4
Te Tumeꞌl Titzaꞌ Tzan Qbꞌet Iktzaꞌ Tgan Te Qtata Dios
1 Ntons waq erman, qetza qgan tzan txik jqꞌumaꞌna etetz bꞌix nqet qwitza ewitz tukyꞌi tbꞌi Qajaw Jesus tzan ebꞌet tuj tumeꞌl iktzaꞌx oxik qxnaqꞌtzaꞌna etetz bꞌix tzan xhchalaj te Qtata Dios etiꞌj; iktzaꞌx nꞌekꞌuluꞌ ajnaꞌl, peꞌejoyon tumeꞌl titzaꞌ tzan ekꞌulun mas bꞌan galan. 2 Komo etetz etebꞌenky te tumeꞌl aj okaj jqꞌumaꞌna etetz aj otzaj tsiꞌ te Qajaw Jesus. 3 Komo te Qtata Dios tgan tzan sten saq qanim, astilji tgan tzan tel epawaꞌ etibꞌ tiꞌj te kꞌajajbꞌilj, 4 ax tzan tel enikyꞌ ekyaqil etetz titzaꞌ tzan tqet ejoyoꞌ jun exuꞌjel tuj jun tumeꞌl bꞌan galan tuj twitz Qtata Dios bꞌix tzan tqet eteꞌeꞌ galan,a 5 bꞌix nyaꞌtx cha tzan etzeqtikqet kyiꞌj xuj iktzaꞌ kye aj nyaꞌtx tijajil Israel aj kꞌontiꞌl nkyeꞌokslan Qtata Dios. 6 Tiꞌj kyaqil nini kꞌontiꞌl tzan tpaltin nijunwt tiꞌj junky, bꞌix kꞌon qet eteqꞌiꞌ jun qerman. Komo te Qajawil otkꞌuluꞌtz tzan tel xhchojoꞌ te xjal aj nkꞌulun ikxji, iktzaꞌx oje xik jqꞌumaꞌna etetz tukyꞌi jun tkꞌuꞌjlal atx jun-el. 7 Te Qtata Dios kꞌontiꞌl otzaj tukꞌleꞌ aꞌoꞌ tzan qanqꞌin tuj jun nyaꞌtx galan sinoke tzan tel qpawaꞌ qibꞌ tiꞌj te nyaꞌtx galan. 8 Astilji abꞌl aj owelal tikꞌoꞌ ja xnaqꞌtzbꞌiljni, nyaꞌtx tyol xjal te aj owelal tikꞌoꞌ sinoke a te Qtata Dios owelal tikꞌoꞌ, te Qtata Dios aj oje xik tsiꞌ etetz te Txewx.
9 Yatzun te tumeꞌl titzaꞌ tzan tqet eganiꞌ etibꞌ kxol etermanx, nyaꞌtx presis tzan tqet ntzꞌibꞌaꞌ te etetz tzan tpaj axk te Qtata Dios oje kxik txnaqꞌtzaꞌ titzaꞌ tzan tqet eganiꞌ etibꞌ. 10 Ikxji nqet ekꞌuluꞌ kyukyꞌi kyaqil kye qerman aj akyeqet tuj tkwentil Masedony. Per nxik qnimsaꞌna ekꞌuꞌj waq erman tzan kꞌon tkaj esiꞌ sinoke tzan ejoyon tumeꞌl titzaꞌ tzan ekꞌulun mas bꞌan galan. 11 Ax intok esiꞌ waq ekꞌuꞌj tzan eten galanx exolx, bꞌix intok esiꞌ ekꞌuꞌj tiꞌj etaqꞌunx, bꞌix aꞌixk etetz peꞌetaqꞌunan tzan ewaꞌan tiꞌj etaqꞌumbꞌenx iktzaꞌx oje xik jqꞌumaꞌna; 12 ikxji tzan eqet jiqꞌbꞌaꞌ etetz tzan kye aj kꞌontiꞌl nkyeꞌokslan bꞌix tzan kꞌon tpaltin tidiꞌ etetz.
Ikxjani Titzaꞌ Owulel Te Qajaw Jesukrist Junkyꞌel
13 Etetz waq erman, qetza qgana tzan tel enikyꞌ kyiꞌj kye aj oje kyekamik,b tzan kꞌon ebꞌisun iktzaꞌ kye aj kꞌontiꞌl jaꞌ bꞌaꞌn tzan tkaj loꞌet kykꞌuꞌj. 14 Komo qetz nqokslaꞌ te Qajaw Jesukrist okamik bꞌix ojaw anqꞌin junkyꞌel, ax ikxji nqokslaꞌ te Qtata Dios otkꞌuluꞌtz tzan kyjaw anqꞌin junx tukyꞌi Jesukrist kye kamnaq aj nkyeꞌokslan tuq tiꞌj.c 15 Astilji qetza oxeꞌl jqꞌumaꞌna etetz iktzaꞌx txnaqꞌtzbꞌen te Qajawil: Qkyaqil qetz aj itzꞌojoꞌx, chaꞌoj tul tetz junkyꞌel, nlay qoxik tuj kaꞌj tbꞌay kywitz kye aj oje kyekamik.d 16 Komo te Qajawil axk tetz oqtetz tuj kaꞌj, tukyꞌi twiꞌ jun kꞌulul mandad, bꞌix oxeꞌl chaꞌlet twiꞌ te ángel aj twitzaleꞌ kxol kyaqil ángel, bꞌix tukyꞌi twiꞌ jun trompet aj te Qtata Dios, ikxji tetz oqtetz tuj kaꞌj, bꞌix yaji kye kamnaq aj eꞌokslan tiꞌj te Krist okyejawel anqꞌin tbꞌayaꞌ. 17 Yaji qetz aj tzunx itzꞌojoꞌ, qetz aj aqoqet tzani twitz txꞌoꞌtxꞌ, oqojawel jotlik junx kyukyꞌiꞌl tuj muj tzan qxik kanol te Qajawil tuj kyaqꞌiqꞌ, ikxji oqotelten tukyꞌiꞌl bꞌeyx te jun-eleꞌx.* 18 Ntons peꞌenimsan waq ekꞌuꞌj exolx tukyꞌi ja tpakbꞌalil aj maꞌtx xik nqꞌumaꞌni.