Te Stzꞌibꞌen Paꞌk Kye Qerman Aj Amaqꞌ Filipos
1
Jun Limbꞌil
1 Wetz aꞌin Paꞌk tukyꞌi te [qerman] Timotey, qetza qꞌapoꞌ qibꞌa nqoꞌaqꞌunan te Kristo Jesus, nqet qtzꞌibꞌaꞌna te ekyaqil etetz aj amaqꞌ Filipos,* etetz aj pawamix te Qtata Dios tzan te Kristo Jesus, nqet qtzꞌibꞌaꞌna te etetz bꞌix kye qerman pastor bꞌix kye aj nkyeꞌonen kyukyꞌiꞌl.a 2 Qtata Dios bꞌix te Qajaw Jesukrist tzaj ksiꞌxwit jun nim bꞌan galan etajsik ekyaqil etetz, bꞌix qet kchewsaꞌxwit ekꞌuꞌj.
Titzaꞌ Nxnaqꞌtzan Tuq Te Paꞌk Kyiꞌj Kye Aj Filipos
3 Wetz nxik nsiꞌ pixon te Qtata Dios kyaqil-el oj etzaj nnaꞌoꞌ. 4 Bꞌix kyaqil-el oj wokten xnaqꞌtzon etiꞌj ekyaqil etetz, wetz nkyinxnaqꞌtzan tukyꞌi jun chalajbꞌil 5 tzan tpaj titzaꞌ nkxꞌonen qukyꞌila tzan txik qpakbꞌaꞌna te tpakbꞌalil galan, atx aj toklen echaꞌoꞌ max ajnaꞌl.* 6 Wetz webꞌen te Qtata Dios oje xik taqꞌsaꞌ jun taqꞌun bꞌan galan tuj etanim, bꞌix nlay kaj tkolaꞌ sinoke obꞌantel max oj tul te Qajaw Jesukrist.* 7 Komo galan tzan nnaꞌon etiꞌj ikxnini tzan tpaj nkxtzaj nnaꞌoꞌ ekyaqil tuj wanim, anke wetz akyinqex pres qatzun akyinqet tzan taj ntzaqꞌbꞌeꞌ kyyol txqꞌanky qatzun tzan tqet nyekꞌuꞌ tumeꞌl te tpakbꞌalil galan kxolji, etetz ekyaqil junx wukyꞌiꞌl njkꞌamoꞌ te aj ntzaj tsiꞌ te Qtata Dios, aj nim bꞌan galan aj kꞌontiꞌl nqajoꞌ. 8 Te Qtata Dios tebꞌen wetz bꞌan nkxqet nganiꞌ tukyꞌi jun tumeꞌl iktzaꞌ te Qajaw Jesukrist nkxqet tganiꞌ.
9 Wetz nqet nwitz twitz Qtata Dios, tzan tqet eganiꞌ etibꞌ bꞌajqꞌij exolx tukyꞌi jun enabꞌl bꞌan tumeꞌl bꞌix tzan tel enikyꞌ byenech titzaꞌ tzan kyqet eganiꞌ kye txqꞌanky. 10 Nkyinqanin ikxji tzan tel enikyꞌ alkyetz te galan tzan ebꞌet tuj tumeꞌl bꞌix chꞌinwt nyaꞌtx galan etiꞌj bꞌeyx ajnaꞌl max oj tul te Krist bꞌix nlay bꞌantik tzan eqet yoliꞌ tzan nijunwt, 11 ikxji tzan ekꞌulun tidiꞌchq bꞌan galan tzan tpaj te Jesukrist [oje tzꞌel tin echoj], tzan tqet jiqꞌbꞌaꞌ te Qtata Dios bꞌix tzan tok te jun chalajbꞌil te tetz.
Bꞌaꞌn Tzan Qpakbꞌan Tiꞌj Qajaw Anke Tiꞌchq Nyaꞌtx Galan Nkyꞌik Qiꞌj
12 Wetz ngan tzan txik nqꞌumaꞌ etetz waq erman, kyaqil aj oje kyꞌik wiꞌj, ma tzꞌok te jun galan tzan txik pakbꞌlet mas te tpakbꞌalil galan. 13 Komo wetz akyinqex pres, ikxji kyaqil kye soldad kyukyꞌi kyaqil kye txqꞌanky xjal tuj tjay te kꞌulul mandad, kyetz kyebꞌen wetz akyinqex pres tzan tpaj nkyinꞌaqꞌunan te Jesukrist.* 14 Bꞌix tzan tpaj wetz nqexlenten pres, kyꞌilaꞌj qerman mas oje tzꞌok kywitꞌbꞌaꞌ kykꞌuꞌj tiꞌj Qajawil bꞌix mas nxik kypakbꞌaꞌ te tyol Qtata Dios tukyꞌi jun tkꞌuꞌjlal bꞌix kꞌontiꞌl nkyexobꞌ. 15 Bꞌanꞌax ateꞌ junjun nkyepakbꞌan per cha enbidyos-eꞌ wiꞌj, cha kygan tzan kyqet jiqꞌbꞌaꞌ bꞌix cha nkyeꞌekꞌawin wiꞌj, per ax ateꞌ junjunky nkyepakbꞌan galan tiꞌj Krist tukyꞌi jun tkꞌuꞌjlal tumeꞌl galan. 16 Kye aj nkyepakbꞌan tukyꞌi jun tkꞌuꞌjlalni, kyetz nkyepakbꞌan tzan tpaj nqet kyganiꞌ te Qajaw Jesukrist, bꞌix kyebꞌen wetz akyinqex tzani tzan tpaj nqet nkoloꞌ te tpakbꞌalil galan tiꞌj Krist.b 17 Yatzun kye txqꞌanky nxik kypakbꞌaꞌ tiꞌj Krist nyaꞌtx tuj jun tumeꞌl tukyꞌi jun kykꞌuꞌj, kyetz cha kygan tzan tok wen mas xhchoꞌnal twitz te aj nꞌok wen tuj pres. 18 ¿Ntons tidiꞌ nqꞌumaꞌtz? Qa nkyepakbꞌan tukyꞌi jun kykꞌuꞌj bꞌanꞌax kyitzaꞌ qa nyaꞌtxji, axkix te Qajaw nxik kypakbꞌaꞌ, bꞌix wetz nkyinchalaj tiꞌj te nini, bꞌix mas okyinchalajel. 19 Wetz webꞌen, te aj nkyꞌik wiꞌjni owokel te jun galan te wetz tzan nkolpjik tzan tpaj nkxnaqꞌtzan wiꞌj bꞌix tzan tpaj nkyintoneꞌ te Txew Qajaw Jesukrist. 20 Wetz witꞌlik nkꞌuꞌj bꞌix sewur atin, nlay kyinqet kyꞌixwik tiꞌj chꞌinwt, sinoke tukyꞌi jun tkꞌuꞌjlal okyinyoliyon kywitz kyaqil xjal ajnaꞌl iktzaꞌx tbꞌay, tzan tok eꞌeꞌ wiꞌjx wetz te Qajaw Jesukrist at nim tajwalil, nkesey qa okyinkamel qa okyinꞌanqꞌiyonji. 21 Komo wetz qa itzꞌojin, itzꞌojin te Krist, bꞌix te nkamiky owokel mas tbꞌanil [tzan tpaj okyinpoyon tukyꞌi Krist].* 22 Per qa itzꞌojin, te aj nwaqꞌunaꞌ nꞌel te jun bꞌan galan. Astilji kwest tzan tel nnikyꞌ alkyetz ngan. 23 Ngan tzan npon tukyꞌi Krist, jaꞌ mas galan te wetz, 24 per mas presis tzan nkaj tzani te jun galan te etetz. 25 Astilji webꞌen wetz okyinkajel, bꞌix okyinꞌaqꞌunayon [te jun galan] te etetz tzan etok mas bꞌan jwert bꞌix tzan echalaj mas tiꞌj te aj jaꞌ witꞌlik ekꞌuꞌj. 26 Ikxji etetz okxchalajel nim tiꞌj Kristo Jesus tzan tpaj wetz atin junkyꞌel etukyꞌiꞌl.
A Tgan Tzan Qbꞌet Tuj Tumeꞌl Iktzaꞌ Te Jesukrist Tgan
27 Ntons, peꞌebꞌet waq tuj jun tumeꞌl iktzaꞌ nyolin te tpakbꞌalil galan tiꞌj Krist. Ikxji oj npon wetz exol tzi qa nlay kyinponji, owokel nchaꞌoꞌ jun tpakbꞌalil galan etiꞌj qa etetz jwert atix bꞌix junchꞌin nkxꞌaqꞌunan exolx tzan tpaj witꞌlik ekꞌuꞌj tiꞌj te tpakbꞌalil galan. 28 Kꞌon kxobꞌ kywitz kye aj nkyeqꞌojin etiꞌj [tzan tpaj kꞌontiꞌl nqet kyganiꞌ te tpakbꞌalil galan]; ikxji owelal kynikyꞌ okyepoyonaj, per yatzun etetz kolomix tzan te Qtata Dios. 29 Komo te Qtat oje qet tbꞌisuꞌ nyaꞌtx cha aꞌox tzan etokslan tuj etanim sinoke ax tzan tok eten twitz xhchoꞌnal tzan tpaj te Krist, 30 iktzaꞌx te xhchoꞌnal aj owok wen wetz oqtxiꞌ* bꞌix nꞌok wen ajnaꞌl.