3
A Tgan Tzan Qxnaqꞌtzan Kyiꞌj Kye Aj Nkyepakbꞌan Tyol Qtata Dios Jaꞌchq
1 Ajnaꞌl waq erman, ngan tzan txik nqꞌumaꞌ etetz tzan exnaqꞌtzan chꞌin qiꞌja tzan txik pakbꞌlet te tpakbꞌalil tiꞌj Qajaw Jesukrist tuj kyaqil amaqꞌ bꞌix tzan tqet kyjiqꞌbꞌaꞌ iktzaꞌ okyꞌik exol etetz. 2 Bꞌix peꞌexnaqꞌtzan chꞌin qiꞌja tzan jkoletna tuj kyqꞌabꞌ kye xjal aj nyaꞌtx galan kyenabꞌlin bꞌix aj pur nyaꞌtx galan nkybꞌisuꞌ, komo nyaꞌtx kyaqil xjal nꞌok witꞌlet kykꞌuꞌj tiꞌj Qtata Dios. 3 Per yatzun te Qtata Dios, tetz jun yolin bꞌix otkꞌuluꞌtz tzan eten jwert bꞌix okxtkoloꞌtz tiꞌj kyaqil aj nyaꞌtx galan. 4 Qetza witꞌlik jkꞌuꞌj tiꞌj Qajawil etetz nlay kaj esiꞌ tzan tqet ekꞌuluꞌ kyaqil aj maꞌtx xik jqꞌumaꞌna etetzni. 5 Qajaw tzꞌonenxwit etiꞌj tzan kyqet eganiꞌ txqꞌanky iktzaꞌ te Qtata Dios nkyeqet tganiꞌ, bꞌix tzan txik tsiꞌ ebalor tzan etipan te xhchoꞌnal iktzaꞌx te Krist otipaj te xhchoꞌnal.
Nyaꞌtx Galan Tzan Qok Kyꞌaj
6 Waq erman, qetza qgana tzan txik jqꞌumaꞌna etetz iktzaꞌ tkyꞌixel Qajaw Jesukrist aꞌoꞌna, tzan tel epawaꞌ etibꞌ kyiꞌj kye qerman aj kꞌon kygan aqꞌunan bꞌix kꞌontiꞌl nkyeꞌaqꞌunan iktzaꞌx aj oxik qxnaqꞌtzaꞌna etetz. 7 Etetz etebꞌen titzaꞌ presis tzan tel etin qiꞌja. Komo qetza kꞌontiꞌl obꞌetna exol aj cha-wit nqokyꞌajina, 8 bꞌix kꞌontiꞌl oxik qwaꞌaꞌna jun qweꞌ tjay jun aj cha-wit jkotzijna, sinoke bꞌajqꞌij bꞌix bꞌajaqꞌbꞌil nqoꞌaqꞌunana tuq tzan kꞌon qokna cha te ekꞌaꞌchbꞌeꞌtz.* 9 Bꞌanꞌax qetza at qoklena tzan txik jqꞌumaꞌna tuq etetz tzan qokna etoneꞌ, per qetza oꞌaqꞌunana nim tzan tok eten tuq qiꞌja titzaꞌ tuq nqoꞌaqꞌunan tzan tel etin tuq etetz ikxji. 10 Aj aqoqet tuq exol nxik jqꞌumaꞌna tuq etetz ikxjani. Abꞌl aj kꞌon tgan aqꞌunan, ax kꞌontiꞌl tzan twaꞌan.
11 Per ajnaꞌl qchabꞌenkyna, ateꞌ junjun exol kꞌontiꞌl nkyeꞌaqꞌunan, kꞌontiꞌl nkyekꞌulun chꞌinwt, cha nꞌox ksamoꞌqet kyibꞌ aj jaꞌ kꞌontiꞌl kyoklen. 12 Qetza tukyꞌi tbꞌi Qajaw Jesukrist nxik jqꞌumaꞌna bꞌix nkyexik jkawiꞌna kye aj xjal ikxji tzan kyaqꞌunan galan tzan kywaꞌan tukyꞌi kyaqꞌumbꞌenx. 13 Bꞌix etetz waq erman, kꞌon kxsiktik tzan ekꞌulun te tumeꞌl galan.*
14 Qa at abꞌl aj kꞌontiꞌl nqet tokslaꞌ aj nxik jqꞌumaꞌna tuj ja uꞌjni, intok esiꞌ enabꞌl tiꞌj bꞌix ya kꞌonky tzꞌok ejunchꞌiꞌ etibꞌ tukyꞌiꞌl tzan tqet kyꞌixwik chꞌin. 15 Per kꞌon qet eten iktzaꞌ etajqꞌoj sinoke intxik ekawiꞌ iktzaꞌx jun eterman.
Jun Kawbꞌil
16 Ntons Qtata Dios aj nchewsan jkꞌuꞌj, qet xhchewsaꞌxwit etetz ekꞌuꞌj bꞌajqꞌij tiꞌj kyaqil. Qajaw qet tenxwit etukyꞌiꞌl tzi.