5
1 Nyaꞌtx presis tzan tqet qtzꞌibꞌaꞌna te etetz waq erman tujbꞌaꞌn kyꞌik kyaqil nini bꞌix alkyetz tyemp okyꞌel. 2 Etetz etebꞌen oj tul te Qajawil, owulel tuj jun tyemp [aj kꞌontiꞌl qebꞌen] iktzaꞌ [oj tul] jun eleqꞌ qonikꞌan.* 3 Oj kyqꞌuman kye xjal, “Ajnaꞌl kꞌontiꞌl qꞌoj, galan atoꞌ,” per tanderepent tzul kyajsik jun xhchoꞌnal aj opoyon tnajsaꞌ kyaqil, tanderepent iktzaꞌ oj stzaj xhchoꞌnal alaꞌmj tiꞌj jun xuj aj chꞌinky tkyꞌix, ax ikxji tuj aj tyempji, nijunwt te kyetz okyekoletel.*
4 Per etetz waq erman, etetz kꞌontiꞌl tzunx atikxqex tuj qlolj [iktzaꞌ kye aj kꞌontiꞌl nkyeꞌokslan], etetz nlay kxjaw sakꞌpuꞌ oj tul te Qajawil iktzaꞌ [oj tul] jun eleqꞌ. 5 Komo ekyaqil etetz nkxbꞌet tuj tumeꞌl iktzaꞌ xjal aj nkyebꞌet tuj xhkꞌatun bꞌix chijqꞌij nkyebꞌet. Qetz nyaꞌtx aꞌoꞌ kxol kye aj akyeqex tuj qlolj. 6 Astilji kꞌon qobꞌajwitan waq iktzaꞌ kye txqꞌanky sinoke intetz qen chꞌin qwitz bꞌix intok qsiꞌ qnabꞌl tzan qbꞌet tukyꞌi jun tkꞌuꞌjlal tukyꞌi Qtata Dios bꞌix tzan kꞌon choꞌon qwiꞌ. 7 Komo kye aj nkyewitan, tuj qlolj nkyewitan, bꞌix kye aj nkyebolin, tuj qlolja nkyebolin. 8 Per qetz aj nqobꞌet tuj xhkꞌatun,b a tgan tzan qtenkix bwenisan. A tgan tzan tok qwitꞌbꞌaꞌ jkꞌuꞌj tiꞌj Qajawil bꞌix tzan kyqet qganiꞌ kye txqꞌanky bꞌix tzan tok qen titzaꞌ te Qtata Dios nqoqet tganiꞌ. Kyaqil nini nqotkoloꞌ iktzaꞌ tkolbꞌil te jun soldad aj atok twitz tpech. Ax a tgan tzan tkaj loꞌet jkꞌuꞌj tukyꞌi jun tkꞌuꞌjlal te Qajawil oqotkoloꞌtz; nini nꞌoken qiꞌj iktzaꞌ jun tkolbꞌil te jun soldad aj nkolon twiꞌ.* 9 Komo te Qtata Dios kꞌontiꞌl okaj tsiꞌ aꞌoꞌ tzan qxik tsiꞌ tuj il sinoke tzan jkolet tzan te Qajaw Jesukrist. 10 Te Qajaw Jesukrist okamik tzan qanqꞌin tukyꞌiꞌl te jun-eleꞌx, itzꞌojoꞌ qatzun kamnaqoꞌji [chaꞌoj tul], per qoꞌanqꞌiyonkix junx tukyꞌiꞌl. 11 Astilji peꞌenimsan waq ekꞌuꞌj bꞌix intjaw etin ekꞌuꞌj exolx, iktzaꞌx nꞌekꞌuluꞌ ajnaꞌl.
Tidiꞌchq Konsej Kye Qerman
12 Qetza waq erman, nqet qwitza ewitz tzan kyqet eten galan kye aj nkyeꞌaqꞌunan exol, aꞌeꞌ aj nkyekꞌulun mandad tukyꞌi tbꞌi Qajawil bꞌix nkxik kykawiꞌ. 13 A tgan tzan kyqet eten bꞌix tzan kyqet eganiꞌ tzan tpaj kyaqꞌun exol. Bꞌix peꞌeten waq galan exolx etetz. 14 Ax qgana tzan txik jqꞌumaꞌna etetz waq erman tzan kxik ekawiꞌ kye aj kyꞌaj, ax tzan txik enimsaꞌ kykꞌuꞌj kye aj nkyebꞌisun, ax tzan etonen kyukyꞌi kye aj nyaꞌtx jwert ateꞌ, bꞌix ax insten epasens exolx ekyaqil. 15 Intok esiꞌ waq enabꞌl qa at abꞌl aj ma kꞌulun jun nyaꞌtx galan etiꞌj, kꞌon ekꞌuluj etetz tukyꞌiꞌl ikxji, sinoke intok esiꞌ ekꞌuꞌj tzan ekꞌulun galan exolx etetz bꞌix kxol kyaqil xjal. 16 Peꞌechalaj waq bꞌajqꞌij,* 17 kꞌon kaj esiꞌ tzan exnaqꞌtzan,* 18 intxik esiꞌ pixon te Qtata Dios tiꞌj kyaqil, komo ikxji tgan tzan tpaj atix tukyꞌi Kristo Jesus. 19 Kꞌon tzꞌel etin gan tiꞌj te aj nkꞌulun te Txew Dios, 20 kꞌon tzꞌel etikꞌoꞌ kyyol kye aj nkyepakbꞌan jun tpakbꞌalil aj Txew Dios swal tetz. 21 Intqet ebꞌisuꞌ tiꞌj kyaqil qa galan bꞌix aꞌox intkaj etin aj galan 22 bꞌix intel epawaꞌ etibꞌ tiꞌj kyaqil aj nyaꞌtx galan.
Jun Kawbꞌil
23 Qtata Dios aj nchewsan jkꞌuꞌj, kꞌulunxwit tzan etel tpawaꞌ tiꞌj kyaqil te nyaꞌtx galan; bꞌix kꞌulunxwit ikxji tzan sten saq etanim,c chꞌinwt nyaꞌtx galan etiꞌj ni tiꞌj echiꞌjel, max chaꞌoj tul te Qajaw Jesukrist. 24 A tetz otzaj ukꞌlen te etetz [tzan eten ikxji], bꞌix [komo] tetz jun yolin [astilji] okꞌuluyonkix ikxji.
26 Peꞌeliman etetz etibꞌx exolx tzi tukyꞌi jun limbꞌil bꞌan tumeꞌld tzan tpaj jun te Qtata Dios.
27 Ntons, wetz ngan tzan txik nqꞌumaꞌ etetz tukyꞌi tajwalil te Qajawil tzan tjaw eten ja uꞌjni kywitz kyaqil qerman aj pawameꞌ te Qtata Dios.
28 Qajaw Jesukrist tzaj sinxwit etajsik etetz jun nim bꞌan galan.