Te Stzꞌibꞌen Paꞌk Kye Qerman Aj Amaqꞌ Kolosas
1
Jun Limbꞌil
1 Wetz aꞌin Paꞌk tkyꞌixel Kristo Jesus tzan tpaj ikxji tgan te Qtata Dios, bꞌix wetz tukyꞌi te qerman Timotey 2 nqet qtzꞌibꞌaꞌna te etetz waq erman aj amaqꞌ Kolosas, etetz aj pawamix te Qtata Dios bꞌix kꞌontiꞌl nkaj esiꞌ tzan tok witꞌlet ekꞌuꞌj tiꞌj Kristo Jesus. Tzaj tsiꞌxwit te Qtata Dios etajsik etetz jun nim bꞌan galan mas nim twitz te aj nqajoꞌ bꞌix tzajxwit tsiꞌ jun chewsbꞌil tuj etanim.
Te Paꞌk Nxik Tsiꞌ Pixon Te Qtata Dios Tzan Tpaj Titzaꞌ Witꞌlik Kykꞌuꞌj Kye Aj Kolosas
3 Qetza oj qxnaqꞌtzana nxikkix qsiꞌna pixon te Qtata Dios etiꞌj etetz, te Qtata Dios aj Stat te Qajaw Jesukrist. 4 Komo oje tzꞌok qchaꞌoꞌna titzaꞌ witꞌlik etetz ekꞌuꞌj tiꞌj te Kristo Jesus bꞌix titzaꞌ etetz nkyeqet eganiꞌ kyaqil kye aj pawameꞌ te Qtata Dios. 5 Etetz nꞌekꞌuluꞌ kyaqil nini tzan tpaj loꞌik ekꞌuꞌj tiꞌj te aj ekambꞌaꞌtz tuj kaꞌj, komo owel enikyꞌ tiꞌj toklen echaꞌoꞌ te tpakbꞌalil galan tiꞌj te bꞌanꞌax. 6 Te aj tpakbꞌalilni owok echaꞌoꞌ etetz, bꞌix ajnaꞌl oje tzꞌok chaꞌoꞌ jaꞌchq twitz txꞌoꞌtxꞌ; jaꞌchq nꞌok te jun galan bꞌix mas kyꞌilaꞌj kye xjal bꞌajqꞌij nkyeꞌokslan tiꞌj. Ikxji oje kyꞌik exol etetz taqꞌlen atx aj toklenqet echaꞌoꞌ bꞌix telen enikyꞌ te tumeꞌl titzaꞌ te Qtata Dios bꞌan galan nabꞌlin etukyꞌiꞌl. 7 Te ntzani mer iktzaꞌ oxik xnaqꞌtzaꞌ etetz tzan te qerman Paꞌxh* aj bꞌan ganiꞌ qitzaꞌ, aj nꞌaqꞌunan qukyꞌila, bꞌix aj kꞌontiꞌl nkaj tsiꞌ tzan taqꞌunan te Krist te jun galan te etetz. 8 Bꞌix tzan tpaj tetz, owok qchaꞌoꞌna te tpakbꞌalil etiꞌj, titzaꞌ nqet eganiꞌ [etibꞌ exolx] tukyꞌi jun ekꞌuꞌj tukyꞌi te Txew Dios.
Te Paꞌk Nxik Tqaniꞌ Tukyꞌi Qtata Dios Tzan Kyok Bꞌan Jwert Kye Aj Kolosas
9 Ntons, astilji qetza atx aj tok qchaꞌoꞌna kꞌontiꞌl nkaj qsiꞌna tzan qxnaqꞌtzan etiꞌj. Nxik jqaniꞌna te Qtata Dios tzan tel enikyꞌ bꞌan byenech tiꞌj kyaqil iktzaꞌ tetz tgan etukyꞌiꞌl bꞌix tzan stzaj tsiꞌ jun enabꞌl bꞌan tumeꞌl bꞌix tzan tqet ebꞌisuꞌ byenech tiꞌj te tumeꞌl. 10 Ikxji nxik jqaniꞌna tukyꞌiꞌl tzan ebꞌet tukyꞌi jun tumeꞌl galan tiꞌj kyaqil iktzaꞌx aj galan nꞌel tuj twitz te Qajawil, bꞌix ikxji kyaqil aj ekꞌulbꞌen nꞌel te jun galan bꞌix kyebꞌayleꞌ nꞌok etotzqilaꞌ bꞌan byenech te Qtata Dios. 11 Bꞌix [nxik jqaniꞌna] ikxji tzan etok bꞌan jwert tukyꞌiꞌl iktzaꞌx tetz at tbalor tzan tpaj mas nim tajwalil kywitz kyaqil. Bꞌix ikxji bꞌaꞌn tzan etipan tidiꞌchq bꞌix tzan sten epasens tukyꞌi jun chalajbꞌil.a 12 Bꞌix ax ikxji oxeꞌl esiꞌ pixon te Qtata Dios tukyꞌi jun chalajbꞌil tzan tpaj ax at etoklen tzan ekꞌamon te aj oxik tsiꞌ tyol tiꞌj kye kyaqil qetz aj pawamoꞌ te tetz, qkyaqil qetz aj nqobꞌet tuj chkꞌatunal.b 13 Te Qtata Dios ojatz tkolpiꞌ aꞌoꞌ tuj tqꞌabꞌ te aj [nkꞌulun mandad] tuj qlolj,c bꞌix oje qokaj tqꞌapoꞌ tuj tqꞌabꞌ te Tkꞌwaꞌal aj ganiꞌ nim titzaꞌ, 14 te Tkꞌwaꞌal aj owel xhchojoꞌ tuq te aj presis tzan tkolpin qetz bꞌix aj nqet tnajsaꞌ te qchoj.*
Tzan Tpaj Te Krist Atqet Kyaqil Aj Nxik Qeꞌeꞌ
15 [Te Tkꞌwaꞌal Dios] aj ebꞌajil, aji te Qtata Dios aj kꞌontiꞌl ebꞌajil, bꞌix a tetz te tbꞌayd twitz kyaqil tkꞌulbꞌen. 16 Komo aji tetz oqet kꞌulun kyaqil tidiꞌchq twitz kaꞌj bꞌix twitz txꞌoꞌtxꞌ, kyaqil aj ebꞌajil bꞌix aj kꞌontiꞌl ebꞌajil, kyaqil kye aj nkyekꞌulun mandad bꞌix kyaqil kye ajawilon qa at kybalor qa kyajwalilji; kyaqil aj at, aji kꞌulul tetz bꞌix oqet tkꞌuluꞌ te tetz. 17 Tetz atqetkix tuq aj minaꞌ tuq tbꞌantik kyaqil, bꞌix kyaqil aj at, tzan tpaj tetz tzunx akyeqet. 18 Bꞌix aji tetz te twitzaleꞌ qxol qetz aj nqoꞌokslan tiꞌj.e Tiꞌj tetz owaqꞌik kyaqil, aji tetz te aj ojaw anqꞌin tbꞌay kxol kye kamnaq tzan tkaj tetz tbꞌay twitz kyaqil. 19 Ikxji tumeꞌl tuq tzan tkaj te Krist kyaqil mer iktzaꞌx nabꞌlin te Stat 20 bꞌix ax tzan kykaj konform tukyꞌiꞌl kyaqil aj at, bꞌix tzan kykaj galan tukyꞌiꞌl kyaqil aj at tzan tpaj tkamlen aj tel xhchikyꞌel,f bꞌix ikxji kyiꞌj kyaqil aj at twitz txꞌoꞌtxꞌ bꞌix kyaqil aj at twitz kaꞌj. 21 Ax etetz, komo oqtxiꞌ laqꞌchik tuq atix [tiꞌj te Qtata Dios], bꞌix aꞌix tuq tajqꞌoj [Dios] tuj etanimg tzan tpaj te aj nyaꞌtx galan tuq nꞌekꞌuluꞌ, 22 per ajnaꞌl etukyꞌiꞌl etetz, [te Krist] otkꞌuluj tzan ekaj konform tukyꞌiꞌl tzan tpaj tetz bꞌanꞌax okamik te xhchiꞌjel tzan ekaj tpawaꞌ aꞌox te tetz bꞌix tzan tok saq etanim tuj twitz bꞌix tzan kꞌon tyolin nijunwt etiꞌj. 23 Ikxji owokel en qa etetz nkxkaj bꞌan jwert bꞌix kꞌontiꞌl nkaj ekolaꞌ titzaꞌ nꞌok witꞌlet ekꞌuꞌj, bꞌix qa kꞌontiꞌl nkaj ekolaꞌ titzaꞌ loꞌik ekꞌuꞌj tiꞌj te tpakbꞌalil, te tpakbꞌalil galan aj owok echaꞌoꞌ bꞌix nqꞌumjik tuq jaꞌchq twitz txꞌoꞌtxꞌ bꞌix nxik npakbꞌaꞌ wetz tiꞌj.
Te Paꞌk Nꞌaqꞌunan Tuq Nim Te Jun Galan Kye Aj Nyaꞌtx Tijajil Israel
24 Ntons wetz nkyinchalaj chaꞌoj tok wen twitz te xhchoꞌnal tuj nchiꞌjel te [jun galan] te etetz bꞌix ikxji nkyꞌik wiꞌj te aj atx tzan tkyꞌik qiꞌj qetz aj nqoꞌokslan tiꞌj Krist.h 25 Te Qtata Dios inkaj tsiꞌ tzan wok wetz jun xnaqꞌtzon kxol kye qerman, tzan tqet nkꞌuluꞌ aj okaj tqꞌumaꞌ wetz te jun galan te etetz tzan txik npakbꞌaꞌ galan te tyol Qtata Dios,* 26 aj tpakbꞌalil aj kꞌontiꞌl nꞌel kynikyꞌ kye xjal tiꞌj atx aj bꞌan oqtxiꞌ, per yatzun ajnaꞌl oje tzaj yekꞌuꞌ qetz aj pawamoꞌ te Qtata Dios. 27 Te Qtata Dios otzaj tyekꞌuꞌ te aj bꞌan tbꞌanil tiꞌj te aj minaꞌ tuq tel kynikyꞌ nijunwt, otzaj tyekꞌuꞌ [ajnaꞌl] atqex te Krist tuj etanim etetz aj nyaꞌtx aꞌix tijajil Israel, bꞌix tiꞌj tetz loꞌik ekꞌuꞌj tzan tok eten xhchqitzꞌunal tuj kaꞌj. 28 Qetza nxik qpakbꞌaꞌna tiꞌj te Krist, nkyexik jkawiꞌ kyaqil xjal, bꞌix nkyexik qxnaqꞌtzaꞌ kkyaqil tukyꞌi jun qnabꞌl bꞌan tumeꞌl, tzan jqꞌapon te kyetz [tukyꞌi Qtata Dios] jwert ateꞌ tukyꞌi Krist. 29 Tzan tpaj ntzani wetz nkyinjaw nkyinqet tukyꞌi nbalor aj ntzaj tsiꞌ te Krist.