2
Titzaꞌ Tuq Te Paꞌk Nꞌok Il Nxnaqꞌtzan Tuq Kxol Kye Aj Tesalonk
1 Komo etetz waq erman, etetz etebꞌen kꞌontiꞌl owok chagan aj qxwaꞌqa qꞌolbꞌel etetz, 2 sinoke etetz etebꞌen tbꞌay owok qena twitz xhchoꞌnal bꞌix oꞌok yasoꞌna tuj amaqꞌ Filipos.* Per te Qtata Dios otzaj tsiꞌ jun qbalor* tzan txik qpakbꞌaꞌna exol etetz* te tpakbꞌalil galan anke ateꞌ tuq txqꞌanky xjal nkyeqꞌojin tuq qiꞌja. 3 Komo tumeꞌl titzaꞌ tuq nkxik jkawiꞌna nyaꞌtx iktzaꞌ kꞌontiꞌl-wit tuq qebꞌena te bꞌanꞌax, bꞌix nyaꞌtx tzan tpaj-wit jun nyaꞌtx galan aj nqbꞌisuꞌ, bꞌix nyaꞌtx tzan eqet qeqꞌiꞌna, 4 sinoke [nkxik jkawiꞌna] tzan tpaj owel galan tuj twitz Qtata Dios tzan jkaj tsiꞌna tzan txik qpakbꞌaꞌ te tpakbꞌalil galan. Nxik jqꞌumaꞌna, nyaꞌtx tzan qel galan tuj kywitz kye xjal, sinoke tzan qel galan tuj twitz Qtata Dios aj ntzaj tkaꞌyiꞌ kyaqil tuj qanim.* 5 Etetz etebꞌen qetza kꞌontiꞌl okxꞌok qxmoxoꞌna tukyꞌi qyol bꞌan tbꞌanil, bꞌix kꞌontiꞌl okxqet qeqꞌiꞌna tzan tel qetzaꞌ jun tidiꞌ te etetz aj nꞌel jqꞌajabꞌ tiꞌj; Qtata Dios eꞌel tetz. 6 Bꞌix kꞌontiꞌl oqjoyojna tumeꞌl tzan jqet jiqꞌbꞌaꞌna-wit tzan xjal, ni tzan jqet ejiqꞌbꞌaꞌna-wit etetz, bꞌix ni tzan txqꞌanky. 7 Komo qetza aꞌoꞌna tkyꞌixel Krist, bꞌaꞌn tuq tzan tqet qyekꞌuꞌna qajwalil exol, per nqonabꞌlina tuq etukyꞌiꞌl bꞌan galan iktzaꞌ jun alon aj nkyeqet tkꞌuluꞌ kwent tal. 8 Bꞌan nkxqet qganiꞌna tuq nim, astilji nqochalajna tuq tzan txik qpakbꞌaꞌna te tpakbꞌalil galan aj tzajnaq tukyꞌi Qtata Dios, bꞌix dispwest tuq atoꞌna tzan qipan tuq xhchoꞌnal tzan tok jun galan te etetz.
9 Komo etetz waq erman etebꞌen titzaꞌ tuq qetza nqoꞌaqꞌunana bꞌix nqoꞌok-ilna tuq tzan qanqꞌin; bꞌajqꞌij bꞌix bꞌajaqꞌbꞌil nqoꞌaqꞌunana tuq tzan kꞌon ebꞌisun etetz qiꞌja tzan etonen qukyꞌila, aj man tuq nqopakbꞌaꞌna exol etetz.* 10 Etetz oje tzꞌok eten, bꞌix ax te Qtata Dios tebꞌen, qetza nqobꞌetna tuq exol etetz iktzaꞌ xjal aj pawamoꞌ aꞌox te Qtata Dios, bꞌix bꞌan tumeꞌl nqobꞌetna tuq, kꞌontiꞌl tidiꞌ bꞌaꞌn tzan kyyolin kye xjal qiꞌja titzaꞌ nqobꞌetna tuq exol etetz aj nkxꞌokslan. 11 Etetz etebꞌen titzaꞌ tuq nqoyolina [kyebꞌaꞌ] etukyꞌiꞌl kyukyꞌi junjunchaq exol ekyaqil, iktzaꞌx jun kꞌwaꞌlon tukyꞌi tkꞌwaꞌal, ax ikxji qetza nkxik jkawiꞌna tuq bꞌix nxik qnimsaꞌna tuq ekꞌuꞌj. 12 Kobꞌchaq tuq nxik jqꞌumaꞌna tzan ebꞌet tuj tumeꞌl aj nqet tuj twitz Qtata Dios, te Qtat aj nkxtukꞌleꞌ tzan eten tuj tqꞌabꞌ bꞌix tzan tok eten xhchqitzꞌunal.
13 Ntons astilji qetza kꞌontiꞌl nkaj qsiꞌna tzan txik qsiꞌ pixon te Dios tzan tpaj aj tok echaꞌoꞌ etetz te tpakbꞌalil te Tyol Qtata Dios aj nxik tuq qpakbꞌaꞌna, etetz ekꞌamoj, nyaꞌtx iktzaꞌ aj cha njaw bꞌantikxwit tzan xjal, sinoke iktzaꞌxkix te bꞌanꞌax tqꞌumbꞌen Qtata Dios, te tpakbꞌalil aj nkꞌulun jun galan tuj etanim etetz aj nkxꞌokslanni. 14 Komo etetz waq erman okxꞌok mer iktzaꞌx kye qerman aj tkwentil Judey, aj aꞌeꞌ te Qtata Dios tzan te Kristo Jesus; komo owok eten etetz twitz xhchoꞌnal tzan tpaj kye exjalil iktzaꞌx kyetz owok kyen twitz xhchoꞌnal tzan tpaj kye [kxjalilx] aj tijajil Israel.* 15 Kye aj tijajil Israelni, kyetz oqet kykansaꞌ te Qajaw Jesus, bꞌix ax ebꞌajqet kykansaꞌ kye aj yolil tyol Dios oqtxiꞌ, bꞌix ax qetza oꞌetza kylajoꞌ.* Kyetz kꞌontiꞌl nkyeqet tuj twitz Qtata Dios, bꞌix nkyeqꞌojin kyiꞌj kyaqil xjal. 16 Kꞌontiꞌl nktzoqpiꞌ tzan qpakbꞌan kxol kye aj nyaꞌtx tijajil Israel tzan kykolet, bꞌix ikxji mas njaw kchꞌuqiꞌ te kchoj tiꞌj kyalq. Per ajnaꞌl ikjaꞌn stzaj kyajsik kyetz te xhchoꞌnal tzan tqꞌoj te Qtata Dios.
Aj Tqet Tbꞌisuꞌ Te Paꞌk Tzan Txik Qꞌolbꞌel Kye Aj Tesalonk
17 Qetza waq erman, atoꞌna laqꞌchik etiꞌj nyaꞌtx kyꞌilaꞌj qꞌij, anke kꞌontiꞌl tuq nkxꞌok qena per te qanim atqetkix etukyꞌiꞌl, qetza nqojoyona tuq tumeꞌl tzan qxik qꞌolbꞌel etetz. 18 Astilji oqet qbꞌisuꞌna tzan qxik qꞌolbꞌel etetz, wetz Paꞌk oqet nbꞌisuꞌ kyꞌilaꞌj-el ikxji, per te Satanas tidiꞌchq oqet tkꞌuluꞌ tzan kꞌon qxikna. 19 Per ¿tidiꞌ qiꞌj qetza loꞌik jkꞌuꞌjna? Bꞌix ¿tistil nqochalajna? Bꞌix ¿abꞌl qiꞌj telponx oje tzꞌel galan qaqꞌuna? ¿Nyaꞌtx petzun etiꞌj etetz oqochalajelna chaꞌoj tul te Qajaw Jesus bꞌix chaꞌoj qten twitz tetz? 20 Bꞌanꞌax etiꞌj etetz nqet qjiqꞌbꞌaꞌna qibꞌ bꞌix nqochalajna.