2
Te Xjal Chimol Choj Tajqꞌoj Dios
1 Bwen, ajnaꞌl waq erman, qetza qgana tzan txik jqꞌumaꞌna etetz titzaꞌ oj tul te Qajaw Jesukrist bꞌix titzaꞌ okyꞌel oj qok xhchimoꞌ tukyꞌiꞌl.* 2 Kꞌon etzoqpij tzan eqet eqꞌiꞌ tzan nijunwt, kꞌon jaw ekyꞌixpuꞌ titzaꞌ nkxbꞌisun etetz tiꞌj nini, bꞌix kꞌon kxobꞌ qa at jun tpakbꞌalil iktzeꞌxtzun tzan te Txew Dios per nyaꞌtx, qatzun ekꞌamoꞌtz jun uꞌj iktzeꞌxtzun qtzꞌibꞌena qetza aj jaꞌ nyolin maꞌtx pon te qꞌij tzan tul te Qajaw Jesukrist. 3 Kꞌon kxqet moyiꞌ tzan nijunwt tiꞌj titzaꞌ owulel te Qajawil. Tetz nlay tzul qa minaꞌ tpon jun tyemp aj bꞌan kyꞌilaꞌj xjal okajel kykolaꞌ tzan kyokslan, bꞌix qa minaꞌ tuq tul te Chimol Choj Tajqꞌoj Qtata Dios, aj okaj siꞌkix tzan txik tuj te nim qꞌaqꞌ. 4 Tetz oqꞌojiyon tiꞌj kyaqil tidiꞌchq aj nꞌok qꞌumaꞌ dios tzan kye xjal, bꞌix oqtel tjiqꞌbꞌaꞌ tibꞌ tiꞌj kyaqil nini bꞌix tiꞌj kyaqil tidiꞌchq aj ntzaj kynaꞌoꞌ kye xjal, bꞌix tetz owokex witꞌlet tuj te Nin Jay Nabꞌil Qtata Dios bꞌix otqꞌumaꞌtz a tetz Dios.* 5 ¿Kꞌontiꞌl petzun naꞌik etitzaꞌ aj txik nqꞌumaꞌ etetz kyaqil ntzani aj akyinqet tuq exol tzi? 6 Etetz etebꞌen tidiꞌ kꞌontiꞌl ntzoqpin tetz ajnaꞌl sinoke max oj tpon or tetz. 7 Oje tzꞌaqꞌik te aj nyaꞌtx galan aj kꞌontiꞌl nꞌel kynikyꞌ kye xjal tiꞌj, cha aꞌox at jun aj tzunx kꞌontiꞌl ntzoqpin tetz ajnaꞌl, sinoke max oj tel in te aj tzyul tetz. 8 Ntons maxji owokel qen te Tajqꞌoj Qtata Dios, bꞌix tetz owokel ten jun xhchoꞌnal aj ni nlay ponaja tzan tpaj chaꞌoj tul te Qajaw Jesukrist, tetz owokel tsiꞌ te aj xhchoꞌnal tiꞌj cha tukyꞌi tyol aj oxeꞌl tqꞌumaꞌ tukyꞌi tajwalil bꞌix tzan tpaj te xhchqitzꞌunal.* 9 Te Tajqꞌoj Qtata Dios aj tzulni, tetz cha lajoꞌ tzan te Satanas, bꞌix tzul tukyꞌi nim tajwalil bꞌix oqtel tkꞌuluꞌ tiꞌchq yekꞌbꞌil aj at tidiꞌ telponx bꞌix tidiꞌchq aj okyelabꞌayon kye xjal tiꞌj, per te aj oxeꞌl tyoliꞌ nyaꞌtx bꞌanꞌax.* 10 Bꞌix oqtel tkꞌuluꞌ tidiꞌchq nyaꞌtx galan tzan kyqet teqꞌiꞌ kye aj okyepoyonaj tzan tpaj kꞌontiꞌl oqet tuj kywitz tzan tqet kyganiꞌ te bꞌanꞌax aj bꞌaꞌn tuq tzan tkolon kyiꞌj. 11 Astilji te Qtata Dios nstzoqpiꞌ tzan kyqet eqꞌiꞌ tzan te nyaꞌtx galan bꞌix tzan kyokslan tiꞌj te aj nyaꞌtx bꞌanꞌax. 12 Ikxji tzan kxik siꞌ tuj il kyaqil kye aj kꞌontiꞌl nkyeꞌokslan te bꞌanꞌax sinoke cha echalaj tiꞌj te nyaꞌtx galan.
13 Per yatzun etiꞌj etetz waq erman, qetza kꞌontiꞌlkix tzan tkaj qsiꞌ tzan txik qsiꞌna pixon te Qtata Dios etiꞌj etetz aj ganimix nim tzan te Qajawil. Komo te Qtata Dios okxꞌel tjoyoꞌ tzan etok etetz kye tbꞌay tzan ekolet titzaꞌ, bꞌix okxkolet titzaꞌ tzan tpaj te Txew Dios owel tsjapunsaꞌ tiꞌj etanim bꞌix etetz owok ewitꞌbꞌaꞌ ekꞌuꞌj tiꞌj te tpakbꞌalil bꞌanꞌax. 14 Tzan tpaj ntzani te Qtata Dios okxtzaj tukꞌleꞌ txiklen qpakbꞌaꞌna te tpakbꞌalil tiꞌj te tumeꞌl titzaꞌ nqokolet, bꞌix oqet tkꞌuluꞌ ikxji tzan tok eten etetz te xhchqitzꞌunal Qajaw Jesukrist. 15 Astilji waq erman, peꞌeten waq jwert bꞌix kꞌon tzꞌaj enajsaꞌ tiꞌj etanim te xnaqꞌtzbꞌilj aj oxik qxnaqꞌtzaꞌna etetz, aj oxik qyoliꞌna etetz qatzun aj oqet qtzꞌibꞌaꞌna te etetzji.*
16 Ntons [nkyinxnaqꞌtzan] tukyꞌi Qajaw Jesukrist bꞌix tukyꞌi Qtata Dios aj nqoqet tganiꞌ bꞌix aj oje tzaj tnimsaꞌ jkꞌuꞌj te jun-eleꞌx bꞌix aj oje tzaj tsiꞌ jaꞌ tzan tkaj loꞌet jkꞌuꞌj tzan tpaj nim bꞌan galan nabꞌlin anke kꞌontiꞌl nqajoꞌ; 17 [nkyinxnaqꞌtzan tukyꞌiꞌl tzan] tnimsan ekꞌuꞌj bꞌix tzan kykꞌulun tzan tel galan kyaqil aj oxeꞌl eqꞌumaꞌ bꞌix kyaqil aj oqtel ekꞌuluꞌ.