Te Tbꞌay Uꞌj Stzꞌibꞌen Paꞌk Te Timotey
1
Jun Limbꞌil
1 Wetz aꞌin Paꞌk, tkyꞌixel Kristo Jesus tzan tpaj inkaj siꞌ tzan te Qtata Dios aj koloyon qiꞌj bꞌix tzan te Kristo Jesus aj jaꞌ loꞌik jkꞌuꞌj. 2 [Nqet ntzꞌibꞌaꞌ ja uꞌj] te yatz Timotey,* yatz aj [naqe] jun bꞌan nkꞌwaꞌal aꞌich tzan tpaj toklen witꞌlet akꞌuꞌj tiꞌj Krist. Qtata Dios bꞌix te Qajaw Kristo Jesus tzaj ksiꞌxwit awajsik jun nim bꞌan galan bꞌix tzꞌokxwit loꞌet kykꞌuꞌj awiꞌj bꞌix qet kchewsaꞌxwit akꞌuꞌj.
A Tgan Tzan Tok Qsiꞌ Qnabꞌl Tiꞌj Te Xnaqꞌtzbꞌilj Aj Nyaꞌtx Bꞌanꞌax
3 Ntons aj ikjaꞌn tuq nxik tuj Masedony, wetz oxik nqꞌumaꞌ tzan akaj amaqꞌ Efeso tzan txik aqꞌumaꞌ kye junjun xjal tzi tzan kꞌon txik kxnaqꞌtzaꞌ junky xnaqꞌtzbꞌilj aj nyaꞌtx bꞌanꞌax. 4 Ax tzan txik aqꞌumaꞌ tzan kꞌon tok ksiꞌ kywiꞌ tiꞌj tidiꞌchq aj cha nqet kximaꞌ qatzun tiꞌj tidiꞌchq aj cha nkyewululun tiꞌj qijajil oqtxiꞌ. Tzan tpaj nini cha mas nkyewululun bꞌix kꞌontiꞌl nꞌoken te nini tzan qbꞌet tuj tumeꞌl witꞌlik jkꞌuꞌj tiꞌj Qtata Dios iktzaꞌ tetz tgan. 5 Wetz nxik nqꞌumaꞌ ntzani tzan tqet kyganiꞌ kyibꞌx tukyꞌi jun kyanim bꞌan saq bꞌix kꞌontiꞌl tidiꞌ nyolin tuj kyanim, bꞌix witꞌlik kykꞌuꞌj tukyꞌi jun tkꞌuꞌjlal bꞌan bꞌanꞌax tiꞌj te Qajawil.
6 Junjun oje kaj kykolaꞌ tzan kykꞌulun ikxji. Oje kaj kykolaꞌ te bꞌanꞌax, cha nkyewululun tiꞌj jun tidiꞌ aj kꞌontiꞌl token. 7 Kyetz kygan tzan kyok xnaqꞌtzal te Kawbꞌil per kꞌontiꞌl nꞌel kynikyꞌ tiꞌj aj nxik kyqꞌumaꞌ, ni tiꞌj aj nxik kxnaqꞌtzaꞌ aj kyetz tuj kynabꞌl bꞌanꞌax.
8 Komo qetz qebꞌenky te Kawbꞌil galan per qa nꞌoken iktzaꞌxkix tkajlen swaꞌ. 9 A tgan tzan stzaj qnaꞌoꞌ, te Kawbꞌil kꞌontiꞌl okaj swaꞌ kye xjal aj nkyebꞌet tuj tumeꞌl, sinoke okaj swaꞌ kye xjal aj iktzaꞌ ja ntzanijeꞌ: kye aj kꞌon kygan okslan, kye aj tidiꞌchq nkyekꞌulun, kye aj kꞌontiꞌl Dios tuj kywitz, kye aj chimol choj, kye aj kꞌontiꞌl nqet kxjaniꞌ Dios, kye aj nkyexmayin tiꞌj Dios, kye aj nkyekansan kytat bꞌix kynan, kye kyaqil aj kansal xjal, 10 kye aj nkyekꞌajajin, kye aj xhqꞌe-eꞌ, kye aj nxik kyeqꞌiꞌ xjal alajwers tzan kxik kykꞌayiꞌ, kye aj cha pur laꞌj-eꞌ, kye aj nxik ksiꞌ kyjurament per nyaꞌtx bꞌanꞌax kyitzaꞌ, bꞌix kye aj nqet kyyoliꞌ tidiꞌchq nyaꞌtx galan tiꞌj te galan aj nxik qxnaqꞌtzaꞌ. 11 Te qxnaqꞌtzbꞌil tzajnaq tiꞌj te aj bꞌan tbꞌanil tpakbꞌalil galan aj nyolin tiꞌj te Qtata Dios aj nqet qnaꞌoꞌ bꞌix inkaj siꞌ wetz tzan txik npakbꞌaꞌ te nini.
Te Paꞌk Nxik Tsiꞌ Pixon Te Qtata Dios Tqetlen Koloꞌ
12 Wetz nxik nsiꞌ pixon te Qajaw Kristo Jesus aj ntzaj tsiꞌ nbalor, bꞌix okaj loꞌlet tkꞌuꞌj wiꞌj bꞌix inkaj tsiꞌ tzan waqꞌunan te tetz. 13 Anke wetz oqtxiꞌ nꞌel wikꞌoꞌ tuq tetz, bꞌix eꞌok nqꞌojiꞌ kye aj nkyexnaqꞌtzan tuq tiꞌj bꞌix tiꞌchq nyaꞌtx galan nqet nkꞌuluꞌ tuq kyiꞌj,* anke ikxji tuq nkyinkꞌulun, tetz owok loꞌet tkꞌuꞌj wiꞌj tzan tpaj kꞌontiꞌl tuq webꞌen aj nkꞌuluꞌ bꞌix minaꞌ tuq wokslan tiꞌj. 14 Per tetz otzaj tsiꞌ wajsik jun nim bꞌan galan aj kꞌontiꞌl nwajoꞌ, otzaj tsiꞌ tzan tok witꞌlet nkꞌuꞌj tiꞌj, bꞌix tzan tok weꞌeꞌ titzaꞌ tetz nim nkyinqet tganiꞌ. 15 Ja yol ntzani bꞌanꞌax bꞌix a tgan tzan txik kyokslaꞌ kyaqil xjal ikxjani: “Te Kristo Jesus owul tzani twitz txꞌoꞌtxꞌ kolol kye chimol choj.” Bꞌix aꞌin wetz te tbꞌay aj mas nim nchoj. 16 Astilji owok loꞌet tkꞌuꞌj wiꞌj, tzan tyekꞌun kyaqil tpasens wukyꞌiꞌl, komo aꞌin wetz te aj bꞌan pyor kxol kye txqꞌanky, bꞌix ikxji tzan tnimsan kykꞌuꞌj kye txqꞌanky aj okyeꞌokslayon tiꞌj tzan kyanqꞌin te jun-eleꞌx. 17 ¡Intqet jiqꞌbꞌaꞌxwit te jun-eleꞌx! A tetz te twitzaleꞌ aj kꞌontiꞌl nmankun tajwalil bꞌix aj kꞌontiꞌl nkamik, tetz aj kꞌontiꞌl ebꞌajil, bꞌix kꞌontiꞌl junky iktzaꞌ tetz. ¡Intqet jiqꞌbꞌaꞌxwit bꞌix kyeyolinxwit galan tiꞌj tajwalil tuj kyaqil tyemp te jun-eleꞌx!
18 Nxik nqꞌumaꞌ yatz ntzani nkꞌajol Timotey, parej iktzaꞌxkix aj oxik qꞌumaꞌ yatz tzan kye aj yolil tyol Dios. Paqꞌojin tiꞌj te aj nyaꞌtx galan tukyꞌi jun tumeꞌl galan tuj twitz te Qtata Dios. 19 Kꞌon kaj asiꞌ tzan tok witꞌlet akꞌuꞌj tiꞌj te Qtat, bꞌix kꞌon chkꞌulun jun tidiꞌ qa te awanim ntyoliꞌ nyaꞌtx galan. Komo ateꞌ junjun oje kaj kykolaꞌ aj jaꞌ witꞌlik tuq kykꞌuꞌj bꞌix ikxji opon kynajsaꞌ aj nkyokslaꞌ tuq. 20 Aj ntzanijeꞌ a te Iméneo bꞌix te Jant. Wetz cha ekaj ntzoqpiꞌ tuj tqꞌabꞌ Satanas tzan tox tuj kywiꞌ tzan kꞌon kykꞌulun nyaꞌtx galan tiꞌj Qtata Dios.