3
1 Ntons [waq erman], tzan tpaj kꞌontiꞌl ma qipajna mas [tzan qten laqꞌchik etiꞌj], ntons ma qet qbꞌisuꞌna tzan jkaj qchukelna ax tuj Aténas,* 2 bꞌix oxik qlajoꞌna te Timotey aj qerman aj nꞌonen qukyꞌiꞌl tzan txik qpakbꞌaꞌna te tpakbꞌalil galan tiꞌj Krist. Oxik qlajoꞌna tzan txik tnimsaꞌ ekꞌuꞌj tzan etok mas jwert bꞌix tzan exik tkawiꞌ tzan eten jwert tiꞌj jaꞌ witꞌlik ekꞌuꞌj, 3 tzan kꞌon ebꞌisun tzan tpaj aj xhchoꞌnal nꞌok eten ajnaꞌlni. Komo etetz etebꞌen qetxkkix tzan tkyꞌik qiꞌj ikxji. 4 Komo aj aqoqetna tuq exol tzi, qetza oxik jqꞌumaꞌna etetz, owokel qenkix tuq twitz xhchoꞌnal, bꞌix ikxji okyꞌik iktzaꞌx oje tzꞌok eten. 5 Astilji wetz kꞌontiꞌlky ma wiyoj mas, oxik nlajoꞌ te qerman [Timotey] chaꞌol qa tzunx tuq witꞌlik ekꞌuꞌj tiꞌj Qajawil. Wetz nkyinbꞌisun tuq kebal eqet tzꞌaqik tzan te aj njoyon tumeꞌl tzan jqet tzꞌaqik, ikxji chagan-tal te qaqꞌumbꞌena exol.
6 Per ajnaꞌl tulen te Timotey,* otzaj tin jun tpakbꞌalil galan etiꞌj etetz, tiꞌj titzaꞌ etetz witꞌlik ekꞌuꞌj [byenech] tiꞌj Qtata Dios bꞌix titzaꞌ nqet eganiꞌ kye txqꞌanky, bꞌix tzunkix nqotzaj enaꞌoꞌna tukyꞌi jun tkꞌuꞌjlal bꞌix egan tzan qok eten iktzaꞌx qetza qgana tzan etok qen. 7 Astilji waq erman, anke nim bꞌis bꞌix nim xhchoꞌnal nꞌok qena tzani, etetz maꞌtx jaw etin jkꞌuꞌj toklen qchaꞌoꞌna etiꞌj etetz, bꞌan jwert atix tiꞌj jaꞌ witꞌlik ekꞌuꞌj. 8 Ajnaꞌl qetza bꞌaꞌn tzan qanqꞌina tukyꞌi jun chalajbꞌil tzan tpaj etetz jwert atix tukyꞌi Qajawil. 9 Chaꞌoj qxnaqꞌtzan tukyꞌi te Qtata Dios, qetza bꞌan nxik qsiꞌna pixon etiꞌj etetz tzan tpaj nqochalajna nim etiꞌj. 10 Komo nqoxnaqꞌtzana bꞌajqꞌij bꞌix bꞌajaqꞌbꞌil tzan etok qena tzan exik qxnaqꞌtzaꞌna tiꞌj te aj npaltin tzan tel enikyꞌ, tzan eten bꞌan jwert tiꞌj te aj jaꞌ witꞌlik ekꞌuꞌj.
11 Ntons axk-wit te Qtata Dios bꞌix te Qajaw Jesukrist kyeꞌonenxwit qukyꞌila tzan qpona etukyꞌiꞌl qꞌolbꞌel etetz. 12 Bꞌix Qajawil kꞌulunxwit tuj etanim tzan tqet eganiꞌ mas etibꞌ exolx, bꞌix tzan tqet eganiꞌ kyaqil xjal iktzaꞌx qetza nkxqet qganiꞌna, 13 tzajxwit tsiꞌ jun ebalor tuj etanim tzan sten etanim bꞌanꞌax saq tuj twitz Qtata Dios bꞌix twitz te Qajaw Jesus oj tul tetz kyukyꞌi kyaqil kye txqꞌanky aj pawameꞌ aꞌox te tetz.