3
A Tgan Tzan Qbꞌisun Mas Tiꞌj Te Aj At Te Qetz Tuj Kaꞌj
1 Ntons tzan tpaj etetz oje kxjaw anqꞌin bꞌan bꞌanꞌax tzan tpaj te Krist, astilji intok esiꞌ ekꞌuꞌj tiꞌj kyaqil galan aj at tuj kaꞌj, aj jaꞌ atqet te Krist witꞌlik tkꞌatzaj Qtata Dios.* 2 Intqet ebꞌisuꞌ tiꞌj kyaqil aj at tuj kaꞌj bꞌix kꞌon kxbꞌisun cha aꞌox tiꞌj kyaqil aj at tzani twitz txꞌoꞌtxꞌ. 3 Komo etetz ajnaꞌl oje kxkamik tiꞌj te aj at tzani twitz txꞌoꞌtxꞌ, bꞌix etetz nkxꞌanqꞌin ajnaꞌl per tukyꞌi Krist tukyꞌi Qtata Dios. 4 Chaꞌoj tul tetz junkyꞌel, tetz aj ntzaj sin qanqꞌin,* ntons ax etetz okxꞌel en tukyꞌiꞌl oj tkꞌulun mandad tukyꞌi nim tajwalil.
Tzan Qbꞌet Tuj Tumeꞌl, A Tgan Tzan Tkaj Qsiꞌ Te Nyaꞌtx Galan
5 Ntons, astilji intpon enajsaꞌ kyaqil te nyaꞌtx galan aj tgan te echiꞌjel aj cha aꞌox te ja twitz txꞌoꞌtxꞌni: Kꞌon kxkꞌajajin bꞌix intkaj esiꞌ tidiꞌchq aj ntzꞌilan tuj etanim bꞌix kꞌon tzꞌel eqꞌajabꞌ tiꞌj tidiꞌchq nyaꞌtx galan aj tgan te echiꞌjel bꞌix kꞌon tzꞌel eganiꞌ te aj xjan bꞌix kꞌon tzꞌel eqꞌajabꞌ tiꞌj tidiꞌ te junky, komo kyaqil nini iktzaꞌ nqonaꞌon titzbꞌalil jun tidiꞌ bꞌix nyaꞌtx tiꞌj te Qtata Dios.* 6 Tzan tpaj kyaqil nini, te Qtata Dios ntzaj tqꞌoj [kyiꞌj kye aj kꞌontiꞌl nqet kyokslaꞌ].* 7 Ax etetz oqtxiꞌ nqet ekꞌuluꞌ tuq kyaqil aj ntzani 8 per ajnaꞌl intkaj esiꞌ kyaqil ntzani: Intkaj esiꞌ te etxꞌuꞌjil, bꞌix intkaj esiꞌ tzan ejaw qꞌojlik, bꞌix intkaj esiꞌ tzan tjaw enikꞌoꞌ kyiꞌj txqꞌanky, intkaj esiꞌ tzan eyolin nyaꞌtx galan tiꞌj Qtata Dios, intkaj esiꞌ kyaqil aj yol xhchꞌajyol qa mal yolji. 9 Kꞌon kxnikꞌon exolx, komo etetz oje kaj ekolaꞌ te nikꞌbꞌil, oje pon enajsaꞌ kyaqil aj nyaꞌtx galanni aj nꞌekꞌuluꞌ tuq tbꞌayaꞌ.*
Tzan Qbꞌet Tuj Tumeꞌl, A Tgan Tzan Jkꞌulun Te Galan Iktzaꞌx Xjal Aj Oje Jaw Qkyꞌexpuꞌ Qnabꞌlin
10 Komo etetz nkxbꞌet iktzaꞌ xjal aj oje kyꞌixpjik kynabꞌlin; ajnaꞌl aꞌix jun xjal akꞌaꞌj, nkxꞌok iktzaꞌ [nabꞌlin] te Qtata Dios aj kꞌulul etetz* tzan tok etotzqilaꞌ bꞌan byenech. 11 Ajnaꞌl kꞌontiꞌl nꞌok eꞌelet qa jun xjal tijajil Israel qatzun nyaꞌtxji, qa atok techalul qatzun kꞌontiꞌlji, qa laqꞌchik xjal aj nyaꞌtx galan qatzun aꞌeꞌ aj kꞌontiꞌl tuq Dios tuj kywitz,a qa jun mosiꞌ qatzun nyaꞌtxji, sinoke ajnaꞌl cha aꞌox nꞌok eꞌelet tiꞌj te Krist tzan tpaj aji tetz atqet kyukyꞌi kyaqil [kye aj nkyeꞌokslan tiꞌj]. 12 Ntons ajnaꞌl etetz, tzan tpaj joyomix aꞌix tzan te Qtata Dios, bꞌix pawamix cha aꞌox te tetz bꞌix ganimix [titzaꞌ], astilji intok loꞌet ekꞌuꞌj kyiꞌj kye txqꞌanky, bꞌix penabꞌlin waq galan kyukyꞌiꞌl, inkxik enaꞌoꞌ tbꞌay ewitz etetz, peꞌeyolin waq kyebꞌaꞌ kyukyꞌiꞌl, insten epasens, 13 kꞌon kaj esiꞌ tzan etonen kyukyꞌi kye txqꞌanky anke nꞌok jun nyaꞌtx galan etiꞌj [tzan tpaj nkxꞌonen kyukyꞌiꞌl],* bꞌix qa at jun nyaꞌtx galan ma tkꞌuluj junky etiꞌj intqet enajsaꞌ waq iktzaꞌx te Qajaw okxqet tnajsaꞌ, bꞌix ikxji etetz peꞌenajsan waq exolx.* 14 Per te aj bꞌan presis tzan tqet eganiꞌ etibꞌ, tzan tpaj ikxji nqoten bꞌan eqꞌiꞌ qibꞌ tzan qten galan qxol. 15 Bꞌix tzoqpij waq tzan sten tuj etanim te chewsbꞌil aj ntzaj tsiꞌ te Krist, komo okxik ukꞌleꞌ tzan Qtata Dios tzan eten bꞌan junchꞌin ekyaqil. Bꞌix intxik esiꞌ pixon te Qtata Dios exolx. 16 Instenxwit nim tuj etanim te tyolbꞌen Krist tzan txik tsiꞌ jun enabꞌl bꞌan tumeꞌl titzaꞌ tzan kxik exnaqꞌtzaꞌ bꞌix tzan kxik ekawiꞌ etibꞌx exolx. Intqet ekꞌuluꞌ waq te nini tukyꞌi bꞌitz aj Tuꞌjal Dios bꞌix tukyꞌi bꞌitz aj nabꞌil te Qtata Dios bꞌix tukyꞌi tidiꞌchq bꞌitz te tetz, intxik ebꞌitzaꞌ te tetz bꞌix intxik esiꞌ pixon tetz tukyꞌi jun tkꞌuꞌjlal tuj etanim.* 17 Bꞌix kyaqil aj oxeꞌl eqꞌumaꞌ bꞌix aj oqtel ekꞌuluꞌ, intqet ekꞌuluꞌ waq tukyꞌi tbꞌi te Qajaw Jesus iktzaꞌ tkyꞌixel aꞌix, bꞌix tzan tpaj tetz intxik esiꞌ pixon te Qtata Dios.
18 Ntons etetz aj xujelbꞌaj aꞌix, etetz inkyqet etokslaꞌ kye etichmil tzan tpaj ikxji te tumeꞌl tuj twitz Qajawil.*
19 Yatzun etetz waq aj ichmilbꞌaj aꞌix, etetz inkyqet eganiꞌ waq kye exuꞌjel bꞌix intok loꞌet ekꞌuꞌj kyiꞌj.*
20 Yatzun etetz aj kꞌwaꞌalbꞌaj aꞌix, etetz inkyqet etokslaꞌ kye etat tiꞌj kyaqil tzan tpaj te ntzani nꞌel galan tuj twitz te Qajawil.*
21 Yatzun etetz aj kꞌwaꞌalon aꞌix, etetz kꞌon tzaj emeqꞌtzaꞌ kywiꞌ kye ekꞌwaꞌal tzan kꞌon tqexten jun bꞌis tuj kyanim.*
22 Yatzun etetz aj mosiꞌ aꞌix, etetz inkyqet etokslaꞌ tiꞌj kyaqil aj otzajel kyqꞌumaꞌ kye epatron tzani twitz txꞌoꞌtxꞌ, nyaꞌtx aꞌox chaꞌoj kykaꞌyin etiꞌj tzan ekaj galan tuj kywitz sinoke intqet ekꞌuluꞌ galan tukyꞌi jun tkꞌuꞌjlal tukyꞌi txobꞌlal tiꞌj te Qajawil.* 23 Bꞌix kyaqil aj oqtel ekꞌuluꞌ intqet ekꞌuluꞌ waq tukyꞌi jun tkꞌuꞌjlal iktzaꞌ nkxꞌaqꞌunan te Qajawil bꞌix nyaꞌtx cha aꞌox kye xjal.* 24 Instzaj enaꞌoꞌ etetzaꞌtz jun galan tuj tqꞌabꞌ te Qajawil* tzan tpaj nqet etokslaꞌ te tetz, komo a te Qajaw Krist te etajawil. 25 Bꞌix te aj cha tkꞌulunqet pur nyaꞌtx galan, otkꞌamoꞌtz jun chojbꞌil iktzaꞌx ntkꞌuluꞌ, komo tuj twitz te Qtata Dios kꞌontiꞌl jun mas tbꞌanil twitz junky.*