4
1 Yatzun etetz aj patron aꞌix, etetz intqet ekꞌuluꞌ tumeꞌl galan kyukyꞌi kye emos; instzaj enaꞌoꞌ ax etetz at jun etajawil aj atjax tuj kaꞌj.*
Kꞌontiꞌl Tzan Tkaj Qsiꞌ Tzan Qxnaqꞌtzan
2 Ntons kꞌon kaj esiꞌ tzan exnaqꞌtzan tukyꞌi Qtata Dios bꞌix intok esiꞌ enabꞌl intxik esiꞌ pixon tetz. 3 Ax peꞌexnaqꞌtzan qiꞌja tzan stzaj tyekꞌuꞌ te Qajawil jun tumeꞌl titzaꞌ tzan txik qpakbꞌaꞌ te tpakbꞌalil tiꞌj te aj kꞌontiꞌl owel nikyꞌj tiꞌj te Krist. Tzan tpaj te aj tpakbꞌalilni, wetz akyinqex pres.a 4 Peꞌexnaqꞌtzan waq tzan txik npakbꞌaꞌ tumelil te tpakbꞌalil iktzaꞌx bꞌan presis tzan txik nqꞌumaꞌ.
A Tgan Tzan Qbꞌet Tuj Tumeꞌl Kxol Kye Aj Kꞌontiꞌl Nkyeꞌokslan
5 Intqet ebꞌisuꞌ tukyꞌi jun enabꞌl bꞌan tumeꞌl titzaꞌ nkxbꞌet kxol kye aj kꞌontiꞌl nkyeꞌokslan bꞌix tzan token te etyemp galan kxol.* 6 Bꞌix peꞌeyolin waq tukyꞌi jun eyol bꞌan tumeꞌl bꞌix bꞌan galanb bꞌix tzan taj etzaqꞌbꞌeꞌ tukyꞌi jun tumeꞌl bꞌan galan.
Jun Kawbꞌil
7 Ntons te qerman Tíkiko* oxeꞌl tqꞌumaꞌ kyaqil aj nkyꞌik wiꞌj tzani. Tetz jun qerman aj ganiꞌ nim qitzaꞌ bꞌix kꞌontiꞌl nkaj tsiꞌ tzan taqꞌunan te Qajawil bꞌix tetz jun wukyꞌiꞌl aj nꞌaqꞌunan te Qajawil. 8 Astilji wetz nxik nlajoꞌ etukyꞌiꞌl tzan tok etotzqilaꞌ etetz kyaqil titzaꞌ nꞌok qukyꞌila* bꞌix tzan txik tnimsaꞌ ekꞌuꞌj. 9 Bꞌix ax ajun tukyꞌiꞌl, te qerman Onésimo* aj ganiꞌ nim qitzaꞌ bꞌix aj kꞌontiꞌl nkaj tsiꞌ [tzan taqꞌunan te Qajawil]. Tetz jun exjalil. Ntons, kyetz oxeꞌl kyqꞌumaꞌ etetz tidiꞌ nkyꞌik tzani.
10 Jun limbꞌil te etetz tzan te qerman Aristark* aj atqex wukyꞌiꞌl tuj pres,c bꞌix ax tzan te Mak* aj tprim Bꞌeꞌch. (Etetz ya etebꞌenky tiꞌj te Mak, qa tetz oxeꞌl qꞌolbꞌel etetz, peꞌekꞌamon chꞌin tetz tuj jun tumeꞌl galan.) 11 Ax jun limbꞌil te etetz tzan te Jesus aj nꞌok qꞌumaꞌ Justo. Aꞌox-eꞌ kyetz kye aj tijajil Israeld aj nkyeꞌonen wukyꞌiꞌl tzan qonen kxol kye aj nkyeꞌokslan Qtata Dios, bꞌix nkyenimsan nkꞌuꞌj. 12 Ax jun limbꞌil te etetz tzan te Paꞌxh,* tetz jun exjalil, bꞌix qꞌapoꞌ tibꞌ nꞌaqꞌunan te Kristo Jesus. Tetz bꞌan nxnaqꞌtzan etiꞌj etetz tzan eten etetz bꞌan jwert bꞌix tzan eten iktzaꞌ te Qtata Dios tgan bꞌix tzan tel enikyꞌ bꞌan byenech tidiꞌ tgan te Qtata Dios. 13 Wetz oje tzꞌok wen, tetz bꞌan nbꞌisun etiꞌj etetz bꞌix kyiꞌj kye aj Lawdisey bꞌix kyiꞌj kye aj Erápolis. 14 Bꞌix ax jun limbꞌil te etetz tzan te qerman Luks, aj qꞌanon aj ganiꞌ nim qitzaꞌ, bꞌix ax jun limbꞌil tzan te Démas.* 15 Intxik esiꞌ chꞌin jun limbꞌil kye qerman aj ateꞌ tuj Lawdisey bꞌix te qerman Nínfas bꞌix kye qerman aj nꞌok kchimoꞌ kyibꞌ tuj tjay. 16 Oj tjaw eꞌelet exol etetz ja uꞌjni, yaji intxik esamaꞌ kyukyꞌi kye qerman tuj Lawdisey* tzan tjaw eꞌeꞌ kxol, bꞌix ax tzan tjaw eteꞌeꞌ etetz te uꞌj aj okykꞌamoj kyetz. 17 Intxik eqꞌumaꞌ te Arkip* ikxjani: “Intok asiꞌ anabꞌl tzan tqet akꞌuluꞌ te awopis aj oje kaj tsiꞌ te Qajaw yatz.” 18 Wetz aꞌin Paꞌk aj nqet ntzꞌibꞌaꞌ ja limbꞌil te etetz tukyꞌi nqꞌabꞌx. Kyintzaj enaꞌoꞌ chꞌin, wetz akyinqex tuj pres. Tzaj tsiꞌxwit te Qtata Dios jun nim bꞌan galan etajsik etetz.