Te Tbꞌay Uꞌj Stzꞌibꞌen Paꞌk Kye Qerman Aj Amaqꞌ Tesalonk
1
Jun Limbꞌil
1 Wetz aꞌin Paꞌk bꞌix ajuneꞌ wukyꞌiꞌl te Silbáno bꞌix Timotey. Qetza nqet qtzꞌibꞌaꞌna ja uꞌjni te etetz erman aj Tesalonk,* etetz aj aꞌix te Qtata Dios bꞌix te Qajaw Jesukrist. Instzaj tsiꞌxwit etajsik etetz jun nim bꞌan galan bꞌix qet xhchewsaꞌxwit ekꞌuꞌj.
Jun Pixon Te Qtata Dios Kyiꞌj Kye Qerman Aj Tesalonk
2 Qetza kꞌontiꞌlkix nkaj qsiꞌna tzan txik qsiꞌ pixon te Qtata Dios etiꞌj etetz bꞌix nkxtzajkix qnaꞌoꞌna oj qxnaqꞌtzan tukyꞌiꞌl. 3 Kobꞌchaq ntzaj qnaꞌoꞌna twitz tetz titzaꞌ etetz ekꞌulbꞌen tzan tpaj witꞌlik ekꞌuꞌj tiꞌj, bꞌix titzaꞌ etetz etaqꞌumbꞌen tzan tpaj nqet eganiꞌ [te Qtat bꞌix kye qerman], ax titzaꞌ etetz kꞌontiꞌl nkaj ekolaꞌ tzan tkaj loꞌet ekꞌuꞌj tiꞌj te Qajaw Jesukrist. 4 Ntzaj qnaꞌoꞌna ikxji waq erman tzan tpaj qetza qebꞌenkyna etetz joyomix tzan te Qtata Dios bꞌix ganimix titzaꞌ. 5 Komo te tpakbꞌalil galan kꞌontiꞌl oxik qpakbꞌaꞌna exol cha aꞌox tukyꞌi qyolna, sinoke tukyꞌi nim tajwalil Txew Dios, bꞌix qetza tukyꞌi jun tkꞌuꞌjlal oxik qpakbꞌaꞌna. Komo etetz etebꞌen titzaꞌ qetza obꞌetna exol te jun galan te etetz. 6 Bꞌix yatzun etetz, ax owel etin aj tumeꞌl iktzaꞌ nqobꞌet qetza bꞌix iktzaꞌ nabꞌlin te Qajawil. Bꞌix etetz ekꞌamoj te tpakbꞌalil tukyꞌi jun chalajbꞌil aj ntzaj tsiꞌ tuq te Txew Qtata Dios tuj etanim, anke owok eten nim xhchoꞌnal [tzan tpaj etokslbꞌen].* 7 Bꞌix etiꞌj etetz owel kyin kye aj nkyeꞌokslan tuj tkwentil Masedony bꞌix te Akay tzan tpaj toklen kchaꞌoꞌ etiꞌj etetz titzaꞌ tuq nkxbꞌet. 8 Komo tzan epaj etetz oje tzꞌok chaꞌoꞌ te tpakbꞌalil tiꞌj te Qajawil nyaꞌtx aꞌox tuj Masedony bꞌix Akay sinoke tuj kyaqil luwar oje tzꞌok chaꞌoꞌ titzaꞌ etetz witꞌlik ekꞌuꞌj, bꞌix astilji ya nyaꞌtx presis tzan txik jqꞌumaꞌna qetza titzaꞌ nkxbꞌet tuj tumeꞌl. 9 Kyaqil nkyeyolin galan titzaꞌ etetz oqet ekꞌamoꞌna galan exol, bꞌix titzaꞌ okaj ekolaꞌ tzan enaꞌon kye kyitzbꞌalil tidiꞌchq bꞌix tzan tqet etokslaꞌ ajnaꞌl te Qtata Dios aj bꞌanꞌax Dios bꞌix aj at jun tanqꞌin, 10 bꞌix nkxꞌiyon tiꞌj Tkꞌwaꞌal aj tzajnaq tuj kaꞌj, te Tkꞌwaꞌal aj ojaw anqꞌin kxol kye kamnaq, te Jesus aj oje qoqet tkoloꞌ tiꞌj te xhchoꞌnal aj otzajel siꞌ mas yaj.*