Te Tkabꞌiꞌ Uꞌj Stzꞌibꞌen Paꞌk Kye Qerman Aj Amaqꞌ Tesalonk
1
Jun Limbꞌil
1 Wetz aꞌin Paꞌk bꞌix ajuneꞌ wukyꞌiꞌl te Silbáno bꞌix te Timotey. Qetza nqet qtzꞌibꞌaꞌna ja uꞌjni te etetz erman aj amaqꞌ Tesalonk,* etetz aj aꞌix te Qtata Dios bꞌix te Qajaw Jesukrist. 2 Qtata Dios bꞌix te Qajaw Jesukrist tzaj ksiꞌxwit etajsik etetz jun nim bꞌan galan bꞌix qetxwit kchewsaꞌ ekꞌuꞌj.
Jun Pixon Te Dios Kyiꞌj Kye Qerman Aj Tesalonk
3 Erman, tumeꞌlkixiꞌ qetza nxik qsiꞌna pixon te Qtata Dios etiꞌj etetz bꞌajqꞌij. Komo etetz bꞌajqꞌij mas nꞌok witꞌlet ekꞌuꞌj tiꞌj te Qajawil bꞌix mas nqet eganiꞌ etibꞌ exolx bꞌix kyukyꞌi txqꞌanky xjal. 4 Qetza bꞌan nqochalajna etiꞌj chaꞌoj qyolin etiꞌj etetz kxol kye txqꞌanky bꞌuchꞌuj qerman. Komo etetz bꞌan nim epasens bꞌix bꞌan witꞌlik ekꞌuꞌj byenech anke nꞌok eten twitz xhchoꞌnal bꞌix bꞌis, per ipaꞌ etitzaꞌ.
Te Qtata Dios Oxeꞌl Tsiꞌ Te Junjun Iktzaꞌx Maꞌtx Kykꞌuluj
5 [Erman waq,] tzan tpaj etetz nkxꞌipan tukyꞌi nim epasens te xhchoꞌnal aj nkyꞌik etiꞌjni, ikxji telponx te Qtata Dios at tkawbꞌil tuj tqꞌabꞌ tzan txik tsiꞌ jun etanqꞌin tuj kaꞌj tzan tpaj nꞌetajoꞌ, komo astilji nkxꞌipan bꞌan bꞌanꞌax jun nim xhchoꞌnal. 6 Per yatzun kye aj nꞌok sin xhchoꞌnal etiꞌj, tumeꞌl tzan txik tsiꞌ te Qtata Dios xhchoꞌnal kyiꞌj. 7 Bꞌix yatzun etetz aj nꞌok eten twitz xhchoꞌnal, te Qtata Dios okxtel tkoloꞌ, otkꞌuluꞌtz tzan etojlan junx qukyꞌila chaꞌoj tul te Qajaw Jesukrist. Tetz otzajel tuj kaꞌj junx kyukyꞌi kye ángel aj nim kyajwalil, 8 tzul tukyꞌi toq qꞌaqꞌ tzan txik tsiꞌ jun xhchoꞌnal kyiꞌj kye aj kꞌontiꞌl kyotzqiꞌ Qtata Dios, aꞌeꞌ aj kꞌontiꞌl nqet kyokslaꞌ te tpakbꞌalil galan tiꞌj Qajaw Jesukrist. 9 Kye aj xjalji owokel kyen jun xhchoꞌnal aj nlay tzꞌel kyiꞌj,a okyeꞌelax in bꞌeyx te jun-eleꞌx twitz Qajaw Jesukrist bꞌix nlay tzꞌok kyen te aj bꞌan tbꞌanil oj tkaj kyaqil tuj tqꞌabꞌ tukyꞌi jun tajwalil. 10 Ikxji okyꞌel tuj aj qꞌij chaꞌoj tul tetz tzan tqet jiqꞌbꞌaꞌ tzan kye aj pawameꞌ titzaꞌ, bꞌix tzan kchalaj tiꞌj tetz kye aj nkyeꞌokslan tetz. Bꞌix etetz, ax owokel eten tuj aj qꞌijji tzan tpaj oxik etokslaꞌ te tpakbꞌalil aj oxik qpakbꞌaꞌna exol.
Titzaꞌ Nxnaqꞌtzan Tuq Te Paꞌk Kyiꞌj Kye Aj Tesalonk
11 Tzan tpaj nini qetza kꞌontiꞌl nkaj qsiꞌna tzan qxnaqꞌtzan etiꞌj. Nqoxnaqꞌtzana tzan etel galan tuj twitz Qtata Dios bꞌix nyaꞌtx chagan okxtzaj tukꞌleꞌ, bꞌix nqoxnaqꞌtzana tzan tbꞌantik tukyꞌi jun tajwalil kyaqil aj egan kꞌulun te tetz bꞌix kyaqil aj nkxkꞌulun tzan tpaj toklen witꞌlet ekꞌuꞌj tiꞌj. 12 Ikxji tzan tqet jiqꞌbꞌaꞌ te Qajaw Jesukrist etiꞌj etetz, bꞌix ax tzan eqet jiqꞌbꞌaꞌ etetz tiꞌj tetz, tzan tpaj kyaqil aj nim bꞌan galan aj kꞌontiꞌl nꞌetajoꞌ aj ntzaj siꞌ etajsik tzan te Qtata Dios bꞌix te Qajaw Jesukrist.