꞌun tiꞌj kyanim, kꞌontiꞌl tzꞌil kyiꞌj bꞌix chꞌinwt nyaꞌtx galan kyiꞌj,* sinoke tzan kyten jun bꞌuchꞌuj xjal sjapun tuj kyanim bꞌix chꞌinwt nyaꞌtx galan kyiꞌj. 28 Ax kye ichmilbꞌaj, a tgan tzan tqet kyganiꞌ kye kxuꞌjel iktzaꞌxkix nqet kyganiꞌ kyibꞌx. Abꞌl te aj nqet tganiꞌ txuꞌjel axk tetz nqet tganiꞌ tibꞌ, 29 komo nijunwt abꞌl nꞌel tikꞌoꞌ te xhchiꞌjelx sinoke ntkꞌuluꞌ tzan sten galan bꞌix nqet ten tibꞌ. Ikxji te Krist nkyeqet ten kye aj nkyeꞌokslan tiꞌj, 30 komo qetz aꞌoꞌ xhchiꞌjel tetz. 31 “Astilji te ichan okyekajel tsiꞌ stat bꞌix tnan tzan tok junan tukyꞌi txuꞌjel bꞌix kykabꞌil kyetz okyeꞌokel iktzaꞌ cha jun xjal.”* 32 Te ntzani bꞌan kwest tzan tel qnikyꞌ tiꞌj, per wetz ajnaꞌl nkyinyolin tiꞌj te Krist bꞌix kyiꞌj kye aj nkyeꞌokslan tiꞌj. 33 Astilji junjunchaq te etetz a tgan tzan tqet eganiꞌ te exuꞌjel iktzaꞌx nqet eganiꞌ etibꞌx, bꞌix yatzun kye xujelbꞌaj a tgan tzan tqet kyokslaꞌ kye kyichmil.