6
Jun Konsej Kye Aj Kꞌwaꞌalbꞌaj-eꞌ
1 Ntons, etetz aj kꞌwaꞌalbꞌaj aꞌix, inkyqet etokslaꞌ kye etat tzan tpaj te Qajawil,* komo te ntzani tumeꞌl. 2 Nyolin tyol Dios ikxjani: “Inkyqet awokslaꞌ te atat bꞌix anan.” Aj ntzani te tbꞌay aj okaj qꞌumaꞌ aj at jun tidiꞌ galan ojkꞌamoꞌtz qa oqtel qokslaꞌ, 3 [komo nyolin] “tzan tkyꞌik kyaqil galan awukyꞌiꞌl bꞌix tzan awanqꞌin nim tyemp tzani twitz txꞌoꞌtxꞌ.”*
Jun Konsej Kye Aj Kꞌwaꞌlon-eꞌ
4 Ntons, ax etetz kꞌwaꞌlon, kꞌon kyeꞌox echukuꞌ kye ekꞌwaꞌal,* sinoke inkxik ekawiꞌ tukyꞌi jun tumeꞌl galan iktzaꞌx te Qajawil tgan, inkxik exnaqꞌtzaꞌ alkyetz te nyaꞌtx galan aj nkyekꞌulun bꞌix alkyetz te galan aj presis.
Jun Konsej Kye Aj Aqꞌunon-eꞌ
5 Ntons, etetz aj mosiꞌ aꞌix, inkyqet etokslaꞌ kye epatron tzani twitz txꞌoꞌtxꞌ tukyꞌi txobꞌlal tukyꞌi jun tkꞌuꞌjlal tzan tpaj te Krist, 6 nyaꞌtx cha aꞌox tzan etok eꞌeꞌ galan nkxꞌaqꞌunan tzan ekaj galan tuj kywitz, sinoke tzan tpaj nkxꞌaqꞌunan te Krist intqet ekꞌuluꞌ kyaqil tukyꞌi jun tkꞌuꞌjlal iktzaꞌ tgan te Qtata Dios.* 7 Peꞌetaqꞌunan tukyꞌi jun tkꞌuꞌjlal iktzaꞌ nkxꞌaqꞌunan te Qajawil bꞌix nyaꞌtx cha aꞌox kye xjal, 8 komo etetz etebꞌenky, jun xjal otkꞌamoꞌtz tukyꞌi Qajawil iktzaꞌx te galan aj maꞌtx tkꞌuluj, mosiꞌ qa nyaꞌtxji.
Jun Konsej Kye Aj Patron-eꞌ
9 Bꞌix ax etetz aj aꞌix patron, ax peꞌekꞌulun ikxji kyukyꞌi kye etaqꞌunon, per nyaꞌtx tukyꞌi iliꞌmj. Instzaj enaꞌoꞌ tuj etanim, etetz iktzaꞌx kyetz ax qꞌapoꞌ kyibꞌ tuj tqꞌabꞌ Qajawil aj atjax tuj kaꞌj* bꞌix komo tuj twitz tetz kꞌontiꞌl jun mas tbꞌanil twitz junky.*
Te Qaqꞌumbꞌil Aj Ntzaj Tsiꞌ Qtata Dios Tzan Qten Jwert Tukyꞌiꞌl
10 Ntons ajnaꞌl waq erman, peꞌeten waq jwert tukyꞌi Qajawil, peꞌetok jwert tukyꞌi tajwalil tetz aj bꞌan nim. 11 Intoken etitzaꞌ kyaqil te eqꞌojbꞌil aj oje tzaj tsiꞌ te Qtata Dios tzan etipan kyaqil te aj nyaꞌtx galan aj bꞌisuꞌ tzan te Tajaw Choj. 12 Komo qetz kꞌontiꞌl nqoqꞌojin kyukyꞌi kye aj cha aꞌox xjal-eꞌ,a sinoke kyukyꞌi kye aj nyaꞌtx galan aj at kyajwalil tuj kyaqꞌiqꞌ bꞌix kyukyꞌi kye aj at nim kybalor bꞌix kyukyꞌi kye malspirit aj nkyekꞌulun tidiꞌchq tuj qlolj twitz ja txꞌoꞌtxꞌni bꞌix kyukyꞌi kyaqil kye aj nyaꞌtx galan aj nkyeqꞌojin tuj kyaqꞌiqꞌ.b 13 Astilji intoken etitzaꞌ kyaqil te eqꞌojbꞌil* aj oje tzaj tsiꞌ te Qtata Dios tzan etipan chaꞌoj tul jun nyaꞌtx galan etiꞌj, bꞌix ikxji chaꞌoj etipan kyaqil, tzunx okxteyon jwert.
14 Ntons peꞌeten waq jwert iktzaꞌ ntzani: Kꞌon kaj esiꞌ tzan ebꞌet tuj te bꞌanꞌax; nini owokeyon etiꞌj iktzaꞌ tkolbꞌil jun soldad aj atok twitz tkux.* Bꞌix kꞌon kaj esiꞌ tzan ekꞌulun kyaqil tuj tumeꞌl;* nini wokeyon etukyꞌiꞌl iktzaꞌ tkolbꞌil te jun soldad aj atok tpech. 15 Ax a tgan tzan eten list tzan txik epakbꞌaꞌ te tpakbꞌalil aj nchewsan jkꞌuꞌj;* nini owokeyon etukyꞌiꞌl iktzaꞌ tkolbꞌil te jun soldad aj atok toq. 16 Bꞌix kyaqil qꞌij a tgan tzan tok witꞌlet ekꞌuꞌj tiꞌj Krist; nini owokeyon etukyꞌiꞌl iktzaꞌ tewbꞌil aj nkolon tiꞌj jun soldad tzan tponajc kye xhjuꞌy twiꞌ aj ntilun [aj iktzaꞌ kyaqil aj nꞌok siꞌ] qiꞌj tzan te Tajaw Choj. 17 Bꞌix a tgan tzan stzaj enaꞌoꞌ kolomix tzan te Krist; nini owokeyon etukyꞌiꞌl iktzaꞌ kolbꞌil twiꞌ te jun soldad.* Bꞌix ax a tgan tzan token etitzaꞌ te tyol Qtata Dios; nini wokeyon tuj tqꞌabꞌ te Txew Dios iktzaꞌ jun soldad at jun tmachit aj tkansbꞌil.* 18 Bꞌix kyaqil-el oj exnaqꞌtzan bꞌix oj tqet ewitz twitz te Qtata Dios, peꞌexnaqꞌtzan* tukyꞌi jun tkꞌuꞌjlal tukyꞌi tajwalil te Txew Dios bꞌix kꞌon kaj esiꞌ tzan tqet ewitz twitz te Qtat kyiꞌj kyaqil kye aj pawameꞌ titzaꞌ. 19 Bꞌix ax intxik eqaniꞌ chꞌin wiꞌj wetz tzan stzaj tsiꞌ te Qtata Dios nyol tzan txik npakbꞌaꞌ tukyꞌi jun nkꞌuꞌj te tpakbꞌalil aj nqokolet titzaꞌ per aj kꞌontiꞌl owel nikyꞌj tiꞌj oqtxiꞌ. 20 Komo tzan tpaj aj tpakbꞌalilni te Qtata Dios intzaj tlajoꞌ tkyꞌixel tzan txik npakbꞌaꞌ tukyꞌi jun nkꞌuꞌj bꞌix tzan tpajji ajnaꞌl wetz atin pres. Astilji peꞌexnaqꞌtzan chꞌin tzan kꞌon nxobꞌ tzan npakbꞌan tukyꞌi jun tkꞌuꞌjlal iktzaꞌx aj presis tzan nkꞌulun.
Jun Kawbꞌil
21 Ntons, te Tíkiko,* jun qerman ganiꞌ nim qitzaꞌ bꞌix aj kꞌontiꞌl nkaj tsiꞌ tzan taqꞌunan te Qajawil, tetz oxeꞌl etukyꞌiꞌl bꞌix oxeꞌl tqꞌumaꞌ kyaqil aj nkyꞌik wiꞌj tzani. 22 Astilji tzpon nlajoꞌ etukyꞌiꞌl tzan tok echaꞌoꞌ tidiꞌ nkyꞌik qiꞌja tzani bꞌix tzan tnimsan ekꞌuꞌj.*
23 Qtata Dios bꞌix te Qajaw Jesukrist qet kchewsaꞌxwit ekꞌuꞌj etetz erman, bꞌix etetz intqet eganiꞌxwit etibꞌ exolx tukyꞌi jun ekꞌuꞌj witꞌlik tiꞌj Qtata Dios bꞌix Qajaw Jesukrist. 24 Instzaj siꞌxwit jun nim bꞌan galan etajsik ekyaqil etetz aj nqet eganiꞌ te Qajaw Jesukrist tukyꞌi jun eganbꞌil aj nlayxwit kyꞌixpjik.