2
1 Wetz ngan tzan tok echaꞌoꞌ titzaꞌ nkyinjaw nkyinqet te jun galan te etetz bꞌix kye aj Lawdisey* bꞌix kye aj minaꞌ tok kyeꞌeꞌ nwitz. 2 Komo wetz nkyinꞌaqꞌunan nim tzan txik nnimsaꞌ kykꞌuꞌj kyetz aj cha jun-oq ateꞌ tuj kyanim tzan tqet kyganiꞌ kyibꞌkyibꞌx kxolx, bꞌix tzan kꞌon tnaꞌnon kyanim bꞌix tzan tel kynikyꞌ tiꞌj te tumeꞌl aj kꞌontꞌl owel kynikyꞌ kye kjal oqtxiꞌ tiꞌj te Krist. 3 Aꞌox tukyꞌi Krist ntzaj jun qnabꞌl bꞌan tumeꞌl tiꞌj kyaqil aj ntzaj tsiꞌ te Qtata Dios. 4 Wetz nxik nqꞌumaꞌ ntzani te etetz, tzan kꞌon eqet eqꞌiꞌ tzan kye aj nkyekꞌubꞌsan ekꞌuꞌj tukyꞌi kyyol naqe cha bꞌan tbꞌanil per nyaꞌtx. 5 Anke wetz kꞌontiꞌl akyinqet nwitzaleꞌ exol etetz, per te wanim atqet bꞌix nkyinchalaj nꞌok nchaꞌoꞌ etiꞌj titzaꞌ etetz nkxbꞌet tuj tumeꞌl bꞌix kꞌontiꞌl nkaj ekolaꞌ tzan tok witꞌlet ekꞌuꞌj tiꞌj Krist.
Aꞌox Te Tumeꞌl Bꞌanꞌax Bꞌaꞌn Tzan Txik Qokslaꞌ Tiꞌj Jesukrist
6 Astilji, iktzaꞌx maꞌtx etokslaj tiꞌj te Qajaw Kristo Jesus, peꞌebꞌet waq tukyꞌiꞌl, 7 per bꞌan junchꞌin tukyꞌiꞌl bꞌix tzan etok bꞌan jwert tukyꞌiꞌl, bꞌix tzan etok en witꞌlikok ekꞌuꞌj tiꞌj iktzaꞌx okxik xnaqꞌtzaꞌ, bꞌix ax intxik esiꞌ pixon te Qtata Dios bꞌajqꞌij.
8 Intok waq esiꞌ enabꞌl, kꞌon kxqet moyiꞌa tukyꞌi jun xnaqꞌtzbꞌilj aj nyaꞌtx bꞌanꞌax qa tukyꞌi tidiꞌchq aj kꞌontiꞌl tokenji. Cha nqet kyeqꞌiꞌ xjal, iktzaꞌx tidiꞌchq aj kykostumbr qa iktzaꞌx [aj nkxnaqꞌtzaꞌ kyiꞌj] kye aj at kyajwalil tuj kyaqꞌiqꞌ, bꞌix nyaꞌtx iktzaꞌx tgan te Krist.* 9 Komo tiꞌj te Krist nxik qen tiꞌj kyaqil iktzaꞌxkix te Qtata Dios, bꞌix te Krist bꞌanꞌax at tuq xhchiꞌjel. 10 Bꞌix tukyꞌiꞌl tetz, etetz kabal aꞌix [bꞌaꞌn tzan ebꞌet tukyꞌi Qtata Dios], komo a tetz te twitzaleꞌ tiꞌj kkyaqil kye aj at kyajwalil bꞌix tiꞌj kkyaqil kye aj at kybalor.
11 Tzan tpaj tetz, etetz owok siꞌ jun etechalul, nyaꞌtx jun etechalul kꞌuluꞌ tiꞌj echiꞌjel tzan xjal, sinoke jun etechalul jqatzlen kolpiꞌ tuj tqꞌabꞌ te qchoj; te ntzani jun qechalul tzan tpaj te Krist. 12 Oj tjaw siꞌ aꞌ ewiꞌ, nini iktzaꞌ etetz okxqex muquꞌ tukyꞌiꞌl bꞌix ax iktzaꞌ okxjaw anqꞌin tukyꞌiꞌl tzan tpaj toklen witꞌlet ekꞌuꞌj tiꞌj tajwalil te Qtata Dios aj otkꞌuluj tzan tjaw anqꞌin te Krist kxol kye kamnaq.* 13 Etetz tbꞌayaꞌ kamnaq tuq aꞌix tzan tpaj te echoj bꞌix tzan tpaj minaꞌ tuq tel eqꞌiꞌ te nyaꞌtx galan [tuj etanim],b per etetz ajnaꞌl te Qtata Dios oje xik tsiꞌ etanqꞌin junx tukyꞌi Krist; tetz oqet tnajsaꞌ kyaqil te echoj.* 14 Te Qtata Dios owel teqꞌiꞌ kyaqil te qchoj aj tzꞌibꞌaꞌ qiꞌj* bꞌix opon tnajsaꞌ aj tkamik te Tkꞌwaꞌal twitz krus.c 15 Ikxji tetz ebꞌajqet titzaꞌ kyaqil kye aj at kyajwalil tuj kyaqꞌiqꞌ bꞌix kye aj at kybalor tuj kyaqꞌiqꞌ, bꞌix owel tin kkyꞌexaw kywitz kyaqil, bꞌix ebꞌajqet titzaꞌ te jun-eleꞌx tzan tpaj tkamlen twitz krus.
16 Astilji kꞌon kxbꞌisun qa at abꞌl ma qet yolin te etetz tzan tpaj kꞌontiꞌl nkxkꞌulun iktzaꞌ kyetz, qatzun tzan tpaj kꞌontiꞌl nkxwaꞌan aj nxik kywaꞌaꞌ kyetz, qatzun tzan tpaj aj nxik kyukꞌaꞌji, qatzun tzan tpaj kꞌontiꞌl nqet exjaniꞌ kye ninqꞌij aqꞌbꞌiaꞌ qa qyaꞌiꞌji qatzun tuj jun qꞌij ojlaꞌmj semaniꞌji.d 17 Kyaqil nini cha jun tidiꞌ aj telponxe tiꞌj te aj okyꞌel tuq mas yaj [aj oje qet bꞌisuꞌ tzan te Qtata Dios], per te bꞌan bꞌanꞌax tiꞌjkix te Krist.f 18 Kꞌon kxqet eqꞌiꞌ tzan xjal aj nkyeyolin nyaꞌtx galan etiꞌj qa etetz kꞌontiꞌl nxik etin iktzaꞌx kyetz cha kyganx tzan tok kyen twitz xhchoꞌnal,g bꞌix tzan kynaꞌon kye ángel tuj kaꞌj, kyetz cha nkyeꞌokslan te aj nꞌok jotoꞌ tuj kywitz, bꞌix nqet kyjiqꞌbꞌaꞌ kyibꞌ tukyꞌi te aj nꞌetz kyin tuj kywiꞌx. 19 Kyetz kꞌon kygan tzan kykaj konform tukyꞌi [Krist] te twitzaleꞌ aj nkꞌulun tzan qok jwert bꞌix tzan qten qkyaqil qetz junchꞌin tukyꞌiꞌl iktzaꞌ tgan te Qtata Dios qiꞌj qetz aj nqoꞌokslan tiꞌj.h 20 Etetz oje kxkamik junx tukyꞌi Krist, etetz nyaꞌtx tzunx atikxqet tuj kyqꞌabꞌ kye aj at kyajwalil tuj kyaqꞌiqꞌ. Ntons ¿tistil etetz tzunx nkxꞌanqꞌin iktzaꞌ atikxqet tuj kyqꞌabꞌ?* 21 [Komo nkxyolin ikxjani:] “¡Kꞌon tzꞌok emakoꞌ nini! ¡Kꞌon xik ewan nini! ¡Kꞌon jaw etzyuꞌ nini!” 22 Kyaqil aj tumeꞌl nini chagan tzan tpaj cha nyolin tiꞌj kyaqil tidiꞌchq aj nponaj bꞌix cha pur kyqꞌumbꞌen xjal, cha kxnaqꞌtzbꞌen xjal. 23 Kyaqil nini naqe cha tukyꞌi jun kynabꞌl bꞌan tumeꞌl nkyenaꞌon Dios, tzan tpaj nkyqꞌumaꞌ a tgan tzan tel qikꞌoꞌ qibꞌx, bꞌix tzan tok qswaꞌ jun xhchoꞌnal tiꞌj te qchiꞌjel; per kyaqil nini chagan, kꞌontiꞌl token tzan tpon tnajsaꞌ te aj nꞌel tganiꞌ te qchiꞌjel.